Yosefa a a li mun’we wa vana va Yakobe. Vamakwavu lavakulu ka Yosefa va vone leswaku a a zrandzriwa ngopfu swinene hi papayi wavu. U yanakanya leswaku a va titwisa kuyini hi leswi Yosefa a a zrandzriwa ngopfu? A va mu tsrhohoka va tlhela va mu nyenya. Kutani siku dzrin’wana Yosefa a ve ni milozro leyi kalaka yi nga tolovelekanga, a va a yi dzrungulela vamakwavu kambe vone a va yi zrandzranga milozro leyo. Va yanakanye leswaku Yosefa a a djula ku va hosi yavu kutani leswo swi yentxe leswaku va ya va mu nyenya ngopfu swinene!

Siku dzrin’wana, vamakwavu va Yosefa va ye byisa tihamba a kusuhi ni doropa dzra le Sikeme. Kutani Yakobe a zruma Yosefa akuva a ya vona leswaku vamakwavu a va hlayisekile kumbe im-him. Nkama lowu Yosefa a a ya a tsrhindzrekela, vamakwavu va sungula ku byelana leswi: ‘Hi lwiya n’wamilozro a taka, a hi mu dlayeni!’ Loko Yosefa a tlhasa, vamakwavu va mu khoma va mu peta ka xihlovo xa ku yenta. Kambe Yuda, ku nga mun’we wa vamakwavu a ku: ‘Hi nga mu dlayeni! A hi mu xaviseni swanga xikazrawa.’ Xileswo, va mu xavisa hi 20 wa mamuweda ya prata ka Vamidiyani lava a va yendzra va ya Egipta.

Kutani vamakwavu va Yosefa va teka mpahla yake va yi txhela ngati ya mbuti, va gama va yi zrumela ka papayi wavu Yakobe va ku: ‘A hi mpahla ya n’wanaku leyi?’ Hiloko Yakobe a yanakanya leswaku Yosefa a dlayiwe hi xihazri xa kukazri xa nhova. Kutani a vaviseka ngopfu swinene lakakuva ku nga vi na mhunu ni mun’we lweyi a kotaka ku mu txhavelela.

Loko Vamidiyani va tlhase a Egipta va xavise Yosefa ka Potifaro leswaku a va xikazrawa xake. Kambe Yehovha a a tama a pfuna Yosefa. Hiloko Potifaro a vona leswaku Yosefa a tizra hi nkhinkhi nakone awa dumbeka. Hi nkamanyana, Potifaro a beka Yosefa a va muvoneleli wa hinkwaswu leswi a a li na swone.

Kutani a nsati wa Potifaro a sungula ku navela Yosefa hi leswi a a xongile a tlhela a va ni ntamu. Phela nsati wa Potifaro siku ni siku a a tsrhamela ku kombela Yosefa akuva va yetlela xikan’we. I yini leswi Yosefa a a swi yentxa nkama lowu nsati wa Potifaro a a mu kombela leswaku va yetlela xikan’we? Minkama hinkwayu Yosefa a a ku: ‘Im-him! A ni nge swi yentxi leswo hikusa swi bihile. Wene u nsati wa Potifaro nakone awa ni dumba. Loko no yetlela na wene ni ta va na ni dohela Yehovha nakone a ni swi djuli leswaku leswo swi yentxeka!’

Siku dzrin’wana, a nsati wa Potifaro a sindzrise Yosefa akuva a yetlela na yene. A khome Yosefa hi mpahla kambe Yosefa a phonyoka a huma hi ku tsrutsruma. Kutani loko Potifaro a tlhasa kaya, a nsati wake a mu byela leswaku Yosefa a a djula ku mu pfinya. Kambe leswi a swi hlayiki a ku nga li ntiyiso. Hiloko Potifaro a kwata ngopfu swinene a va a khoma Yosefa a mu pfalela djele. Xana Yehovha a mu dzrivalile Yosefa? Hi ta swi vona ka dondzro leyi landzrelaka.

Nkama lowu Yosefa a a li djele, Faro hosi ya le Egipta a ve ni milozro leyi a ku nga na mhunu lweyi a a kota ku yi tlhamuxela. Mun’we ka malandzra yake a mu byele leswaku Yosefa a nga tlhamuxela milozro yake. Kutani hi ku kahlula Faro a zrumela leswaku ku ya tekiwa Yosefa a djele.

