Yehova Ntazoteba

“Naho [ivyerekanywe] vyotebagana, ubirorēre, kuko bitazobura kuza, ntibizoteba.”​—HABAKUKI 2:3.

1. Ni umwiyemezo uwuhe wagaragajwe n’abasavyi ba Yehova, kandi ivyo vyabasunikiye gukora iki?

“NZOHAGARARA nshibamye.” Ivyo ni vyo Habakuki umumenyeshakazoza w’Imana yari yiyemeje. (Habakuki 2:1) Abasavyi ba Yehova bo mu kinjana ca 20 bagaragaje umwiyemezo nk’uwo nyene. Kubera ico, baritabiriye n’umwete aka kamo katewe kw’iteraniro ry’akataraboneka ryabaye muri Nyakanga 1922 kagira gati: “Uyu ni umusi uruta iyindi yose. Raba, Umwami ari ku ngoma! Muri abakozi bamwamamaza. Ku bw’ico rero, tangaze, tangaze, tangaze Umwami n’ubwami bwiwe.”

2. Igihe Abakirisu basizwe bashobora gusubizwa intege zo gukora igikorwa n’umwete inyuma y’Intambara ya Mbere y’Isi Yose, bashobora kuvuga iki?

² Inyuma y’Intambara ya Mbere y’Isi Yose, Yehova yasubije amasigarira y’abasizwe b’abizerwa intege zo gukora igikorwa n’umwete. Nka kurya kwa Habakuki, umwe wese muri bo yashobora rero kuvuga ati: “[Nzokenguza] ndābe ico aribumbarire.” Amajambo y’Igiheburayo yahinduwemwo ‘gukenguza’ no ‘gushibama,’ arasubirwamwo mu buhanuzi bwinshi.

“Ntibizoteba”

3. Ni kuki dukwiye kuguma tugavye?

³ Mu gihe Ivyabona vya Yehova basamiriza imburizi y’Imana muri iki gihe, bategerezwa kuba maso kurusha ikindi gihe cose kugira ngo bakurikize amajambo asozera ubuhanuzi bukomeye bwa Yezu, ubugira buti: “Nuko mwame mugavye, kuko mutazi igihe nyen’urugo azozamwo, namb’ari ku mugoroba, canke mu gicugu, canke mu nkoko, cank’umutwenzi ukītse: kugira ngo ni yaza giturumbuka, ntasange musinziriye. Arikw ico mbabariye, ndakibarira bose, nti Mwame mugavye.” (Mariko 13:35-37) Nka kumwe kwa Habakuki no mu buryo buhuje n’amajambo ya Yezu, dutegerezwa kwama tugavye!

4. Ukuntu ivyacu vyifashe gusa gute n’uko ivya Habakuki vyari vyifashe nko mu 628 B.G.C.?

⁴ Habakuki ashobora kuba yasozereye kwandika igitabu ciwe nko mu 628 B.G.C., imbere y’uko na Babiloni ihinduka inganji nganzasi. Hari haheze imyaka myinshi urubanza Yehova yari yaraciriye Yerusalemu yahunye rusamirizwa. Ariko rero, nta kimenyetso na kimwe gitomoye cariho cagaragaza neza igihe urwo rubanza rwoshikiririjwe. Ni nde yokwemeye ko vyobaye mu myaka nka 21 gusa, kandi ko Babiloni ari yo Yehova yokoresheje mu gushitsa urubanza rwiwe? No muri iki gihe, ntituzi ‘umusi n’isaha’ vyashingiwe iherezo ry’uru runkwekwe, mugabo Yezu yaratuburiye imbere y’igihe ati: “Mwame mwiteguye, kuk’Umwana w’umuntu azoza mu gihe mutiyumviriye.”​—Matayo 24:36, 44.

