BIBLIYOTEKA Dzra Watchtower Ka Internet
Dzra Watchtower Ka Internet
BIBLIYOTEKA
Xironga
  • BIBELE
  • SWIPALUXIWA
  • MINTLHANGANU
  • w25 Mayu matl. 14-19
  • Lavisisa Doropa Ledzra Ha Taka

A ku na video ka leswi u swi hlawuliki

Dzrivalelo, ku ni leswi hoxekiki akuva video dzri txhaya.

  • Lavisisa Doropa Ledzra Ha Taka
  • Xihondzro Xa Ku Zrindzra Xi Zrezraka Mfumu Wa Yehovha (Nhlayu Ya Xidondzro)—2025
  • Swinhlokwanamhaka
  • Leswi Yelanaka Na Dzrone
  • DUMBA YEHOVHA LWEYI A KALAKA A NGE TI KU TSRHIKA
  • YINGISETANI LAVA MI ZRANGELAKA
  • KOMBISA LIZRANDZRU DZRA WUMAKWEZRU NI MALWANDLA
  • LESWI TAKA YENTXEKA A NKAMENI LOWU TAKA
  • Papela Ledzri Nga Hi Pfunaka Ku Tama Hi Dumbeka Ku Ya Tlhasa Wugamu
    Xihondzro Xa Ku Zrindzra Xi Zrezraka Mfumu Wa Yehovha (Nhlayu Ya Xidondzro)—2024
  • Swiboho Leswi Kombisaka Leswaku Ha Mu Dumba Yehovha
    Xibukwana Xa Ntlhanganu Wa Wutomi Ni Wutizreli Byezru Bya Wukriste—2023
  • Titsrongahati Loko Ku Ni Leswi U Kalaka U Nga Swi Tivi
    Xihondzro Xa Ku Zrindzra Xi Zrezraka Mfumu Wa Yehovha (Nhlayu Ya Xidondzro)—2025
  • Ku Tsrhindzrekela Ka Van’wana I Ntxhumu Wa Wunene Kwezru!
    Xihondzro Xa Ku Zrindzra Xi Zrezraka Mfumu Wa Yehovha (Nhlayu Ya Xidondzro)—2025
Vona Leswi Yengetelekiki
Xihondzro Xa Ku Zrindzra Xi Zrezraka Mfumu Wa Yehovha (Nhlayu Ya Xidondzro)—2025
w25 Mayu matl. 14-19

NHLOKOMHAKA YA XIDONDZRO 21

LISIMU 21 Zrangisa Mfumu Wa Yehovha A Wuton’wini

Lavisisa Doropa Ledzra Ha Taka

“Hi dzri lavisele ngopfu [doropa] ledzra ha taka.”—HEB. 13:14.

NKONGOMETO

Ku vona ndlela leyi buku dzra Vaheberu ndzrima 13 dzri nga hi pfunaka ha yone swoswi ni le nkameni lowu taka.

1. Xana Yesu a profete leswaku a ku ta yentxeka yini a Yerusalema a dzaneni dzra ku sungula?

NA KE sala masikunyana na a nge si fa, Yesu Kriste a nyikele wutsrhokotsrhoko lebyi hetisekiki ka ku sungula a masikwini ya wugamu ya xiyimu xa Xiyuda. Yesu a va dzrimuxe leswaku a doropa dzra Yerusalema a dzri ta ‘tsrandzreliwa hi masotxha’. (Luk. 21:20) Yesu a byele vadondzrisiwa vake leswaku loko va vona masotxha ya Varoma a va fanela ku tsrutsruma.—Luk. 21:21, 22.

2. He swini switsratsriyo leswi Pawulo a swi nyikiki vakriste va Vaheberu va le Yudeya ni va le Yerusalema?

2 Na ke sala malembenyana na masotxha ma nga si tsrandzrela Yerusalema, mupostola Pawulo a tsrale buku dzra ntamu ledzri swoswi dzri vitaniwaka buku dzra Vaheberu. Ka papela ledzro Pawulo a nyike vakriste va le Yudeya ni va le Yerusalema switsratsriyo leswi a swi ta va pfuna akuva va tilulamisela ka leswi a swa ha ta. Kasi i yini leswi a swa ha ta? Yerusalema a a ta helisiwa. Loko ku li leswaku vakriste a va djula ku huluka, a va fanela ku tilulamisela ku tsrutsruma va siya tiyindlu tavu ni manegosiyu yavu. Kutani Pawulo a tsrale leswi hi doropa dzra Yerusalema: “Lani a hi na dzrone doropa ledzri taka tsrhamisa hi lani ku nga helikiki.” A tlhela a ku: “Kambe hi dzri lavisele ngopfu ledzra ha taka.”—Heb. 13:14.

