Nugume Ujana n’Ishirahamwe rya Yehova

“Imana Nyen’amahoro . . . [“ibaronse ikintu ciza cose mukeneye ngo mukore ukugomba kwayo,” “NW”].”​—ABAHEBURAYO 13:20, 21.

1. Abantu baba kw’isi ni bangahe, kandi ni bangahe baharurwa mu bagize amadini amwamwe?

MU MWAKA w’1999, abantu baba kw’isi barashitse ku miliyaridi zitandatu! Igitabu kimwe (The World Almanac) cerekana yuko muri ico gitigiri harimwo Abisiramu 1.165.000.000; Abagatolika 1.030.000.000; Abahindu 762.000.000; Ababuda 354.000.000; Abaporotisanti 316.000.000; n’Abarotodogisi 214.000.000.

2. Hashobora kuvugwa iki ku vyerekeye uko ivy’amadini vyifashe muri iki gihe?

² Twihweje amacakubiri ashingiye ku madini n’umuvurungano biri muri iki gihe, ayo mamiliyoni yose yoba ashobora gukora ibintu mu buryo bujanye n’ukugomba kw’Imana? Ekaye, “kukw Imana atar’iy’umuvurungano, ariko [ari] iy’amahoro.” (1 Ab’i Korinto 14:33) Ku rundi ruhande, twovuga iki ku vyerekeye ikivukano mpuzamakungu kigizwe n’abasavyi ba Yehova? (1 Petero 2:17) Itohoza ryitondewe ryemeza yuko ‘Imana nyene amahoro ibaronsa ikintu ciza cose bakeneye ngo bakore ukugomba kwayo.’​—Abaheburayo 13:20, 21.

3. Ni ibiki vyabaye i Yeruzalemu kuri Pentekote yo mu 33 G.C., kandi kuki?

³ Nta nkeka, igitigiri c’abifatanya n’Ivyabona vya Yehova si co cofatirwako mu kumenya niba batoneshwa n’Imana; eka n’ibitigiri ntibitangaza Imana. Ntiyahisemwo Abisirayeli ngo ni uko “[b]arusha ayandi mahanga yose ubginshi.” Nkako, bari “ubusa” kuri bo. (Gusubira mu Vyagezwe 7:7) Mugabo, kubera yuko Isirayeli yahemutse, kuri Pentekote yo mu 33 G.C. Yehova yatanguye gutonesha ishengero rishasha ryari rigizwe n’abayoboke ba Yezu Kirisitu. Barasizwe impwemu yera ya Yehova maze baragenda n’umwete gutangariza abandi ukuri kwerekeye Imana na Kirisitu.​—Ivyakozwe 2:41, 42.

Kwama Nantaryo Dutera Tuja Imbere

4. Ni kuki woshobora kuvuga yuko ishengero ry’Abakirisu rya kare ryama nantaryo ritera rija imbere?

⁴ Mu kinjana ca mbere, ishengero ry’Abakirisu ryama nantaryo ritera rija imbere, rikugurura ivyibare bishasha, rigahindura abantu abigishwa rikongera rikarushiriza gutahura imigambi y’Imana. Abakirisu ba kare baguma bajana n’ukumurikirwa mu vy’impwemu kwagirwa biciye ku makete yahumetswe n’Imana. Bakabuwe n’ukugenderwa n’intumwa be n’abandi, bararanguye ubusuku bwabo. Ivyo biranditse neza mu Vyanditswe vy’Ikigiriki vya Gikirisu.​—Ivyakozwe 10:21, 22; 13:46, 47; 2 Timoteyo 1:13; 4:5; Abaheburayo 6:1-3; 2 Petero 3:17, 18.

5. Ni kuki ishirahamwe ry’Imana ririko riratera imbere muri iki gihe, kandi ni kuki dukwiye kuguma tujana na ryo?

⁵ Nka kurya kw’Abakirisu ba kare, Ivyabona vya Yehova bo muri kino gihe bagiye gusagamba batanguye ari bake cane. (Zekariya 4:8-10) Guhera mu myaka ihereza ikinjana ca 19, harabaye ikimenyamenya gitomoye c’uko impwemu y’Imana iri kumwe n’ishirahamwe ryayo. Kubera yuko twihetse ku burongozi bw’impwemu yera, ntitwiheke ku bubasha bw’umuntu, twarabandanije kugira iterambere mu vy’ugutahura kwacu Ivyanditswe be no mu vy’ugukora ukugomba kw’Imana. (Zekariya 4:6) Ubu turi “mu misi y’iherezo,” birahambaye cane ko tuguma tujana n’ishirahamwe rya Yehova ritera imbere. (2 Timoteyo 3:1-5) Kubigenza dutyo biratuma dushobora kuguma dufise icizigiro kizima bigatuma kandi tugira uruhara mu gushinga intahe ku vyerekeye Ubwami bwashinzwe bw’Imana imbere y’uko iherezo rya nyuma rihwikira uru runkwekwe rw’ibintu.​—Matayo 24:3-14.

