Tiducike Abumva Bakibagira

“Mube abakora ivy’iryo jambo, ntimube abaryumva gusa, mwibesha.”​—YAKOBO 1:22.

1. Abisirayeli ba kera batewe agateka ko kwibonera ibitangaro ibihe?

IMVUGO ngo “ikintu c’intibagirwa” yoba ari yo mvugo ibereye mu kudondora ibitangaro vyakozwe na Yehova muri Misiri ha kera. Kimwe cose muri vya Vyago Cumi nta nkeka ko vyari ibiteye akoba. Ivyo vyago vyakurikiwe n’ukurokoka gutangaje kw’Abisirayeli, baciye mu mazi agabuwemwo kubiri y’Ikiyaga Gitukura. (Gusubira mu Vyagezwe 34:10-12) Iyo ubwawe uba wariboneye ivyo bintu, twokwizigira yuko utokwigeze wibagira nyene kubitera. Yamara rero, umwanditsi wa Zaburi yaririmvye ati: “[Abisirayeli] bibagira Imana, Umukiza wabo, yakoreye ibikomeye muri Egiputa; yakoreye ibitangaza mu gihugu ca Hamu, n’ibiteye ubgoba ku Kiyaga Gitukura.”​—Zaburi 106:21, 22.

2. Ni igiki cerekana yuko ugukenguruka Isirayeli yagize ku bw’ibikorwa vy’ububasha vy’Imana kwamaze igihe gito?

² Bamaze kujabuka Ikiyaga Gitukura, Abisirayeli “ba[tanguye gu]tinya Uhoraho, baramwizera.” (Kuvayo 14:31) Abagabo bo muri Isirayeli barifatanije na Musa mu ruririmbo rwo kwigina intsinzi baririmbiye Yehova, maze Miriyamu n’abandi bagore bitabira mu kuvuza udushako tw’ingoma no mu gutamba. (Kuvayo 15:1, 20) Egome, abasavyi b’Imana barakozwe ku mutima n’ibikorwa vy’ububasha vya Yehova. Mugabo ugukenguruka bagiriye Uwakoze ivyo bikorwa kwamaze igihe gito. Butaraca na kabiri, benshi muri bo bigenjeje nk’aho boba bari bafashwe n’indwara ikomeye yo kwibagira. Bahavuye bidodombera Yehova baranamwidogera. Bamwe bisutse mu vy’ugusenga ibigirwamana no mu bushegabo.​—Guharūra 14:27; 25:1-9.

Ni Ibiki Vyotuma Twibagira?

3. Kubera turi abanyagasembwa, ni ibiki twoshobora kwibagira?

³ Kuba Isirayeli yarabuze ugukenguruka ni ikintu mu vy’ukuri kigoye itahura. Yamara rero, ikintu nk’ico nyene coshobora kudushikira. Ego ni ko, ntitwiboneye ibitangaro nk’ivyo vy’Imana. Ariko rero, mu bucuti dufitaniye n’Imana, nta nkeka ko habayemwo ibihe vy’intibagirwa. Bamwe muri twebwe turashobora kwibuka igihe twemera ukuri kwo muri Bibiliya. Ibindi bihe twagize vy’umunezero bishobora kuba nk’igihe twatura isengesho twiyegurira Yehova, be n’igihe twabatizwa mu mazi ngo tube Abakirisu b’ukuri. Yehova yarafashije benshi muri twebwe mu bindi bihe vyo mu buzima bwacu. (Zaburi 118:15) Ikirushirije ni uko biciye ku rupfu rw’inkuka rwa Yezu Kirisitu wa Mwana w’Ikinege w’Imana, twaronse icizigiro c’ubukiriro. (Yohana 3:16) Yamara rero, kubera turi abanyagasembwa, igihe duhanganye n’ivyipfuzo bibi be n’imyitwarariko y’ubuzima, birashobora kworoha cane ko twibagira ibintu vyiza Yehova yadukoreye.

4, 5. (a) Yakobo atugabisha gute ku vyerekeye ingeramizi yo kuba abumva bakibagira? (b) Dushobora gute gushira mu ngiro ikigereranirizo Yakobo yatanze c’umuntu n’icirore?