3. I yini “doropa ledzri nga ni masungulo lama tiyiki” nakone ha yini hi dzri lavisela?

3 Vakriste lava tsrutsrumiki Yerusalema ni Yudeya, swi nga yentxeka va lavisane ni ku kanetiwa ni ku poyileliwa, kambe xiboho xavu xi va huluxile. Namunhla ha poyileliwa hi leswi hi nga dumbiki vhanu kumbe hi leswi hi nga landzreleliki mintxhumu leyi vonekaka ya misava leyi. Ha yini hi hlawula ku yentxa leswo? Hikusa ha swi tiva leswaku xiyimu xa misava leyi i xa nkamanyana. Hi “yimela doropa ledzri nga ni masungulo lama tiyiki” kumbe “ledzri dzra ha taka” ku nga Mfumu wa Xikwembu Nkulukumba.a (Heb. 11:10; Mat. 6:33) Ka xinhlokwanamhaka xin’wana ni xin’wana ka nhlokomhaka leyi hi ta vona: 1) ndlela leyi xitsratsriyo xa Pawulo xi va pfuniki ha yone vakriste va le dzaneni dzra ku sungula ku tama va yimela a “[doropa] ledzra ha taka”, 2) ndlela leyi Pawulo a va pfuniki ha yone akuva va tilulamisela ka leswi a swa ha ta ni 3) ndlela leyi switsratsriyo swa Pawulo swi hi pfunaka ha yone namunhla.

DUMBA YEHOVHA LWEYI A KALAKA A NGE TI KU TSRHIKA

4. Ha yini Yerusalema a a li mbangu wa lisima ka vakriste?

4 A Yerusalema a ku li mbangu wa lisima ka vakriste hikusa hi lani bandla dzra wukriste a dzri simekiwe kone hi 33 N.Y., nakone a Huvo Leyi Zrangelaka a yi kumeka ka doropa dzroledzro. Handle ka leswo, vakriste a va ni mimiti yinyingi ni mintxhumu leyi vonekaka a doropeni. Nambitanu, Yesu a byele vadondzrisiwa vake leswaku a swi ta djula va suka a Yerusalema ni le Yudeya.—Mat. 24:16.

5. Xana Pawulo a va lulamisele hi ndlela yini vakriste ka leswi a swa ha ta?

5 Leswi Pawulo a a djula leswaku vakriste va tsrhama na va tilulamisele ku suka a Yerusalema, a va pfune ku swi twisisa ku yampswa leswi Yehovha a a titwisa xiswone hi doropa ledzro. Pawulo a va pfune ku vona leswaku hi ku ya hi langutelo dzra Yehovha, a tempele, vaprista kun’we ni magandzrelo lawa a ma nyikeliwa a Yerusalema a swi nga ha xwenganga. (Heb. 8:13) Ntalu wa lava a va tsrhama ka doropa ledzro a va yale Mesiya. A tempele dzra Yerusalema a ku nga ha li ntsindzra wa wugandzreli bya ku xwenga nakone a dzri ta helisiwa.—Luk. 13:34, 35.