6, 7. Tugira turimbure iyihe mice itatu muri yo ishirahamwe rya Yehova ryateye rija imbere?

⁶ Muri twebwe hariho abatanguye kwifatanya n’ishirahamwe rya Yehova mu myaka y’1920, iy’1930 n’iy’1940. Muri iyo myaka ya kare, ni nde muri twebwe yoshoboye kwiha ishusho ry’iyongerekana ritangaje be n’ugusagamba intambwe ku yindi kw’ishirahamwe kugeza muri iki gihe? Zirikana ku bintu biri n’ico bivuze vyashitsweko muri kahise kacu kerekeye igihe ca none! Mu vy’ukuri, birahesha impera mu vy’impwemu umuntu azirikanye ku vyo Yehova yaranguye biciye ku basavyi biwe bungunganijwe mu buryo bwa Tewokarasi.

⁷ Dawidi wo mu bihe vya kera yarajorewe cane igihe yitegereza ibikorwa vy’akaroruhore vya Yehova. Yavuze ati: “Nogomba kubidonda no kubivuga birenze uko vyoharūrwa.” (Zaburi 40:5) Natwe ntitwobishikako, kubera tudashobora kudonda ibintu vyinshi bihambaye kandi bikwiye gushemezwa Yehova akora muri iki gihe cacu. Naho ari ukwo, nimuze turimbure imice itatu ishirahamwe rya Yehova ryateyemwo imbere: (1) ukumurikirwa mu vy’impwemu intambwe ku yindi, (2) ubusuku buryohowe kandi bwaguwe, na (3) amahinduka aza hageze mu vyerekeye ukwungunganya ibintu.

Turakura Ubwatsi ku bw’Ukumurikirwa mu vy’Impwemu

8. Mu buryo bujanye n’⁠Imigani 4:18, ukumurikirwa mu vy’impwemu kwatumye dushobora gutahura iki ku biraba Ubwami?

⁸ Ku biraba ukumurikirwa mu vy’impwemu intambwe ku yindi, mu Migani 4:18 haragaragaye ko havuga ukuri. Havuga hati: “Inzira y’abagororotsi imeze nk’umuco wo mu gatondotondo, ugenda urushiriza gukayangana gushitsa hakeye rwose.” Ese ukuntu dukura ubwatsi ku kuba twagiye turamurikirwa mu vy’impwemu intambwe ku yindi! Kw’ihwaniro ryo mu 1919 ryabereye i Cedar Point muri Ohio, Ubwami bw’Imana bwarashizwe ahabona. Yehova akoresha Ubwami kugira ngo yerandishe izina ryiwe yongere yemeze ubusegaba bwiwe. Kukaba nkako, ukumurikirwa mu vy’impwemu kwaratumye dushobora gutahura yuko guhera mw’⁠Itanguriro gushika mu Vyahishuriwe, Bibiliya yemeza umugambi wa Yehova wo kwerandisha izina ryiwe biciye kuri bwa Bwami butegekwa n’Umwana wiwe. Aho harimwo icizigiro gihambaye c’abakunda ubugororotsi bose.​—Matayo 12:18, 21.

9, 10. Mu myaka y’1920, ni ibiki vyamenyekanye ku vyerekeye Ubwami no ku vyerekeye amashirahamwe abiri adahuza, kandi ivyo vyabaye rufasha gute?