⁴ Mw’ikete yandikiye Abakirisu bagenziwe, mwenenyina wa Yezu Yakobo yaragabishije abantu ku vyerekeye ingeramizi yo kuba abumva bakibagira. Yanditse ati: “Mube abakora ivy’iryo jambo, ntimube abaryumva gusa, mwibesha. Kuk’uwumva iryo jambo ntarikore, ameze nk’umuntu yirābiye mu cirore mu maso hiwe yavukanye. Amaze kwirāba, akagenda, uwo mwanya agaca yiyibagira ukw asa.” (Yakobo 1:22-24) Yakobo yashaka kuvuga iki muri ayo majambo?

⁵ Igihe tuvyutse mu gitondo, kenshi turatereza amaso mu cirore kugira ngo turabe utuntu dukeneye gutunganya. Uko tuja mu mirimo itandukanye kandi tugashira umuzirikanyi ku bindi bintu, duca tureka kwiyumvira ivyo twabonye muri ca cirore. Ivyo birashobora gushika no mu buryo bw’impwemu. Uko dutereza amaso mw’Ijambo ry’Imana, turashobora kugereranya uko tumeze n’ukuntu Yehova yiteze ko tumera. Gutyo, turahangana n’ubugoyagoye bwacu. Kumenya ubwo bugoyagoye gukwiye kudusunikira ku kugira ivyo duhindura muri kamere zacu. Mugabo, uko twicurumbira mu mirimo yacu ya misi yose tukongera tukarwana n’ingorane zacu, birashobora kworoha ko tureka kwiyumvira ivyerekeye ibintu vy’impwemu. (Matayo 5:3; Luka 21:34) Ni nk’aho twoba twibagira ibikorwa biranga urukundo Imana idukorera. Mu gihe ivyo vyoshika, twoba tugeramiwe n’impengamiro z’icaha.

6. Ni umwihwezo nyabaki wo mu Vyanditswe ushobora kudufasha kutibagira ijambo rya Yehova?

⁶ Mw’ikete ryiwe rya mbere ryahumetswe yandikiye Abanyakorinto, intumwa Paulo yerekeza ku Bisirayeli bakunda kwibagira igihe bari mu bugaragwa. Nka kurya nyene Abakirisu bo mu kinjana ca mbere bungukiye ku majambo ya Paulo, kwihweza ivyo yanditse birashobora kudufasha kutibagira ijambo rya Yehova. Nimuze rero turimbure 1 Ab’i Korinto 10:1-12.

Nitwikunkumure Ivyipfuzo vy’Isi

7. Abisirayeli baronse ikihe kimenyamenya ntaharirwa c’uko Yehova abakunda?

⁷ Ivyo Paulo avuga ku vyerekeye Abisirayeli ni ingabisho ku Bakirisu. Hamwe, Paulo yandika ati: “Bene Data, singomba ko mutamenya yuko ba sogokuruza bose bāri musi ya ca gicu, kandi yuko bose bāciye hagati ya ca kiyaga cigabanije, bose bakabatirizwa kuba aba Mose mur’ico gicu no mur’ico kiyaga.” (1 Ab’i Korinto 10:1-4) Abisirayeli bo mu gihe ca Musa bari barabonye ibintu bihambaye bigaragaza ububasha bw’Imana, harimwo na ya nkingi yayo y’igicu yo ku gitangaro yabayobora ku musi ikanabafasha kurokoka baciye mu Kiyaga Gitukura. (Kuvayo 13:21; 14:21, 22) Egome, abo Bisirayeli bararonse ikimenyamenya ntaharirwa c’uko Yehova abakunda.

8. Ukwibagira ivy’impwemu kwa Isirayeli kwagize izihe ngaruka?

⁸ Paulo abandanya ati: “Arikw abenshi muri bo, Imana ntiyabashimye, kuko bahonerejwe mu bugaragwa.” (1 Ab’i Korinto 10:5) Ese ukuntu bibabaje! Benshi mu Bisirayeli bavuye mu Misiri ntibashikije ibisabwa ngo binjire muri ca Gihugu c’Isezerano. Kubera ko banswe n’Imana bitumwe n’uko babuze ukwizera, bapfiriye mu bugaragwa. (Abaheburayo 3:16-19) Ivyo dushobora kuvyigirako iki? Paulo avuga ati: “Ivyo vyatubereye akarorero kugira ngo ntitwifuze ibibi, nk’uko ba bandi bāvyifuje.”​—1 Ab’i Korinto 10:6.

