Yetisela Ku Hiseka Ka Yesu A Ku Zrezreni

1. He wini ntxhumu lowu wu hambanisaka vhanu va Yehovha ni lava tihlayaka vakriste?

NTXHUMU lowu yentxaka vhanu va Yehovha va hambana ni vhanu lava tihlayaka vakriste, i ku hiseka kwavu a ku zrezreni. (Tit. 2:14) Kambe minkama yin’wana u nga ha titwa u nga ha swi nyonxeli ku ya ku zrezreni. Swi nga yentxeka u titwa ku fana ni makwezru wa kukazri lweyi a tizraka swanga nkulu lweyi a hlayiki leswi: “Minkama yin’wana ni titwa na ni nga swi naveli ku ya ku zrezreni.”

2. Ha yini minkama yin’wana u nga ha titwaka u nga ha swi nyonxeli ku ya ku zrezreni?

² Minkama yin’wana swi nga ku nyonxisa ngopfu ku patsreka ka mintizro yin’wana ya Yehovha ku tlula ku zrezra. Ha yini leswo swi yentxeka? Yanakanya hi loko hi yaka kumbe ku pfuxeta Tiyindlu Ta Wugandzreli, ku pfuna lava weliwiki hi timhangu kumbe ku tiyisa vamakwezru. Ka swiyimu leswi, hi tekela ku vona mabindzru nakone swa hi nabyalela ku vona leswaku a ku tikazrata kwezru a ku vanga ka mahala. Handle ka leswo, swa nyonxisa ku va ka mbangu lowu ku nga ni vhanu lavanene lani hi kotaka ku vona lizrandzru ni ku zrula leswi swi nga kone a xikazri ka vamakwezru nakone hi kota ku vona leswaku va hi nyika lisima hi kola ka ntizro lowu hi wu yentxaka. Hi tlhelo dzrin’wana, swi nga yentxeka hi zrezra ka muganga wa wun’we hi malembe kambe va li vatsrongo lava yamukelaka dzrungula dzrezru dzra Bibele kumbe va dzri yala hi ku kongoma. Nakone ha swi tiva leswaku loko wugamu byi ya byi tsrhindzrekela hi ta ya hi kanetiwa. (Mat. 10:22) I yini lexi nga hi pfunaka ku tama hi hiseka kumbe ku yengesela ku hiseka kwezru a ntizrweni wa ku zrezra?

3. Hi dondzre yini ka Luka 13:6-9 mayelanu ni ku hiseka ka Yesu?

³ Hi nga dondzra mayelanu ni ku hiseka a ku zrezreni hi ku kambisisa xikombiso xa Yesu. Ka wutizreli byake bya lani misaveni Yesu a nga zanga a pumba ku hiseka kwake, ku hlaya ntiyiso, a tame a yentxa leswi yengetelekiki. (Dondzra Luka 13:6-9.) Yesu a fananise ntizro wake ni wanuna lweyi a a tikazratela ku hlayisa nsimu ya mawuvha. Wanuna lweyi a hete malembe mazrazru na a hlayisa nsinya wa nkuwa lowu a wu nga beki mihandzru lowu a wu li ka nsimu ya mawuvha. Hi lani ku fanaka, Yesu a hete malembe mazrazru na a zrezrela Vayuda kambe ntalu wavu a va dzri yingisetanga dzrungula dzra Xikwembu Nkulukumba. Ku fana ni wanuna lweyi a kalaka a nga godolanga ku hlayisa nsinya, Yesu na yene a nga godolanga ku zrezrela vhanu. A tame a tinyiketela akuva a pfuna vhanu leswaku va yingiseta madzrungula lamanene.

4. He yini mune wa mintxhumu leyi hi ta ka yi dondzra ka xikombiso xa Yesu?

⁴ Ka xidondzro lexi, hi ta vona ndlela leyi Yesu a kombisiki ku hiseka ha yone a ku zrezreni ngopfungopfu ka 6 wa tihweti ta wugamu na a li lani misaveni. Ku dondzra mayelanu ni leswi Yesu a swi dondzrisiki ni ku yetisela xikombiso xake swi ta hi pfuna ku tama hi hiseka. Hi ta kambisisa mune wa mintxhumu leyi hi nga yi dondzraka ka xikombiso xa Yesu: 1) a a beka miyanakanyu yake ka ku zrandzra ka Yehovha, 2) a a byi twisisa ha hombe wuprofeta bya Bibele, 3) a a dumba Mfumu wa Yehovha nakone 4) a a ni vonela ledzrinene mayelanu ni vhanu.

