NHLOKOMHAKA YA XIDONDZRO 30
LISIMU 97 Hi Hanya Hi Zritu Dzra Yehovha
Hi Nga Tama Hi Dondzra Ka Tidondzro Ta Masungulo Ta Bibele!
“Ni tiyimisele kuva minkama hinkwayu ni mi dzrimuxa mintxhumu leyi, nambileswi mi yi tivaka nakone mi tiyiki swinene ka ntiyiso.”—2 PET. 1:12.
NKONGOMETO
Ka nhlokomhaka leyi, hi ta vona leswi hi swi dondzriki ka tidondzro ta masungulo loko hi sungule ku dondzra Bibele ni ndlela leyi tidondzro leto ti nga hi pfunaka ha yone namunhla.
1. Xana tidondzro ta masungulo ta Bibele ti txintxe wutomi byaku hi ndlela yini?
TIDONDZRO ta masungulo ta Bibele ti txintxe wutomi byezru. Hi xikombiso, loko hi tive leswaku vito dzra Xikwembu Nkulukumba i Yehovha hi ye hi tsrhindzrekela kwake. (Eza. 42:8) Ntsrhaku ka loko hi tive leswaku ku yentxeka yini loko mhunu a fa, a ha ha kazratekanga hi maxaka yezru lawa ma fiki hi ku va hi yanakanya leswaku ma le ku xanisekeni. (Ekles. 9:10) Nakone loko hi dondzre leswaku misava yi ta va paradeyisi, hi tsrhike ku kazrateka hi wumundzruku byezru. Hi ve ni ku tiyiseka ka leswaku swa koteka leswaku hi hanya ku nga li 70 kumbe 80 wa malembe kambe hi lani ku nga helikiki.—Amaps. 37:29; 90:10.
2. Ha yini hi nga hlayaka leswaku nambi vakriste lava wupfiki va nga pfuneka hi tidondzro ta masungulo ta Bibele? (2 Petro 1:12, 13)
2 Minkama hinkwayu ha pfuneka ka tidondzro ta masungulo ta Bibele. Ka papela dzrake dzra wubidzri, mupostola Petro a tsralele vakriste lava a va ‘tiye swinene ka ntiyiso’ kumbe lava wupfiki. (Dondzra 2 Petro 1:12, 13.) Kambe a nkameni wolowo, vadondzrisi va madzrimi ni vhanu va ku biha a va lwela ku va tsravuxa ka wugandzreli bya ntiyiso. (2 Pet. 2:1-3) Petro a a djula ku tiyisa vamakwavu akuva va langusana ni xikazratu lexo, xileswo a va dzrimuxe hi leswi a va swi dondzrile. Tidondzro leto a ti ta pfuna vakriste akuva va tama va dumbeka ku ya tlhasa wugamu.
3. He xini xikombiso lexi hi pfunaka ku vona leswaku tidondzro ta masungulo ta Bibele ta ha tizra nambi ka vakriste lava wupfiki?
3 Nambileswi hi buyaka na hi tizrela Yehovha hi malembe, hi nga tama hi dondzra mintxhumu yinyingi ka tidondzro ta masungulo ta Bibele. Yanakanya hi xikombiso lexi: Mhunu lweyi a swekaka ha hombe ni lweyi o ho ko dondzrela va nga ha txhela mintxhumu leyi fanaka ka swakuda leswi va djulaka ku swi sweka. Kambe a nkama ni mfambu swi nga pfuna mhunu lweyi a swekaka ha hombe akuva a tizrisa mintxhumu leyi a swekaka hi yone hi ndlela ya ku hambanahambana ni hi ndlela leyimpshwa akuva swakuda swi nandzrika. Hi ndlela leyi fanaka, vhanu lava tizrelaka Yehovha hi nkama wa ku leha ni lava vo ho ko dondzra Bibele va tiva tidondzro tin’we ta masungulo ta Zritu dzra Xikwembu Nkulukumba kambe swi nga yentxeka va tizrisa tidondzro leto hi tindlela ta ku hambana. Ku sukela loko hi babatisiwile, swi nga ha yentxeka a wuton’wini kumbe ni ka wutizreli byezru ku ve ni ku txintxa. Loko hi yanakanyisisa hi tidondzro ta Bibele leti hi ti dondzriki a nkameni lowu khalutiki, hi vona tindlela letimpshwa ta ku ti tizrisa ka xiyimu leximpshwa. A hi voneni tidondzro tizrazru ta masungulo ta Bibele hi tlhela hi vona leswi vakriste va nga swi dondzraka ka tone.
