Pfumelela Lizrandzru Dzri Ku Susumetela Ku Tama U Zrezra!

1. I yini leswi hi swi dondzriki ka ntlhanganu wa lembe wa 2023?

KA NTLHANGANU wa lembe wa 2023,a hi yamukele mintlhamuxelo ya ku nyonxisa mayelanu ni tidondzro ta kukazri leti hi kholwaka ka tone, nakone hi yamukele switiviso swa kukazri mayelanu ni ntizro wezru wa ku zrezra. Hi xikombiso, hi dondzre leswaku vhanu va kukazri va nga va ni mukhandlu wa ku tipatsra ni vhanu va Yehovha ntsrhaku ka loko Babilona Lwenkulu a helisiwile. Nakone hi tive leswaku ku sukela hi Novhembru wa 2023, a vazrezri va Mfumu a va nge he te nyikela mawora lawa va ma hetiki ntizrweni wa nsimu. Xana a ku txintxa koloko ku yentxa leswaku a ntizro wezru wu nga ha li wa lisima nakone wu nga ha li wa xihantla ku tlula nkameni wa khale? Nikutsrongo!

2. Ha yini ntizro wezru wa ku zrezra wu ya wu va wa xihantla siku ni siku? (Marka 13:10)

² Nkama lowu masiku ma yaka ma famba, a ntizro wa ku zrezra wu ya wu va wa xihantla. Ha yini? Hikusa a ku salanga nkama wunyingi akuva wugamu byi tlhasa. Kambisisa leswi Yesu a swi hlayiki mayelanu ni ntizro wa ku zrezra a masikwini ya wugamu. (Dondzra Marka 13:10.) Hi ku ya hi dzrungula dzra ku fana ni ledzri kumekaka ka Matewu, Yesu a hlaye leswaku a madzrungula lamanene ma fanela ku zranga ma zrezriwa a matikweni hinkwawu na ku nga si tlhasa a “wugamu”. (Mat. 24:14) Xiga lexi xi tlhamuxela a wugamu bya xiyimu lexi xa ku biha xa misava ya Sathana. Yehovha a beke “siku ni nkama” lani mintxhumu leyi yi taka yentxeka ha wone. (Mat. 24:36; 25:13; Mint. 1:7) Siku ni siku hi ya hi tsrhindzrekela kusuhi ni siku ledzro. (Rom. 13:11) Na siku ledzro dzri nga si tlhasa, hi fanela ku tama hi zrezra ku ya tlhasela wugamu.

3. I yini lexi hi susumetelaka ku zrezra?

³ Loko hi yanakanya hi ntizro wezru wa ku zrezra, ku sekeleka xivutiso xa lisima lexi hi djulaka ku yanakanya ha xone, lexi liki: Ha yini hi zrezra madzrungula lamanene? Hi ku tsrema, a lizrandzru hi dzrone dzri hi susumetelaka ku zrezra. Leswi hi swi yentxaka a ntizrweni wa ku zrezra swi kombisa lizrandzru ledzri hi nga na dzrone hi madzrungula lamanene, lizrandzru ledzri hi nga na dzrone hi vhanu nakone ku tlula hinkwaswu, lizrandzru ledzri hi nga na dzrone ha Yehovha ni vito dzrake. A hi kambisiseni swivangelo leswi ha xin’we ha xin’we.

HI ZREZRA HIKUSA HI ZRANDZRA MADZRUNGULA LAMANENE

4. Xana hi yangulisa kuyini loko hi yamukela dzrungula dzra ku nyonxisa?

⁴ Yanakanya hi ndlela leyi u titwiki ha yone loko u yamukela ndzrava ya ku nyonxisa. Swi nga yentxeka mun’we ka maxaka yaku a ve ni n’wana kumbe u nyikiwe ntizro lowu a u wu vilela ngopfu. Handle ka ku ganaganeka a u nga wu voni nkama wa ku yavelana ni maxaka yaku ndzrava leyo. Xana ku yentxeke leswi fanaka loko u yamukele dzrungula dzra ku yampswa ku tlula hinkwawu ku nga madzrungula lamanene ya Mfumu wa Xikwembu Nkulukumba?