⁹ Kw’ihwaniro ry’i Cedar Point mu 1922, umushikirizansiguro nyamukuru, J. F. Rutherford, yahimirije abasavyi b’Imana “gutangaza, gutangaza, gutangaza, Umwami n’ubwami bwiwe.” Mu kiganiro cavuga ngo “Ivuka ry’Ihanga,” casohowe mu Munara w’Inderetsi (mu Congereza) wo ku wa 1 Ntwarante 1925, ubwenge bw’abantu bwakwegewe ku guca mu kajisho kwo mu vy’impwemu ku vyerekeye ubuhanuzi bwadomye urutoke ku biri imbere, ni ukuvuga kw’ishingwa ry’Ubwami bw’Imana mu 1914. Vyaratahuwe kandi mu myaka y’1920 yuko hariho amashirahamwe abiri adahuza​—irya Yehova n’irya Shetani. Urugamba rurashushe hagati yayo, kandi turamutse tugumye tujana n’ishirahamwe rya Yehova ni ho gusa tuzoba turi ku ruhande ruzotsinda.

¹⁰ Ukwo kumurikirwa mu vy’impwemu kwadufashije gute? Kubera yuko Ubwami bw’Imana n’Umwami Yezu Kirisitu bitari mu bigize isi, natwe nyene ntidushobora kuba mu bayigize. Mu kuguma twitandukanije n’isi, turerekana yuko turi ku ruhande rw’ukuri. (Yohana 17:16; 18:37) Igihe twitegereza ingorane z’urusobe zisinzikaje uru runkwekwe rubi, ese ukuntu dukura ubwatsi kuba tutari mu bagize ishirahamwe rya Shetani! Kandi ese ukuntu dutoneshejwe kuba dufise umutekano wo mu buryo bw’impwemu mw’ishirahamwe rya Yehova!

11. Ni irihe zina rishingiye ku Vyanditswe ryafashwe n’abasavyi b’Imana mu 1931?

¹¹ Kw’ihwaniro ryabereye i Columbus muri Ohio mu 1931, Yesaya 43:10-12 harashizwe mu ngiro mu buryo bubereye. Abatohoji ba Bibiliya barafashe izina ry’Ivyabona vya Yehova ribatandukanya n’abandi. Ese ukuntu ari agateka gahambaye kumenyesha izina ry’Imana kugira ngo abandi bashobore kuryambaza ngo bakizwe!​—Yesaya 12:2; Abaroma 10:13.

12. Ni ukumurikirwa mu vy’impwemu ukuhe kwerekeye ishengero ryinshi kwatanzwe mu 1935?

¹² Imbere y’imyaka y’1930, benshi mu basavyi b’Imana hari ukuntu batari bazi neza ivyerekeye icizigiro cabo ku bw’ubuzima bwa kazoza. Bamwebamwe bari bafise ivyiyumviro ku vyerekeye ubuzima bw’ijuru, mugabo bakaba bakwegerwa n’inyigisho za Bibiliya zerekeye iparadizo yo kw’isi. Kw’ihwaniro ryabereye i Washington, D.C., mu 1935, vyarabaye akezamutima kumenya yuko rya sinzi rinini, ari ryo shengero ryinshi, ryo mu Vyahishuriwe ikigabane c’⁠7

ari umugwi ufise icizigiro co kw’isi. Guhera ubwo, itororokanywa ry’ishengero ryinshi ryarateye imbere mu buryo bwihuta kuruta. Ntidukura ubwatsi none yuko akaranga k’ishengero ryinshi atari amayobera kuri twebwe? Ukuri kw’uko hari abantu bariko baratororokanywa ari benshi bakurwa mu mahanga yose, mu moko yose, no mu ndimi zose, biradusunikira kunyarutsa umurindi wacu mu gihe tuguma tujana n’ishirahamwe rya Yehova.

13. Ni ikibazo ikihe gihambaye cashizwe ahabona kw’ihwaniro ryabereye i Saint Louis mu 1941?

¹³ Ikibazo gihambaye cari gikwiye kuraza ishinga ikibano c’abantu carashizwe ahabona kw’ihwaniro ryabereye i Saint Louis muri Missouri mu 1941. Ni inganji canke ubusegaba ku vyaremwe vyose. Ico ni ikibazo gitegerezwa gutorerwa umuti vuba, vyongeye umusi uhambaye kandi uteye akoba ivyo bitegerezwa kuberako uriko uraza wihuta! Ikindi cashizwe imbere mu 1941 cari ca kibazo kijanye na co, ari co ukutadohoka, igituma dushobora kwerekana aho umwumwe muri twebwe ahagaze ku biraba ubusegaba bw’Imana.

