Swivutiso Swa Vadondzri

Xana a nhlokomhaka leyi liki “A Vito Dzraku A Dzri Hlawuliwe” leyi humexiwiki ka Xihondzro Xa Ku Zrindzra xa Junyu wa 2020, yi swi tlhamuxele hi ndlela yini leswi hi swi kholwaka mayelana ni vito dzra Yehovha kun’we ni wulawuli byake?

Ka xidondzro lexiyani, hi dondzre leswaku ko va ni xivangelo xin’we ntsena xa lisima ngopfu lexi khumbaka vhanu hinkwavu kun’we ni tintsrumi: ku nga ku xwengisiwa ka vito dzra Yehovha. A wulawuli, kumbe ndlela leyi Yehovha a fumaka ha yone hi yone ya ku yampswa nakone i mhaka leyi yelanaka ni ku xwengisiwa ka vito dzra Yehovha. Hi ndlela leyi fanaka, a ku dumbeka ka vhanu i mhaka yin’wana leyi yelanaka ni ku xwengisiwa ka vito dzra Yehovha.

Kambe ha yini swoswi hi yi nyika lisima ngopfu mhaka leyi khumbaka vito dzra Yehovha kun’we ni ku xwengisiwa ka dzrone? Hi ta vona swivangelo swizrazru.

Xa ku sungula, Sathana a hlasele vito dzra Yehovha, kumbe ndhuma yake, a xizrambeni xa Edeni. Xivutiso lexi Sathana a xi hambiki Evha a xi nyikela mongo wa leswaku Xikwembu Nkulukumba a nga na malwandla nakone milawu yake yi va bindzrisela wutomi. Phela leswi Sathana a swi hlayiki a swi hambane hi ku helela ni leswi Yehovha a swi hlayiki, a swi fana ni loko Sathana a ku Yehovha i muhembi. A ntxhimise vito kumbe ndhuma ya Yehovha. Hi ndlela leyo a ndzruluke “Diyavulosi”, leswi tlhamuxelaka “muhembi”. (Yoh. 8:44) Leswi Evha a kholwiki ka madzrimi ya Sathana, a xandzrukele Xikwembu Nkulukumba, ni wulawuli byake. (Gen. 3:1-6) Ku ta tlhasela ni namunhla, Sathana a ha tama a hlaya madzrimi mayelana na Yehovha. Swi nga yentxeka lava kholwaka ka madzrimi wolawu va tsrhika ku yingiseta Yehovha. Kutani ka vhanu va Xikwembu Nkulukumba, a madzrimi lama lukeliwaka vito dzra ku xwenga dzra Yehovha hi ma vona na a li ku kala wululami lebyikulu. Lowo i mitsru wa swikazratu ni ku xaniseka hinkwaku loku hi ku vonaka namunhla wa siku a misaveni.

Xa wubidzri, hi nkongometo wa kuva a pfuna swivumbiwa swake, Yehovha a tiyimisele ku yimelela vito dzrake, ni ku dzri basisa. Lowo hi wone ntxhumu wa lisima ka Yehovha. Hi yone mhaka a hlayaka leswi: ‘Ndzri ta xwengisa vito dzranga ledzrikulu.’ (Ezek. 36:23) Nakone Yesu na yene a swi beke livaleni leswaku he wini ntxhumu lowu wu fanelaka kuva wa lisima ka malandzra hinkwawu ya ku dumbeka ya Yehovha loko ma khongota, a te: “A vito dzraku a dzri xwengisiwe.” (Mt 6:9) Makhambi manyingi a Bibele dzri vulavula hi ku xwengisa vito dzra Yehovha. Vona swin’we swa swikombiso: ‘Hlayelani Yehovha vumenyemenye lebyi fanelaka vito dzrakwe.’ (1 Makr. 16:29; Amaps. 96:8) ‘Yimbelelani vukulu bya vito dzrakwe.’ (Amaps. 66:2) ‘Ndzri ta kulisa vito dzraku hi la ku nga helikiki.’ (Amaps. 86:12) Dzrin’we ka makhambi lawa Yehovha a vulavuliki na a li tilweni ku ve loko a hlamula leswi Yesu a swi kombeliki na a li tempeleni dzra Yerusalema, Yesu a te: “Papayi, twalisa vito dzraku.” Kolanu, Yehovha a hlamule a ku: “Ni dzri twalisile nakone ni ta tlhela ni dzri twalisa.”—Yoh. 12:28.a

