U Nga Wu Fambisisa Kuyini Ntlhanganu Wa Nsimu Hi Ndlela Leyinene

Ka mintlhanganu yezru hinkwayu, a mintlhanganu ya nsimu i yin’we ya tindlela leti Yehovha a hi nyikaka akuva hi kutxanana. (Hb 10:24, 25) A ntlhanganu wa nsimu wu fanela ku hambiwa ndzreni ka 5 ku ya ka 7 wa maminutu. Leswi liki, a mufambisi a fanela ku fambisa, a yava mintlawa, a yavela mbangu lowu va taka tizra kone ni ku hamba xikhongoto ndzreni ka nkama lowo. (Loko ntlhanganu wa nsimu wu hambiwa ntsrhaku ka ntlhanganu wa bandla wu va fanela ku va lowu gomiki ngopfu). A mufambisi a fanela ku lulamisela mhaka leyi taka pfuna ngopfu vazrezri. Hi xikombiso, ka ntlhanganu wa mugqivela a mufambisi a nga ha nyikela swidzringanyeto swa leswi vazrezri va nga ha swi hlayaka, ngopfu leswi vazrezri vanyingi va kalaka va nga kumeki a makazri ka vhiki. Hi yini mintxhumu yin’wana leyi mi nga ha vulavulaka ha yone?

• Xikombiso xa ku bula hi Bibele xi nga ka Xibukwana Xa Ntlhanganu—Wa Wutomi Ni Wutizreli Byezru

• U nga ma tizrisisa kuyini madzrungula kumbe ntxhumu wa kukazri lowu wa ha ka ku yentxeka a mugangeni akuva u sungula mabulu

• U nga hlamulisa kuyini loko mhunu a djula ku siva bulu

• U nga ku yini loko u kuma mhunu lwa kalaka a nga kholwi ka Xikwembu Nkulukumba, mhunu lwa kholwaka ka ku titumbulukela ka mintxhumu, mhunu lwa vulavulaka lidzrimi ledzri hambaniki ni dzraku kumbe mhunu lwa nga ni wukhongoti lebyi kalaka byi nga tolovelekanga a mugangeni waku

• U nga swi tizrisisa kuyini swin’we swa switizro leswi nga ka jw.org, JW Library^® app kumbe Bibele

• U nga swi tizrisisa kuyini swin’we swa Switizro Swa Ku Dondzrisa Ha Swone

• U nga hlengemelisa kuyini ka mazrezrela ya ku hambanahambana ya ku fana ni ku zrezra hi telefone, ku tsrala makarta, ku zrezra hi swikarinyana, ku hamba timpinda kumbe ku fambisa swidondzro swa Bibele

• Swidzrimuxo mayelanu ni ku tisizrelela, ku dzringanisela, ku va ni xitxhavu a nsin’wini, ku va ni vonela ledzrinene kumbe swin’wana

• U nga ha tizrisa dondzro kumbe vídeo ledzri nga ka broxura ledzri liki Tihite A Ku Dondzreni Ni Le Ku Dondzriseni

• U nga mu pfunisa kuyini lweyi u nga na yene nsin’wini

• Tsralwa ledzri yelanaka ni ntizro wa ku zrezra kumbe mfambu wa ku kazri lowu u nyonxisaka