YEHOVHA I MUTUMBULUXI
4. Xana ku tiva leswaku Yehovha i Mutumbuluxi swi txintxe wutomi byezru hi ndlela yini?
4 Ha swi tiva leswaku misava ni hinkwaswu leswi nga kone swi hambiwe hi Mutumbuluxi lweyi a nga ni wutlhazri ni ntamu. A Bibele dzri li: “Lweyi a yakiki mintxhumu hinkwayu i Xikwembu Nkulukumba.” (Heb. 3:4) Kambe hi nga dondzra mintxhumu yinyingi ka ntiyiso wolowo. Leswi ku nga Yehovha a hi tumbuluxiki, a tiva hinkwaswu mayelanu na hine. Yene awa zron’weka ha hine nakone awa swi tiva leswi nga swinene kwezru. Xileswo, ku tiva leswaku Yehovha i Mutumbuluxi swi txintxe wutomi byezru hi ku helela ni ku tlhela swi hi nyika nkongometo a wuton’wini.
5. He wini ntiyiso wa le Bibeleni lowu hi pfunaka ku va vhanu lava titsrongahataka? (Ezaya 45:9-12)
5 Ku tiva leswaku Yehovha i Mutumbuluxi swi tlhela swi hi pfuna ku va vhanu lava titsrongahataka. Hi xikombiso, ku dzringana nkama wa kukazri na Yobe a beke miyanakanyu kwake ni ka vhanu van’wana, Yehovha a dzrimuxe Yobe leswaku yene a a li Mutumbuluxi wa ntamu hinkwawu. (Yb. 38:1-4) Hi xidzrimuxo lexo, Yobe a twisise leswaku hinkwaswu leswi Yehovha a swi yentxaka minkama hinkwayu swi lulamile. Loko a tlhamuxela leswaku vhanu a va nga fanelanga va tivona na va lulamile ku tlula Xikwembu Nkulukumba, hi ku famba ka nkama Ezaya a tsrale leswi: ‘Xana a vumba dzri nga hlaya ku muvumbi leswaku: U yentxa yini?’—Dondzra Ezaya 45:9-12.
6. Xana a nga va ka xiyimu xini lani swi nga vaka swinene ku yima hi yanakanyisisa hi wutlhazri ni ntamu wa Mutumbuluxi wezru? (Tlhela u vona ni mifoto.)
6 Loko mukriste a ya a va ni mfambu, a nga ha dumba mavonela yake ku tlula mpimu a matsrhan’wini ya ku djula nkongomiso wa Yehovha ni wa Bibele. (Yb. 37:23, 24) Loko leswo swi yentxeka, i swa hombe ku va mukriste a yima a yanakanyisisa hi ndlela leyi wutlhazri ni ntamu wa Mutumbuluxi swi kalaka swi nga pimanisiwi ni ntxhumu ha yone. (Eza. 40:22; 55:8, 9) Hi ndlela leyo, dondzro leyi ya masungulo yi nga mu pfuna ku tama a titsrongahata a tlhela a twisisa leswaku ndlela leyi Yehovha a pimisaka ha yone i ya lisima ngopfu swinene ku tlula mavonela yake.