14. Kw’ihwaniro mpuzamakungu ryo mu 1950, ni ibiki vyamenyekanye ku vyerekeye ba baganwa bavugwa muri Zaburi 45:16?

¹⁴ Kw’ihwaniro mpuzamakungu ryabereye mu Gisagara ca New York mu 1950, ba baganwa bo muri Zaburi 45:16 baramenyekanye neza na neza abo ari bo. Cari igihe gishwangamura, aho Umuvukanyi Frederick Franz yashikiriza insiguro kuri ico ciyumviro maze agasigura yuko abaganwa bo mw’isi nshasha bari muri twebwe. Kuri iryo hwaniro be no ku yandi yakurikiye, harabayeho imishwarara y’umuco wo mu vy’impwemu itari mike. (Zaburi 97:11) Ese ingene dukura ubwatsi kubona inzira yacu “imeze nk’umuco wo mu gatondotondo, ugenda urushiriza gukayangana”!

Gutera Tuja Imbere mu Busuku Bwacu

15, 16. (a) Twateye tuja imbere gute mu busuku bwacu mu myaka y’1920 n’iy’1930? (b) Ni ibihe bisohokayandikiro vyahaye ingoga nshasha ubusuku bwa gikirisu muri iyi myaka mirongo iheze?

¹⁵ Uburyo bugira kabiri ishirahamwe rya Yehova ryateye rija imbere, bwerekeye igikorwa nyamukuru cacu​—ni ukuvuga kwamamaza Ubwami no guhindura abantu abigishwa. (Matayo 28:19, 20; Mariko 13:10) Kugira ngo ishirahamwe rirangure ico gikorwa, ntiryigeze rihengeshanya gushimika ku kamaro ko kwagura ubusuku bwacu. Mu 1922, Abakirisu bose barahimirijwe kugira uruhara mu gikorwa co kwamamaza. Vyava kuri umwe wese kureka umuco wiwe ukaka maze gutyo ubwiwe akagira uruhara mu gushingira intahe ukuri. (Matayo 5:14-16) Mu 1927 haratewe intambwe yo gushira Umusi w’Iyinga ku ruhande bwa musi ugenewe ubusuku bwo mu ndimiro. Guhera muri Ruhuhuma 1940, Ivyabona barakunda kubonwa bari mu mabarabara mu turere tw’ubucuruzi bariko barashikiriza Umunara w’Inderetsi na Consolation (ubu akaba ari Réveillez-vous!).

¹⁶ Mu mwaka w’1937 harasohowe agatabu kamwe (Étude Modèle), gashimika ku vy’uko bikenewe kugira amasubirayo kugira ngo umuntu yigishe abandi ukuri kwa Bibiliya. Mu myaka yakurikiye, igikorwa co kurongora inyigisho za Bibiliya carashimitsweko cane. Ingoga nshasha zarahawe uwo muce w’ubusuku igihe hasohorwa (mu Congereza) ibitabu “Que Dieu soit reconnu pour vrai” (Imana Nimenyekane ko Ari iy’Ukuri) mu 1946 be na La vérité qui conduit à la vie éternelle (Ukuri Kujana mu Buzima Budahera) mu 1968. Muri iki gihe, dukoresha igitabu Ubumenyi Bujana mu Buzima Budahera. Iheturwa ry’amayagwa nk’ayo rirashinga ishingiro rikomeye rishingiye ku Vyanditswe mu vy’uguhindura abantu abigishwa.

Gutera Tuja Imbere mu vy’Ukuryohora Uburyo bwo Kwungunganya Ibintu

17. Mu gukurikiza Yesaya 60:17, ni gute ishirahamwe rya Yehova ryateye rija imbere?

¹⁷ Uburyo bugira gatatu ishirahamwe rya Yehova ryateye rija imbere bwerekeye ivy’ukuryohora uburyo bwo kwungunganya ibintu. Nk’uko muri Yesaya 60:17 habivuga, Yehova yatanze umuhango ati: “Mu gishingo c’imiringa nzozana izahabu, no mu gishingo c’ivyuma nzozana ifeza: nzane imiringa mu gishingo c’ibiti, n’ivyuma mu gishingo c’amabuye; nzokwimika amahoro abe ari yo [“bacungezi bawe,” NW], n’ukugororoka abe ari kwo [“ba gapita bawe,” NW].” Mu kuguma hakurikizwa ubwo buhanuzi, intambwe zaratewe kugira ngo haryohorwe ubucungezi bw’igikorwa c’ukwamamaza Ubwami be n’iragirwa ry’ubusho.

