Ukuntu wokwungukira ku mugwi urimwo wo gusohoka mu ndimiro

1. Ni ivyiza ibihe twahora twungukira ku Nyigisho y’igitabu y’ishengero bikiboneka biciye ku mugwi wacu wo gusohoka mu ndimiro?

¹ Hoba hari imice imwimwe mu yari igize Inyigisho y’igitabu y’ishengero wumva umengo urahomba? Imigwi wasanga ari mitomito kandi umuntu yarisanzura. Ivyo vyatuma vyoroha gutsimbataza ubucuti, buno bukaba bwaradufasha kuguma dukomeye mu vy’impwemu. (Imig. 18:24) Umucungezi w’inyigisho y’igitabu yaramenya uko ivyacu vyaba vyifashe maze akaturemesha umwumwe wewe ukwiwe. (Imig. 27:23; 1 Pet. 5:2, 3) Ivyo vyiza nyene turacabironka biciye ku mugwi wacu wo gusohoka mu ndimiro.

2. Dushobora gute kwibwiriza gutsimbataza ubucuti mu mugwi wacu wo gusohoka mu ndimiro, ubudufasha kuguma dukomeye mu vy’impwemu?

² Niwibwirize: Imigwi yo gusohoka mu ndimiro muri rusangi ingana n’ukuntu imigwi y’inyigisho y’igitabu yangana. Gukorana n’abandi mu busuku “[du]fatanye mu nda,” birashobora kuvamwo ubucuti somambike. (Flp. 1:27) Mu mugwi urimwo, ni abantu bangahe mumaze gukorana? Woba ‘wokwaguka’ muri uwo muce? (2 Kor. 6:13) Vyongeye, hari aho rimwe na rimwe twotumira mu Gusenga kwo mu muryango kwacu umuntu kanaka turi kumwe mu mugwi canke tukamutumira ngo dusangire akajumbu. Mu mashengero amwamwe, imigwi yo gusohoka mu ndimiro irakurakuranwa mu gutegurira ibifungurwa umushikirizansiguro w’umushitsi. Umugwi uba ari wo uramukiwe ku ndwi kanaka, abawugize barahurira hamwe kugira ngo basangire udufungurwa n’indemesho naho uwo mushikirizansiguro w’umushitsi atohaguma ngo afungure.

3. Ni uturyo tumwetumwe utuhe dufise two kugenderwa cungere mu mugwi wacu wo gusohoka mu ndimiro?

³ Naho ubu abagize ishengero bose bahurira hamwe incuro zibiri mu ndwi, ivyo ntibisigura ko ivyo kugendera cungere abamamaji bica bigabanuka. Mu mugwi wose haragenwa umucungezi w’umugwi kugira ngo aronse indemesho umwumwe wese ku giti ciwe kandi amumenyereze mu busuku. Nimba umucungezi w’umugwi urimwo ataratunganya ivy’uko mwokorana mu busuku, ubona gute ubimusavye? Vyongeye, mu mpera y’umushamvu imwe mu kwezi, umucungezi w’umurimo arakorana mu busuku n’umugwi kanaka. Mu mashengero matomato aho usanga hari imigwi mikeyi yo gusohoka mu ndimiro, umucungezi w’umurimo yoshobora gutunganya ivyo kugendera buri mugwi incuro zibiri mu mwaka. Woba uhora utunganya ivyawe kugira ngo uje mu busuku igihe aba yagendeye umugwi wanyu?

4. (a) Amakoraniro yo gusohoka mu ndimiro atunganijwe gute? (b) Ni kubera iki dukwiye kurimbura ibijanye no gutanga inzu yacu ku bw’amakoraniro yo gusohoka mu ndimiro?

⁴ Akenshi usanga bifise akamaro igihe imigwi ihuriye mu bibanza bitandukanye, umwumwe wose ukwawo ku bwo kuja mu ndimiro ku mpera z’imishamvu. Kuba hari ibibanza bitari bike biberamwo ibiganiro, bikabera nko ku gihe kimwe, vyoshobora gutuma abamamaji boroherwa no gushika kw’ikoraniro ryo gusohoka mu ndimiro, kumbure bikaborohera no gushika mu cibare. Abamamaji bakwiye kugaburwa mu buryo bwihuta maze bagaca baja mu cibare badatebaganye. Birarushiriza kandi kworohera umucungezi w’umugwi kwitwararika cane abo ajejwe. Ariko rero, ukuntu ibintu biba vyifashe birashobora gutuma biba vyiza imigwi ibiri canke irenga ihuriye hamwe. Nimba ishengero ryose rihurira hamwe ku bw’ugusohoka mu ndimiro ku wa gatandatu wa mbere w’ukwezi canke inyuma y’Inyigisho y’Umunara w’Inderetsi, usanga akenshi ari vyiza abagize umugwi kanaka bicaye hamwe kandi umucungezi w’umugwi wese agahabwa umwanya wo kugabura abagize umugwi wiwe imbere y’uko ico kiganiro gisozerwa n’isengesho.—Raba uruzitiro ruvuga ngo “Woba woshobora gutanga inzu yawe?”

5. Naho intunganyo y’Inyigisho y’igitabu y’ishengero yahagaze, ni igiki twokwizigira tudakeka?

⁵ Naho intunganyo y’Inyigisho y’igitabu y’ishengero yahagaze, Yehova arabandanya kuturonsa ibintu vyose dukeneye kugira ngo dukore ivyo agomba. (Heb. 13:20, 21) Narirya Yehova atwitwararika, nta co tuzobura. (Zab. 23:1) Turironkera imihezagiro myinshi biciye ku mugwi wacu wo gusohoka mu ndimiro. Twibwirije kandi ‘tukabiba vyinshi, tuzoshwabura vyinshi.’—2 Kor. 9:6.

[Uruzitiro ku rup. 6]

Woba woshobora gutanga inzu yawe?

Hari amashengero usanga atunganya ivy’uko imigwi nk’ingahe ihurira hamwe ku bw’ubusuku ku mpera z’umushamvu kubera ko ata mazu akwiye ahari yo gukoraniramwo. Amakoraniro yo gusohoka mu ndimiro ni uwundi muce w’intunganyo z’ishengero, gutanga rero inzu yawe ngo iberemwo iryo koraniro ni agateka koko. Woba woshobora kwemera ko inzu yawe ikoreshwa? Ntureke gutanga inzu yawe ngo ni uko ibayabaye. Abakurambere bazorimbura ibijanye n’aho iyo nzu yawe iri, barimbure kandi n’ibindi bintu bisa n’ivyo bahora barimbura igihe baba bariko barahitamwo ahobera inyigisho y’igitabu. Nimba wipfuza gutanga inzu yawe, nubimenyeshe umucungezi wawe w’umugwi.