Amahwaniro y’intara ni igihe c’ugusenga giteye umunezero
1. Ni mu buryo ki imisi mikuru yo muri Isirayeli yasa n’amahwaniro y’intara tugira muri iki gihe?
1 Yozefu, Mariya, abana babo hamwe n’abandi, bama bagiye i Yeruzalemu ku misi mikuru yaba buri mwaka. Muri ivyo bihe, bo hamwe n’abandi basavyi b’Imana baragerageza kwibagira imyitwarariko yo mu buzima bwabo bwa misi yose maze bakibanda ku bintu vy’impwemu, ari na vyo vyari bihambaye cane mu buzima bwabo. Iyo misi mikuru yarabaha akanya ko kuzirikana no kuyaga ibijanye n’ukumera neza kwa Yehova, bikongera bikabaha akanya ko kurimbura Itegeko ryiwe. Amahwaniro y’intara twimirije azoturonsa uturyo two gusenga Yehova duteye umunezero dusa n’utwo.
2. Ni ibiki dukwiye gukora mu kwitegurira ihwaniro ry’intara ryimirije?
2 Kwitegura birakenewe: Kugira ngo umuryango wa Yezu uve i Nazareti uje i Yeruzalemu vyasaba ko ugira urugendo rw’amaguru rw’ibilometero nka 200 kugenda no kugaruka. Naho tutazi igitigiri c’abana bavukana na Yezu, turashobora kwiyumvira imyiteguro be n’akigoro Yozefu na Mariya basabwa kugira. Woba umaze kugira imyiteguro ikenewe kugira ngo uzobe ari ho uri imisi itatu yose ihwaniro ry’intara ryimirije rizomara? Hari igihe vyoba ngombwa ko usaba ikonji ku kazi canke uvugana n’umukoresha wawe kibure umwigisha w’umwana wawe kugira ngo usabe umwanya wo kwitaba iryo hwaniro. Woba umaze gutegekanya uburaro nimba bikenewe? Woba woshobora kwibwiriza ugafasha umuntu kanaka wo mw’ishengero akeneye gufashwa mu buryo budasanzwe kugira ngo aze yitabe iryo hwaniro?—1 Yoh. 3:17, 18.
3. Ni gute imisi mikuru yo muri Isirayeli yaronsa Abayuda uturyo two kwifatanya n’abandi bakaremeshanya?
3 Kwifatanya n’abandi tukaremeshanya: Imisi mikuru y’Abayuda yarabaha akaryo keza utoraba ko kwifatanya n’abasavyi b’Imana bagenzi babo bakaremeshanya. Nta gukeka ko umuryango wa Yezu witegana igishika gusubira kubonana n’abagenzi babo ba kera. Bararonka n’uturyo two kwironkera abagenzi bashasha mu masinzi y’Abayuda be n’abari barahindukiriye idini ry’Abayuda baba ari ho bari canke baba bariko baraja i Yeruzalemu kibure bavayo.
4. Twokwerekana gute ko duha agaciro umuryango wacu wunze ubumwe w’abavukanyi?
4 Impamvu imwe ituma umushumba w’umwizigirwa kandi w’ubwenge atunganya ivy’uko duhurira hamwe kugira ngo twumvirize insiguro zishikirizwa ku mahwaniro y’intara aho kudushikiriza ayo makuru mu vyandikano, ni ukugira ngo dushobore kuremeshanya. (Heb. 10:24, 25) Ku bw’ivyo, nutegekanye ukuntu woshika kare ku musi umwumwe wose w’iryo hwaniro, kugira ngo uhimbarwe no kwifatanya n’abandi imbere y’uko umuhagarikizi w’ikiringo amenyesha ko hagira hatangure umuziki w’intango utwibutsa yuko hageze ko dufata ivyicaro. Mu karuhuko ka sasita, aho kuva mu kibanza c’ihwaniro tugiye kurondera ibifungurwa, turemeshwa kwibangikanya udufungurwa tworoshe no kuguma mu kibanza c’ihwaniro kugira ngo tubonane twongere tuyage n’abandi. Umuryango wacu wunze ubumwe w’abavukanyi ni ingabire iva kuri Yehova tudakwiye kwigera dufata minenegwe.—Mika 2:12.
5. Ni ibiki bizodufasha kwungukira bimwe bikwiye ku bishikirizwa kw’ihwaniro?
5 Igihe co kwiga: Kuva Yezu akiri muto, kuri iyo misi mikuru yaraboneraho akaryo ko kwiga ivyerekeye Se wiwe wo mw’ijuru. (Luka 2:41-49) Ni ibiki bizodufasha twe n’imiryango yacu kwungukira bimwe bikwiye ku biganiro bizoshikirizwa? Mu biringo vy’ihwaniro, nugume wicaye kandi wirinde kuyaga bidakenewe. Ntureke telefone ngendanwa yawe canke utundi twuma mwene utwo ngo bigusamaze canke ngo bisamaze abandi. Nugumize amaso ku mushikirizansiguro, ugire n’utwo wanditse. Nimwicarane uko mugize umuryango kugira ngo urabe neza ko abana bawe na bo nyene bariko barumviriza. Ku mugoroba, nimufate akanya muganire ku vyiyumviro vyabashimishije.
