KU HANYA SWANGA VAKRISTE

Tizrisa Xibukwana Ni Buku Ledzri Liki Hanya Hi Ku Nyonxa Hi La Ku Nga Helikiki! A Nsin’wini

Swa nyonxisa ku va ni xibukwana ni buku ledzrimpswha akuva hi fambisa swidondzro swa Bibele ha swone! Hi khongota leswaku Yehovha a tovokisa minzamu hinkwayu ya ku yentxa vadondzrisiwa. (Mt 28:18-20; 1Ko 3:6-9) Kutani hi ta ma tizrisisa kuyini mabuku lawa?

Ndlela leyi hi taka fambisa swidondzro swa Bibele ha yone hi ku tizrisa mabuku lawa, yi hambanile ni ndlela leyi a hi yi tolovelile. Leswi landzrelaka swi nga ku pfuna kuva u tilulamisela ku fambisa swidondzro swa Bibele:a

Dondzra nhlokomhaka hinkwayu u gama u hamba swivutiso leswi u taka swi tizrisa loko u bulisana ni lweyi u dondzraka na yene
Dondzrani tindzrimana leti tsraliwiki leswaku “Dondzrani”, u va u pfuna lweyi u dondzraka na yene Bibele kuva a twisisa yinhla
Txhaya ma-vídeo u gama u tizrisa swivutiso akuva mi bulisana ha wone
Dzringisani ku heta nhlokomhaka ka xidondzro xin’wana ni xin’wana

Loko u li nsin’wini, zranga hi ku nyikela xibukwana akuva u vona leswaku hakunene awa swi djula ku dondzra kumbe im-him. (Vona bokisi ledzri liki “u nga xi nyikelisa kuyini xibukwana lexi liki Hanya Hi Ku Nyonxa Hi La Ku Nga Helikiki! Ka liyendzro dzra ku sungula” ka tluka 16.) Loko u heta xibukwana hinkwaxu na lweyi u dondzraka na yene a ha djula ku tama a dondzra, mu nyiki buku mi va mi sungula ka xidondzro 4. Loko a li leswaku wa ha dondzra ni mhunu hi ku tizrisa mabuku man’wana lawa hi dondzrisaka vhanu ha wone, u ta yentxa yini? Ntxintxa buku kutani mi dondzra hi buku ledzri liki Hanya Hi Ku Nyonxa Hi La Ku Nga Helikiki! A swi sindzrisi kuva mi sungulisa buku. Hlawula xidondzro xa kukazri hi ku ya hi nhluvuku wa lweyi u dondzraka na yene Bibele mi va mi sungulela kolanu.

Vatekani vola va van’we va tizrisaka buku ledzri liki “Hanya Hi Ku Nyonxa Hi La Ku Nga Helikiki!” akuva va fambisa xidondzro xa Bibele ni wanuna wa kukazri a kaya kwake.

HLALELANI VÍDEO LEDZRI LIKI HA KU HOYOZELA KA DONDZRO YAKU YA BIBELE, MI GAMA MI HLAMULA SWIVUTISO LESWI LANDZRELAKA:

I yini leswi lava hi dondzraka na vone Bibele va taka swi dondzra ka buku ledzrimpswha?
Ha yini swi li swa lisima ku kombisa ma-vídeo ka lava hi dondzraka na vone?
U fanela ku pfuna lweyi u dondzraka na yene Bibele ku kuma yini ni ku lwela ku tlhasela yini? —Vona bokisi ledzri liki “Nkatsrakanyu Wa Swiyenge Swa Buku” ka tluka 16

a Xiya: U nga hlawula leswaku u ta xi tizrisa xiyenge lexi liki “Handzrisisa” kumbe im-him, kambe nkama lowu u lulamiselaka tinyiki nkama wa ku dondzra ni ku hlalela ma-vídeo ya xiyenge lexo. Kutani leswo swi ta ku pfuna ku vona leswaku a mhaka leyo yi ta pfuna lweyi u dondzraka na yene kumbe im-him. A xibukwana ni buku swi nga ka internet swi ni malink lama nga ni ma-vídeo ni mabuku man’wana.

Nkatsrakanyu Wa Swiyenge Swa Buku
	SWIDONDZRO	LESWI U TAKA SWI DONDZRA	LESWI XIDONDZRANA XI FANELAKA KU SWI LWELA
1	01-12	Vona ndlela leyi Bibele dzri nga ku pfunaka ha yone ni ndlela leyi u nga tivaka mutsrali wa dzrone ha yone	Kutxa xidondzrana akuva xi dondzra Bibele, xi lulamisela dondzro ni kuva xi sungula ku ya mintlhanganwini
2	13-33	Vona leswi Xikwembu Nkulukumba a hi yentxelaka swone ni leswi hi faneliki ku swi yentxa akuva a yamukela wugandzreli byezru	Pfuna xidondzrana akuva xi byela vambeni hi mintiyiso leyi xi yi dondzraka ni kuva xi va muzrezri
3	34-47	Dondzra leswaku hi nga yentxa yini akuva hi nyonxisa Xikwembu Nkulukumba	Xi kutxe kuva xi teka xiboho xa ku tinyiketela ka Yehovha xi va xi babatisiwa
4	48-60	Vona leswaku u nga tama u va a lizrandzrwini dzra Xikwembu Nkulukumba hi ndlela yini	Xi pfune akuva xi hambanisa leswi lulamiki ni leswi bihiki ka Yehovha ni kuva xi hluvuka hi tlhelo dzra moya

**U NGA XI NYIKELISA KUYINI XIBUKWANA LEXI LIKI HANYA HI KU NYONXA HI LA KU NGA HELIKIKI! KA LIYENDZRO DZRA KU SUNGULA**

A xibukwana lexi liki Hanya Hi Ku Nyonxa Hi La Ku Nga Helikiki! xi fana ni swipapelana, ka tluka dzra wugamu u ta kuma xivutiso lexi nyonxisaka akuva u sungula mabulu. Dzringisa ku yentxa leswi landzrelaka:

Hamba xivutiso u gama u mu komba tinhlamulo leti nga ka xibukwana kuva a hlawula yin’we
Dondzra Bibele ka Amapsalma 37:29
Bulani hi tinhla ti nga hansi ka xinhlokwanamhaka lexi liki “Ndlela Leyi Ku Tiva Leswo Swi Nga Ku Pfunaka Ha Yone”. Loko n’winyi wa muti a kombisa ku nyonxela, dondzrani tindzrimana mi gama mi bula hi mifoto.
Byela n’winyi wa muti leswaku u nga mu hlamula xivutiso xi nga wugan’wini ka tluka u gama u mu komba ndlela leyi xidondzro xa Bibele xi fambisiwaka ha yone hi ku tizrisa xidondzro xa ku sungula