I yini lexi nga hi pfunaka ku vona leswaku mavonela yezru a ma tluli mavonela ya Yehovha? (Vona yava 6)d
7. I yini leswi Rahela a swi yentxiki akuva a kota ku yamukela nkongomiso lowumpshwa?
7 Ku dzrimuka leswaku Yehovha i Mutumbuluxi swi pfune Rahela wa le Eslovênia, ku pfumela nkongomiso lowumpshwa wa nhlengeletanu. Yene a li: “Minkama yimbeni swa ni kazratela ku pfumela swiboho swa vamakwezru lava va hi kongomisaka. Hi xikombiso, ni hlalele Xib’iko Xa Wu 8 Lexi Pfaka Hi Ka Huvo Leyi Zrangelaka Xa 2023, nambitanu ka khambi dzra ku sungula ni voniki makwezru lweyi a a beka wukaneli na a ni malepfu, ni kazratekile kutani ni khongote ka Yehovha ni kombela a ni pfuna leswaku ni pfumela ku txintxa koloko.” Rahela a twisise leswaku leswi Yehovha a nga tumbuluxa tilo ni misava, a swi kota hi ku helela ku kongomisa nhlengeletanu yake hi ndlela leyinene. Xana na wene minkama yin’wana swa ku kazratela ku landzra kumbe ku twisisa minkongomiso leyimpshwa? Loko swi li tanu, lexi yampswaka ku xi yentxa i ku titsrongahata ni ku tinyika nkama wa ku yanakanyisisa hi wutlhazri ni ntamu wa Yehovha Mutumbuluxi wezru.—Rom. 11:33-36.
XIKWEMBU NKULUKUMBA A NGA VANGI KU XANISEKA
8. Ha yini swi ve swinene ku dondzra leswaku Xikwembu Nkulukumba a hi yene a vangaka ku xaniseka?
8 Ha yini Xikwembu Nkulukumba a pfumelela ku xaniseka? Hi ku va va nga yi tivi nhlamulo ya xivutiso lexi, vhanu vanyingi va hlundzrukela Xikwembu Nkulukumba kumbe va nga kholwi leswaku a kone! (Amapr. 19:3) Hi tlhelo dzrin’wana, u dondzre leswaku i xidoho lexi hi pswaliwiki na xone ni ku kala ku hetiseka swi vangaka ku xaniseka ku nge Yehovha. U tlhele u dondzra leswaku hi ku va Yehovha a lehisela vhanu mbilu, swi yentxa va mu tiva va tlhela va gungula leswaku a ta helisa ku xaniseka hi ku helela. (2 Pet. 3:9, 15) Mintiyiso leyo yi ku txhavelelile yi tlhela yi tiyisa wunghanu byaku na Yehovha.
9. I ka swiyimu muni lani swi nga vaka swinene ku dzrimuka xivangelo lexi yentxaka Yehovha a pfumelela ku xaniseka?
9 Ha swi tiva leswaku hi fanela ku lehisa mbilu na hi yimela leswaku Yehovha a helisa ku xaniseka. Kambe loko mhunu lweyi hi mu zrandzra kumbe hine hi kumana ni swikazratu, hi khomiwa hi ndlela ya ku kala wululami kumbe hi luzekeliwa hi nga ha pimisa leswaku Yehovha awa hlwela. (Hab. 1:2, 3) A swi ta va swinene ku dzrimuka swivangelo leswi yentxaka Yehovha a pfumelela ku va vhanu lavanene va kumana ni swikazratu leswo.a (Amaps. 34:19) Nakone hi nga tlhela hi yanakanyisisa hi nkongometo wa Yehovha wa ku helisa ku xaniseka hi lani ku nga helikiki.
10. I yini leswi pfuniki Anne akuva a kota ku tiyiselela lifu dzra mamana wake?
10 Ku tiva ntiyiso mayelanu ni ku xaniseka swi ta hi pfuna ku tiyisela. Anne lweyi a tsrhamaka a xihlaleni xa Mayotte a Oceano Índico a li: “Malembenyana lawa ma khalutiki ni feliwe hi mamana wanga, leswo swi ni hete ntamu. Kambe minkama hinkwayu ni dzrimuka leswaku Yehovha a hi yene a vangaka ku xaniseka. Ku hambana ni leswo, a tiyimisele ku helisa hinkwaswu leswi hi yentxaka hi xaniseka ni ku pfuxa vazrandzriwa vezru lava fiki. Ku yanakanyisisa hi mintiyiso leyo swi ni pfuna ku va ni ku zrula lokukulu.”
