IGICE CA GATANU

Nimugaruke “kuri wa mwungere akaba n’umucungezi w’ubuzima bwanyu”

Mu ngorane twavuze muri aka gatabu, hoba hari n’imwe yoba isa n’iyo ufise? Nimba ihari, uri mu bandi. Abasavyi b’Imana benshi b’abizigirwa, baba abo mu gihe ca kera canke abo mu gihe ca none, barashikiwe na mwene izo ngorane. Nk’uko nyene Yehova yabafashije kuzitsinda, na wewe arashobora kugufasha.

Yehova azogufasha igihe uzoba uriko urarondera kugaruka kuri we

NUMENYE neza ko Yehova azogufasha igihe uzoba uriko urarondera kugaruka kuri we. Azogufasha kwihanganira amaganya, gutuma umubabaro ufise uhera, no kuronka amahoro yo mu muzirikanyi no mu mutima ava ku kugira ijwi ryo mu mutima ryiza. Gutyo woshobora kwumva usubiye kuvyurirwa umutima wo gusukurira Yehova uri kumwe n’abasavyi biwe bagenzawe. Ivyawe bizoba bimeze nk’ivy’abakirisu bamwe bo mu kinjana ca mbere, abo intumwa Petero yandikiye ati: “Mwari nk’intama, muriko murazimira; ariko ubu mwaragarutse kuri wa mwungere akaba n’umucungezi w’ubuzima bwanyu.”—1 Petero 2:25.

Nta kindi kintu na kimwe wokora coza kiruta kugaruka kuri Yehova. Uti kubera iki? Kubera ko ivyo bizonezereza umutima wa Yehova. (Imigani 27:11) Nk’uko ubizi, Yehova arafise inyiyumvo, rero ivyo dukora birashobora kumunezereza canke kumubabaza. Ariko ntiwumve, Yehova ntaduhata ngo tumukunde canke ngo tumukorere. (Gusubira mu vyagezwe 30:19, 20) Umuhinga umwe mu vya Bibiliya yabivuze muri ubu buryo: “Nta muntu n’umwe yoshobora kwugurura umutima wawe. Ni we utegerezwa kuwiyugururira.” Dukoreye Yehova tubitumwe n’umutima wuzuye urukundo, tuba twuguruye umutima wacu. Ivyo tubigize, tuba tumuhaye ingabirano y’agaciro, nayo akaba ari ugutungana kwacu, kandi ivyo biratuma umutima wiwe unezerwa cane. Mu vy’ukuri, nta kintu na kimwe cogereranywa n’agahimbare twironkera iyo dukoreye Yehova nk’uko abibereye.—Ivyakozwe 20:35; Ivyahishuwe 4:11.

Mushiki wacu yari yarahororokewe ariko arakiranwa igishika mw’ishengero

Vyongeye, niwasubira gukora imirimo ya gikirisu, uzoronka ivyo ukenera mu vy’impwemu. (Matayo 5:3) Mu buryo ubuhe? Abantu bo hirya no hino kw’isi baribaza bati: ‘Ni kubera iki turiho?’ Ntibafise inyishu z’ibibazo vyerekeye intumbero y’ubuzima. Abantu barumva bakeneye ivy’impwemu kubera ko ukwo ari ko Yehova yabaremye. Yaturemye ku buryo twumva dushize akanyota iyo tumusukuriye. Nta kintu cotuma twumva dushize akanyota kiruta gusukurira Yehova tubitumwe n’urukundo.—Zaburi 63:1-5.

Numenye ko Yehova yipfuza ko ugaruka kuri we. Ivyo wovyemezwa n’iki? Zirikana iki kintu: Aka gatabu kateguwe mu buryo bwitondewe hariko n’amasengesho menshi. Kumbure wakaronse ugahawe n’umukurambere canke uwundi musangiye ukwizera. Rero waragasomye maze urashira mu ngiro ivyo kavuga. Ivyo vyose ni ivyerekana ko Yehova atakwibagiye. Ahubwo nyabuna, ariko aragukwegera abigiranye urukundo ngo ugaruke kuri we.—Yohani 6:44.

Turahumurizwa no kumenya yuko Yehova atigera yibagira abasavyi biwe bazimiye. Ivyo ni vyo mushiki wacu umwe yitwa Donna yahavuye atahura. Yavuze ati: “Naragiye akayombekere ndava mu kuri, ariko akenshi nasanga ndiko ndazirikana kuri Zaburi 139:23, 24, iyigira iti: ‘Mana, nunserangure umenye umutima wanje. Nunsuzume umenye ivyiyumviro vyanje bidurumbanya, urabe ko muri jewe hari inzira n’imwe ibabaza, unyobore mu nzira y’igihe kitagira urugero.’ Nari nzi ko ntari uw’isi, sinigeze mbona ko ndayifisemwo ikibanza, kandi nari nzi ko ishirahamwe rya Yehova ari ryo nari nkwiye kuba ndimwo. Naratanguye kubona ko Yehova atigeze ampeba; nari nkeneye gusa kurondera ukuntu nosubira kuri we. Kandi ndanezerewe cane kubera ko nabigize!”

“Naratanguye kubona ko Yehova atigeze ampeba; nari nkeneye gusa kurondera ukuntu nosubira kuri we”

Dusenga tubikuye ku mutima dusaba ko nawe wosubira kugira “akanyamuneza ka Yehova.” (Nehemiya 8:10) Niwagaruka kuri Yehova ntuzokwigera wicuza.

Inyishu z’ibibazo bijanye no kugaruka kuri Yehova

NOHERA HE?