9. Yehova yaronkeje gute abasavyi biwe ivyo bari bakeneye, kandi Isirayeli yavyakiriye gute?

⁹ Abisirayeli bari bafise vyinshi vyotumye baguma bashinze amaso ku vy’impwemu mu gihe bari mu bugaragwa. Barinjiye mw’isezerano bagiranye na Yehova maze bacika ihanga ryamwiyeguriye. Vyongeye, barahawe ubuherezi, ihema riba ahantu ho gusengera, bongera bagirirwa n’intunganyo y’ivyerekeye ugushikanira Yehova ibimazi. Ariko rero, aho kunezererwa izo ngabirano zo mu vy’impwemu, ntibemeye guhazwa n’ibintu vy’umubiri Imana yari yabahaye.​—Guharūra 11:4-6.

10. Ni kuki dukwiye nantaryo kugumiza Imana mu vyiyumviro vyacu?

¹⁰ Abasavyi ba Yehova bo muri iki gihe si cokimwe n’Abisirayeli bari mu bugaragwa. Bo barashimwa n’Imana. Ariko rero, ni ngirakamaro cane ko umwumwe wese muri twebwe agumiza Imana mu vyiyumviro vyiwe. Kubigira bizodufasha gutera akagere ivyipfuzo biranga ubwikunzi vyoshobora gutuma tubona ibintu vy’impwemu mu buryo buvurunganye. Dutegerezwa kwiyemeza “kwikunkumura ukutubaha Imana n’ukwifuza ivy’isi, [no] kwama tudahugumba, tugororoka, twubaha Imana, mu gihe ca none.” (Tito 2:12) Abo muri twebwe bifatanije n’ishengero rya gikirisu kuva mu bwana, bakwiye kutigera biyumvira yuko hariho ikintu ciza kiriko kirabacika. Ivyiyumviro nk’ivyo biramutse biciye mu mizirikanyi yacu, vyoba vyiza twibutse Yehova be n’imihezagiro y’akaroruhore atubikiye.​—Abaheburayo 12:2, 3.

Tugamburukire Yehova Bimwe Vyuzuye

11, 12. Umuntu yoshobora gute kwagirwa n’ugusenga ibigirwamana atarinze kuja mu vy’ugusenga ibishushanyo?

¹¹ Paulo aratubwira ayandi majambo yo kutugabisha, igihe yandika ati: “Kandi ntimugasenge ibishushanyo vy’ibigirwamana, nk’uko bamwe bo muri ba bandi bābisenga: nk’uko handitswe, ngw Abantu bicaritswe no kurya no kunywa, bava hasi baravyina.” (1 Ab’i Korinto 10:7) Paulo ariko yerekeza kuri ca gihe Abisirayeli bahata Aroni ngo abacurire imasa y’inzahabu. (Kuvayo 32:1-4) Naho kumbure bisa n’ibitoshoboka ko duhindukirira ikigirwamana nya kigirwamana ngo tugisenge, twoshobora gucika abasenga ibigirwamana mu kureka ivyipfuzo vyacu vy’ubwikunzi bikadusamaza ntitube tugisenga Yehova n’ubugingo bwacu bwose.​—Ab’i Kolosayi 3:5.

