Turi Abo Mu Bafise Ukwizera

Kumenyesha Inkuru Nziza mu Mirima y’Umuceri y’i Tayiwani

I TAYIWANI mu bisanzwe hagwa imvura nyinshi, ivyo bigatuma hashobora gusarurwa umwimbu mwinshi w’umuceri ku mwaka ku mwaka. Ariko rero rimwe na rimwe, imvura ntigwa ku gihe, maze imivyaro igaca ipfa. Igihe ivyo bishitse, umurimyi yoba aca aheba? Ekaye. Arazi yuko gukomera ku muheto bikenewe. Aratera iyindi mivyaro hanyuma agasubira kubadika imirima. Maze igihe ijuru rigenze neza, uwo murimyi araronka ivyimburwa vyinshi. Itera n’iyimbura vyo mu buryo bw’impwemu rimwe na rimwe usanga bisa n’ivyo.

Gukomera ku Muheto mw’Iyimbura ryo mu Buryo bw’Impwemu

Mu myaka n’iyindi, Ivyabona vya Yehova b’i Tayiwani barakoze baratama mu gutera no kwimbura imbuto z’ukuri kwo mu Vyanditswe mu turere tumwetumwe twasa n’ututimbuka. Akarorero kamwe ni Intara ya Miao-li. Habaye ukwitabira buhoro utwigoro two gushinga intahe muri ako karere twagirwa rimwe na rimwe. Ni co gituma mu 1973, hari umugabo n’umugore wiwe b’abatsimvyi badasanzwe barungitswe gukorerayo bwa bamamaji b’Ubwami b’igihe cose. Mu ntango, bamwebamwe bagaragaje ugushimishwa n’inkuru nziza. Ariko rero, ukwo gushimishwa ntikwatevye guhera. Abo batsimvyi badasanzwe baciye barungikwa mu kandi karere.

Mu 1991 abandi batsimvyi badasanzwe babiri bararungitsweyo. Mugabo n’ico gihe nyene, uko ibintu vyagenda biba kwarerekanye yuko ivyaho bitatuma haba ikura ryo mu buryo bw’impwemu. Haheze imyaka mikeyi, abo batsimvyi badasanzwe barungitswe ahandi vyizigirwa ko hoba ari indimiro zimbuka kuruta. Gutyo, uwo murima wararajwe mu kiringo kinaka.

Utwigoro Twanaguwe Twererwa

Muri Nyakanga 1998, harafashwe ingingo yuko hogirwa akigoro ko kurondera utundi duce twimbuka kuruta atawuradukeberwa two muri ako karere kanini ka Tayiwani. Ivyo vyoranguwe gute? Mu kurungika abatsimvyi badasanzwe b’igihe gito nka 40 gukorera mu turere atawuradukeberwa tubamwo abantu benshi kuruta.

Ibisagara bibiri bibangabanganye vyo mu Ntara ya Miao-li vyari mu turere twatowe ku bw’iryo sekeza. Abavukanyikazi b’abirebange bane bategerezwa gukorerayo amezi atatu kugira bagerageze ako karere. Bamaze igihe gito bashitseyo, baranditse amaraporo yeza umutima ku vyerekeye igitigiri c’abantu bashimishwa bubuye. Igihe barangiza amezi yabo atatu y’ubutsimvyi muri ako gace, barongora inyigisho za Bibiliya nyinshi zo ku mihana. Barashinze kandi umugwi w’inyigisho y’igitabu babifashijwemwo n’umukurambere wo mw’ishengero rihegereye.

Batatu muri abo bavukanyikazi baragaragaje yuko bipfuza kubandanya kubungabunga “iyo mivyaro” ikiri mito yariko irakura neza. Ico vyavuyemwo ni uko babiri muri bo bagenywe kuba abatsimvyi badasanzwe b’igihe cose, kandi uwa gatatu akabandanya gukorerayo ari umutsimvyi w’intahorereza. Hari umukurambere wo mw’ishengero rihegereye yimukiye muri ako gace kugira ngo abafashe. Abantu barenga 60 baritavye insiguro y’icese ya mbere yari itanzwe muri ako gace. Ubu, iryo shengero riri mu micungararo ririko rirafasha uwo mugwi mushasha kugira amakoraniro ubudahorereza ku w’Iyinga, yiyongereye ku nyigisho z’igitabu nka zingahe. Ubu bwa vuba, ishengero rishasha rirashobora kuzoshingwa muri ako gace.

