ISI YUZUYEMWO INGORANE

2 | Nukingire akazi ukora

IGITUMA BIHAMBAYE

Buri musi, abantu benshi ntibiborohera kuronka icorirenza. Ikibabaje, ingorane ziri mw’isi zirashobora gutuma birushiriza kubabera urugamba kuronka ikibabeshaho. Uti kubera iki?

Mu turere twugarijwe n’ingorane, ibiciro vy’ibintu vya nkenerwa biraduga, aho twovuga nk’ibifungurwa n’uburaro.
Ivyago birashobora gutuma abantu batakaza akazi canke agashahara kabo kakagabanuka.
Ibiza n’isibe birashobora kwonona canke kubomora inyubakwa abantu bakoreramwo ubuzi, amazu canke ibindi bibanza, bigatuma benshi basigara bifumbereje.

Ico ukwiye kumenya

Nimba uzi gukoresha neza amahera, uzoshobora kuvyifatamwo neza mu gihe c’ubukene.
Amahera nta woyizigira. Agashahara uronka, utwo waziganije canke ibindi bintu birashobora guta agaciro.
Hari ibintu amahera adashobora kugura, nk’agahimbare n’ubumwe mu muryango.

Ico wokora ubu

Bibiliya ivuga iti: “Iyo . . . dufise ivyo kurya n’ivyo kwambara, ivyo biratubumba.”—1 Timoteyo 6:8.

Kubumbwa n’ivyo dufise birimwo kugabanya ivyo twipfuza maze tukamarwa ipfa n’uko turonka ivya nkenerwa buri musi. Ivyo birahambaye canecane igihe dufise uburyo buke.

Kugira ubumbwe n’ivyo ufise, vyoshobora gusaba ko uhindura uburyo wari ubayeho. Nimba ukoresha amahera arenze ayo winjiza, nta kindi bizovamwo atari ukwunyura ingorane.

UKO WOVYIFATAMWO—Impanuro nziza

Mu bihe vy’ingorane, nukingire akazi ukora mu gukurikiza izi mpanuro

NUGABANYE AYO USOHORA

Nugabanye ayo usohora

Ntugure ikintu ico ari co cose kiretse ugikeneye vy’ukuri. Niwibaze uti: ‘Ubwo sinobaho ntagira umuduga? Noba notera akarima k’imboga?’
Imbere yo kugura ikintu, niwibaze uti: ‘Noba ndagikeneye vy’ukuri? Noba mfise amahera yo kukigura?’
Nimba hari imfashanyo itangwa na Leta canke n’abagiraneza, nuyisabe.

“Twaricaye uko tugize umuryango turasuzuma uko tubayeho. Twaragabanije amahera dukoresha mu vy’ukwisamaza. Twarahevye n’ibifungurwa bizimvye.”—Gift.

NUHARURE AYASOHOKA N’AYINJIRA

Nuharure ayasohoka n’ayinjira

Bibiliya ivuga iti: “Imigambi y’umunyamwete ntibura kuvamwo akarusho, ariko uwihutagiza wese ntabura kugana ku bukene.” (Imigani 21:5) Guharura ayasohoka n’ayinjira vyogufasha kumenya ko ayo usohora ataruta ayo winjiza.

Ubwa mbere, niwandike ayo witeze kuronka mu kwezi.
Ubukurikira, nugire urutonde rw’ayo musohora buri kwezi mu bintu vya nkenerwa maze murabe ko hari ivyo mwohindura.
Nuce ugereranya ayo winjiza n’ayo usohora maze nimba bikenewe urabe ibintu wogabanya canke woheba kugira ntusohore ayarenga ayo winjiza.

“Buri kwezi turagira urutonde rw’ayo twinjiza n’ayo dusohora. Turaziganya amahera y’ivyoshika tutari tuvyiteze be n’ibintu vya nkenerwa tuzokenera muri kazoza. Ivyo bituma tutahagarika umutima cane kubera tuba twategekanije imbere y’igihe ingene tuzokoresha amahera tuzoronka.”—Carlos.

NIWIRINDE AMADENI / NUZIGANYE

Niwirinde amadeni / Nuziganye

Nutegekanye ukuntu wogabanya amadeni. Nimba bishoboka, niwirinde amadeni. Ahubwo riho, nugire utwo uziganije kugira ushobore kuronka ivyo ukenera.
Nuze uraziganya uduhera dukeyi buri kwezi ku bw’ivyoshika uvyiteze canke utari uvyiteze.

NUKORE CANE / UGUMANE AKAZI

Bibiliya ivuga iti: “Ubwoko bwose bw’ubucumukure burazana akarusho.”—Imigani 14:23.

Nukore cane / Ugumane akazi

Nugume ubona akazi ukora mu buryo bwiza. Naho ako kazi koba atari ko wari wipfuza, karagutunze.
Niwihatire kuba umunyamwete n’umwizigirwa. Ivyo birashobora kugufasha kugumana akazi canke n’imiburiburi bikazotuma vyoroha ko uronka akandi.

“Ndakora akazi kose ndonse naho ntoba ndagakunda canke bakaba batampemba ayo nipfuza. Nama nkorana ubwizigirwa kandi nkakora neza igikorwa njejwe. Nkora nk’uwikorera.”—Dmitriy.

Nimba uriko urarondera akazi . . .

Nugire ico ukoze. Nubaze amashirahamwe yoba atanga ubuzi ushobora gukora naho atoba ariko ararondera abakozi. Nubwire incuti n’abagenzi ko uriko urarondera akazi.
Nuhuze n’uko ibintu vyifashe. Birashoboka ko utoronka akazi gakwije neza na neza ivyo wipfuza vyose.