XIYENGETELO C

Ndlela Ya Ku Fambisa Swidondzro Swa Bibele Hi Ku Tizrisa Buku Ledzri Liki Hanya Hi Ku Nyonxa Hi La Ku Nga Helikiki!

Hanya Hi Ku Nyonxa Hi La Ku Nga Helikiki! i buku ledzri hambiwiki hansi ka swikhongoto swinyingi ni wukambisisi byinyingi. Akuva u ta kota ku tizrisa ha hombe buku ledzri, tizrisa yentxela ledzri landzrelaka loko u djula ku fambisa xidondzro:

Na u nga si na fambisa xidondzro

1. Tilulamiseli ha hombe. Loko u li ku tilulamiseleni, yanakanya hi swivileleko, swiyimu ni mavonela ya lweyi u dondzraka na yene. Dzringisa ku vona tinhla leti nga mu kazratelaka ku ti twisisa kumbe ku ti tizrisa. Yanakanyisisa hi ndlela leyi dzrungula ledzri kumekaka ka xiyenge lexi liki “Handzrisisa” dzri nga pfunaka ha yone lweyi u dondzraka na yene, tiyimiseli ku swi tizrisa nkama lowu dondzro yi yaka yi famba, loko swi vileleka.

Loko u fambisa xidondzro

2. Sungula u tlhela u gama hi xikhongoto, loko lweyi u dondzraka na yene a ku pfumelela.
3. Tingawula ku vulavula ngopfu. Beka miyanakanyu ka dzrungula ledzri mi dondzraka dzrone nakone pfuna lweyi u dondzraka na yene akuva a vulavula na a ntsrhunxekile.
4. Loko u sungula xiyenge ha xin’we ka leswa mune, dondzra lani ku liki leswi taka dondzriwa u gama u khanela hi tinhlokomhaka ti nga li tingani ta xiyenge lexo
5. Loko mi heta xiyenge ha xin’we ka leswa mune, tizrisa lani ku liki mpfuxeto akuva u pfuna lweyi u dondzraka na yene leswaku a dzrimuka mintiyiso leyi a yi dondzriki
6. Akuva u kambisisa dondzro yin’wana ni yin’wana ni lweyi u dondzraka na yene, yentxa leswi:
1. Dondzrani mayava.
2. Dondzrani matsralwa hinkwawu ya Bibele lawa ma nga ni zritu ledzri liki “Dondzra”.
3. Loko swi vileleka dondzrani matsralwa man’wana lawa ma tsrhahiwiki.
4. Hlalelani mavhidiyu hinkwawu lawa ku buyaka swa ku “Vonani VHIDIYU” (loko swi koteka).
5. Mu hambi swivutiso hinkwaswu leswi kongomaka yene.
6. Mu kombi mufoto lowu kumekaka ka xiyenge lexi liki “Kelisisa” u gama u mu kombela kuva a wu tlhamuxela.
7. Tizrisa bokisi ledzri liki “Lwela leswi” akuva u pfuna lweyi u dondzraka na yene leswaku a vona nhluvuku wake. U nga ha mu kutxa ku tlhaselela kungu ledzri nyikeliwiki, ku tlhaselela makungu man’wana kumbe hinkwaswu.
8. Vutisa lweyi u dondzraka na yene leswaku a nkama na a lulamisela a nga va na a zrandzre nhlokomhaka ya kukazri kumbe vhidiyu ka xiyenge lexi liki “Handzrisisa”.
9. Zama ku heta dondzro hinkwayu hi khambi ledzri mi yi sungulaka ha dzrone.

Ntsrhaku ka xidondzro

7. Tama u yanakanya hi lweyi u dondzraka na yene. Khongota u kombela Yehovha leswaku a tovokisa nhluvuku wake nakone kombela wutlhazri akuva u kota ku mu pfuna hi lani swi djulekaka ha kone.