Ndlela Ya Ku Nyikela Switsratsriyo Leswinene

1. I mani a fanelaka ku nyikela switsratsriyo nakone ha yini?

XANA wa swi zrandzra ku nyika van’wana switsratsriyo? Van’wana va nyonxa hi ku nyikela switsratsriyo kasi van’wana va txhava kumbe a va titwi ha hombe ku yentxa leswo. Swi nge na mhaka ni ndlela leyi hi titwaka ha yone, minkama yin’wana hi sindzriseka ku nyikela switsratsriyo. Ha yini? Hikusa Yesu a hlaye leswaku valandzreli vake va ta tiviwa hi ku kombisana lizrandzru. (Yoh. 13:35) Yin’we ya tindlela ta ku kombisa leswaku ha va zrandzra vamakwezru i ku va nyika swilayu. Handle ka leswo, a Bibele dzri hlaya leswaku loko hi nyikela swilayu leswi sukelaka mbilwini hi tiyisa a wunghanu byezru.—Amapr. 27:9.

2. Xana vakulu va fanela ku va ni wuswikoti bya ku yentxa yini nakone ha yini? (Tlhela u vona ni bokisi ledzri liki: “Ku Nyikela Switsratsriyo Ka Mintlhanganu Ya Le Xikazri Ka Vhiki.”)

² Vakulu hi ntshima va fanela ku va ni wuswikoti bya ku nyikela switsratsriyo leswinene. Hi ku tizrisa Yesu, Yehovha a beke vavanuna lava akuva va hlayisa bandla. (1 Pet. 5:2, 3) Tin’we ta tindlela ta ku yentxa leswo i ku nyikela swilayu leswi seketeliwiki a Bibeleni loko va beka wukaneli a bandleni. Va tlhela va hi nyika swilayu loko hi swi vilela ku patsra ni lava va tsrhikiki Yehovha akuva va tlhelela bandleni. Xana vakulu na hine hinkwezru, hi nga nyikela switsratsriyo leswinene hi ndlela yini?

3. a) Hi nga dondzra ku nyikela swilayu leswinene ka van’wana hi ndlela yini? (Ezaya 9:6; tlhela u vona ni bokisi ledzri liki: “Yetisela Yesu Loko U Nyikela Xilayu.”) b) Hi ta bula hi yini ka nhlokomhaka leyi?

³ Hi nga dondzra swinyingi mayelanu ni ku nyikela swilayu leswinene loko hi kambisisa swikombiso swa vhanu va le Bibeleni ngopfungopfu ka xikombiso xa Yesu Kriste. A Bibele loko dzri khanela ha Yesu Kriste dzri li i: ‘Mutlhavukanyisi lwe wa ku hlamalisa.’ (Dondzra Ezaya 9:6.) Ka nhlokomhaka leyi, hi ta bula hi leswi hi nga swi yentxaka loko va hi kombela ku va nyika swilayu ni leswi hi nga swi yentxaka akuva hi nyikela switsratsriyo na hi nga kombeliwanga. Hi ta tlhela hi vona lisima dzra ku nyikela swilayu hi ndlela leyinene ni hi nkama lowunene.

LOKO VA HI KOMBELA KU VA NYIKA SWITSRATSRIYO

4-5. Loko mhunu a hi kombela switsratsriyo, he xini xivutiso lexi hi fanelaka ku tihamba xone? Nyikela xikombiso.

⁴ Loko mhunu a hi kombela switsratsriyo hi fanela ku yangulisa kuyini? Hi nga ha titwa hi hlawuleke ngopfu lakakuva hi tekela ku mu pfuna hi nkama wolowo. Kambe ku sungula hi fanela ku tivutisa leswi: “Xana ni nga swi kota ku mu nyika switsratsriyo mayelanu ni mhaka leyi?” Minkama yin’wana a swa ku yampswa i kuva u nga mu nyiki switsratsriyo, kambe u mu kongomisa ka mhunu lweyi a fanelekaka akuva a mu nyika nkongomiso mayelanu ni mhaka yake.