5. Xana u titwise kuyini loko u yingele ntiyiso lowu nga ka Zritu dzra Xikwembu Nkulukumba hi khambi dzra ku sungula? (Tlhela u vona mifoto.)

⁵ Yanakanya ndlela leyi u titwiki ha yone loko hi khambi dzra ku sungula u yamukela ntiyiso lowu nga ka Zritu dzra Xikwembu Nkulukumba. U tive leswaku Papayi waku wa le matilweni awa ku zrandzra, a djula leswaku u hamba xiyenge xa ndangu wake wa vagandzreli, a dumbise ku helisa swivavu ni ku xaniseka, u nga yimela ku vona vazrandzriwa vaku lava fiki va tlhela va hanya—ni swin’wana hi ku tala ka swone. (Mar. 10:29, 30; Yoh. 5:28, 29; Rom. 8:38, 39; Mpful. 21:3, 4) Mintiyiso leyo yi yentxe leswaku u nyonxa. (Luk. 24:32) Leswi a u swi zrandzra ngopfu leswi a u swi dondzra, a u nga wu voni nkama wa ku yavelana ni van’wana!—Dzringanisa Yeremiya 20:9.

6. I yini leswi u swi dondzriki ka mfambu wa Ernest na Rose?

⁶ Vona mfambu lowu landzrelaka. Makwezru lweyi a vitaniwaka Ernestb a o va ni 10 wa malambe loko a feliwa hi papayi. Ernest a dzrimuka leswi: “Ni tivutise leswi: ‘Xana papayi a ye matilweni? Kumbe a nyamalalile a ni nge he ti mu vona ni siku ni dzrin’we?’ A ni navela vatsrongwana vambeni lava a va ha li ni vapapayi.” Minkama hinkwayu Ernest a a ya sizreni dzra papayi wake, a tlhasa a khinsama a khongota a ku: “Na ku kombela we Xikwembu Nkulukumba, ni kombe lomu papayi wanga a nga kone.” Ntsrhaku ka kolomu ka 17 wa malembe na papayi wake a file, vamakwezru va mu kombele ku mu fambisela xidondzro xa Bibele lexi Ernest a tekeliki ku xi pfumela. A a nyonxe ngopfu hi ku tiva leswaku a vafi a va tivi ntxhumu, swo fana ni loko va biwe hi wuzrongo lebyikulu, ni leswaku Bibele dzri dondzrisa leswaku lava fiki va ta pfuxiwa a nkameni lowu taka. (Ekles. 9:5, 10; Mint. 24:15) Hi wugamu, a kume tinhlamulo ta swivutiso leswi a swi mu kazrata hi malembe manyingi! Ernest a a nyonxe ngopfu swinene hi ku dondzra mintiyiso ya Bibele. Nkatake Rose a yamukele xidondzro xa Bibele nakone a swi zrandzrile leswi a swi dondzriki. Hi 1978 va babatisiwile. Ntsrhaku ka leswo, va zrezrele maxaka yavu, vanghanu vavu ni van’wana mayelanu ni mintiyiso ya lisima leyi va yi dondzriki. Bindzru dzra kone, Ernest na Rose va kote ku pfuna ku tlula 70 wa vhanu ku dondzra ntiyiso ni ku babatisiwa.

7. Xana ku yentxeka yini loko lizrandzru ledzri hi nga na dzrone hi ntiyiso wa Bibele dzri ya dzri kula a timbilwini tezru? (Luka 6:45)

⁷ Nakunene, loko lizrandzru dzrezru hi ntiyiso lowu hi wu dondzraka a Bibeleni dzri kula a hi nge miyeli. (Dondzra Luka 6:45.) Hi titwa ku fana ni vadondzrisiwa va Yesu va le dzaneni dzra ku sungula lava hlayiki leswi: “A hi nge tsrhiki ku vulavula hi mintxhumu leyi hi yi voniki ni ku yi yingela.” (Mint. 4:20) Hi wu zrandzra ngopfu ntiyiso lakakuva hi djula ku yavelana ni vhanu vanyingi hi lani hi nga kotaka ha kone.