Xa wuzrazru, a nkongometo wa Yehovha minkama hinkwayu wu ta yelana ni vito dzrake, kumbe ndhuma yake. Pimisa hi leswi, ku ta yentxeka yini ntsrhaku ka nhlaselo wa wugamu ntsrhaku ka Mfumu wa 1.000 wa malembe ya ku fuma ka Kriste? Xana a vhanu kun’we ni tintsrumi va ta tama va hambana hi mavonela mayelana ni lweyi a yimaka ni ku xwengisiwa ka vito dzra Yehovha ni lweyi a kalaka a nga yimi na swone? Akuva hi kota ku hlamula xivutiso lexi, a hi dzrimukeni mintxhumu yibidzri leyi yelanaka ni ku dumbeka ka vhanu kun’we ni wulawuli hinkwabyu. Ntsrhaku ka nhlaselo wa wugamu, xana swa ha ta vilela kuva vhanu va kambeliwa ku dumbeka kwavu? Im-him. Hikusa kutani va ta va na va kambeliwile, va hetisekile va tlhela va kuma wutomi lebyi nga helikiki. Loko nkama lowo wu tlhasa, xana ka ha ta va ni ku dokadokisana mayelana ni lweyi a fanelaka ku va ni wulawuli hinkwabyu? Im-him. Hikusa hinkwavu a matilweni ni misaveni va ta va ni wumun’we nakone va ta va na va tiyiseka leswaku Yehovha a fuma hi ndlela leyinene ni hi wululami. Kambe, xana a vito dzra Yehovha dzra ha ta tama dzri va ntxhumu wa lisima ngopfu ka vhanu vake?

Ntsrhaku ka nhlaselo wa wugamu hinkwavu va ta tiva ntiyiso mayelana na Yehovha nakone vito dzrake dzri ta xwengisiwa hi ku helela, kambe a vito dzra Yehovha dzra ha ta tama dzri va ntxhumu wa lisima ka malandzra yake hinkwawu ya lani misaveni ni matilweni. Ha yini? Hikusa va ta vona Yehovha na a tama a yentxa mintxhumu ya ku hlamalisa. Pimisa hi leswi: Ntsrhaku ka loko hi ku titsrongahata Yesu a tlhelisela Mfumu ka Yehovha Xikwembu Nkulukumba, Yehovha a ta va “mintxhumu hinkwayu ka vhanu hinkwavu”. (1 Kor. 15:28) Ntsrhaku ka leswo a vhanu lani misaveni va ta tikholisa hi “mintxhumu hinkwayu ka vhanu hinkwavu.” (Rom. 8:21) Kutani hi wugamu Yehovha a ta hetisisa nkongometo wake lowukulu ku nga ku tlhanganisa swivumbiwa swake swa le matilweni ni swa lani misaveni swi va ndangu lowukulu lowu nga ni wumun’we.—Efe. 1:10.

Ntsrhaku ka loko hinkwaswu leswi swi yentxekile, Xana a ndangu wa Yehovha wa le matilweni ni wa lani misaveni wu ta titwisa kuyini? Handle ka ku ganaganeka hinkwavu va ta tama va susumeteleka ku dzrumisa. Mupsalma Davhida a huhuteliwe ku tsrala leswi: ‘A ku khensiwe Yehovha . . . A dzri khensiwe a vito dzrakwe ledzrikulu hi lani ku nga helikiki.’ (Amaps. 72:18, 19) Hi ta tama hi va ni swivangelo leswimpshwa ni leswi nyonxisaka swa ku tama hi dzrumisa Yehovha hi lani ku nga helikiki.

Phela vito dzra Yehovha dzri swi bela livaleni leswaku yene i mani nakone loko hi pimisa hi vito dzrake ntxhumu wa ku sungula lowu wu hi telaka miyanakanywini i lizrandzru dzrake. (1 Yoh. 4:8) Minkama hinkwayu hi ta dzrimuka leswaku Yehovha a hi vumbe hi lizrandzru, a hi nyike xitizrulo hi kola ka lizrandzru ni leswaku a fuma hi ndlela ya wululami ni hi lizrandzru. Nakone hi ta tama hi vona lizrandzru ledzri Yehovha a nga na dzrone hi swivumbiwa swake. Hi ta va ni swivangelo swinyingi swa ku tama hi dzrumisa vito dzrake dzra ku xwenga hi lani ku nga helikiki.—Amaps. 73:28.