⁵ Yanakanya hi mhaka leyi. A hi nge munghanu waku lwenkulu a ni mavabyi lamakulu. A ku byela leswaku a hambe wusetxhi mayelanu ni madahela ya mavabyi yake, kutani a ku kombela kuva u mu pfuna ku vona madahela lawa u ma vonaka na ma yampswa. Swi nga yentxeka u mu byela madahela ya kukazri lawa u ma tivaka, kambe xa ku sungula wene a u dokodela nakone a u wupfisiwanga akuva u daha mavabyi. Ka xiyimu lexo, ndlela ya ku yampswa ya kuva u pfuna munghanu waku i ku mu kongomisa ka mhunu lweyi a fanelekaka akuva a mu pfuna.

6. Ha yini hi fanela ku yimanyana na hi nga si na nyikela switsratsriyo?

⁶ Nambiloko hi tivona na hi faneleka ku nyikela switsratsriyo mayelanu ni mhaka ya kukazri, hi nga yentxa swone loko hi yimanyana na hi nge si na mu hlamula lweyi a hi kombelaka swilayu. Ha yini? Amaproverbia 15:28 yi li: ‘A mbilu ya lwa lulamiki yi yanakanya ku sungula.’ Kambe swi li yini loko a li leswaku ha yi tiva nhlamulo? Ni loko swi li hi ndlela leyo swi djula ku va hi tinyika nkama wa ku hamba wusetxhi, ku khongota ni ku yanakanyisisa hi mhaka leyo. Hi ndlela leyo hi ta tiyiseka leswaku nhlamulo yezru yi fambisana ni matitwela ya Yehovha mayelanu ni mhaka leyo. Vona xikombiso xa muprofeta Natani.

7. U dondzra yini ka xikombiso xa muprofeta Natani?

⁷ Hosi Davhida a byele muprofeta Natani leswaku a a djula ku yakela Yehovha tempele. Natani a vhele a byela Hosi Davhida ku yentxa swoleswo. Kambe ku sungula Natani a a fanela ku vutisa Yehovha. Ha yini? Hikusa Yehovha a a nga swi djulisi xileswo. (1 Makr. 17:1-4) Hi lani hi swi vonaka ha kone ka xikombiso lexi, loko hi kombeliwa xilayu hi ta va na hi yentxa swone loko hi “hlwela ku vulavula”.—Yak. 1:19.

8. He xini xivangelo xin’wana lexi fanelaka ku hi yentxa hi yanakanyisisa ha hombe na hi nga si na nyikela switsratsriyo?

⁸ A hi voneni xikombiso xin’wana lexi hi pfunaka ku pimisa ha hombe na hi nge si na nyikela switsratsriyo. Loko hi nyika mhunu wa kukazri xitsratsriyo lexi hoxekiki, hi ta va ni nandzru loko a yentxekeliwa hi mintxhumu ya ku biha. Hi ndlela leyo, hi ni swivangelo leswi twalaka swa ku yanakanyisisa ha hombe na hi nge si na nyikela switsratsriyo.

LOKO HI NYIKELA SWILAYU NA HI NGA KOMBELIWANGA

9. I yini leswi vakulu va fanelaka ku tiyiseka ha swone na va nga si nyikela swilayu? (Vagalatiya 6:1)

⁹ Minkama yin’wana, swi sindzrisa ku va vakulu va nyikela swilayu ka makwezru lweyi a nga “huma ndleleni na a nga swi xiyi”. (Dondzra Vagalatiya 6:1.) Mhunu lweyo a nga ha teka swiboho leswi nga liki swinene leswi hi ku famba ka nkama swi nga mu yentxaka a hamba xidoho lexikulu. Nkongometo wa vakulu i ku pfuna mhunu lweyo leswaku a tama a famba ka ndlela leyi yisaka a wuton’wini lebyi nga helikiki. (Yak. 5:19, 20) Akuva swilayu swavu swi famba ha hombe, ku sungula vakulu va fanela ku tiyiseka leswaku nakunene mhunu lweyo a hume ndleleni. Va fanela ku swi twisisa leswaku akuva mhunu a teke xiboho lexi hambaniki ni xavu, a swi hlayi swone leswaku a yentxa ntxhumu lowu khunguvanyisaka Yehovha. (Rom. 14:1-4) Kambe swi li yini loko makwezru wa kukazri nakunene a hume ndleleni kutani vakulu va teka xiboho xa ku mu nyika xilayu?

