Turyohore ubuhanga bwacu mu busuku—Nufashe abo wigisha Bibiliya batsimbataze akamenyero keza ko kwiyigisha

Igituma bihambaye: Kugira ngo abiga Bibiliya babe abakomeye mu vy’impwemu, bategerezwa kugaburira imizirikanyi n’imitima yabo ibirenze inyigisho z’ishimikiro zo mw’Ijambo ry’Imana. (Heb. 5:12–6:1) Kwiga bisaba akigoro. Harimwo kurondera isano riri hagati y’ibintu bishasha twize n’ivyo dusanzwe tuzi no kuzirikana ku kuntu ivyo twize ari ngirakamaro. (Imig. 2:1-6) Igihe abariko bariga Bibiliya bamenye kwigirira ubushakashatsi bizobafasha kwishura ibibazo bishingiye kuri Bibiliya bakoresheje ibisohokayandikiro vyacu. Akigoro bagira mu kwihatira gushira mu ngiro ivyo biga kazobafasha gutsinda ibigeragezo bizobashikira mu buzima bwabo bwa gikirisu.— Luka 6:47, 48.

Uko twobigira:

Nushimike ku kamaro ko gusaba imfashanyo Yehova mw’isengesho imbere y’uko mutangura kwiga.—Yoh. 14:26; 1 Kor. 2:10.
Kuva mu ntango, nuremeshe uwo wigisha Bibiliya kuza arategura imbere y’igihe ivyo muzokwiga. Numwereke mu gitabu cawe ingene utegura, maze umwigishe guca imirongo canke gusiga ibara ku majambo canke ku mungane nyamukuru.
Numenyereze uwo wigisha Bibiliya kuza arishura mu majambo yiwe. Niwirinde guhindura iyo nyigisho ikiganiro c’ibibazo n’inyishu aho uwo wigisha apfa kuza arasoma inyishu mu gitabu.
Nuremeshe uwo wigisha Bibiliya gusoma igihimba c’Ijambo ry’Imana buri musi. Numwereke urutonde rwo gusoma Bibiliya rwerekana uburyo bwiza bwo kubigira ruri kuri jw.org. Kugira akamenyero keza ko gusoma Bibiliya ku musi ku musi ni ikintu gisaba akigoro, ariko ako kigora si ak’impfagusa.—Zab. 1:2, 3.
Niwereke uwo wigisha Bibiliya ukuntu yoronka inyishu z’ibibazo bishingiye kuri Bibiliya akoresheje ca cegeranyo c’amayagwa yo mu bisohokayandikiro vyacu (Watchtower Library) canke ca CEGERANYO C’IBITABU CO KURI INTERNET ca Watchtower canke ca GITABU C’UBUSHAKASHATSI. Numufashe amenye indome ziranga ibisohokayandikiro dukunze gukoresha mu makoraniro y’ishengero.

Muri uku kwezi nugerageze iki kintu:

Murangije agatwe canke umutwe, nusabe uwo wigisha Bibiliya avuge muri make ivyo muhejeje kwiga. Niba ata we ufise, niwimenyereze kugira incamake y’igisomwa kinaka co muri Bibiliya canke ingingo yo mu Munara w’Inderetsi kugira ngo uryohore ububasha bwawe bwo gutahura ivyo usoma.