¹² Ikindi gihe, Paulo yaranditse ku biraba bamwebamwe bari bitwararitse canecane ibintu vy’umubiri aho kwitwararika ibintu vy’impwemu. Ku vyerekeye “abagenda . . . ar’abansi b’[“igiti co kubabarizwako,” NW] ca Kristo,” yanditse ati: “Iherezo ryabo n’uguhona, imana yabo n’inda.” (Ab’i Filipi 3:18, 19) Ikigirwamana basenga nticari igishushanyo kibajwe. Cari icipfuzo bafise c’ibintu vy’umubiri. Ariko ntiwumve, ivyipfuzo vyose si bibi. Yehova yaturemye turi abantu bafise ivyo bakenera kandi bashoboye kwinovora ibintu bitandukanye binezereza. Mugabo, abashira imbere ukwirukira ibibahimbara bakabirutisha ubucuti bafitaniye n’Imana, emwe baracika abasenga ibigirwamana.​—2 Timoteyo 3:1-5.

13. Dushobora kwigira iki kuri ya nkuru yerekeye imasa y’inzahabu?

¹³ Abisirayeli bamaze kuva mu Misiri, baracuze imasa y’inzahabu kugira bayisenge. Turetse ingabisho yo kudasenga ibigirwamana, hariho ikindi cigwa gihambaye twokura muri iyo nkuru. Abisirayeli baragambaraye ubuyobozi butomoye buva kuri Yehova. (Kuvayo 20:4-6) Yamara rero, intumbero yabo ntiyari iyo gutera akagere Yehova ngo si Imana yabo. Bosereje ibimazi ya masa y’inzahabu bongera bita urwo rubanza “umusi mukuru w[a Yehova].” Hari ukuntu bibeshe mu kwiyumvira yuko Imana yokwirengagije ubugambarazi bwabo. Ico cari igitutsi kuri Yehova, kandi vyaramushavuje cane.​—Kuvayo 32:5, 7-10; Zaburi 106:19, 20.

14, 15. (a) Ni kuki Abisirayeli batari bafise icitwazo co gucika abumva bakibagira? (b) Niba twiyemeje kudacika abumva bakibagira, tuzokora iki ku biraba amabwirizwa ya Yehova?

¹⁴ Coba ari ikintu c’imbonekarimwe hagize uwo mu Vyabona vya Yehova yifatanya n’idini ry’ikinyoma. Ariko rero, naho bamwebamwe bashobora kuguma bari mw’ishengero, barashobora gutera akagere ubuyobozi bwa Yehova mu bundi buryo. Abantu bo muri Isirayeli nta citwazo bari bafise co gucika abumva bakibagira. Barumvise ya Mabwirizwa Cumi, kandi ni ho bari bari igihe Musa yabashikiriza ibwirizwa ry’Imana rigira riti: “Ntimukarondere izindi mana ngo muzibangikanye na we: ntihakagire ivyitwa imana mucura, ari mw ifeza canke mw izahabu.” (Kuvayo 20:18, 19, 22, 23) Naho ari ukwo, Abisirayeli barasenze imasa y’inzahabu.

¹⁵ Na twebwe nyene nta citwazo cumvikana twoba dufise hamwe twocika abumva bakibagira. Mu Vyanditswe, turafise ubuyobozi buva ku Mana bwerekeye imice myinshi y’ubuzima. Nk’akarorero, Ijambo rya Yehova rirabuza mu buryo butomoye akageso ko kugurana udasubiza. (Zaburi 37:21) Abana babwirizwa kugamburukira abavyeyi babo, abavyeyi na bo vyitezwe ko barera abana babo “[nk’]uk’Umwami wacu agomba.” (Abanyefeso 6:1-4) Abakirisu b’abirebange babwirizwa kwubaka “mu Mwami [gusa],” abasuku b’Imana bubatse na bo babwirwa bati: “Umubano w’abābīranye ni wubahwe na bose, kand’uburiri bgabo bgoye guhumanywa; kukw abashakanyi n’abasambanyi Imana izobacirakw iteka.” (1 Ab’i Korinto 7:39; Abaheburayo 13:4) Niba twiyemeje kudacika abumva bakibagira, ubwo buyobozi be n’ubundi buva ku Mana tuzobufatana uburemere twongere dushire aho bushize.