6. Ha yini xidzrimuxo xa Pawulo lexi kumekaka ka Vaheberu 13:5, 6 xi tlhase hi nkama wa kone?

6 Nkama lowu Pawulo a nga tsralela Vaheberu, Yerusalema a a li doropa ledzri a dzri ganyile. Mutsrali wa kukazri wa le nkameni luwani a tsrale leswaku “Yerusalema a ku li doropa ledzri nga ni ndhuma ku tlula madoropa man’wana ka tlhelo ledzriyani dzra misava”. Lembe ni lembe Vayuda lavan’wana a va yendzra va ya a Yerusalema akuva va ya hlalela minkhuvu, leswi a swi yentxa ku va doropa dzri hluvuka. Handle ka ku ganaganeka, vakriste na vone va pfunekile hi nhluvuku lowo. Swi nga yentxeka ku li leswi yentxiki Pawulo a ku: “Mi nga zrandzri mali, ku hambana ni leswo, nyonxani hi leswi mi nga na swone.” Hi ku landzrela a tsrhahe xidumbiso lexi tiyiki lexi kumekaka Matsralweni. A tiyisekise mazritu ya Yehovha loko a ku: “A ni nge ti txhuka ni ku tsrhika, nakone a ni nge ti txhuka ni yima ku ku pfuna.” (Dondzra Vaheberu 13:5, 6; Deut. 31:6; Amaps. 118:6) A vakriste lava a va tsrhama Yerusalema ni le Yudeya a va ta vilela xitiyisekiso lexi. Ha yini? Hikusa ntsrhakunyana ka loko va yamukele papela ledzro a va ta vilela ku tsrhika mimiti yavu, manegosiyu yavu ni mintxhumu yavu. Kutani a va fanela ku lavisana ni leswi a swa ha ta.

7. Ha yini hi fanela ku tiyisa lipfumelo dzrezru ka Yehovha na ke he swoswi?

7 Leswi hi swi dondzraka: Ku ta yentxeka yini ku nga li khale? Ku ta sungula “nhlomulo lowukulu” hi ku landzrela ku helisiwa xiyimu lexi xa misava. (Mat. 24:21) Ku fana ni vakriste va lembe xidzana dzra ku sungula, hi fanela ku tsrhama na hi zrindzrile. (Luk. 21:34-36) Hi nkama wa nhlomulo lowukulu, swi nga yentxeka swi ta sindzrisa hi tsrhika mintxhumu ya kukazri kumbe mintxhumu hinkwayu leyi hi nga na yone na hi dumba hi ku helela leswaku Yehovha a nge ti hi tsrhika. Na ke he swoswi, na nhlomulo lowukulu wu nga si sungula hi ni mukhandlu wa ku kombisa leswaku ha mu dumba Yehovha. Tivutise: ‘Xana ndlela leyi ni hanyaka ha yone, makungu yanga swi kombisa leswaku ni dumba mintxhumu leyi vonekaka ku tlula xidumbiso xa Xikwembu Nkulukumba xa leswaku a ta ni hlayisa?’ (1 Tim. 6:17) Nambileswi ku nga ni swinyingi leswi hi nga swi dondzraka ka leswi humeleliki vakriste va le dzaneni dzra ku sungula, a nkameni lowu taka a “nhlomulo lowukulu” wu ta kazrata ku tlula ntxhumu wun’wana ni wun’wana lowu samiki wu humelela vakriste namunhla. Kutani ke, hi ta swi tivisa kuyini leswi hi fanelaka ku swi yentxa loko nhlomulo lowukulu wu sungula?

YINGISETANI LAVA MI ZRANGELAKA

8. He swini swileleto leswi Yesu a swi nyikiki vadondzrisiwa vake?

8 Malembenyana ntsrhaku ka loko va yamukele papela dzra Pawulo, vakriste va Vaheberu va vone masotxha ya Varoma ma tsrandzrela doropa dzra Yerusalema. Leswo a swi kombisa leswaku nkama wa kuva va tsrutsruma a wu tlhasile hikusa doropa dzra Yerusalema a dzri ta helisiwa. (Mat. 24:3; Luk. 21:20, 24) Kambe a va ta tsrutsrumela kwini? Yesu a a va byelile a ku: “Lava nga a Yudeya a va tsrutsrumeli a tinhaveni.” (Luk. 21:21) Leswi a ku ni tinhava tinyingi a mugangeni luwani, xana a va ta tsrutsrumela ka tinhava tini ta kone?

9. Ha yini vakriste swi nga ha yentxekaka va tivutise leswaku a va ta tsrutsrumela ka tinhava tini? (Tlhela u vona ni mapa.)