5. Ni igiki canecane kiremesha ku vyerekeye amajambo Imana yavuze yanditse muri Habakuki 2:2, 3?

⁵ Bivuye ku mvo ibereye, Yehova yarashinze Habakuki iri banga ry’akezamutima! “Andika ivyo weretswe, uvyandike ku bisate mu nyuguti zisomeka, kugira ng’ūbisoma anyarutse. Kukw ivyerekanywe bifise igihe vyashingiwe, kandi vyihutira kugishikako, ntibizobesha; naho vyotebagana, ubirorēre, kuko bitazobura kuza, ntibizoteba.” (Habakuki 2:2, 3) Muri iki gihe, ububisha n’ubukazi vyarimonogoje kw’isi yose, ivyo bikaba bigaragaza ko “umusi mukuru uteye ubgoba w’Uhoraho” wegereje cane. (Yoweli 2:31) Mu vy’ukuri, amajambo Yehova yivugiye ubwiwe asubiriza umutima mu nda agira ati “Ntibizoteba,” ni amajambo aremesha!

6. Twoshobora gute kurokoka wa musi w’urubanza rwo kwica uriko uraza?

⁶ None dushobora gute kuzorokoka umusi uriko uraza w’urubanza rwo kwica? Yehova yishura yerekana itandukaniro hagati y’umugororotsi n’uwugabitanya mu kugira ati: “Rāba, umutima wiwe urīkakishije, ntutunganye: arik’umugororotsi azobeshwaho n’ukwizera kwiwe.” (Habakuki 2:4) Abategetsi b’ubwibone kandi b’abanyamwina hamwe n’abatwarwa babo bameze ukwo nyene, iki gihe ca none baracujujemwo amaraso y’abantu amamiliyoni bishwe ataco bazira, canecane mu ntambara zibiri z’isi yose no mu bwicanyi bw’agahomerabunwa bushingiye ku moko. Abasuku b’Imana basizwe bakunda amahoro bobo barihanganye babigiranye ukwizigirwa. Ni bo bagize rya “hanga rigororoka rikitondera ivy’ukuri.” Iryo hanga kumwe na bagenzi babo, ari bo za “zindi ntama,” bakurikiza iyi nkeburo igira iti: “Ni mwizigire Uhoraho ibihe vyose: kuk’Uhoraho Yehova ari we gitandara camah’ibihe bidashira.”​—Yesaya 26:2-4; Yohana 10:16.

7. Dukurikije ukuntu Paulo yakoresheje Habakuki 2:4, dukwiye gukora iki?

⁷ Igihe intumwa Paulo yandikira Abakirisu b’Aheburayo, yasubiyemwo amajambo yavuzwe muri Habakuki 2:4 aho yabwira abasavyi ba Yehova iti: “Mukwiye kwihangana, kugira ngo ni mwamara gukora ivy’Imana igomba mubone guhabga ivyasezeranywe. Kuko hasigaye igihe gito cane, kand’ūgira aze, azoza, ntazoteba. Ariko, umugororotsi wanje azobeshwaho n’ukwizera, na ho ni yiyonjorora ntazohimbara umutima wanje.” (Abaheburayo 10:36-38) Iki gihe turimwo si ico kwineganegera canke co kugwa mu mutego w’inzira zirangwa uguhahamira amaronko n’ibinezereza z’iyi si ya Shetani. Dutegerezwa gukora iki gushika aho ca “gihe gito cane” gisigaye kizorangirira? Nka kumwe kwa Paulo, twebwe abagize ihanga ryeranda rya Yehova dutegerezwa ‘gushingīra ibiri imbere, tukabandanya gushika ku co dutanguranirwa’ c’ubuzima budahera. (Ab’i Filipi 3:13, 14) Kandi nka kumwe kwa Yezu, dutegerezwa ‘kwihangana ku bw’umunezero wadushizwe imbere.’​—Abaheburayo 12:2.