A A BEKA MIYANAKANYU YAKE KA KU ZRANDZRA KA YEHOVHA

5. Xana Yesu a swi kombise hi ndlela yini leswaku a a beka miyanakanyu yake ka ku yentxa ku zrandzra ka Xikwembu Nkulukumba?

⁵ Yesu a zrezre “madzrungula lamanene ya Mfumu” hi ku hiseka hikusa a a swi tiva leswaku loko a ku li ku zrandzra ka Xikwembu Nkulukumba. (Luk. 4:43) Ka Yesu, a ku zrezra a ku li ntizro wa lisima ngopfu swinene a wuton’wini byake. Nambi ka tihweti ta wugamu ta wutizreli byake, “a fambe hi doropa ni doropa ni hi xidoropana ni xidoropana” a dondzrisa vhanu. (Luk. 13:22) A tlhele a wupfisa vadondzrisiwa van’wana akuva va zrezra madzrungula lamanene.—Luk. 10:1.

6. Xana a ntizro wezru wa ku zrezra wu fambisana hi ndlela yini ni mintizro yin’wana ya moya? (Tlhela u vona ni mufoto.)

⁶ Ni namunhla, a ku zrezra madzrungula lamanene i ntizro lowu Yehovha na Yesu va djulaka leswaku hi wu yentxa. (Mat. 24:14; 28:19, 20) Ku hlaya ntiyiso mintizro hinkwawu leyi hi yi yentxaka yi fambisana ni ntizro wa ku zrezra. Hi xikombiso, hi yaka Tiyindlu Ta Wugandzreli akuva lava nyonxelaka dzrungula dzrezru va kuma mbangu wa ku gandzrela Yehovha ka wone. Handle ka leswo, a nkongometo wa hinkwaswu leswi yentxiwaka Betele i ku seketela ntizro wa ku zrezra. Nakone a ntizro wa ku seketela lava weliwiki hi timhangu a hi wu yentxeli ntsena ku pfuna vamakwezru hi leswi va swi vilelaka, kambe ni kuva hi va pfuna leswaku va tlhelela ka xiyimiso xavu xa moya leswi patsraka ku zrezra. Kutani loko hi dzrimuka leswaku a ku zrezra i ntizro wa lisima swinene lowu Yehovha a djulaka leswaku hi wu yentxa, hi ta susumeteleka ku wu hisekela. Makwezru János, nkulu wa bandla wa le Hungria a li: “Minkama hinkwayu ni dzrimuka leswaku a ku na ntizro wun’wana lowu hi nga wu yentxelaka Yehovha lowu nga pfaletaka ntizro wa ku zrezra, lexi i xiyavelo xezru xa ntshima.”

7. Ha yini Yehovha a djula leswaku hi tama hi zrezra? (1 Timotewu 2:3, 4)

⁷ Hi nga yengesela ndlela leyi hi hisekelaka ha yone ntizro wa ku zrezra hi ku va ni vonela ledzri fanaka ni dzra Yehovha hi vhanu. A djula leswaku vhanu vanyingi va yingiseta madzrungula lamanene akuva va huluxiwa. (Dondzra 1 Timotewu 2:3, 4.) Xileswo a djula leswaku hi yampswisa wuswikoti byezru bya ku zrezrela vhanu madzrungula lamanene. Xikombiso xa leswo i broxura ledzri liki, Zrandzra Vhanu—Yentxa Vadondzrisiwa, ledzri hi nyikaka swidzringanyeto leswi tizraka swa ku sungula mabulu hi nkongometo wa ku sungula swidondzro swa Bibele. Nambiloko swoswi vhanu va nga mu tizreli Yehovha, swi nga yetxeka va ta kuma mukhandlu lowo na nhlomulo lowukulu wu nga si hela. Kutani leswi hi va byelaka swoswi swi ta va pfuna a nkameni lowu taka akuva va teka xiboho xa ku tizrela Yehovha. Kambe leswo swi to koteka ntsena loko hi tama hi zrezra.

A A BYI TWISISA HA HOMBE WUPROFETA BYA BIBELE

8. Xana ku twisisa a wuprofeta bya Bibele swi mu pfunise kuyini Yesu akuva a tizrisa nkama wake hi ndlela leyinene?

⁸ Yesu a a yi tiva ndlela leyi wuprofeta bya kukazri bya le Bibeleni a byi ta hetiseka ha yone. Hi xikombiso, a a swi tiva leswaku a wutizreli byake a byi to heta malembe mazrazru ni hamfu ntsena. (Dan. 9:26, 27) Nakone a a tiva ndlela leyi a a ta fa ha yone ni nkama wa kone. (Luk. 18:31-34) Xileswo a a tizrisa nkama wake hi ndlela leyinene hi ku zrezra hi ku hiseka akuva a hetisisa xiyavelo xake.