18, 19. Ni amaryohorwa ayahe mu vy’ukwungunganya ibintu yagiye araba uko imyaka yagiye iragenda?

¹⁸ Mu 1919, umuyobozi w’umurimo yaragenywe mw’ishengero rimwerimwe ryose ryasavye kwungunganywa ku bw’umurimo wo mu ndimiro. Ivyo vyarahaye ingoga nshasha ubusuku bwacu bwo mu ndimiro. Ivyo gutora abakurambere n’abadiyakoni vyarahagaritswe mu 1932, bituma dusezera gukora ibintu mu buryo bwa demokarasi. Ikindi kintu gihambaye cashitsweko mu 1938, aho abasuku bose bo mw’ishengero batangura kugenwa mu buryo burushirije kuba ubuhuje n’indinganizo zo mw’ishengero rya gikirisu rya kare zo kugena abantu mu buryo bwa Tewokarasi. (Ivyakozwe 14:23; 1 Timoteyo 4:14) Mu 1972, abacungezi n’abakozi b’ishengero bagenerwa gusukura, nk’uko abagabo nk’abo bagenwa mu Bakirisu ba kare. Aho kugira umugabo umwe gusa asukura bwa mucungezi w’ishengero, mu B’i Filipi 1:1 no mu bindi vyanditswe herekana yuko abakwiza ibisabwa vyo mu Vyanditswe ngo babe abacungezi bagize inama y’abakurambere.​—Ivyakozwe 20:28; Abanyefeso 4:11, 12.

¹⁹ Mu 1975, hari indinganizo yagiye mu ngiro yuko amakomite y’Inama Nyobozi y’Ivyabona vya Yehova acungera imirimo yo kw’isi yose y’ishirahamwe ry’Imana. Amakomite y’Amashami yaragenywe kugira ngo acungere igikorwa mu vyibare yagiye arakeberwa. Kuva ico gihe, bashize umutima ku kworosha akazi ko ku cicaro gikuru be no ku mashami ya Sosiyete Watch Tower kugira ngo “barobanure [“ibintu bihambaye kuruta,” NW].” (Ab’i Filipi 1:9, 10) Amabanga yikorewe n’abungere batobato ba Kirisitu arimwo kurongora igikorwa co kwamamaza, kwigisha mw’ishengero no kuragira mu buryo bubereye ubusho bw’Imana.​—1 Timoteyo 4:16; Abaheburayo 13:7, 17; 1 Petero 5:2, 3.

Uburongozi Burangwa Umwete bwa Yezu

20. Kuguma tujana n’ishirahamwe rya Yehova bisaba yuko twemera icese iki ku vyerekeye ikibanza Yezu arimwo?

²⁰ Kuguma tujana n’ishirahamwe ritera rija imbere rya Yehova bisaba yuko twemera icese uruhara Yezu Kirisitu yashinzwe n’Imana rwo kuba “umutwe w’ishengero.” (Abanyefeso 5:22, 23) Ikindi kintu dukwiriye kubona, ni ikiri muri Yesaya 55:4, aho tubwirwa duti: “Rāba, [jewe Yehova] ndamutanze ngw abe icabona co gushingira intahe amahanga, ngw abe n’umukuru na segaba w’amahanga.” Nta nkeka, Yezu arazi ukuntu arongora ibintu. Arazi kandi intama ziwe n’ivyo zikora. Kukaba nkako, igihe yagenzura ya mashengero indwi yo muri Aziya Ntoyi, yavuze incuro zitanu ati: “Ndazi ibikorwa vyawe.” (Ivyahishuriwe 2:2, 19; 3:1, 8, 15) Yezu kandi arazi ibikorwa vyacu nk’uko Se wiwe Yehova abizi. Imbere y’ugushikiriza rya Sengesho ry’Akarorero, Yezu yavuze ati: “So a[ra]zi ivyo mukennye mutaramusaba.”​—Matayo 6:8-13.