9 Hi leti tin’we ta tinhava leti vakriste a va ta tsrutsrumela ka tone: Tinhava ta Samariya, tinhava ta Galileya, Nhava ya Hermoni, tinhava ta Lebanoni ni tinhava leti a tikumeka ka tlhelo dzrin’wana dzra Yordani. (Vona mapa.) Man’we ya madoropa lawa a ma kumeka ka mimbangu leyi ya tinhava a yi tikomba na yi sizrelelekile. Hi xikombiso, a doropa dzra Gamla a dzri kumeka ka nhava leyi tlakukiki leyi swi kazrataka ku tlhasa ka yone. Xileswo, van’we va Vayuda va vone nhava leyo na ku li mbangu lowunene wa ku tsrutsrumela ka wone. Nambitanu, a doropa dzra Gamla dzri ve mbangu lowu ku viki ni yimpi ya ku hisa a makazri ka Vayuda ni Varoma nakone vhanu vanyingi lava a va hanya ka mbangu lowo va file.b

Mapa lowu kombisaka tin’we ta tinhava ni madoropa ya Israyele a dzaneni dzra ku sungula. A n’walungu wa le Yerusalema ku ni tinhava ta Lebanoni , Galileya, Samariya, ni Giliyadi, kun’we ni Nhava ya Hermoni ni Nhava ya Tabori. A madoropa ya n’walungu wa Yerusalema i Gamla, Khezariya, ni Pela. A nyingitimu wa Yerusalema ku ni tinhava ta Yudeya ni Abarimi, kun’we ni doropa dzra Masada. A mapa wu tlhela wu kombisa mimbangu ya Varoma leyi Vayuda va yi luziki hi 67 N.Y ku ya ka 73 N.Y.

A ku ni tinhava tinyingi leti vakriste a va ta tsrutsrumela ka tone, kambe a hi hinkwatu leti a ti tikomba na ti sizrelelekile. (Vona yava 9)


10-11. a) Xana Yehovha a nga va a nyikele nkongomiso hi ndlela yini? (Vaheberu 13:7, 17) b) Xana vakriste va pfunekise kuyini hi kuva va yingisete lava zrangelaka? (Tlhela u vona ni mufoto.)

10 Swi tikomba na Yehovha a kongomise vakriste hi ku tizrisa lava a va zrangela bandleni. N’wamatimu wa kukazri lweyi a vitaniwaka Eusébio hi ku famba ka nkama a tsrale leswi: “A vhanu a bandleni dzra Yerusalema hi ku pfuniwa hi Xikwembu Nkulukumba va yamukele nkongomiso lowu pfaka hi ka lava a va zrangela, lowu a wu hlaya leswaku a va fanela va tsrutsruma doropeni na yimpi yi nga si sungula va ya doropeni dzra kukazri a Pereya ka mbangu lowu vitaniwaka Pela.” Ku ya a Pela swi tikomba na ku ve xiboho lexinene hikusa a ku nga li kule ni Yerusalema, leswi a swi yentxa swi nabyala ku tlhasa kone. Handle ka leswo, ntalu wa vhanu lava a va tsrhama Pela a va nga li Vayuda xileswo a va nga dzringisi ku lwa ni Varoma.—Vona mapa.

11 Vakriste lava tsrutsrumeliki tinhaveni va tizrise xitsratrsiyo xa Pawulo xa ku ‘yingiseta lava va zrangelaka’ a bandleni. (Dondzra Vaheberu 13:7, 17.) Swanga mabindzru, vhanu va Xikwembu Nkulukumba va hulukile. Matimu ma kombisa leswaku Xikwembu Nkulukumba a nga va tsrhikanga lava a va “yimela doropa ledzri nga ni masungulo lama tiyiki” ku nga Mfumu wa Xikwembu Nkulukumba.—Heb. 11:10.

Ntlawa wa kukazri wa vhanu lava nga vakriste va le dzaneni dzra ku sungula va fambaka ni mintxhumu yavu ka mbangu lowu nga ni tinhava.

A Pela a ku sizrelelekile (Vona mayava 10-11)


12-13. Xana Yehovha a kongomisa vhanu vake hi ndlela yini a minkameni ya ku kazrata?

12 Leswi hi swi dondzraka: Yehovha a tizrisa lava zrangelaka akuva va nyikela nkongomiso ka vhanu vake. Matsralwa ma tale hi swikombiso swinyingi swa ndlela leyi Yehovha a tizrisiki ha yone vabyisi akuva va kongomisa vhanu vake ka swiyimu swa ku kazrata. (Deut. 31:23; Amaps. 77:20) Nakone namunhla hi vona mintxhumu yinyingi leyi kombisaka leswaku Yehovha a ha tama a kongomisa lava zrangelaka.