8. Ba “bantu” bavugwa muri Habakuki 2:5 ni ba nde, kandi ni kuki ataco bazoshikako?

⁸ Muri Habakuki 2:5 hadondora “abantu” batandukanye n’abasavyi ba Yehova, bo bananirwa gushikira intumbero yabo, naho nyene “baromoye nk’i kuzimu.” Mbega abo bantu ‘badahaga’ ni ba nde? N’ukudahaga n’akantu nka kumwe kwa Babiloni yo mu gihe ca Habakuki, abo “bantu” bagizwe n’intwaro, zaba iz’Abafashisite, iz’Abanazi, iz’Abakomunisita canke mbere n’izitwa iza demokarasi​—zirwana intambara zirondera kwagura ibihugu vyabo. Buzuza kandi kuzimu, ari yo mva, ubugingo butagira ico buzira. Mugabo abo “bantu” b’ibihemu bagizwe n’isi ya Shetani baborewe ukwibona ko bahambaye, baragerageza “[kw]iyegeranirizakw amahanga yose, [b]ikumakumirakw amoko yose,” ariko ntibabishikeko. Yehova Imana ni we wenyene ashobora kunywanisha abantu bose, kandi ivyo azobikora abicishije ku Bwami bwa Mesiya.​—Matayo 6:9, 10.

Ibara Ritangurira ya Mahano Atanu

9, 10. (a) Yehova abandanya kumenyesha iki biciye kuri Habakuki? (b) Ku biraba inyungu mbi ibintu vyifashe gute muri iki gihe?

⁹ Biciye ku muhanuzi wiwe Habakuki, Yehova yaratangaje urukurikirane rw’amahano atanu, akaba ari imanza zitegerezwa gushitswa mu gutegura isi kugira ngo ibemwo abasenga Imana b’abizigirwa. Abo b’imitima igororotse ‘baciweko akagani’ Yehova ashikiriza. Muri Habakuki 2:6 tuhasoma duti: “Bazobona ibara, abakuma ibitar’ivyabo, bagatako bakīremēka amasahu!”

¹⁰ Aha hashimika ku nyungu mbi. Mw’isi idukikije, umutunzi arushiriza gutunga, umukene na we akarushiriza gukena. Abacuruza ibiyayura umutwe n’abanyuruji barirundaniriza ubutunzi bwinshi, mu gihe benshi muri ba nyarucari bicwa n’inzara. Ica kane c’ababa kw’isi bivugwa ko ari abaguye mu ruzu. Uburyo bwo kubaho mu bihugu vyinshi burateye ikinya. Abipfuza ubugororotsi kw’isi batangara bavuga bati: Mbega ubu bubisha bugenda bwiyongera buzogeza “ryari”! Yamara iherezo riri hafi! Si ivy’imbeshere, ivyeretswe ‘ntibizoteba.’

11. Habakuki avuga iki ku vyerekeye iseswa ry’amaraso y’abantu, kandi ni kuki dushobora kuvuga yuko hariho umwenda munini w’amaraso kw’isi muri iki gihe?

¹¹ Uwo muhanuzi abwira ababisha ati: “Ko mwanyaze amahanga menshi, namwe amasigarira yose y’amoko azobanyaga, abahōye amaraso y’abantu, n’umuryano igihugu cabonye, bo n’ibisagara n’ababibamwo bose.” (Habakuki 2:8) Ese ukuntu dusanga umwenda w’amaraso kw’isi muri iki gihe! Yezu yaravuze atomora ati: “Ababanguye inkota bose bazokwicwa n’inkota.” (Matayo 26:52) Yamara, muri iki kinjana ca 20 conyene, amahanga hamwe n’utugwi tw’amoko dufise umwenda w’amaraso, twagirizwa igandagurwa ry’abantu barenga imiliyoni ijana. Ese ibara rizobonwa n’abagira uruhara muri iryo seswa ry’amaraso!

Ibara rya Kabiri

12. Ni ibara rya kabiri irihe ryanditswe na Habakuki, kandi dushobora kudakeka gute ko inyungu z’ubugunge ataco zizomara?

¹² Ibara rya kabiri, iryanditswe muri Habakuki 2:9-11, rigwa ku “[wu]ronderera inzu yiwe inyungu mbi, kugira ngo yiyarikire icāri ciwe hejuru iyo bigwa, ngw abone gukira ukuboko kw’umunyakibi!” Inyungu z’ubugunge nta co zizomara, nk’uko n’umwanditsi wa Zaburi abitomora ati: “Ntuz’ugire ubgoba umuntu ni yatunga, icubahiro c’inzu yiwe kikagwira: Kuko ni yahwera atazogira ico ajana, icubahiro ciwe ntikizomanuka ngo kimukurikire.” (Zaburi 49:16, 17) Rero iyi mpanuro iranga ubukerebutsi y’intumwa Paulo irahambaye. Igira iti: “Wihanize abatunzi bo mu vy’iki gihe, boye kwibona, canke kwishimira ubutunzi butar’ubgo kwishimirwa, ariko bishimire Imana, iduha vyose ibisēsekaye, ngo tubinezererwe.”​—1 Timoteyo 6:17.