21. Uburongozi bwa Yezu bugaragara gute mw’ishengero rya gikirisu?

²¹ Uburongozi bwa Yezu bugaragara gute? Uburyo bumwe, bugaragara biciye ku bacungezi b’Abakirisu, ba “bantu b’ingabirano.” (Abanyefeso 4:8, NW) Mu Vyahishuriwe 1:16 hadondora abacungezi basizwe nk’abari mu kuboko kw’i buryo kwa Kirisitu, ari we abarongora. Muri iki gihe, Yezu arayobora ivy’indinganizo yerekeye abakurambere, abo bagabo baba bafise icizigiro c’ijuru canke baba bafise ic’isi. Nk’uko vyasiguwe mu kiganiro c’imbere y’iki, bagenwa n’impwemu yera mu buryo bujanye n’ibisabwa vyo mu Vyanditswe. (1 Timoteyo 3:1-7; Tito 1:5-9) Mu kinjana ca mbere, umugwi w’abagabo b’inararibonye b’i Yeruzalemu, bari bagize inama nyobozi yacungera amashengero be n’igikorwa co kwamamaza Ubwami muri rusangi. Ico citegererezo nyene ni co gikurikizwa mw’ishirahamwe rya Yehova muri iki gihe.

Tugume Tujana!

22. Ni imfashanyo iyihe Inama Nyobozi itanga?

²² Ivyungura Ubwami vyo kw’isi vyajejwe “wa mushumba w’umwizewa kandi w’incabwenge,” (NW) uwuserukirwa n’Inama Nyobozi y’Ivyabona vya Yehova. (Matayo 24:45-47) Inama Nyobozi, yitwararika mbere na mbere gutanga amacishabwenge yo mu vy’impwemu be n’ubuyobozi ku bw’ishengero rya gikirisu. (Ivyakozwe 6:1-6) Ariko rero, igihe abo basangiye gusenga basinzikajwe n’ivyago vy’ivyaduka, Inama Nyobozi irasaba kimwe canke vyinshi mu bisata bigengwa n’amategeko ngo kibatabare congere gisanasane canke cubake amazu n’Ingoro z’Ubwami vyononekaye. Igihe Abakirisu bamwebamwe bacunaguzwa canke bahamwa, hari intambwe ziterwa kugira ngo babubake mu vy’impwemu. Kandi, “mu gihe kidurumbanye,” (NW) haragirwa utwigoro twose kugira ngo igikorwa co kwamamaza kigume gitera kija imbere.​—2 Timoteyo 4:1, 2.

23, 24. Ata kuraba ibishikira abasavyi biwe, ni ibiki Yehova adahengeshanya gutanga, kandi umwiyemezo wacu ukwiye kuba uwuhe?

²³ Ibishikira abasavyi biwe vyaba ibihe, Yehova ntahengeshanya gutanga imfungurwa z’ivy’impwemu be n’ubuyobozi bukenewe. Imana kandi iraha ubukerebutsi n’uguca mu kajisho abavukanyi bafise amabanga kugira bitegurire irindi terambere n’amaryohorwa vy’ishirahamwe rya Tewokarasi. (Gusubira mu Vyagezwe 34:9; Abanyefeso 1:16, 17) Yehova ntabura kuturonsa ivyo dukeneye kugira ngo dushitse ibanga twashinzwe ryo guhindura abantu abigishwa twongere turangure ubusuku bwacu kw’isi yose.​—2 Timoteyo 4:5.

²⁴ Turafise umwizero ntabanduka w’uko Yehova atazokwigera aheba abasavyi biwe b’abizerwa; azobahabuza abarenganye wa “mubabaro ukomeye” ugiye kuza. (Ivyahishuriwe 7:9-14; Zaburi 94:14; 2 Petero 2:9) Turafise impamvu yumvikana yo kuzigama umwizero twari dufise mu ntango, ukaguma ushikamye gushika kw’iherezo. (Abaheburayo 3:14) Nimuze rero twiyemeze kuguma tujana n’ishirahamwe rya Yehova.

Wokwishura Gute?

• Ni kuki dushobora kuvuga yuko ishirahamwe rya Yehova riguma ritera rija imbere?

• Ni ikimenyamenya ikihe kiriho c’uko abasavyi b’Imana binovora ukumurikirwa intambwe ku yindi mu vy’impwemu?

• Ni gute habaye amaryohora mu busuku bwa gikirisu?

• Ni amahinduka ayahe yaje hageze yagizwe mu basavyi ba Yehova mu vy’ukwungunganya ibintu?

[Ifoto ku rup. 11]

Nka kumwe kwa Dawidi, ntidushobora kudondora ibikorwa vy’akaroruhore vya Yehova vyose

[Ifoto ku rup. 12]

Ubusho bw’Imana bwarungukiye ku mahinduka yaza hageze mu vyerekeye ukwungunganya ibintu