HI ZREZRA HIKUSA HI ZRANDZRA VHANU

8. Ha yini hi djula ku zrezrela van’wana madzrungula lamanene? (Vona bokisi ledzri liki “Zrandzra Vhanu—Yentxa Vandondzrisiwa”.) (Tlhela u vona mufoto.)

⁸ Ku fana na Yehovha ni N’wanake, ha va zrandzra vhanu. (Amapr. 8:31; Yoh. 3:16) Hi va twela ngopfu lava kalaka va “nga mu tivi Xikwembu Nkulukumba” ni lava kalaka va nge na “dumbo”. (Efe. 2:12) Swikazratu leswi va nga na swone a wuton’wini swi fana ni loko va li xikheleni xa ku yenta ngopfu swinene, kambe hine hi ni pindzra ledzri nga va pfunaka ku huma ka xikhele lexo ku nga madzrungula lamanene ya Mfumu wa Xikwembu Nkulukumba. Leswi hi va zrandzraka ni ku va twela wusiwana vhanu lava, hi djula ku yentxa hinkwaswu leswi hi nga swi kotaka akuva hi va zrezrela madzrungula lamanene. Dzrungula ledzro dzra lisima dzri nga va pfuna ku kuma dumbo, ku kuma wutomi bya ku yampswa swoswi ni ku va nyika ku lavisela ka “wutomi lebyi nga byone” ku nga wutomi lebyi nga helikiki a misaveni leyimpshwa ya Xikwembu Nkulukumba.—1 Tim. 6:19.

9. I yini leswi hi tivisaka vhanu mayelanu ni wumundzruku, nakone ha yini? (Ezekiel 33:7, 8)

⁹ A lizrandzru dzrezru hi vhanu dzri tlhela dzri hi susumetela ku va tivisa mayelanu ni wugamu bya misava leyi ya ku biha lebyi nga kusuhi. (Dondzra Ezekiel 33:7, 8.) Ha va tsretsra vayakelani vezru ni maxaka yezru lama kalaka ma nga li Timboni. Ntalu wavu va tihanyela wutomi byavu na va nga swi tivi leswaku ku tsrhindzrekela “nhlomulo lowukulu wa ku a wu ngi ngi sama wu va kone ku sukela misava yi tumbuluxiwa, nakone a wu nge he tlheli wu va kone”. (Mat. 24:21) Hi djula leswaku va tiva leswi taka yentxeka hi nkama wa yavanyiso, ku nga ku helisiwa ka wukhongoti bya madzrimi hi ku landzrela ku helisiwa xiyimu lexi xa misava ka yimpi ya Armagedoni. (Mpful. 16:14, 16; 17:16, 17; 19:11, 19, 20) Hi khongota kuva vhanu vanyingi va yingiseta leswi hi va byelaka swone ni ku teka xiboho xa ku tipatsra na hine a ku tizreleni kwezru ka Yehovha. Kambe swi ta kuyini hi lava kalaka va nga hi yingiseti swoswi ku patsra ni maxaka yezru lama zrandzrekaka?

10. Ha yini swi li swa xihantla ku tama hi tivisa vhanu leswi taka yentxeka ku nga li khale?

¹⁰ Hi lani hi swi voniki ha kone ka xidondzro lexi khalutiki, swi nga yentxeka ku ta va ku zrandzra ka Yehovha ku huluxa lava kombisaka ku txintxa loko va vona ku helisiwa ka Babilona Lwekulu. Loko swi li hi ndlela leyo, swi ya swi va swa xihantla ku tama hi tivisa vhanu hi mhaka leyi. Yanakanya hi leswi: Leswi hi va byelaka swone swoswi swi nga va pfuna ku dzrimuka xa kukazri a nkameni lowu taka. (Dzringanisa Ezekiel 33:33.) Swi nga yentxeka va ta yanakanyisisa hi xitiviso lexi va xi yingeliki kwezru va va va susumeteleka ku tipatsra na hine na nkama wa ha pfumela. Ku fana ni leswi mulaveleli wa djele wa le Filipe a txintxiki ntsrhaku ka loko ku ve ni “ku tsrekatsreka lokukulu ka misava”, swi nga yentxeka lava va kalaka va nga hi yingiseti swoswi va ta txintxa ntsrhaku ka ku vona ku helisiwa ka Babilona Lwenkulu.—Mint. 16:25-34.

