KU YENTXA VADONDZRISIWA
DONDZRO 11
Ku Nabyalisa
Nsinya wa nawu: ‘Tizrisa mazritu lawa swi nabyalaka ku ma twisisa.’—1 Kor. 14:9.
Leswi Yesu A Swi Yentxiki
1. Hlalela VHIDIYU, kumbe u dondzra Matewu 6:25-27, u gama u hlamula swivutiso leswi landzrelaka:
Yesu a yi fananise na yini ndlela leyi Yehovha a hi hlayisaka ha yone?
Yesu a a tiva mintxhumu yinyingi mayelanu ni tinyanyana, kambe he wini ntxhumu wun’we lowu a bekiki miyanakanyu ka wone? Ha yini leyo yi ve ndlela leyinene ya ku dondzrisa?
Hi Dondzra Yini Ka Xikombiso Xa Yesu?
2. Loko hi dondzrisa hi ndlela ya ku nabyala, a vhanu va ta swi kota ku dzrimukela leswi va swi dondzrisiki nakone hi ta kota ku khumba timbilu tavu.
Yetisela Yesu
3. U nga vulavuli ku tlula mpimu. A matsrhan’wini ya kuva u mu byela dzrungula hinkwadzru mayelanu ni mhaka ya kukazri, beka miyanakanyu yaku ka dzrungula ledzri kumekaka ka buku ledzri mi dzri tizrisaka ku dondzra ha dzrone. Ntsrhaku ka loko u hambe xivutiso yimela nhlamulo nakone lehisa mbilu. Loko a nga yi tivi nhlamulo kumbe a hlaya ntxhumu lowu nga fambisaniki ni leswi Bibele dzri swi dondzrisaka, mu hambe swivutiso leswi yengetelekiki akuva u mu pfuna ku yanakanyisisa hi mhaka. Loko a yi twisisile yinhla, khalutani mi ya ka leyi landzrelaka.
4. Pfuna xidondzro xaku akuva xi vona ku yelana loku nga kone ka tidondzro letimpshwa ni leswi xi swi tivaka. Hi xikombiso, na mi nga si na sungula dondzro leyi khanelaka hi ku pfuka ka vafi u nga pfuxetanyana na yene mhaka leyi khanelaka hi xiyimu xa vafi.
5. Tiva ku tizrisa swifaniso. Na u nga si na tizrisa xifaniso xa kukazri, tivutise:
‘Xana xifaniso lexi xa nabyala?’
‘Xana lweyi ni dondzraka na yene a ta xi twisisa hi ku nabyala?’
‘Xana xi ta pfuna lweyi ni dondzraka na yene kuva a dzrimuka yinhla—ku nga li ntsena xifaniso?’