Ugukomera ku Muheto Kuzana Imihezagiro mu Yindi Mihingo ya Tayiwani

Mu tundi duce bavyakiriye gutyo nyene. Mu Ntara ya I-lan yo mu buraruko bushira ubuseruko bw’iryo zinga, hari Inyigisho y’Igitabu y’Ishengero nshasha yashinzwe mu gace ba batsimvyi badasanzwe b’igihe gito bakoreramwo.

Igihe umutsimvyi adasanzwe w’igihe gito umwe yariko agenda inzu ku nzu ku mugoroba umwe, yahuye n’umugabo akiri muto maze amwereka agakaratasi k’ubutumire gatondetsweko amakoraniro y’ishengero. Yaciye ubwo nyene abaza ati: “Vyoba bishoboka ko nitaba ikoraniro ejo mw’ijoro? Niba vyoshoboka, nkwiye kwambara iki?” Uwo mutsimvyi yahavuye arongora uko indwi itashe inyigisho za Bibiliya umunani kumwe n’abashimishwa. Abigishwa ba Bibiliya nka bangahe ntibatevye gufata imigambi y’ukuba abamamaji b’inkuru nziza, bafise intumbero yo kubatizwa.

Uwundi mukenyezi wo muri ico gisagara nyene yari yamaze imyaka myinshi aja gusenga, mugabo akaba atashoboye kuronka umuntu n’umwe amwigisha Bibiliya. Igihe yumva ivyerekeye indinganizo y’inyigisho ya Bibiliya, ntiyagishije ako karyo. Yararemeshejwe gutegura icigwa ciwe imbere y’igihe. Igihe wa mutsimvyi adasanzwe w’igihe gito yashika kugira ngo arongore iyo nyigisho, yasanze uwo mukenyezi yakoze ico twokwita “agakorwa ko gukorera i muhira” mu kugura agakaye yaciye yandikamwo ibibazo biri mu gisohokayandikiro yigiramwo. Maze yaciye yandika inyishu ziwe ku kibazo cose. Yari yimuriye kandi muri ako gakaye kiwe ivyanditswe vyose vyatanzwe muri nya cigwa ciwe. Igihe uwo muvukanyikazi yashika kuyobora inyigisho ya mbere, uyo mukenyezi yari amaze gutegura ivyigwa bitatu vya mbere!

Ibintu nk’ivyo vyarashitse mu gisagara ca Dongshih co muri Tayiwani yo hagati. Abatsimvyi badasanzwe b’igihe gito basigiye abantu udutabu turenga 2.000 mu mezi atatu bahakoreye. Mu kwezi kugira gatatu, bayobora inyigisho za Bibiliya zo ku mihana 16. Ico gisagara carasambuwe cane n’ikinyamugigima cateye Tayiwani yo hagati ku wa 21 Nyakanga 1999, mugabo abantu bashimishwa bamwebamwe barabandanya gutera imbere mu vy’impwemu, naho nyene bategerezwa kugira urugendo rushika isaha kugira ngo bitabe amakoraniro ku Ngoro y’Ubwami ibegereye. Egome, ugukomera ku muheto kurakenewe kugira ngo umuntu asarure ivyimburwa vyinshi, vyaba ivyimburwa nya vyimburwa canke ivyo mu buryo bw’impwemu.

[Ikarata ku rup. 8]

(Ushaka igisomwa cose, raba iki kinyamakuru)

UBUSHINWA

Umugende wa Tayiwani

TAYIWANI

[Abo dukesha ifoto]

Mountain High Maps® Copyright © 1997 Digital Wisdom, Inc.