9. Ha yini ku twisisa wuprofeta bya Bibele swi hi susumetela ku zrezra hi ku hiseka?

⁹ Ku twisisa a wuprofeta bya Bibele swi hi pfuna ku zrezra hi ku hiseka hikusa a wugamu bya xiyimu lexi xa misava byi ta tlhasa ku nga li khale. Hi vona ndlela leyi swiyentxakalu swa misava hinkwayu ni ndlela leyi vhanu va hanyaka ha yone swi byi hetisisaka ha yone wuprofeta bya le Bibeleni mayelanu ni masiku ya wugamu. Hi tlhela hi vona ku lwisana loku nga kone a makazri ka mfumu wa Anglo-América ni Rússia xikan’we ni vaseketeli vake, leswi hetisisaka a wuprofeta lebyi liki a hosi ya nyingitimu ni hosi ya n’walungu ti ta lwa “a nkameni wa wugamu”. (Dan. 11:40) Nakone hi twisisa leswaku a minkondzro ya xifaniso xa wuprofeta bya Daniel 2:43-45 yi fanekisela mfumu wa misava hinkwayu wa Anglo-América. Ha tiyiseka leswaku ku nga li khale, ina ku nga li khale a Mfumu wa Xikwembu Nkulukumba wu ta helisa mimfumu hinkwayu ya vhanu. Wuprofeta lebyi byi kombisa leswaku hi le kusuhi swinene ni le ku heleni ka masiku ya wugamu, xileswo hi fanela ku wu tizrisa ha hombe nkama wezru hi kuva hi hisekela ntizro wa ku zrezra madzrungula lamanene.

10. He tini tindlela tin’wana leti a wuprofeta bya Bibele byi hi susumetelaka ku zrezra ha tone?

¹⁰ A wuprofeta bya Bibele byi ni dzrungula ledzri nyikanaka dumbo ledzri hi swi navelaka ngopfu ku dzri byela van’wana. Makwezru Carrie lweyi a tizrelaka a República Dominicana a li: “Loko ni yanakanyisisa hi mintxhumu ya ku hlamalisa leyi Yehovha a dumbisaka ku hi yentxela yone a nkameni lowu taka, swi ni yentxa ni va ni ku navela lokukulu ka ku byela van’wana mhaka leyi. Vhanu va lavisana ni swikazratu leswikulu nakone swi vhela swi tikomba leswaku va vilela ngopfu ku tiva swidumbiso swa Yehovha.” Handle ka leswo, a wuprofeta bya Bibele byi hi komba leswaku Yehovha awa hi seketela ka ntizro lowu. Makwezru Leila lweyi a tsrhamaka a Hungria a li: “A buku dzra Ezaya 11:6-9 dzri ni dzrimuxa leswaku mhunu mun’wana ni mun’wana a nga ha txintxa hi ku pfuniwa hi Yehovha. Xileswo ni djula ku byela vhanu hinkwavu madzrungula lamanene nambi lava swi tikombaka ingiki a va nge ti ma yamukela.” Makwezru Christopher wa le Zâmbia a li: “A buku dzra Marka 13:10 dzri li: A madzrungula lamanene ma fanela ku zranga ma zrezriwa a matikweni hinkwawu, nakone i ndjombo leyikulu ku pfunisa ka ku hetisisa wuprofeta lebyo.” Wene ke? He byini wuprofeta lebyi ku susumetelaka ku tama u zrezra?

A A DUMBA MPFUNU WA YEHOVHA

11. Ha yini a swi djula kuva Yesu a dumba mpfunu wa Yehovha akuva a tama a zrezra hi ku hiseka? (Luka 12:49, 53)

¹¹ Yesu a a dumba leswaku Yehovha a a ta mu pfuna ku tama a zrezra hi ku hiseka. Nambileswi Yesu a a vulavula hi ndlela ya xitxhavu nakone a a ma pimisa ha hombe mazritu lawa a a ta ma hlaya, a a swi tiva leswaku vhanu vanyingi a va nge ti ma nyonxela madzrungula lamanene nakone a va ta ma kaneta. (Dondzra Luka 12:49, 53.) Hi kola ka ku zrezra kwake madzrungula lamanene, vazrangeli va wukhongoti va zame ku mu dlaya hi makhambi manyingi. (Yoh. 8:59; 10:31, 39) Nambitanu, a tame a zrezra hikusa a a swi tiva leswaku Yehovha a na yene. Yesu a te: “A ni wuswanga, kambe Papayi lweyi a ni zrumiki a na mine. [. . . ] A nga ni tsrhikanga wuswanga hikusa minkama hinkwayu ni yentxa leswi mu nyonxisaka.”—Yoh. 8:16, 29.