6. Ni ibiki dukwiye kugumiza ku muzirikanyi ku vyerekeye inyambaro yacu be n’ukuntu twitunganya?
6 Inyambaro be n’ukwitunganya: Abadandaza b’abanyamahanga baba bari ku rugendo barashobora kumenya umuryango wa Yezu be n’abandi basavyi b’Imana b’Abayuda baba bagiye canke bavuye ku misi mikuru, bakabamenyera ku buyonga bwo ku mitwe y’impuzu zabo be na ka kanyuzi k’ubururu kaba kari hejuru ya nya buyonga. (Guh. 15:37-41) Naho twebwe abakirisu ata mpuzu twambara zidutandukanya n’abandi, abantu barazi ko twambara rupfasoni, tukaboneka neza kandi tukaba dusukuye. Turakwiye kwitaho cane ukuntu tuboneka igihe dufata urugendo tuja kw’ihaniro canke tuvayo be n’igihe tuba turi mu gisagara kiberamwo iryo hwaniro. Naho twohindura impuzu inyuma y’ihwaniro, uburyo tuboneka burakwiye kuguma ari ubuteye iteka, tukaguma kandi twambaye ka gakarata karanzi k’ihwaniro. Ivyo bizotuma tuboneka ko dutandukanye n’abatari Ivyabona, vyongere bikore ku mutima abatwitegereza.
7. Ni kubera iki twozirikana ivyo kwitanga ngo dufashe mu bikorwa vyo kw’ihwaniro?
7 Harakenewe abitanga: Harakenerwa abakozi benshi kugira ngo ihwaniro rigende neza. Woba ushobora kwitanga ngo ugire ico ufashije? (Zab. 110:3) Ibikorwa birangurwa ku mahwaniro biri mu bigize umurimo wacu mweranda kandi birashinga intahe nziza. Umuyobozi w’inyubakwa imwe iberamwo amakoraniro maninimanini yarakozwe cane ku mutima n’abitanze bagasukura iyo nyubakwa ku buryo yanditse ati: “Nagomba kubashimira ku bw’ico gikorane mwagize cantangaje kuruta ibindi vyose nari maze kubona. Namye numva bavuga ko Ivyabona vya Yehova ari abantu badasanzwe bamye bazwi neza mw’ishirahamwe ryacu yuko bama basiga inyubakwa bakoresheje isukuye kuruta uko bayisanze. Mwebwe n’ishirahamwe ryanyu mwatumye iyi nyubakwa ibera ikibano cacu ikibanza ciza cane, kandi mubigira biciye ku bantu b’intore kuruta abandi bose twari tumaze gukorana.”
8. Ni uturyo utuhe two gushinga intahe tuzoboneka mu gisagara kizoberamwo ihwaniro?
8 Uturyo two gushinga intahe: Abantu benshi bo mu gisagara kizoberamwo ihwaniro bazobona abashitsi bambaye neza kandi bitunganije mu buryo bwisoneye bafise udukarata karanzi tw’ihwaniro. Ivyo bizotuma kumbure bibaza ibibazo, tube turonse akaryo ko kubabwira ibijanye n’iryo hwaniro. Umusi umwe, agahungu kamwe k’imyaka ine kavuye kw’ihwaniro karinjiye mu buriro gafise igitabu cako cari casohotse kuri nya hwaniro maze kacereka umukenyezi yitwararika abakiriya. Ivyo vyatumye abavyeyi ba nya gahungu baboneraho akaryo ko gutumira nya mukenyezi kw’ihwaniro.
9. Twokwigana gute ukuntu umuryango wa Yezu waha agaciro ibintu vy’impwemu Yehova aturonsa?
9 Imisi mikuru ya kera twari uturyo duteye umunezero Abayuda bitaho cane ivy’impwemu wasanga bitegana igishika. (Gus. 16:15) Umuryango wa Yezu waremera guheba ikintu ico ari co cose kugira ngo witabe iyo misi mikuru wongere uyungukireko bimwe bikwiye. Na twebwe turaha agaciro amahwaniro y’intara tugira, tukabona ko ari ingabire iva kuri Data wa twese wo mw’ijuru yuzuye urukundo. (Yak. 1:17) Harageze ko twitegurira ako karyo gateye umunezero dufise uyu mwaka ko gusenga Yehova!