16. Ingaruka zo gusenga ya masa y’inzahabu zabaye izihe?

¹⁶ Yehova ntiyavyemeye igihe Abisirayeli bagerageza kumusenga mu buryo bishakiye. Ahubwo, abantu 3.000 barasanganguwe, kumbure bivuye ku ruhara ruhambaye bagize muri ico gikorwa c’ubugarariji co gusenga imasa y’inzahabu. Izindi nkozi z’ikibi zaracumukujwe n’ikiza kivuye kuri Yehova. (Kuvayo 32:28, 35) Ese ukuntu ari icigwa ku bantu abo ari bo bose basoma Ijambo ry’Imana, mugabo bagahitamwo ivyo bishakira kugamburuka!

“Nimuhunge Ubushakanyi”

17. Mu 1 Ab’i Korinto 10:8 herekeza ku kintu ikihe cabaye?

¹⁷ Umuce umwe aho ivyipfuzo vy’umubiri bishobora gusuka umuntu mu kwibagira ibintu vy’impwemu, uraserurwa na Paulo igihe avuga ati: “Kandi ntitugashakane, nk’uko bamwe bo muri ba bandi bāshakanye, maze hagapfamw’abantu ibihumbi mirongwibiri na bitatu ku musi umwe.” (1 Ab’i Korinto 10:8) Aha Paulo yerekeza ku kintu cabaye mu Kiyaya ca Mowabu ku mpera za ya myaka 40 ya rwa rugendo rugoye Abisirayeli bagira baciye mu bugaragwa. Abisirayeli bari bamaze igihe gitoyi bafashijwe na Yehova kwigarurira ibihugu biri mu buseruko bwa Yorodani, mugabo benshi bagaragaza ko bakaza kwibagira be n’uko badakenguruka. Ku nkengera za ca Gihugu c’Isezerano, barakwegewe mu bushegabo be no mu gusenga Bayali y’i Peyori guhumanye. Abantu nk’24.000 baratikijwe, 1.000 muri bo bakaba bari ba kizigenza muri uwo mugumuko.​—Guharūra 25:9.

18. Ni ukwigenza gute gushobora gushikana umuntu mu bushegabo?

¹⁸ Abasavyi ba Yehova muri iki gihe barazwi neza ko bakurikiza ingingo zo mu vy’ukwigenza runtu ziri hejuru. Mugabo, igihe Abakirisu bamwebamwe bageragezwa mu vy’ubushegabo, barahagaritse kwiyumvira ivyerekeye Imana n’ingingo ngenderwako zayo. Bacitse abumva bakibagira. Mu ntango, ico kigeragezo gishobora kuba kitarimwo ugusambana. Ishobora kuba ari impengamiro yo kwisuka mu vyo kuraba amashusho yerekana ivy’ubusambanyi, ugutebura be n’ugukwegana n’uwo mudahuje igitsina mu buryo butabereye, canke ukwifatanya n’abantu bagoyagoya mu vy’ukwigenza runtu. Ivyo bintu vyose vyarashikanye Abakirisu mu ngeso y’icaha.​—1 Ab’i Korinto 15:33; Yakobo 4:4.

19. Ni impanuro iyihe yo mu Vyanditswe idufasha “[guhunga] ubushakanyi”?

¹⁹ Igihe tugeragejwe ngo twisuke mu ngeso y’ubushegabo, ntitugahagarike kwiyumvira Yehova. Ahubwo, dutegerezwa gukurikira ivyo twibutswa mw’Ijambo ryiwe. (Zaburi 119:1, 2) Kubera turi Abakirisu, benshi muri twebwe turakora uko dushoboye kwose kugira ngo tugume dutyoroye mu vy’ukwigenza runtu. Ariko, gukora ibigororotse mu nyonga z’Imana bisaba ko tugira akigoro tudahorereza. (1 Ab’i Korinto 9:27) Paulo yandikiye Abakirisu b’i Roma ati: “Ukwumvira Imana kwanyu kwamamaye mu bantu bose: ni co gitumye mbanezererwa, ariko ndagomba ko muba abanyabgenge ku vyiza, mukaba abatungu ku bibi.” (Abaroma 16:19) Nka kumwe nyene ba Bisirayeli 24.000 bicwa bahowe ivyaha vyabo, ni ko n’abasambanyi be n’izindi nkozi z’ikibi vuba bagiye gucirwa rubi na Yehova. (Abanyefeso 5:3-6) Rero, aho gucika abumva bakibagira, dutegerezwa kubandanya “[guhunga] ubushakanyi.”​—1 Ab’i Korinto 6:18.