12. Xana Yesu a va lulamisele hi ndlela yini vadondzrisiwa vake akuva va tama va zrezra loko va xanisiwa?

¹² Yesu a dzrimuxe vadondzrisiwa vake leswaku na vone va nga dumba mpfunu wa Yehovha. Makhambi manyingi a va tiyisekise leswaku Yehovha a a ta va pfuna ku lavisana ni ku xanisiwa. (Mat. 10:18-20; Luk. 12:11, 12) Yesu a tlhele a va kombela leswaku va va ni wuxiyaxiya. (Mat. 10:16; Luk. 10:3) A va byele leswaku a va nga fanelanga ku sindzrisa mhunu ku yamukela dzrungula dzra Mfumu. (Luk. 10:10, 11) A tlhele a va byela leswaku a va fanela ku tsrutsruma loko swi vileleka. (Mat. 10:23) Nambileswi Yesu a a hiseka a tlhela a dumba Yehovha, a a nga tibeki nghozini na swi nga vileleki.—Yoh. 11:53, 54.

13. Ha yini u nga tiyisekaka leswaku Yehovha a ta ku pfuna?

¹³ Na hine namunhla ha wu vilela mpfunu wa Yehovha akuva hi zrezra hi ku hiseka loko hi lwisana ni nkaneto. (Mpful. 12:17) Ha yini u nga tiyisekaka leswaku Yehovha a ta ku pfuna? Kambisisa xikhongoto xa Yesu lexi kumekaka ka buku dzra Yohane ndzrima 17. Ka xikhongoto lexo, Yesu a kombele kuva Yehovha a hlayisa vapostola vake nakone Yehovha a xi hlamulile xikhongoto lexo. A buku dzra Mintizro dzri kombisa ndlela leyi Yehovha a va pfuniki ha yone vapostola ku tama va hisekela ntizro wa ku zrezra nambileswi a va kanetiwa. Ka xikhongoto xolexo, Yesu a tlhele a kombela Yehovha leswaku a hlayisa lava a va ta yamukela dzrungula dzra Mfumu. Na wene wa patsreka! Yehovha a ha tama a hlamula xikhongoto lexo ku ta tlhasa ni namunhla, leswi liki, na wene a ta ku pfuna hi lani a va pfuniki ha kone vapostola.—Yoh. 17:11, 15, 20.

14. Ha yini hi nga tiyisekaka leswaku hi ta swi kota ku zrezra nambi hi minkama ya ku kazrata? (Tlhela u vona ni mufoto.)

¹⁴ Leswi wugamu byi yaka byi tsrhindzrekela swi nga ha kazrata ngopfu swinene ku zrezra madzrungula lamanene hi ku hiseka. Kambe Yesu a hi tiyisekise leswaku hi ta va ni mpfunu hinkwawu lowu hi wu vilelaka. (Luk. 21:12-15) Ku fana na Yesu kun’we ni vadondzrisiwa vake, hi tsrhika vhanu va tihlawulela ku hi yingiseta kumbe im-him na hi nga lwisani na vone. Nambi mimbangwini leyi ntizro wezru wu tsimbisiwaka, vamakwezru va tama va zrezra hi ku hiseka hikusa va dumba Yehovha ku nge ntamu wavu. Hi lani Yehovha a tiyisiki malandzra yake ya khale ha kone, ni namunhla a hi nyika ntamu akuva “hi zrezra madzrungula lamanene hi ku helela” hi ku ya hi ku zrandzra kwake. (2 Tim. 4:17) Xileswo dumba Yehovha. a ta ku pfuna ku tama u zrezra madzrungula lamanene hi ku hiseka.