[Uruzitiro ku rup. 4]
Ivyibukijwe ku vyerekeye ihwaniro ry’intara
◼ Ibihe porogarama izoberako: Ku wa gatanu no ku w’iyinga, porogarama izotangura isaha 2:30 zo mu gitondo, ku musi wa gatandatu na ho izotangura isaha 4:30 zo mu gitondo. Igihe umuziki w’Ubwami wugurura utanguye, twese dukwiye gufata ivyicaro kugira ngo porogarama itangure mu buryo buteye iteka. Ku wa gatanu porogarama izorangira isaha 10:05 zo ku muhingamo, ku wa gatandatu irangire isaha 11:25 zo ku mugoroba, ku w’iyinga na ho izorangira isaha 9:10 zo ku muhingamo.
◼ Ugufatira abandi ibibanza: Ukwiye gufatira ibibanza abantu mwazananye mu muduga gusa canke abo mubana mu nzu, hamwe n’abo musanzwe mwigana Bibiliya.—1 Kor. 13:5.
◼ Imfungurwa za sasita: Turabinginze muzoze mwitekereye impamba, aho kuva mu kibanza c’ihwaniro mugiye kurondera ibifungurwa mu karuhuko ka sasita.
◼ Intererano: Turashobora kwerekana ko dukenguruka intunganyo zagizwe ku bw’ihwaniro mu gutanga intererano zivuye ku mutima ku bw’igikorwa kirangurirwa kw’isi yose, haba ku Ngoro y’Ubwami iwacu canke kw’ihwaniro. Amasheki yoba atanzwe bwa ntererano kw’ihwaniro akwiye kuba yanditseko yuko ayo mahera ahabwa ishirahamwe Témoins de Jéhovah.
◼ Amasanganya hamwe no gutabarwa vyihutirwa: Mu gihe mu kibanza c’ihwaniro habaye ibintu bisaba gutabarwa vyihutirwa, turagusavye uce ubimenyesha uwakira abantu akwegereye na we azoce ubwo nyene abimenyesha Urwego rujejwe gutabara abarwaye, kugira ngo abantu bajejwe ico gikorwa babimenyereye bari ng’aho bashobore kuraba nimba bikomeye canke bidakomeye maze bagire ico bafashije.
◼ Ugufata amajwi n’amasanamu: Ivyuma bifata amajwi n’amasanamu vy’ubwoko ubwo ari bwo bwose ntibikwiye gucomekwa ku vyuma biduza amajwi canke ku muyagankuba vy’aho hantu, kandi vyoshobora gukoreshwa gusa mu buryo budatuma abandi basamara.
◼ Udupapuro two kwuzuza hasabwa gukurikirana umuntu yashimishijwe: Agapapuro ko kwuzuza kavuga ngo Turabasavye mukurikirane uwu muntu yashimishijwe (S-43) gakwiye gukoreshwa mu gutanga amakuru yerekeye umuntu uwo ari we wese ashimishijwe igihe dushinze intahe akaryo kizanye mu gihe c’ihwaniro. Abamamaji bakwiye kugenda kw’ihwaniro bitwaje mwene ako gapapuro kamwe canke tubiri. Udupapuro twujujwe woshobora kuduha abo mu Rwego rujejwe ibitabu canke ukaduha umunyamabanga w’ishengero ryanyu umaze gutaha. Utwo dupapuro tutabonetse, turagusavye wandike ayo makuru ku rupapuro rusanzwe uheze urushikirize. Turagusavye wandike n’izina ryawe be n’izina ry’ishengero urimwo kuri urwo rupapuro.—Raba Igikorwa dukorera Ubwami co muri Ruhuhuma 2005, urupapuro rwa 6.
◼ Amaresitora: Nutere iteka izina rya Yehova biciye ku nyifato ugira uri mw’iresitora.
◼ Uburaro: Hazoboneka amasomero yo kuraramwo. Akenshi bizokenerwa ko umwe wese yizanira ibisaswa hamwe n’ibikoresho vyo guteka. Turabasavye mutashe, muzosige aho hantu hasukuye. Ivyo bizoshingira intahe ikomeye izina rya Yehova be n’abasavyi biwe.
◼ Abitanga bavyishakiye: Umunezero turonkera kw’ihwaniro uzorushiriza kwongerekana nitwitanga kugira ngo dufashe mu dukorwa tuzoba dukenewe. (Ibikorwa 20:35) Uwo wese yipfuza gufasha akwiye gushikira Urwego rw’abitanga bavyishakiye kw’ihwaniro. Abana batarakwiza imyaka 16 barashobora na bo nyene kugira ico baterereye mu gukora bahagarikiwe n’umuvyeyi canke umurezi, canke uwundi muntu akuze yavyemerewe n’umwe muri abo.