10-12. I yini leswi vakulu va fanelaka ku swi yentxa loko va nyikela swilayu ka mhunu lweyi a kalaka a nga va kombelanga? Nyikela xikombiso. (Tlhela u vona ni mifoto.)

¹⁰ A swi nabyali kuva vakulu va nyika swilayu mhunu lweyi a kalaka a nga va kombelanga. Hi ndlela yini? Pawulo a hlaye leswaku swi nga yentxeka mhunu a nga swi xiyi leswaku a hume ndleleni. Xileswo, na va nge si na mu nyika swilayu mhunu lweyo ku ni leswi vakulu va fanelaka ku swi yentxa akuva swi nabyala leswaku a va yingiseta.

¹¹ Ku nyikela swilayu ka mhunu lweyi a kalaka a nga kombelanga swi fana ni ku byala mbewu ka masimu lawa ma kalaka ma nga dzrimiwanga. Akuva mudzrimi a byala mbewu ku sungula a fanela ku dzrima, leswo swi nabyalisa misava ni ku yi lulamisela ku yamukela mbewu. Kutani hi ku landzrela a byala, hi wugamu a txheletela mbewu leswaku yi kota ku kula. Hi ndlela leyi fanaka, loko nkulu a nge si na nyikela swilayu leswi a kalaka a nga kombeliwanga, a yentxa swone loko a sungula hi ku lulamisela nsimu hi ndlela ya ku fanekisela. Hi xikombiso, nkulu a yimela nkama lowunene wa kuva a byela makwezru leswaku awa zron’weka ha yene ni leswaku ku ni leswi a nyonxelaka ku mu byela swone. Loko lweyi a nyikelaka swilayu a ni ndhuma ya ku kombisa lizrandzru ni wunene, swi ta nabyala kuva mhunu a yamukela switsratsriyo swake.

¹² Nkulu wa bandla a nga tlhela a yentxa leswaku swi nabyala kuva mhunu lweyo a yamukela swilayu swake hi ku mu dzrimuxa leswaku hinkwavu va yentxa swihoxo nakone minkama yin’wana va vilela swilayu. (Rom. 3:23) Hi ndlela ya ku zrula ni xitxhavu, nkulu wa bandla a tizrisa Bibele leswaku a mu tlhamuxela hi ku khanya leswaku a hume ndleleni. Loko makwezru a swi twisisa leswaku a hoxile, nkulu wa bandla a “byala mbewu” hi ku mu tlhamuxela hi ku nabyala leswi a fanelaka ku swi yentxa akuva a lulamisa mhaka yake. Hi wugamu, nkulu wa bandla a “txheletela” mbewu hi ku kulungela makwezru lweyo na swi sukela mbilwini ni ku va a khongota na yene.—Yak. 5:15.

13. I yini leswi vakulu va nga swi yentxaka akuva va tiyiseka leswaku mhunu lweyi va mu nyikiki xilayu a xi twisisile?

¹³ Minkama yin’wana, leswi lweyi a nyikelaka xilayu a swi hlayaka ni leswi lweyi a nyikiwaka xilayu a swi twisisaka swi nga ha hambana. I yini leswi vakulu va nga swi yentxaka akuva leswo swi nga yentxeki? Hi ndlela ya lizrandzru, vakulu va fanela ku hamba swivutiso mhunu lweyo akuva va vona leswaku a xi twisisile xilayu ni leswi a nga swi yentxaka akuva a xi tizrisa. (Ekles. 12:11) A tinhlamulo ta lweyi a nyikiwaka xilayu ti ta pfuna nkulu ku vona leswaku a swi twisisile kumbe im-him.