13. Kuki dukwiye kubandanya gusamiriza imburizi y’Imana?

¹³ Ese ukuntu bihambaye kuba muri iki gihe ubutumwa bw’urubanza rw’Imana busamirizwa! Igihe Abafarizayo barwanya ivy’uko abantu bashimagiza Yezu bavuga ko ari “Umwami, aje mw izina ry’Uhoraho,” yasubijeyo ati: “Ndababgire, aba ni bahora, amabuye arasemerera.” (Luka 19:38-40) N’abasavyi b’Imana hamwe bonanirwa gushira ku kabarore ububisha buri muri iyi si, “ibuye ryo mu yubatse inzu [ry]osemerera.” (Habakuki 2:11) Nimuze rero n’umutima rugabo tubandanye gusamiriza imburizi y’Imana!

Ibara rya Gatatu n’Ikibazo c’Ukwagirwa n’Amaraso

14. Amadini yo muri iyi si yagiriwe n’ikihe caha c’amaraso?

¹⁴ Ibara rya gatatu ryatangajwe biciye kuri Habakuki ryerekeye ivy’ukwagīrwa n’amaraso. Muri Habakuki 2:12 havuga hati: “Azobona ibara, uwubakisha igisagara amaraso yavishije, akaninaharisha igisagara ibigabitanyo!” Muri uru runkwekwe rw’ibintu, akenshi ukugabitanya no gusesa amaraso birajana. Ahanini, amadini y’isi ni yo yagiye aratuma haba ugusesa amaraso kw’agahomerabunwa muri kahise. Dushobora gusa kuvuga nka za Ntambara z’Amadini hagati y’Abitwa Abakirisu n’Abisilamu; ya Sentare ya Gatolika yo muri Esupanye no muri Amerika y’Epfo; ya Ntambara y’Imyaka Mirongo Itatu yaba i Buraya hagati y’Abaporotisanti n’Abagatolika; be n’izasheshe amaraso kurusha izindi, ari zo za ntambara zibiri z’isi yose zo muri iki kinjana cacu, zompi zikaba zatanguriye mu karere k’Abitwa Abakirisu.

15. (a) Amahanga abandanya gukora iki afashwe mu mugongo n’amadini canke ano madini akabirenzako uruho rw’amazi? (b) Ishirahamwe Mpuzamakungu ryoba rishobora guhagarika ivy’ugukwiragiza ibirwanisho muri iyi si?

¹⁵ Kimwe mu bintu vy’ububisha kuruta ibindi vyose vyaranze intambara ya kabiri y’isi yose, ni kwa Gutikiza Abayuda kwagirwa n’Abanazi, ukwahitanye Abayuda hamwe n’abandi batagira ico bazira b’i Buraya baharurwa mu mamiliyoni. Ejobundi ni ho gusa abayobozi ba Ekeleziya Gatolika y’i Roma bo mu Bufaransa biyemereye icese yuko bananiwe kurwanya irungikwa ry’abantu bazira ubusa ibihumbi amajana mu makambi y’iyiciro y’Abanazi. Yamara amahanga arabandanya kwitegurira gusesa amaraso, abifashijwemwo n’ikeleziya canke ino nyene ikabirenzako uruho rw’amazi. Ikinyamakuru Time (ikigenewe amakuru yo hirya no hino kw’isi), giherutse kuvuga ivy’Idini ry’Abarotodogisi ryo mu Burusiya giti: “Iryo dini ryanaguwe riragira n’akosho gakomeye mu bintu ata woshoboye kwiyumvira kera: ni ukuvuga abantu n’ibikoresho bigenewe intambara vyo mu Burusiya. . . . Uguhezagira indege z’intambara n’ibigo vy’abasirikare, kwabaye nk’akamenyero. Mu kwezi kwa Munyonyo, mu kigo c’abihebeye Imana c’ahitwa Danilovsky i Mosuku, ku cicaro c’Umwepisikopi Mukuru w’Uburusiya, iyo keleziya yarashitse no ku guhezagira ibirwanisho ruhonyanganda vy’Uburusiya.” Mbega Ishirahamwe Mpuzamakungu ryoba rishobora guhagarika ivyo kwongera guha iyi si ibikoresho vy’intambara vya gishetani? Ihibambewe! Nk’uko ikinyamakuru kimwe, The Guardian, c’i Londres mu Bwongereza kibivuga, hari umuntu umwe yatsindiye ka Gashimwe k’Amahoro Kitiriwe Nobeli yavuze ati: “Igiteye umutima uhagaze mu vy’ukuri, ni uko vya bihugu bitanu ntayegayezwa mu Nama ya ONU Ijejwe Amahoro n’Umutekano ari na vyo bitanu bikwiragiza mw’isi ibirwanisho kurusha ibindi vyose.”

