KU HANYA SWANGA VAKRISTE
“Pawulo A Tlangele Xikwembu Nkulukumba, A Kuma Ni Ku Tiya Mbilu”
Loko bandla dzra le Roma dzri twe leswaku Pawulo awa buya, ntlawa wa vamakwezru wu yendzre kolomu ka 60 km, wu mu tlhangaveta. Xana swi mu khumbise kuyini Pawulo hi leswi va titsroniki swin’wana leswaku va mu kombisa lizrandzru? ‘Pawulo, a ku awa va vona, a ku tlangela Xikwembu Nkulukumba, a kuma ni ku tiya mbilu.’ (Min 28:15) Nambi leswi Pawulo afaka a tiviwa hi ku tiyisa mabandla lawa afaka a ma yendzrela, ka khambi ledzri, swanga mubohiwa, hi yene a tiyisiwiki.—2Ko 13:10.
Namunhla, valanguseli va miganga va yendzrela mabandla hi nkongometo wa ku tiyisa vamakwezru. Ku fana ni malandzra hinkwawu ya Xikwembu Nkulukumba, na vone va pfa va langusana ni minkazralu, minhlatiyelo ni ku godola. Ka khambi ledzri taka, loko mulanguseli wa muganga ni nkatakwe va yendzrela bandla dzraku, u nga yentxa yini akuva va ta ‘khongoteliwa kun’we na n’wine’?—Ro 1:11, 12.
Kumeka ka mintlhanganu ya nsimu. Mulanguseli wa muganga awa tiyisiwa loko vazrezri va tikazratela ku dzri londzrovota hi lani ku heleliki a vhiki dzra ntizro dzra ku hlawuleka. (1Te 1:2, 3; 2:20) Ha yini u nga teki wuphayona bya ku pfunisa hi wheti leyi a mi yendzrelaka ha yone? Xana u nga tizra na vone a nsin’wini, kumbe nambi ku famba ni mun’we wa vone ka xidondzro xaku xa Bibele? Va swi zrandzra ku tizra ni vazrezri va ku hambana-hambana, ku patsra ni lava nga vampswha kumbe va ngeke na wuswikoti bya ku tlhasa mbangu a ku zrezreni.
Kombisa malwandla. Xana u nga va nyika mbangu wa ku yetlela kumbe swakuda? Leswo swi nga komba mulanguseli wa muganga kun’we ni nkatakwe leswaku wa va zrandzra. A va djuli swinyingi.—Lk 10:38-42.
Yingiseta u tlhela u tizrisa nkongomiso ni swilayu swakwe. Hi lizrandzu, mulanguseli wa muganga a hi pfuna ku vona leswi hi nga yampswisaka xiswone ndlela leyi hi mu tizrelaka ha yone Yehovha. Minkama mimbeni swi nga ha djula a hi nyika swilayu leswi vavisaka. (1Ko 5:1-5) Awa tsrhava loko hi yingiseta hi tlhela hi tibeka hansi.—Hb 13:17.
Kombisa ku tlangela. Byela mulanguseli wa muganga ni nkatakwe ndlela leyi minzamu yavu yi ku pfuniki ha yone. U nga swi yentxa hi ku kongoma kumbe hi ku va tsralela papela.—Kl 3:15.