Xana Bibele Dzri Nga Ni Pfuna Ku Hanya Ni Mavabyi Lama Nga Dahekiki?

Nhlamulo Ya Bibele

Ina. Xikwembu Nkulukumba awa zron’weka hi malandzra yakwe lama vabyaka. Loko Bibele dzri vulavula hi nandzra wa ku dumbeka, dzri li: ‘Yehovha a ta mu pfuna likukwini la vuvabyi.’ (Amapsalma 41:3) Loko u ni mavabyi lama nga dahekiki, mintxhumu leyizrazru leyi landzrelaka yi nga ku txhavelela:

1. Khongota u kombela ntamu wa ku tiyisela. U nga kuma ku ‘zrula ka Xikwembu Nkulukumba, loku tlulaka ku yanakanya hinkwaku’, loku nga pumbaka ku hlatiyela kwaku nakone ku nga tamaka ku ku tiyisa.​—Ba-le-Filipi 4:6, 7.

2. Vana ni vonela dzrinene. Bibele dzri li: ‘Mbilu leyi tsrhaviki i muzri lowunene, kasi moya lowu wu daka xiviti wu womisa mazrambu.’ (Amaproverbia 17:22, BIBELE DRA KU XWENGA) Hlakulela ku va mhunu lwa nyonxiki, hikusa leswo swi ta ku pfuna loko u kumana ni swikazratu nakone swi ta ku pfuna ka wutomi byaku.

3. Tiyisa dumbo dzraku ka swidumbiso swa Xikwembu. Dumbo ledzri, dzri nga pfuna nambi leswi u nga ni mavabyi lama nga dahekiki. (Ba-le-Roma 12:12) Bibele dzri vulavula hi nkama lowu ku nge tiki vaka na ‘muyaki lwa taka ku: ndzra vabya.’ (Ezaya 33:24) Xikwembu Nkulukumba a ta hanyisa vhanu ka mavabyi hinkwawu lama nga dahekiki lama hlulaka tintlhazri swoswi. Hi xikombiso, Bibele dzri hlaya leswi mayelanu ni ku helisa wuduhwati: ‘Kutani mizri yakwe mi ta va mimpswha ku tlula mizri ya ntsrongwana.’​—Yob 33:25.

Xiya: Timboni ta Yehovha ta wu yamukela mpfunu lowu Xikwembu Nkulukumba a ti nyikaka wone kambe ti tlhela ti djula mpfunu wa swipiritana mayelanu ni mavabyi ni ku hlatiyela. (Marka 2:17) Nambitanu, a hi leleti mhunu ku tizrisa madahela ya muxaka wa kukazri; mhunu mun’wana ni mun’wana a fanela ku titekela xiboho a mhakeni leyi.