16. Yehova azokorera iki amahanga akokeza intambara?

¹⁶ Mbega Yehova azoshitsa urubanza yaciriye ayo mahanga akokeza intambara? Muri Habakuki 2:13 havuga hati: “Mbega ntibiva k’Uhoraho Nyen’ingabo kw amoko atamishwa n’ibizoturirwa n’umuriro, amahanga akiruhiriza ubusa?” “Uhoraho Nyen’ingabo”! Ni vyo, Yehova afise ingabo zo mw’ijuru zigizwe n’abamarayika, ari zo azokoresha mu guherengeteza abantu n’amahanga bama barota intambara!

17. Ubumenyi ku vyerekeye Yehova buzokwuzura isi ku rugero rungana iki inyuma y’ishitswa ry’urubanza rwiwe ku migwi y’amahanga y’inkazi?

¹⁷ Ni igiki none kizokurikira Yehova niyashitsa urubanza ku migwi y’amahanga y’inkazi? Muri Habakuki 2:14 haratanga inyishu hati: “Kuko kumenya icubahiro c’Uhoraho kuzoba kwuzuye mw isi nk’ukw amazi abugereye mu kiyaga.” Ese ukuntu ari icizigiro ciza igitangaza! Kuri Harumagedoni, ukugaba n’ukuganza kwa Yehova kuzokwemezwa rimwe rizima. (Ivyahishuriwe 16:16) Adukura amazinda yuko ‘aho ashira ibirenge vyiwe azohubahiriza,’ ni ukuvuga iyi si tubako. (Yesaya 60:13) Abantu bose bazokwigishwa inzira y’ubuzima ishimwa n’Imana kugira ngo ukumenya imigambi y’ubuninahazwa ya Yehova kwuzure mw’isi nk’uko amazi y’ibiyaga abugereye.

Ibara rya Kane n’Irya Gatanu

18. Ibara rya kane ryatangajwe na Habakuki ni irihe, kandi ribonekera gute ku kuntu isi yuzuye ubushegabo muri iki gihe?

¹⁸ Ibara rya kane ridondorwa muri Habakuki 2:15 muri aya majambo: “Azobona ibara, ūha mugenzi we ibinyobga, na wewe umwongerakw ibituriranije, ukamuboreza, kugira ngo wirābire ubgambure bgiwe.” Ivyo vyerekeza ku buhehesi n’ukuba akagaramaruganda vyo muri iyi si ya none. Ubushegabo bwayo, ubushigikirwa mbere n’inzego z’ivy’idini zirekerana ibintu, bwarateye iyindi ntambwe. Ibiza, nk’akarorero SIDA be n’izindi ndwara zandukirira mu bihimba vy’irondoka, zirabandanya kubica bigacika kw’isi hose. Aho guca ibibatsi vy’‘icubahiro ca Yehova,’ iyaruka ryikwegerako ryo muri iki gihe rigenda rirushiriza kwishora mu bikorwa vy’akahebwe kandi rikagenda rigana ugushitswa kw’urubanza rw’Imana. Iyi si ataco yibanga, ‘iyuzuyeko ibiteterwe mu gishingo c’icubahiro,’ igiye kunywera ku gikombe c’uburake bwa Yehova, ubugereranya ivyo ashaka ku biyerekeye. “Ivy’isoni biteye ishishi bizoba ku cubahiro c[ayo].”​—Habakuki 2:16.