13 Hi xikombiso, loko ntungu wa COVID-19 wu sungulile “lava va . . . zrangelaka” va nyikele minkongomiso leyi vilelekaka. Vakulu va yamukele minkongomiso akuva va pfuna vamakwezru hi swivileleko swavu swa moya. Na ntungu wa COVID-19 wa ha ku sungula hi hambe kongresu ledzri hlamalisaka hi ku tlula 500 wa tindzrimi hi Internet, televhizawu ni radiyu. Hi tame hi phameliwa swakuda swa moya. Swanga mabindzru, hi tama hi va ni wumun’we. Hi nga tiyiseka leswaku Yehovha a ya mahlweni a pfuna lava va hi zrangelaka akuva va tama va hi kongomisa hi wutlhazri. Handle ka ku dumba Yehovha ni ku yingiseta swileleto swake, he wani matsrhamela lawa ma taka hi pfuna ku tama hi tiyisela ka nhlomulo lowukulu ni ku yentxa mintxhumu hi ndlela ya wutlhazri ka xiyimu lexi xa ku txhavisa?

KOMBISA LIZRANDZRU DZRA WUMAKWEZRU NI MALWANDLA

14. Hi ku ya hi Vaheberu 13:1-3, he wani matsrhamela lawa vakriste va fanelaka ku va na wone?

14 Loko nhlomulo lowukulu wu sungula, swi ta vilela kuva hi kombana lizrandzru ku tlula ndlela leyi hi buyaka na hi swi yentxa ha yone. Leswi liki, swi ta djula hi yetisela xikombiso xa vakriste lava a va hanya a Yerusalema ni le Yudeya. Vone a va kombisana lizrandzru minkama hinkwayu. (Heb. 10:32-34) Kambe ka masiku ya wugamu na Yerusalema a nga si helisiwa, a vakriste a va fanela va ‘zrandzranana ingiki hi loko va li vamakwavu’ ni ku kombisana “malwandla” hi ndlela leyi tlulisaka.c (Dondzra Vaheberu 13:1-3.) Swi ta djula na hine hi yentxa hi ndlela leyi fanaka loko ku tlhasa wugamu bya xiyimu lexi xa misava.

15. Ha yini a swi vilela leswaku vakriste va Vaheberu va kombana lizrandzru dzra hakakunene ni malwandla ntsrhaku ka loko va tsrutsrumile?

15 Loko masotxha ya Varoma ma tsrandzrele Yerusalema ma va ma suka na swi nga yimeliwanga, vakriste va tsrutsrumile na va li ni mintxhumu ya yitsrongo. (Mat. 24:17, 18) Na va li ku yendzreni va ya tinhaveni a swi djula kuva va pfunana nakone va ye tsrhama mutini wavu lowumpshwa. Handle ka ku ganaganeka, vanyingi a va ni “swivileleko swa xihantla” nakone a swi ta pfula mikhandlu ya ku va mukriste mun’wana ni mun’wana a kombisa lizrandzru dzra hakakunene, a kombisa malwandla, a pfuna van’wana ni ku yavelana ni vambeni leswi a a li na swone.—Tit. 3:14.

16. Xana hi nga kombisa lizrandzru hi ndlela yini ka vamakwezru lava vilelaka mpfunu? (Tlhela u vona ni mufoto.)

16 Leswi hi swi dondzraka: Lizrandzru dzri hi susumetela ku pfuna vamakwezru loko va vilela mpfunu wezru. Vanyingi ka vhanu va Xikwembu Nkulukumba, va tiyimisele ku pfuna ku yanelisa swivileleko swa moya ni swa nyama swa vamakwezru lava viki vahlapfa hi kola ka swikazratu swa tiyimpi ni swa timhangu ta ntumbuluku leti ta ha ka ku humelela. Makwezru wa kukazri wa le Ucrânia, lweyi a sindzrisekiki ku suka kaya hi kola ka yimpi a te: “Hi vone ndlela leyi Yehovha a tizrisaka vamakwezru ha yone akuva va hi pfuna va tlhela va hi kongomisa. Vamakwezru va hi yamukele ha hombe va va va hi pfuna nkama lowu a hi li a Ucrânia, a Hungria nakone swoswi hi nga lani Alemanha va tama va yentxa hi lani ku fanaka.” Hi tizrisana na Yehovha loko hi kombisa vamakwezru malwandla ni ku va pfuna hi leswi va swi vilelaka.—Amapr. 19:17; 2 Kor. 1:3, 4.