Nitwame Nantaryo Dukenguruka Intunganyo za Yehova

20. Abisirayeli bagerageje Yehova gute, kandi ivyo vyavuyemwo iki?

²⁰ Benshi cane mu Bakirisu ntibigera bagwa mu bushegabo. Yamara rero, dukeneye kwiyubara kugira ngo ntidukurikirane ingendo yotuma dutora akamenyero ko kwidodomba gashobora gutuma tutemerwa n’Imana. Paulo adukebura ati: “Kandi ntitukagerageze Umwami wacu, nk’uko bamwe bo muri ba bandi bāmugerageje, bakamarwa n’inzoka. Kandi ntimukidodombe, nk’uko bamwe bo muri ba bandi bidodomvye, bakamarwa n’umuranduzi.” (1 Ab’i Korinto 10:9, 10) Abisirayeli baridodombeye Musa na Aroni, eka baranidodombera Imana ubwayo, bidogera mana baronka ku gitangaro. (Guharūra 16:41; 21:5) Ubusambanyi bwabo bwoba ari bwo bwababaje Yehova kuruta ukwidodomba kwabo? Inkuru ya Bibiliya yerekana yuko abidodomvye benshi bishwe n’inzoka. (Guharūra 21:6) Imbere y’aho, abantu bidodomvye b’abagarariji barenga 14.700 barasanganguwe. (Guharūra 16:49) Nimuze ntidushire mu kigeragezo ukwihangana kwa Yehova, mu kudafatana icubahiro intunganyo ziwe.

21. (a) Paulo yahumekewe ngo yandike iyihe nkeburo? (b) Nk’uko bivugwa muri Yakobo 1:25, dushobora gute kugira agahimbare nyakuri?

²¹ Igihe Paulo yandikira Abakirisu bagenziwe, yasozereye urutonde rw’ingabisho mu kubahimiriza ati: “Arikw ivyo vyababayeko kugira ngo bitubere akarorero, kandi vyandikiwe kuduhanūra twebge, abashikwako n’amaherezo y’ibihe. Nuko rer’uwiyumvira kw ahagaze ni yiyubare ntagwe.” (1 Ab’i Korinto 10:11, 12) Nka kurya kw’Abisirayeli, twararonse imihezagiro myinshi iva kuri Yehova. Ariko rero, mu buryo butandukanye na bo, nimuze ntitukigere na rimwe twibagira canke ngo tunanirwe gukenguruka ibintu vyiza Imana iriko iradukorera. Igihe imyitwarariko y’ubuzima ituremereye, nimuze tuzirikane ku mihango y’akaroruhore dusanga mw’Ijambo ryayo. Ese twokwibuka ubucuti bw’agaciro dufitaniye na Yehova maze tukabandanya gukora igikorwa twashinzwe co kwamamaza Ubwami. (Matayo 24:14; 28:19, 20) Nta nkeka ko ingendo nk’iyo izotuzanira ubuhirwe nyakuri, kubera yuko Ivyanditswe bisezerana biti: “Uwitegereza ivyagezwe bitunganye rwose, ari vyo vy’umwidegemvyo, akabishishikara, atar’uwumva akavyibagira, arikw ar’ūbikora, ni we azohabga umugisha mu vy’akora.”​—Yakobo 1:25.

Wokwishura Gute?

• Ni ibiki vyoshobora gutuma tuba abantu bumva bakibagira?

• Ni kuki kugamburukira Imana mu buryo bwuzuye ari ntahara?

• Dushobora gute “[guhunga] ubushakanyi”?

• Dukwiye kugira akahe gatima ku biraba intunganyo za Yehova?

[Ifoto ku rup. 11]

Abisirayeli baribagiye ibikorwa vy’ububasha Yehova yabakoreye

[Ifoto ku rup. 12]

Abasavyi ba Yehova biyemeje kuguma bakurikiza ingingo ngenderwako z’ivy’ukwigenza runtu ziri hejuru