19. Amajambo atangurira ibara rya gatanu ryatangajwe na Habakuki yerekeye iki, kandi ni kuki ayo majambo ari n’ico avuze mw’isi ya kino gihe?

¹⁹ Amajambo atangurira ibara rya gatanu atanga imburizi ikomeye yo kwirinda gusenga ibishushanyo. Yehova yasavye uwo muhanuzi gushikiriza aya majambo akomeye: “Azobona ibara, ūbgira igiti, ati Ni wikangure! akabarira n’ibuye ry’ikiragi, ati Haguruka! Mbeg’ivyo vyoragura? Erega vyayagirijwekw izahabu n’ifeza, arikw imbere nta mpwemu bigira na mba.” (Habakuki 2:19) Kugeza muri iki gihe, mu Biyita Abakirisu no mu bitwa ngo ni Abapagani, barunamira ibishusho vya Kirisitu ari ku musaraba, ibishusho vya Bikira Mariya, n’ivy’abandi batagatifu, be n’ayandi mashusho y’abantu n’ibikoko. Nta na kimwe muri ivyo gishobora gukanguka ngo gikize abagisenga baco igihe Yehova azoba aje gushitsa urubanza. Izahabu n’ifeza vyaziyagirijweko biba ibintu bitagira agaciro namba uravye ubwiza buhebuje bwa Yehova Imana ihoraho, n’ubwiza bw’ibiremwa vyiwe bifise ubuzima. Nimuze dushemeze izina ryiwe ntangere ibihe bidahera!

20. Ni indinganizo iyihe y’ivy’urusengero dufise agateka ko gusukuriramwo n’umunezero?

²⁰ Egome, Imana yacu Yehova irakwiriye gushemezwa mu buryo bwose. Nimuze twumvire iyi mburi ikomeye yo kwirinda gusenga ibigirwamana, twiyumvamwo ko tuyikurikiza bimwe bishika ibwina. Mugabo tega amatwi! Yehova aracavuga: “Uhoraho we, ari mu rusengero rwiwe rwera: isi yose n’ihwēkērere imbere yiwe.” (Habakuki 2:20) Nta gukeka, uwo muhanuzi yari afise mu muzirikanyi urusengero rw’i Yerusalemu. Ariko rero, twebwe muri iki gihe twatewe agateka ko gusengera mu ndinganizo y’ivy’urusengero rwo mu buryo bw’impwemu ruhambaye kuruta, aho Umukama wacu Yezu Kirisitu yashinzwe kuba Umuherezi Mukuru. Aho mu rugo rwo kw’isi rw’urwo rusengero, turahakoranira, tukahasukurira, tukongera tugasenga, dutera Yehova iteka rikwiriye izina ryiwe rininahaye. Kandi ese umunezero dufise wo gusenga Data wa twese wo mw’ijuru tubikuye ku mutima!

Woba Uvyibuka?

• Amajambo ya Yehova avuga ngo “ntibizoteba” uyabona gute?

• Ya mahano y’ibara yamenyeshwa biciye kuri Habakuki afise iyihe nsobanuro mu gihe ca none?

• Ni kuki dukwiye kubandanya gusamiriza imburizi ya Yehova?

• Dufise agateka ko gusukurira mu kigo c’uruhe rusengero?

[Amafoto ku rup. 21]

Nka kumwe kwa Habakuki, abasuku b’Imana bo mu gihe ca none barazi yuko Yehova atazoteba

[Amafoto ku rup. 24]

Woba ukenguruka agateka ko gusengera Yehova mu kigo c’urusengero rwiwe rwo mu vy’impwemu?

[Abo dukesha ifoto ku rup. 22]

U.S. Army photo