HI ZREZRA HIKUSA HI ZRANDZRA YEHOVHA NI VITO DZRAKE

11. Xana hi nyika Yehovha ku phatima, xihlonipho ni ntamu hi ndlela yini? (Mpfuletelo 4:11) (Tlhela u vona mifoto.)

¹¹ Xivangelo xa lisima ngopfu lexi hi yentxaka hi zrezra, hi leswaku hi zrandzra Yehovha Xikwembu Nkulukumba ni vito dzrake dzra ku xwenga. Hi vona ntizro wa ku zrezra swanga ndlela ya ku dzrumisa Xikwembu Nkulukumba wezru lweyi hi mu zrandzraka. (Dondzra Mpfuletelo 4:11.) Ha pfumela hi mbilu hinkwayu leswaku: Swa mu fanela Yehovha Xikwembu Nkulukumba wezru, ku yamukela ku phatima, ku hloniphiwa ni ntamu leswi pfaka ka vagandzreli vake lava ku dumbeka. Hi mu nyika ku phatima ni ntamu loko hi yavelana ni vhanu wumboni lebyi kholwisaka bya leswaku a “tumbuluxe mintxhumu hinkwayu” ni leswaku hi hanya hi kola kwake. Hi mu nyika ntamu loko hi tizrisa nkama wezru, ntamu wezru ni leswi hi nga na swone akuva hi yavelana ni van’wana madzrungula lamanene hi lani hi nga kotaka ha kone loko swiyimu swi hi pfumelela. (Mat. 6:33; Luk. 13:24; Kol. 3:23) Hi ku songa, ha swi zrandzra ku vulavula hi Xikwembu Nkulukumba lweyi hi mu zrandzraka. Nakone hi susumeteleka ku byela van’wana mayelanu ni vito dzrake ni leswaku i Xikwembu Nkulukumba wa matsrhamela muni. Ha yini?

12. Xana hi xwengisa vito dzra Yehovha a ntizrweni wa nsimu hi ndlela yini?

¹² Lizrandzru dzrezru ha Yehovha dzri hi susumetela ku xwengisa vito dzrake. (Mat. 6:9) Leswo swi tlhamuxela leswaku hi djula ku byela van’wana leswaku mintxhumu ya ku biha leyi Sathana a yi hlayiki mayelanu na Yehovha a hi ntiyiso. (Gen. 3:1-5; Yak. 2:4; Yoh. 8:44) Loko hi li nsin’wini, nkongometo wezru i ku byela vhanu hinkwavu leswaku Yehovha i mani ni leswaku i mhunu wa matsrhamela muni. Hi djula va swi tiva leswaku a tsrhamela ledzrikulu dzra Yehovha i lizrandzru, ndlela leyi a fumaka ha yone i yinene ni leswaku ku nga li khale a Mfumu wake wu ta susa ku xaniseka misaveni wu yentxa leswaku vhanu va zrula ni ku nyonxa. (Amaps. 37:10, 11, 29; 1 Yoh. 4:8) Loko hi byela vhanu mintxhumu leyi mayelanu na Yehovha, hi xwengisa vito dzrake. Hi tlhela hi nyonxa hi ku tiva leswaku hi yentxa leswi hi swi kotaka akuva hi hanya hi ku pfumelelana ni vito ledzri hi nyikiwiki dzrone, Timboni ta Yehovha. Hi ndlela yini?