Umuntu yahora arwaye bisaba ko agenda aramenyereza buhorobuhoro kugira asubire gukora ivyo yahora akora. Muri ubwo buryo nyene, woshobora buhorobuhoro kugenda uraronka inkomezi zo mu vy’impwemu ugiye uragerageza kwihereza n’imiburiburi udufungurwa tw’ivy’impwemu dukeyi buri musi. Ntiwibaze ko utegerezwa kubikorera rimwe. Kumbure woshobora kumara iminuta mikeyi uriko urasoma Bibiliya canke wumviriza ubusomyi bwayo bwafashwe amajwi, uriko uriga kimwe mu bisohokayandikiro vyacu, canke uri kuri wa muhora wa jw.org, canke na ho urabe kimwe mu biganiro biri kuri televiziyo ya JW. N’ikindi kandi, nugerageze kwitaba ikoraniro ry’ishengero vuba bishoboka. Ikiruta vyose, nusenge Yehova umusabe agufashe. Bibiliya ivuga iti: “Muterere amaganya yanyu yose kuri yo, kuko ibababara.”—1 Petero 5:7.

“Igihe nari narahororokewe, narumva mbere n’isoni zo gusenga. Igihe narya umutima amenyo nkasenga, hari umukurambere wacu yangendeye. Yaramfashije gutahura ko Yehova atampevye. Uwo mukurambere yampanuye ko nohera ku gusoma Bibiliya buri musi. Igihe nabigira, nararonse inguvu zo gusubira kuja ku makoraniro. Mu nyuma, narasubiye kugira uruhara mu busuku. Ndahimbawe cane no kuba Yehova atigeze ampeba.”—Eeva.

MW’ISHENGERO BAZONYAKIRA GUTE?

Numenye neza ko abagize ishengero bazokwakirana igishika cinshi. Aho kukunebagura canke ngo bagutore amahinyu, bazokwereka urwo bagukunda kandi bazokora uko bashoboye kwose kugira bakuremeshe.—Abaheburayo 10:24, 25.

“Narumva isoni zo gusubira ku Ngoro y’Ubwami. Nariyumvira ukuntu abagenzi bazomfata. Umwe mu bavukanyikazi bageze mu zabukuru yari amaze imyaka 30 muri iryo shengero yambwiye ati: ‘Kibondo, urahawe ikaze i muhira!’ Ivyo vyarankoze ku mutima koko. Mu vy’ukuri nari ngarutse i muhira.”—Javier.

“Naragiye ku Ngoro y’Ubwami nicara ku ntebe y’inyuma kugira ngo ntihagire uwumbona. Ariko benshi baciye banyibuka nitaba amakoraniro nkiri umwana. Barampaye ikaze barangumbira n’igishika cinshi ku buryo numvise amahoro atovugwa. Ni nk’aho nari ngarutse i muhira.”—Marco.

ABAKURAMBERE BAZOMFASHA GUTE?

Abakurambere bazogufatana umutima mwiza. Bazogukeza kubera ko uzoba wipfuza gusubira kugira “urukundo wari ufise ubwa mbere.” (Ivyahishuwe 2:4) Babigiranye imbabazi “n’umutima w’ubwitonzi,” bazogufasha gukosora amakosa yose wakoze. (Abagalatiya 6:1; Imigani 28:13) Abakurambere boshobora gutunganya ivy’uko hagira umuntu akuyoborera inyigisho ya Bibiliya, kumbure mu gitabu Niwiyegereze Yehova canke “Mwigumize mu rukundo rw’Imana.” Urama wibuka ko abakurambere bazoguma bakuremesha kandi bakaguma bagushigikira muri vyose.—Yesaya 32:1, 2.

“Mu myaka umunani namaze narahororokewe, abakurambere baguma bagerageza kumfasha. Umusi umwe, hari umukurambere yanyeretse amafoto amwamwe yari yaradufotoye. Ayo mafoto yaranyibukije ibintu bihimbaye vyinshi cane ku buryo naciye nipfuza cane umunezero nari mfise ngikorera Yehova. Abakurambere babigiranye urukundo baramfashije gusubira kugira urutonde rwiza rwo mu vy’impwemu.”—Victor.

“Imana izogukomeza”

Igitabu cacu c’indirimbo Turirimbire Yehova tunezerewe, kirimwo indirimbo zitari nke zikora ku mutima zokuremesha kandi zikagukomeza igihe uzoba uriko urasubira gukora imirimo y’ivy’impwemu. Raba nk’akarorero amajambo ari mu ruririmbo rwa 38. Urwo ruririmbo rushingiye ku majambo ari muri 1 Petero 5:10, rukaba rufise umutwe uvuga ngo “Yehova azogukomeza.”

Yehova yabonye ko war’unyotewe

Kumumenya no kumukorera,

Maze na we ac’arakumurikira

Ubu none rab’uraryohewe!

Wamubwiye yuk’uzomwumvira,

Kand’azogufasha kubigira.
Yarahevye Yezu kuko yagukunze.

Ashaka k’umuber’umugenzi.

Kw’atimanye mbega ca kinege ciwe,

Wumva non’azokwim’inkomezi?

Ntazibagir’ukwizera kwawe.

Azokwitaho, kukw’ari Dawe.

(ICITABIRIZO)

Waguzwe ya maraso; wegukir’Imana.

Izogukomeza, uhez’ushikame.

Izokuyobora yonger’ikuzigame.

Izogukomeza, uhez’ushikame.

Kugira wumvirize amajwi y’abaririmvyi bariko bararirimba urwo ruririmbo rw’Ubwami be n’izindi nk’izo, ja kuri jw.org canke winjireyo ukoresheje aka kamenyetso ntekeramakuru.