Loko U Li Ni Mavabyi Lamakulu

“Loko dotori a ni byele leswaku ni ni xilondzra xa ku kala xi nga daheki ka phaphu ni ka zrumbu, ni pimise leswaku ni ta fa. Kambe loko ni muke kaya ni tibyele leswi: ‘Ina, a hi swone leswi a ni swi yimelile, kambe ni fanela ku djula ndlela ya ku langusana ni mavabyi yanga.’”—Linda, lwa nga ni 71 wa malembe.

“Ni xanisiwa hi mavabyi ya ku kazrata lawa ma baka tlhelo dzra ximantsri dzra wuso byanga. Minkama yimbeni ni yingela ku vavisa swinene lakakuva ni khomiwa hi gome. Minkama yinyingi a ni ni xivundzra lakakuva a ni navela ni ku tisunga.”—Elise, lwa nga ni 49 wa malembe.

Wanuna lweyi a vabyaka a nga ka xitsrhamu xa lava ku limala na a li ni vazrandzriwa vakwe

LOKO u gungule leswaku wene kumbe mhunu lweyi u mu zrandzraka a ni mavabyi lamakulu, wa swi tiva leswi swi kazratisaka xiswone. Handle ka mavabyi ntsena, swi nga ha djula ku lwa ni ku txhava ni ku hlatiyela. Lexi nga yengetelaka ku txhava ni ku hlatiyela loku a nga va ku tsrhamela ku ya xipiritana, ku pfumaleka ka muzri kumbe mali ya ku wu xava, kumbe kuva muzri wu ku vangela swin’wana. Nhlomulo lowu vangiwaka hi mavabyi lamakulu wu nga ku yentxa u sala u nga xi tivi ni xa ku xi yentxa.

Xana hi nga wu kuma kwini mpfunu? Vanyingi va kume leswaku leswi pfunaka ngopfu i ku khongota ka Xikwembu Nkulukumba ni ku dondzra tindzrimana ta Bibele leti txhavelelaka. Xin’wana xi nga hi pfunaka hi loko maxaka ni vanghanu va hi seketela va tlhela va hi komba lizrandzru.

LESWI VAN’WANA VA SWI YENTXIKI KA XIYIMU LEXI

Robert, lweyi a nga ni 58 wa malembe, a li: “A lipfumelo dzraku ka Xikwembu Nkulukumba dzri ta ku pfuna ku lwisana ni mavabyi. Khongota ka Yehovha, u mu byela hinkwasu leswi u swi twaka. Mu kombele a ku nyika moya wa ku xwenga. Mu kombele a ku tiyisa nhlana akuva u nga godolisi ndangu waku kambe u kota ku tiyisela nkama hinkwawu.”

Robert a yengesela a ku: “Swi nyonxisa swinene loko ndangu waku wu ku nyika ntamu ni loko u tiva leswaku nkama hinkwawu wu na wene. Siku ni siku va ni fonela va ni pfuxela va ku: ‘Swo yini?’ Handle ka vone, vanghanu va mimbangu ya ku siyana-siyana na vone va ni nyika ntamu. Leswo swi ni pfuna ku tama ni tiyiselela mavabyi.”

Loko u ya pfuxela munghanu lweyi a vabyaka, twana leswi Linda a swi hlayaka: “Leswi lweyi a vabyaka a swi djulaka ngopfu i ku hanya ku fana ni vambeni. A nga swi djuli ku tsrhama hi ku bula hi mavabyi yakwe. Xileswo, bula naye hi mintxhumu ya ntolovelo.”

Loko hi kuma ntamu lowu taka hi ka Yehovha ni ntxhavelelo lowu nga Matsralweni, hi va hi seketeliwa hi maxaka ni vanghanu lava nga ni lizrandzru, hi nga dumba leswaku swa ha siza ku tama hi hanya, nambi loko hi lwisana ni mavabyi lamakulu.

Tindzrimana Ta Bibele Leti Nga Ku Pfunaka

Tsrutsrumela ka Xikwembu Nkulukumba.

‘Ndzri djulile Yehovha, kutani a ndzri yangulile, a ndzri huluxile a ku txhaveni kwanga hinkwaku. A muxaniseki lweyi a khongotile, kutani Yehovha a mu yingela.’—Amapsalma 34:4, 6.

Linda, lweyi hi khaneliki ha yene ku sunguleni, a li: “A ni nga khongoti ni ku: ‘Ni dahe’. Kambe minkama hinkwayu a ni khongota ni ku: ‘Ni pfune ku va ni tiya ni tiyiselela mavabyi yanga.’”

Kuma ntxhavelelo ka Zritu dzra Xikwembu Nkulukumba.

‘Ku nga vi na muyaki lwa taka ku: Ndzra vabya.’—Ezaya 33:24.

Yanakanyisisa hi swidumbiso swa Xikwembu Nkulukumba mayelanu ni wumundzruku. Leswo swi ta ku tiyisa lipfumelo, xileswo u ta va ni ntamu wa ku langusana ni mavabyi.

Kombela va ndangu waku ni vanghanu leswaku va ku pfuna.

‘A nakulobye wa mhunu awa mu zrandzra hi masiku; I makwavu a makhombyeni.’—Amaproverbia 17:17.

Elise, lwe hi khaneliki ha yene ku sunguleni, a li: “U nga tsrhami hi le kule. Tsrhika vanghanu vaku va ku pfuna. Nambi loko minkama yimbeni u titwa na u li wuswaku u tlhela u vona ingiki Xikwembu Nkulukumba a nga na mhaka na wene, u nga tsrhami hi le kule.”