13. Ha yini hi tikhuza hi leswi hi vitaniwaka swanga Timboni ta Yehovha? (Ezaya 43:10-12)

¹³ Yehovha a hi hlawule kuva hi va ‘Timboni’ take. (Dondzra Ezaya 43:10-12.) Ka malembe lama khalutiki papela dzra kukazri dzra Huvo Leyi Zrangelaka a dzri hlaya leswi: “Ntxhumu wa ku hlawuleka ku tlula hinkwaswu lowu mhunu a nga vaka na wone i ku vitaniwa Mboni ya Yehovha.”c Ha yini? Yanakanya hi xifaniso lexi landzrelaka: A hi nge u lumbetiwe ku yentxa ntxhumu wa kukazri wa ku biha, kutani u vilela mhunu akuva a ku yimelela ka leswi u lumbetiwaka swone. I mani lweyi a u ta mu hlawula akuva a ku yimelela? Handle ka ku ganaganeka, a u ta hlawula mhunu lweyi u mu tivaka, u mu dumbaka ni lweyi a nga ni ndhuma leyinene akuva van’wana va kholwa ka leswi a swi hlayaka. Hi ndlela leyi fanaka, Yehovha a hi hlawule swanga Timboni take hikusa a hi tiva ha hombe nakone awa hi dumba akuva hi byela van’wana leswaku hi yene ntsena Xikwembu Nkulukumba wa ntiyiso. Hi tikhuza ngopfu hi leswi hi nga Timboni take, lakakuva hi tizrisa mikhandlu hinkwayu akuva hi byela vhanu hi vito dzrake ni ku va kholwisa leswaku mintxhumu hinkwayu ya ku biha leyi va yi hlayaka mayelanu na yene i madzrimi. Hi ku yentxa leswo, hi va na hi hanya hi ku ya hi leswi vito dzrezru dzri tlhamuxelaka swone, Timboni ta Yehovha! —Amaps. 83:18; Rom. 10:13-15.

HI TA TAMA HI ZREZRA KU YA TLHASA WUGAMU

14. He yini mintxhumu ya ku nyonxisa leyi nga ha yentxekaka ku nga li khale?

¹⁴ Hi swi zrindzrele hi manyawu ku vona leswi taka yentxeka ku nga li khale! Hi ku tovokisiwa hi Yehovha, hi yimela ku vona vhanu vanyingi va yamukela ntiyiso na nhlomulo lowukulu wu nga si na sungula. Handle ka leswo, ha nyonxa ku tiva leswaku nambi hi nkama wa nhlomulo lowukulu ku nga nkama wa ku kazrata ku tlula hinkwayu, swi nga yentxeka vhanu vanyingi va ta tsrhika misava ya Sathana va va va tipatsra na hine a ku gandzreleni ka Yehovha!—Mint. 13:48.

15-16. I yini leswi hi taka tama hi swi yentxa nakone hi ta swi yentxa ku ya tlhasela dzrini?

¹⁵ Na leswo swi nga si yentxeka, hi ni tovoko dzra ku patsreka ka ntizro wa lisima ngopfu swinene, ku nga ntizro wa ku zrezra madzrungula lamanene ya Mfumu wa Xikwembu Nkulukumba a misaveni hinkwayu. Hi nkama wu li wun’we, hi fanela ku tama hi byela van’wana mayelanu ni leswi taka yentxeka ku nga li khale. A vhanu va vilela ku swi tiva leswaku a wugamu bya xiyimu lexi xa misava byi tsrhindzrekela hi ku kahlula. Kutani loko nkama lowo wa wuyavanyisi wu tlhasa a vhanu va ta swi tiva leswaku a dzrungula ledzri na hi dzri zrezra a dzri pfa ka Xikwembu Nkulukumba.—Ezek. 38:23.

¹⁶ Kutani ke, i yini leswi hi tiyimiseliki ku swi yentxa? Hi ku susumeteliwa hi lizrandzru ledzri hi nga na dzrone hi madzrungula lamanene, hi vhanu, ku tlula hinkwaswu lizrandzru ledzri hi nga na dzrone hi Xikwembu Nkulukumba ni vito dzrake, hi ta tama hi zrezra hi ku hiseka, hi xihantla ni hi nkhinkhi ku ya tlhasa loko Yehovha a ku: ‘Swi dzringanile!’