11. Ku tiva swivangelo leswi yentxaka Yehovha a pfumelela ku xaniseka swi hi pfuna hi ndlela yini?
11 Ku tiva leswaku ha yini Xikwembu Nkulukumba a lehisa mbilu a tlhela a pfumelela ku xaniseka swi nga hi pfuna ku tama hi zrezra. Mupostola Petro a tlhamuxele leswaku ku lehisa mbilu ka Yehovha ku nyika vhanu mukhandlu wa ku va va tisola ni ku va va huluxiwa. Hi ku landzrela a tsrale a ku: “Tikambelani akuva mi vona leswaku mi fanela ku va vhanu va matsrhamela muni a mhakeni ya ku va ni mahanyela lawa ma xwengiki ni ku tinyiketela ka Xikwembu Nkulukumba.” (2 Pet. 3:11) Yin’we ya tindlela ta ku “tinyiketela ka Xikwembu Nkulukumba” i ku zrezra. Ku fana ni Papayi wezru, ha va zrandzra vhanu nakone hi djula leswaku va hanya a misaveni leyimpshwa hi lani ku nga helikiki. Yehovha a tama a nyika vhanu va le mugangeni waku mukhandlu wa ku va va mu tizrela. Kutani u ni ndjombo ya ku tizrisana na Xikwembu Nkulukumba ni ku va u pfuna vhanu vanyingi hi lani u nga kotaka ha kone leswaku va dondzra ha yene na wugamu byi nga si na tlhasa!—1 Kor. 3:9.
HI HANYA “MASIKWINI YA WUGAMU”
12. Ku twisisa leswaku hi hanya a “masikwini ya wugamu” swi hi yentxa hi tiyiseka hi yini?
12 A Bibele dzri tlhamuxela hi ku helela matsrhamela lawa vhanu a va ta va na wone a “masikwini ya wugamu”. (2 Tim. 3:1-5) Loko hi vona ndlela leyi vhanu va le mugangeni wezru va hanyaka ha yone, hi swi vona hi ku khanya leswaku wuprofeta lebyo bya hetiseka. Ku twisisa wuprofeta lebyi swi hi yentxa hi dumba Zritu dzra Xikwembu Nkulukumba hi ku helela.—2 Tim. 3:13-15.
13. I yini leswi hi fanelaka ku tivutisa swone loko hi yanakanyisisa hi xikombiso xa Yesu lexi kumekaka ka Luka 12:15-21?
13 Ku tiva leswaku hi hanya a masikwini ya wugamu swi hi pfuna ku beka miyanakanyu ka mintxhumu leyi nga ya lisima ngopfu swinene. Ka Luka 12:15-21 (Dondzra.) Yesu a hi tlhamuxela lisima dzra ku yentxa leswo. Ha yini wanuna lweyi a ganyiki a vitaniwe lweyi a nga “yanakanyikiki”? A ku vanga hi leswi a a ni mintxhumu yinyingi kambe a ve hi leswi a a zrangisa mintxhumu ya ku biha. Yene ‘a tihlengeletelele wukosi kambe a a li xisiwana mahlweni ka Xikwembu Nkulukumba’. Ha yini ku yentxa leswo ku ve xihoxo lexikulu? Xikwembu Nkulukumba a byele wanuna lweyo a ku: “Wusiku byolebyi u ta fa.” Hi dondzra yini ka xikombiso lexi? Ke sala nkama wutsrongo akuva xiyimu lexi xa misava xi helisiwa. Kutani hi nga tihamba swivutiso leswi: ‘Xana makungu yanga ma swi kombisa leswaku ni zrangisa mintxhumu ya lisima? He wani makungu lawa ni kutxaka vananga leswaku va ma tlhaselela? Xana ni tizrisa nkama ni mintxhumu leyi ni nga na yone ngopfungopfu akuva ni tihlengeletelela wukosi lani misaveni kumbe ni tihlengeletela wukosi a tilweni?’