Vatekani lava kuliki hi ntanga va yamukelaka ndangu wa kukazri wa vahlapfa a kaya kwavu. Ndangu lowo wu ni mintsrhwalu ya kukazri.

Vamakwezru lava nga vahlapfa va vilela mpfunu wezru (Vona yava 16)


17. Ha yini swi li swa lisima ku txutxela lizrandzru ni malwandla na ke he swoswi?

17 Hi nkama wa nhlomulo lowukulu swi ta djula kuva hi pfunana ku tlula ndlela leyi hi pfunanaka ha yone swoswi. (Hab. 3:16-18) Yehovha a hi lulamisela swoswi kuva hi txutxela lizrandzru ni malwandla ku nga matsrhamela lawa ma taka hi pfuna a nkameni lowu taka.

LESWI TAKA YENTXEKA A NKAMENI LOWU TAKA

18. Hi nga va yetiselisa kuyini vakriste va Vaheberu va le dzaneni dzra ku sungula?

18 Hi lani matimu ma kombisaka ha kone, vakriste lava tsrutsrumeliki tinhaveni va hulukile loko Yerusalema a helisiwa. Yehovha a nga zanga a va tsrhikile nambileswi va sukiki doropeni dzra Yerusalema. Ku hlayiwa yini a masikwini yezru? A hi swi tivi hi ku kongoma leswaku mintxhumu yi ta yentxekisa kuyini a nkameni lowu taka kambe hi ni swidzrimuxo swa Yesu leswi taka hi pfuna ku tiva leswi hi fanelaka ku swi yentxa. (Luk. 12:40) Nakone hi ni switsratsriyo swa Pawulo leswi hi swi kumaka ka papela dzrake ledzri a dzri ya ka Vaheberu, ku nga swilayu leswi tizraka hi lani a swi tizra ha kone ka lembe xidzana dzra ku sungula. Hi tlhela hi va ni xitiyisekiso xa Yehovha xa leswaku a nge ti txhuka a hi tsrhika. (Heb. 13:5, 6) A hi tameni hi lavisela doropa ledzra ha taka ku nga Mfumu wa Xikwembu Nkulukumba nakone a hi tiyimiseleni ku tikholisa hi matovoko lawa ma nga helikiki lawa ma taka tisiwa hi doropa ledzri.—Mat. 25:34.

A U TA HLAMULISA KUYINI?

  • Ha yini swi djula ku va hi tiyisa ndlela leyi hi dumbaka Yehovha ha yone swoswi?

  • Ha yini ku yingiseta ku ta va ka lisima hi nkama wa “nhlomulo lowukulu”?

  • Ha yini swi li swa lisima ku txutxela lizrandzru dzra wumakwezru ni malwandla na ke he swoswi?

LISIMU 157 Ku Zrula Loku Nga Helikiki!

a A minkameni ya Bibele, a madoropa a ma fumiwa hi hosi yin’we. A doropa ledzri a dzri fumiwa hi hosi yin’we a dzri voniwa swanga mfumu.—Gen. 14:2.

b Leswo swi yentxeke hi 67 N.Y., ntsrhakunyana ka loko vakriste va tsrutsrumile a Yudeya ni le Yerusalema.

c A xiga lexi ndzruluteliwiki xi va ku “zrandzranana ingiki hi loko mi li vamakwavu” xi nga ha tlhamuxela lizrandzru ledzri hi nga na dzrone hi maxaka yezru ya le kusuhi, kambe Pawulo a tizrise xiga lexi akuva a kombetela lizrandzru ledzri nga kone ndzreni ka bandla.

    Mabuku Ya Xizronga - (2003-2025)
    Huma
    Nghena
    • Xironga
    • Zrumela
    • Tihlawulele
    • Copyright © 2025 Watch Tower Bible and Tract Society of Pennsylvania
    • Milawu Ya Matizrisela
    • Nawu Wa Xihundla
    • Seta Swa Xihundla
    • JW.ORG
    • Nghena
    Zrumela