Hiloko Faro a byela Yosefa a ku: ‘Ni tlhamuxeli milozro yanga.’ Kutani Yosefa a mu byela leswi: ‘Ku ta va ni swakuda swa swinyingi a Egipta ku dzringana 7 wa malembe, kambe ntsrhaku ka leswo, ku ta va ni ndlala ya yikulu ku dzringana 7 wa malembe lawa ma taka landzrela. Kutani hlawula mhunu wa ku tlhazriha akuva a hlengeleta swakuda leswaku vhanu vaku va nga fi hi ndlala.’ Hiloko Faro a mu hlamula a ku: ‘Ni hlawula wene, u ta va ka xitsrhamu xa wubidzri ka mfumu wanga a Egipta!’ Yosefa a swi kotise kuyini ku tlhamuxela milozro ya Faro? A pfuniwe hi Yehovha.

Ka 7 wa malembe lawa ma landzreliki, Yosefa a hlengelete swakuda. Kutani ntsrhaku ka malembe lawa ya 7, ku ve ni ndlala a tikweni hinkwadzru dzra Egipta, hi lani Yosefa a hlayiki ha kone. Vhanu va matiko ya ku siyanasiyana a va ya xava swakuda ka Yosefa. Hiloko Yakobe papayi wa Yosefa a yingela leswaku ku ni swakuda a Egipta, kutani a zrumela vanake na va li 10 wa vone akuva va ya swi xava.

A vana va Yakobe va ye a Egipta akuva va ya xava swakuda. Kutani loko Yosefa a va vona a tekela ku va tiva, kambe vamakwavu a va mu tivanga. Hiloko va mu khinsamela hi lani Yosefa a lozriki ha kone na a ha li mutsrongo. Akuva Yosefa a tiva leswaku vamakwavu a va tsrhikile mahanyela yavu ya ku biha kumbe im-him, a va byele leswi: ‘N’wine mi vakambeli va tiko, mi tele ku ta vona leswaku mi nga dzri hlulisa kuyini tiko dzrezru.’ Kutani vamakwavu va Yosefa va ku: ‘Im-him, a hi vakambeli va tiko! Hi ta hi le Kanana. A hi li 12 wa vamakwavu kambe mun’we a file nakone lwentsrongo a sale kaya na papayi. Xileswo Yosefa a va hlamula a ku: ‘Buyani ni makwenu lwentsrongo ni ta kota ku kholwa leswi mi swi hlayaka.’ Kutani vamakwavu va Yosefa va tlhelela kaya ka papayi wavu Yakobe.

Ntsrhaku ka nkamanyana va heleliwi hi swakuda. Kutani Yakobe a zruma vanake akuva va tlhela va ya a Egipta va ya xava swakuda swimbeni, kambe swoswi va fambe ni makwavu Benjamini. Loko va tlhela va kumana na Yosefa, ni ka khambi ledzri a va mu tivanga. Akuva a dzringa vamakwavu, Yosefa a fihle a kopo dzrake dzra prata ka saka dzra swakuda ledzri a dzri li dzra Benjamini, a tlhela a lumbeta vamakwavu hi ku hlaya leswaku va dzri yivile. Ntsrhaku ka leswo, a zruma vatizri vake akuva va ya setxha a kopo ledzro ka masaka ya vamakwavu, hiloko va ya dzri kuma ka saka dzra Benjamini. Vamakwavu va Yosefa va txhava ngopfu va tlhela va kazrateka lakakuva va mu kombela kuva a khatisa vone a matsrhan’wini ya Benjamini.

Loko a vona leswo, Yosefa a vhela a tiyiseka leswaku vamakwavu kutani va txintxile. Yosefa a nga ha swi kotanga ku tikhoma, a dzrile ku huma ni minyembeti, a va a ku: ‘Hi mine Yosefa makwenu, xana papayi a ha hanya?’ Loko vamakwavu va Yosefa va yingela leswo, va hlamala ngopfu! Hiloko Yosefa a ku: ‘Mi nga kazrateki hi leswi mi ni yentxiki swone, Xikwembu Nkulukumba a ni zrumele lani akuva ni ta huluxa wutomi byenu. Kahlulani mi ya teka papayi mi mu buyisa halenu.’

Hi ku kahlula, vamakwavu va Yosefa va tlhelela Kanana akuva va ya byela papayi wavu Yakobe madzrungula lamanene ya leswaku Yosefa a nga fanga. Kutani ndangu hinkwawu wu zruzrela a Egipta. A hi ku nyonxisa ka swone ku va Yosefa ni papayi wake va tlhela va kumana ntsrhaku ka malembe manyingi!