14. Ha yini swi li swa lisima ku yanakanyisisa hi leswaku hi hanya masikwini ya wugamu nakone mfambu wa Miki wu swi kombisa hi ndlela yini leswo?
14 Ku yanakanyisisa hi leswaku hi hanya a masikwini ya wugamu swi nga txintxa hi ku helela ndlela leyi hi hanyaka ha yone. Leswo swi yentxekele makwezru wa xisati lweyi a vitaniwaka Miki. Yene a li: “Loko ni hete ku dondzra, a ni djula ku dondzra leswi yengetelekiki hi ku va ni tiva wutomi bya swihazri nakone a ni navela ku va lowo wu va ntizro wanga. Kambe a ni tlhela ni va ni kungu dzra ku tizra swanga phayona dzra nkama hinkwawu ni ya tizrela lomu ku nga ni xivileleko. Vanghanu vanga lava nga ni mfambu va ni pfune ku yanakanyisisa ha hombe ku vona leswaku xana ni nga swi kota ku hamba ntizro lowu a ni wu navela na hi nkama wu li wun’we ni hetisisa makungu yanga ya moya. Va ni byele leswaku a wugamu bya xiyimu lexi byi le kusuhi nakone a misaveni leyimpshwa ni ta va ni nkama wa ku va ni dondzra hi swihazri hinkwaswu leswi ni swi djulaka hi lani ku nga helikiki. Xileswo, ni teke xiboho xa kuva ni dondzra ntizro lowu a wu nga ti ni tekela nkama wunyingi. Hi ndlela leyo, ni kote ku tizra swanga phayona dzra nkama hinkwawu nakone hi ku landzrela ni zruzrele a tikweni dzra Equador lani a ku ni xivileleko lexikulu.” Namunhla Miki ni nuna wake va le ka ntizro wa ku yendzrela mabandla ka tiko ledzro.
15. Xana xikombiso xa Yakobe xi swi kombisisa kuyini leswaku a hi fanelanga hi godola ku zrezrela vhanu? (Tlhela u vona ni mifoto.)
15 Ku tiva leswaku hi hanya a masikwini ya wugamu swi hi pfuna ku vona xihantla lexi ntizro wa ku zrezra wu nga na xone. Nambiloko mhunu wa kukazri a ku sunguleni a yale ku yamukela madzrungula lamanene, lexi tiyiki hi leswaku vhanu va nga ha txintxa. Vona xikombiso xa Yakobe makwavu wa Yesu. Yakobe a vone Yesu hi ku kongoma loko a kula, a va Mesiya ni ku va mudondzrisi lwenkulu. Nambitanu ku khalute malembe manyingi kambe Yakobe a nga vanga mudondzrisiwa wa Yesu. Ntsrhaku ka loko Yesu a pfuxiwile a ku feni, hi kone Yakobe a viki mudondzrisiwa wa Yesu nakone a a ni nkhinkhi ngopfu swinene!b (Yoh. 7:5; Gal. 2:9) Xileswo, u nga godoli ku zrezrela maxaka yaku ku patsra ni lava a mugangeni waku va kalaka va nga si kombisa leswaku va wu nyika lisima ntiyiso. Swi nga yentxeka leswi u va byelaka namunhla swi va ni mabindzru a nkameni lowu taka kumbexana ntsrhaku ka loko ku sungula nhlomulo lowukulu.c
I yini lexi nga hi pfunaka ku va hi nga ma godoleli maxaka yezru lawa ma kalaka ma nga si na wu yamukela ntiyiso? (Vona yava 15)e
TAMA U SWI NYIKA LISIMA SWIDZRIMUXO SWA YEHOVHA
16. Xana swidzrimuxo swa Yehovha swi ku pfunise kuyini? (Tlhela u vona ni bokisi ledzri liki: “Tizrisa Mintiyiso Ya Bibele Akuva U Pfuna Van’wana.”)
