Moxe a hanye 40 wa malembe a tikweni dzra Midiyani. Na a li kohala a txhatile a tlhela a va ni vana. Siku dzrin’wana na a byisa tihamba kusuhi ni Nhava ya Sinayi, a vone ntxhumu wa ku hlamalisa ngopfu. A vone xinsinyana xa kukazri na xi dudumela kambe a xi nga pshwi. Nkama lowu Moxe a nga tsrhindzrekela kusuhi ni xinsinyana lexo akuva a swi vona ha hombe leswi a swi yentxeka, a yingela zritu na dzri twala ka xinsinyana lexo dzri ku: ‘Moxe! U nga tsrhindzrekeli lani. Susa masandaliya yaku hikusa a mbangu lowu u wu kandzretelaka wu xwengile.’ Phela a a li Yehovha lweyi a a vulavula na Moxe hi ku tizrisa ntsrumi.

Hiloko Moxe a txhava a va a timbhonya wuso. Yehovha a tlhela a ku: ‘Ni vone ku xaniseka ka Vaisrayele. Ni ta va huluxa ka Vaegipta ni va yisa ka tiko ledzrinene. Ni hlawule wene akuva u zrangela vhanu vanga.’ Swi nga yentxeka Moxe a hlamale ngopfu loko Yehovha a mu byela leswo, a hi swone?

Moxe a vutisa Yehovha a ku: ‘Loko Vaisrayele va ni vutisa leswaku i mani lweyi a ni zrumiki ke, ni ta va byela swa kuyini?’ Kutani Yehovha a mu hlamula a ku: ‘Va byeli leswaku i Yehovha, Xikwembu Nkulukumba wa Abrahamu, Xikwembu Nkulukumba wa Izaki ni Xikwembu Nkulukumba wa Yakobe.’ Moxe a tlhela a vutisa a ku: ‘Loko va nga ni yingiseti ke?’ Xileswo, Yehovha a komba Moxe xitiyisekiso xa leswaku a ta mu pfuna. Yehovha a byela Moxe leswaku a txukumetela nhonga yake a hansi, hiloko nhonga leyo yi ndzruluka nyoka! Kasi loko a ku awa yi khoma hi nkila, a nyoka yi tlhela yi ndzruluka nhonga. Kutani Yehovha a byela Moxe a ku: ‘Loko Vaisrayele va ku vona na u yentxa leswi, va ta kholwa leswaku hi mine ni ku zrumiki.’

Moxe a byela Yehovha a ku: ‘Swa ni kazratela ku vulavula mahlweni ka vhanu.’ Xileswo, Yehovha a mu tiyisa hi ku mu byela mazritu lawa: ‘Ni ta ku byela leswi u faneleka ku swi hlaya nakone ni ta zrumela makwenu Aroni akuva a ku pfuna.’ Leswi kutani a a swi tiva leswaku Yehovha a a ta mu pfuna, Moxe a teka nkatake ni vanake va ya a Egipta.

A Vaisrayele va sindzrisiwa ku tizra swanga swikazrawa a Egipta. Kutani Yehovha a zruma Moxe na Aroni akuva va ya byela Faro dzrungula ledzri: ‘Tsrhika vhanu vanga va famba va ya ni gandzrela a mananga.’ Kambe leswi Faro a nga mhunu wa ku tibyela ngopfu nakone a kalaka a nga swi djuli ku yingiseta Yehovha, a hlamula a ku: ‘Mine a ni na mhaka ni leswi Yehovha a swi hlayaka, futsrhi a ni nge ti va tsrhika Vaisrayele va famba.’ Xileswo Faro a sindzrisa kuva Vaisrayele va tizra ngopfu swinene ku tlula ndlela leyi a va tizra ha yone ku sunguleni. Yehovha a a djula ku susa a nkanu wa Faro. Wa swi tiva leswaku a swi yentxise kuyini? A hlasele tiko dzra Egipta hinkwadzru hi 10 wa mintungu. Yehovha a byela Moxe a ku: ‘Faro a nga ni yingiseti. Mundzruku mixweni a ta ya nambyeni wa Nilo. Mu tsrhindzrekeleli u mu byela leswaku leswi a yalaka ku tsrhika Vaisrayele va famba, a mati hinkwawu ya nambu wa Nilo ma ta ndzruluka ngati.’ Hiloko Moxe a yingiseta Yehovha, a va a ya vulavula na Faro. Faro a mu vonile Aroni na a ba mati ya nambu wa Nilo hi nhonga yake, a tlhela a swi vona loko mati hinkwawu ma ndzruluka ngati. Hiloko nambu hinkwawu wu sungula ku nun’hwa, a tihlampfi hinkwatu ti fetetela nakone a ku nga ha na mati lawa a ma nweka lama pfaka hi ka nambu wa Nilo. Nambitanu Faro a nga pfumelanga ku tsrhika Vaisrayele va famba.

Ntsrhaku ka loko ku khalute vhiki, Yehovha a zrume Moxe akuva a tlhela a ya vulavula na Faro, a ye mu byela leswi: ‘Loko u nga va tsrhiki vhanu vanga va famba, tiko hinkwadzru dzra Egipta dzri ta tala hi makhutla.’ Kutani Aroni a tlakuxa nhonga yake, a hiloko tiko hinkwadzru dzra Egipta dzri tala hi makhutla. A makhutla a ma li ka mimbangu hinkwayu, phela a ma fambafamba a makaya, ma khwela ka mibede, nambi ku nghena ka mapanela. Xileswo Faro a byela Moxe leswaku a kombela Yehovha akuva a helisa ntungu luwani wa makhutla. Faro a dumbisa leswaku a a ta tsrhika Vaisrayele va famba. Kutani Yehovha a wu yimisile ntungu, ku gama ku fetetela makhutla hinkwawu va tlhela va ma hlengeletela ma va swidulu swinyingi, hiloko tiko hinkwadzru dzri sungula ku nun’hwa. O va ku ni ka khambi ledzri, Faro a nga tsrhikanga Vaisrayele va famba.

Hi leswi yentxiki Yehovha a byela Moxe a ku: ‘Byela Aroni a teka nhonga yake a ba ntsrhuzri wa misava kutani a ntsrhuzri lowo wu ta ndzruluka tinsuna leti hlaselaka vhanu ni swihazri.’ A hiloko hi ku kahlula tiko hinkwadzru dzri tala hi tinsuna. Xileswo, van’we ka Vaegipta va byele Faro va ku: ‘A ntungu lowu wu buya hi ka Xikwembu Nkulukumba.’ Nambitanu ni ka khambi ledzri, Faro a nga va pfumelelanga Vaisrayele va famba.