Ijwi ryo mu Mutima—Ni Umutwaro Canke Ni Ubutunzi?

‘IJWI ryanje ryo mu mutima rirambujije amahoro!’ Rimwe na rimwe nka twese turacumitwa n’ijwi ryo mu mutima. Ukwiyumvamwo ukwo bishobora gutangurira ku kutoroherwa gusanzwe bigashika ku mubabaro ubāga. Ijwi ryo mu mutima rifyiriye rirashobora kuvyurira umuntu ukudendebukirwa canke ukwiyumvamwo rwose ko ivyiwe vyanse.

Tubiravye muri ubwo buryo none, ijwi ryo mu mutima ntiriba ari umutwaro? Hari abokwibaza ko riba ari wo. Abantu biyumvira bakageza kure bo mu bihe vyahise bǎkunda kubona ko ijwi ryo mu mutima ari ikintu c’indemanwa, ububasha buvukanwa. Abenshi bǐbaza ko ari ikiyobozi co mu vy’ukwigenza runtu citangirwa n’Imana ubwayo. Kubera ico rero, ijwi ryo mu mutima ryiswe “Ukuhaba kw’Imana mu muntu,” “akamere twaremanywe mu ntango,” mbere vyongeye ngo ni “ijwi ry’Imana.”

Ariko mu myaka iheruka, haragwiriye ivy’ukuvuga yuko ijwi ryo mu mutima ahanini ari ububasha umuntu aronka—ikintu kiva ku bavyeyi no ku kibano. Nk’akarorero, abahanga bamwebamwe batohoza ivy’inyifato bavuga yuko umwana yiga kwirinda inyifato mbi canecane abitumwe n’ugutinya igihano, bakavuga yuko ico twita ijwi ryo mu mutima ari ukwiyinjizamwo gusa imico y’abavyeyi bacu hamwe n’ivyo bemera. Abandi na bo batunga urutoke ku ruhara ikibano kirangura muri rusangi, mu vy’ukwinjiza mu bandi imico n’ingingo. Hari ababona yuko ugucumitwa n’ijwi ryo mu mutima ata kindi atari amatati yonyene aba hagati y’ico tuba twashaka gukora n’ico ikibano gikoresha umukazo gishaka ko dukora!

Naho hari ivyo vyiyumviro, kenshi na kenshi hari abantu banse kwumvira abavyeyi babo, incuti zabo hamwe n’ibisata bizima kubera yuko ijwi ryabo ryo mu mutima ryaba ribibabwirije. Bamwe mbere baremeye guheba ubuzima bwabo ku bw’ijwi ryabo ryo mu mutima! Kandi naho imico yo kw isi itandukanye bimwe bishika kure, ibikorwa nko kwica, kwiba, kurenga ibigo, kubesha hamwe no kugoka usanga nka hose kw isi bibonwa ko ari bibi. Ivyo ntivyoba vyemeza yuko ijwi ryo mu mutima ari indemanwa, ikintu kivukanwa?

Ijwi ryo Mu Mutima—Ico Bibiliya Irivugako

Umuhanga nyawe ku vy’iki kibazo ni Yehova Imana. Ubiravye, ‘Imana ni yo yaturemye, si twe twiremye.’ (Zaburi 100:3) Aratahura cane rwose uko turemye. Ijambo ry’Imana Bibiliya rirasigura yuko umuntu yaremwe mw “ishusho” y’Imana. (Itanguriro 1:26) Umuntu yaremanywe ubushobozi bwo kumenya ikibi n’iciza; kuva mu ntango, ijwi ryo mu mutima ryari igihimba c’akamere k’umuntu.—Gereranya n’​Itanguriro 2:16, 17.

Intumwa Paulo ivyo yaravyemeje mw ikete yandikiye Abaroma, yandika ibi: “Abanyamahanga badafise ivyagezwe n’Imana iyo bakoze ibibgirizwa na vyo ku bgabo, baba bihindukiye ivyagezwe naho batabifise: kuko berekana igikorwa kibgirijwe n’ivyagezwe canditswe mu mitima yabo, ijwi ryo mu mitima yabo ribgiririkanya na co, ar’icabona cavyo, kand’ivyo biyumvira bifatanya kubarega canke kubaregura.” (Abaroma 2:14, 15) Urabona ko benshi mu batari barerewe mu Vyagezwe vy’Imana vyahawe Abayuda bakurikiza ingingo zimwezimwe zo mu Vyagezwe vy’Imana, batabigira kubera ukugoberwa n’abo mu kibano, ariko “n’akamere”!

Ijwi ryo mu mutima rero aho kuba umutwaro, ni ingabire y’Imana, ubutunzi. Ikitohakanwa co, rirashobora kudutera akababaro. Mugabo igihe turyumviye mu buryo bubereye, rirashobora kuturonsa impembo y’ukwumva ko dushize akanyota cane, tukumva n’amahoro y’imbere muri twebwe. Rirashobora kutwerekeza, kudukingira, no kudutuma gukora ikintu. Igitabu kimwe citwa The Interpreter’s Bible gitanga aya masigurano. “Amagara yo mu buzirikanyi n’ayo mu vy’akanyengetera ko mu mutima ashobora kuzigamwa igihe gusa umuntu agerageza kuzibira imanga iri hagati yivyo akora n’ivyo yiyumvamwo ko yari akwiye gukora.” Umuntu ashobora kuzibira iyo manga gute? Vyoba bishoboka kumeresha ukundi no kwigisha ijwi ryacu ryo mu mutima? Ivyo bibazo biraza kurimbūrwa mu kiganiro gikurikira.