A A NI VONELA LEDZRINENE MAYELANU NI VHANU

15. Hi swi tivisa kuyini leswaku Yesu a a ni vonela ledzrinene mayelanu ni ntizro wa ku zrezra?

¹⁵ Yesu a tame a va ni vonela ledzrinene mayelanu ni ntizro wa ku zrezra. Leswo swi mu pfune ku tama a nyonxa ni ku tlhela a yentxa hinkwaswu leswi a a swi kota ka ntizro lowo. Hi xikombiso, ntsrhaku ka loko ku khalute kolomu ka lembe na a sungule ku zrezra, Yesu a xiye leswaku vhanu vanyingi a va tiyimisele ku yingiseta madzrungula lamanene. A ve a fananisa vhanu lava ni masimu lawa a ma lulamele ku tsrhoveliwa. (Yoh. 4:35) Na ku khalute kolomu ka lembe na a fananise vhanu ni masimu a tlhele a byela vadondzrisiwa vake a ku: “A ntsrhovelo i wukulu.” (Mat. 9:37, 38) Ntsrhaku ka nkamanyana a tlhele a ku: “A ntsrhovelo i wukulu . . . Kombelani n’winyi wa ntsrhovelo leswaku a zrumela vatizri a ntsrhovelweni wake.” (Luk. 10:2) Yesu a nga zanga a ganaganeka leswaku vhanu va nga ma yamukela madzrungula lamanene nakone a a nyonxa ngopfu loko leswo swi yentxeka.—Luk. 10:21.

16. Xana a swifaniso leswi Yesu a swi tizrisiki swi va pfunise kuyini vadondzrisiwa vake akuva va va ni vonela ledzrinene mayelanu ni ntizro wa ku zrezra? (Luka 13:18-21) (Tlhela u vona ni mufoto.)

¹⁶ Akuva Yesu a pfuna vadondzrisiwa vake leswaku va tama va hiseka a va byele ndlela leyi dzrungula ledzri a va dzri zrezra a dzri ta va ni mabindzru lamanene ha yone. Hi xikombiso, vona swikombiso swibidzri leswi Yesu a swi tizrisiki. (Dondzra Luka 13:18-21.) Ka swin’we swa swifaniso leswo, Yesu a tizrise mbewu leyitsrongo ya sinapi akuva a dondzrisa leswaku a dzrungula dzra Mfumu wa Xikwembu Nkulukumba a dzri ta kula hi ndlela ya ku hlamalisa nakone a nga kone lweyi a a ta sivela ku kula koloko. Kutani ka xifaniso xin’wana, Yesu a tizrise fermentu akuva a kombisa ndlela leyi dzrungula dzra Mfumu wa Xikwembu Nkulukumba a dzri ta hangalaka ha yone ni ku yentxa ku txintxa ka lava va dzri yamukelaka nambiloko swi ngo teka nkama akuva ku txintxa koloko ku voneka. Hi ku yentxa leswo, a kombe vadondzrisiwa vake leswaku dzrungula ledzri a va dzri zrezra a dzri ta pfuna vhanu vanyingi.

17. Ha yini hi fanela ku tama hi va ni vonela ledzrinene hi ntizro wa ku zrezra?

¹⁷ Yanakanya ndlela leyi ntizro wa ku zrezra wu pfunaka vhanu ha yone a misaveni hinkwayu. Loko hi yanakanya hi leswo, hi ta susumeteleka ku zrezra madzrungula lamanene hi nkhinkhi. Lembe ni lembe vhanu vanyingi lava nyonxelaka va hlalela Xidzrimuxo nakone vhanu vanyingi va babatisiwa va tlhela va tipatsra na hine ka ntizro wa ku zrezra madzrungula lamanene. A hi swi tivi leswaku i vangani lava ha taka yamukela dzrungula dzrezru. Lexi hi xi tivaka hi leswaku Yehovha a le ku hlengeleteni ka xitsrhungu lexikulu lexi taka huluka ka nhlomulo lowukulu. (Mpful. 7:9, 14) Yehovha n’winyi wa ntsrhovelo awa swi tiva leswaku vanyingi va ta yamukela madzrungula lamanene. Hi ndlela leyo hi ni swivangelo leswi twalaka swa ku tama hi zrezra madzrungula lamanene.

18. I yini leswi hi djulaka leswaku van’wana va swi xiya kwezru?

¹⁸ Ntxhumu lowu minkama hinkwayu wu kombisiki leswaku a a li vamani vadondzrisiwa va Yesu ku ve ku hiseka kwavu a ntizrweni wa zrezra. Hi xikombiso, vapostola va zrezre hi xixixi ni hi ku nyonxa lakakuva vhanu va dzrimuka leswaku, “a va fambafamba na Yesu”. (Mint. 4:13) Namunhla, loko vhanu va hi vona na hi zrezra, hi djula leswaku va tiyiseka leswaku na hine hi yetisela ku hiseka ka Yesu loko hi zrezra madzrungula lamanene.