KU NYIKELA SWITSRATSRIYO HI NKAMA LOWU FANELEKAKA NI HI NDLELA LEYINENE

14. Ha yini hi nga fanelanga ku nyikela switsratsriyo na hi hlundzrukile? Tlhamuxela.

¹⁴ Leswi hinkwezru hi kalaka hi nga hetisekanga, minkama yin’wana hi ta yentxa kumbe ku hlaya ntxhumu lowu wu taka khunguvanyisa van’wana. (Kol. 3:13) A Bibele dzra swi tiyisekisa leswaku minkama yin’wana hi nga ha khunguvanyeka kumbe ku khunguvanyisa van’wana. (Efe. 4:26) Kambe a hi fanelanga ku nyikela switsratsriyo na hi hlundzrukile. Ha yini? Hikusa “loko mhunu a hlundzruka, a nga yentxi leswi fambisanaka ni wululami bya Xikwembu Nkulukumba”. (Yak. 1:20) Loko hi nyikela xitsratsriyo na hi hlundzrukile, hi nga ha kulisa mhaka. Leswo a swi hlayi swone leswaku a hi fanelanga ku hlaya leswi hi swi tivaka, leswi hi swi twisisaka ni ndlela leyi hi titwaka ha yone hi mhunu lweyi a hi hlundzrukisiki. Kambe hi ta humesa mazritu ya ku xonga loko hi yimela nkama lowu fanelekaka, leswi liki na hi zrulile. Hi nga dondzra ka xikombiso xa Elihu lweyi a nyikiki Yobe xilayu lexinene.

15. Hi dondzra yini ka xikombiso xa Elihu? (Tlhela u vona ni mufoto.)

¹⁵ Elihu a hete nkama wunyingi na yingiseta Yobe nkama lowu na a tiyimelela hi mhaka ya swihehlo swa vavanuna vazrazru. Elihu a a mu twela wusiwana Yobe. Kambe Yobe a tame a tiyimelela lakakuva a hlaye mintxhumu leyi a yi nga li ntiyiso. Hi kola ka leswo, Elihu a hlundzruke ngopfu swinene. Nambitanu, Elihu a yimele nkama lowunene akuva a vulavula a va a khanela hi ndlela ya ku zrula ni ya xitxhavu loko a nyika Yobe xilayu. (Yb. 32:2; 33:1-7) Xikombiso xa Elihu xi hi nyika dondzro ya lisima. Nkama lowu fanelekaka wa kuva hi nyikela xitsratsriyo hi loko hi zrulile nakone a ndlela leyinene i ku kombisa xitxhavu ni lizrandzru.—Ekles. 3:1, 7.

TAMA U NYIKELA SWITSRATSRIYO NI KU SWI YAMUKELA

16. Xana u dondzra yini ka Amapsalma 32:8?

¹⁶ A tsralwa dzra nhlokomhaka dzri li: ‘Ndzri ta ku mamulela na mahlo yanga ma ku lavisa.’ (Dondzra Amapsalma 32:8.) Leswo swi kombisa leswaku Yehovha minkama hinkwayu awa hi pfuna. A nga hi nyiki switsratsriyo ntsena kambe a tlhela a hi pfuna ku swi tizrisa. Xongani ka xikombiso lexi! Loko u kuma mukhandlu wa ku nyikela switsratsriyo, yetisela Yehovha nakone tama u kutxa van’wana ni ku va pfuna leswaku va teka swiboho swa wutlhazri.

17. Xana hi titwisa kuyini loko vakulu va hi nyika switsratsriyo leswi seketeliwiki Bibeleni? Tlhamuxela. (Ezaya 32:1, 2)

¹⁷ Swoswi ku tlula nkama wini na wini, hi fanela ku nyikela ni ku yamukela switsratsriyo. (2 Tim. 3:1) Vakulu lava nyikelaka swilayu leswi kongomiki, leswi seketeliwiki a Bibeleni va fana ni ‘swinambyana swa mati a mbangwini lowa ku woma’. (Dondzra Ezaya 32:1, 2.) Hi va tlangela ngopfu vanghanu lava kalaka va nga djikadjiki akuva va hi nyika swilayu leswi tizraka. Mazritu yavu ma fana ni ‘malalandzri [maçã] ya gole a swibyeni swa silivhela’. (Amapr. 25:11) Xileswo, ingiki hinkwezru hi nga tama hi dondzra ndlela leyinene ya ku nyikela ni ku yamukela swilayu.