16 Xin’we xa swiyenge xa swakuda swa moya leswi hi swi yamukelaka swi lulamiseliwa vhanu lava kalaka va nga tivi swinyingi hi Bibele. Hi xikombiso, a wukaneli bya livala bya ntlhanganu wa ku hela ka vhiki, marevhixta lawa ma hambeliwaka vhanu hinkwavu, tinhlokomhaka ta kukazri ni mavhidiyu lawa ma nga ka pajina dzrezru dzra jw.org, swi hambeliwa ngopfungopfu vhanu lava kalaka va nga li Timboni ta Yehovha. Nambitanu, swidzrimuxo leswi swa Yehovha swi nga hi pfuna. Swi kulisa lizrandzru ledzri hi nga na dzrone hi Xikwembu Nkulukumba, swi tiyisa lipfumelo ledzri hi nga na dzrone hi Bibele ni ku hi pfuna ku va vadondzrisi lavanene.—Amaps. 19:7.
17. I ka swiyimu swini lani swi nga swinene kuva hi yanakanyisisa hi tidondzro ta masungulo ta Bibele?
17 Hine Timboni ta Yehovha hi nyonxa ngopfu loko hi yamukela matwisisela lamampshwa ya ntiyiso wa Bibele. Kambe hi tlhela hi ti nyika lisima tidondzro ta masungulo ta Bibele leti ti hi kokeliki ntiyisweni. Loko hi ni xihena xa ku womelela ka mavonela yezru a matsrhan’wini ya ku landzra nkongomiso wa nhlengeletanu, hi fanela ku titsrongahata hi va hi dzrimuka leswaku Mutumbuluxi wezru lweyi a nga ni wutlhazri ni ntamu hinkwawu hi yene lweyi a kongomisaka nhlengeletanu yake. Loko hine kumbe mhunu lweyi hi mu zrandzraka a kumana ni xikazratu, swi nga va swinene ku va hi lehisa mbilu hi va hi yanakanyisisa leswaku ha yini Yehovha a pfumelela ku xaniseka. Nakone loko hi hlawula ndlela leyi hi yi tizrisaka ha yone mintxhumu yezru ni nkama wezru, hi fanela ku zrangisa mintxhumu ya lisima ngopfu ni ku dzrimuka leswaku hi hanya a masikwini ya wugamu. Hi ku yentxa leswo, a swidzrimuxo swa Yehovha swi ta tama swi hi tiyisa, swi hi kutxa ni ku hi yentxa vhanu lava tlhazrihiki.
LISIMU 95 Livaningu Dzri Ya Dzri Yengeteleka
a Vona nhlokomhaka leyi liki: “Mhaka Leyi Ha Yona Ku Xaniseka Hinkwako Ku Nga Ta Hela Ku Nga Ri Khale” ka Xihondzo xo Rindza 15/05/2007 pp. 21-25.
b Vona dondzro 8 ka broxura ledzri liki: Zrandzra Vhanu—Yentxa Vadondzrisiwa.
c Vona nhlokomhaka leyi liki: “Xana I Yini Leswi Hi Swi Tivaka Mayelanu Ni Ndlela Leyi Yehovha A Taka Yavanyisa Ha Yone Vhanu A Nkameni Lowu Taka?” ka Xihondzro Xa Ku Zrindzra 05/2024 pp. 8-13.
d NTLHAMUXELO WA MUFOTO KA: Nkulu mun’we wa bandla a nyikela mavonela, kambe lavan’wana a va pfumelelani na yene. Hi ku landzrela a lavisa matilweni lani ku taliki hi tinyeleti a tlhela a yanakanyisisa hi ntamu ni wutlhazri bya Mutumbuluxi a twisisa leswaku mayanakanyela ya Yehovha i ya lisima ngopfu ku tlula mavonela yake.
e NTLHAMUXELO WA MUFOTO: Makwezru wa xisati lweyi a kambisisaka swikombiso swa leswaku hi hanya a masikwini ya wugamu ka dondzro yake ya ximhunu. Leswo swi mu yentxa a fonela makwavu akuva a mu zrezrela.