Uguhumurizwa mu Bihe vy’Amagume

AMAKURU yo muri iki gihe ntahumuriza na gatoyi. Umuntu umwe yanditse ati: “Ibintu biba muri kino gihe birateye umujinya ku buryo kenshi tudashobora gufata ingingo nimba tworaba canke tutoraba amakuru y’isaha cumi na zibiri.” Isi yuzuye intambara, ibikorwa vy’iterabwoba, ugucumukura, ubugizi bwa nabi be n’indwara, bikaba ari ibibi bishobora kugira ico bidukozeko ubwacu nimba bitamaze kubigira.

Bibiliya yari yarabuye itihenda uku kuntu ibintu vyifashe. Mu kudondora igihe turimwo, Yezu yavuze yuko hobayeho intambara zikomakomeye, indwara z’ikiza, ubukene bw’ibifungurwa na vya nyamugigima. (Luka 21:10, 11) Muri ubwo buryo nyene, intumwa Paulo yaranditse ivyerekeye “ibihe bigoye,” aho abantu bobaye ari inkazi, bakunda amahera kandi badakunda ivyiza. Ico kiringo yacise “[i]misi y’iherezo.”​—2 Timoteyo 3:1-5.

Ni co gituma mu kudondora uko ivy’isi bimeze, hari ukuntu amakuru ahuza n’ivyo Bibiliya yari yarabuye. Mugabo nta kindi bihurizako atari ivyo gusa. Bibiliya iratanga icizigiro amakuru adatanga. Biciye kw’Ijambo ry’Imana ryahumetswe, turashobora gushika ku gutahura igituma hariho ububi bwinshi, ariko kandi tukanatahura uko kazoza kazomera.

Ukuntu Imana Ibona Ububisha

Bibiliya irasigura ingene Imana ibona uku kuntu hari ibintu bibabaza muri iki gihe cacu. Naho yabonye imbere y’igihe imidurumbanyo ya kino gihe, ntiyishima kandi nta mugambi ifise wo kuyireka ngo ibandanye ibihe vyose. Intumwa Yohani yanditse ati: “Imana [ni] urukundo.” (1 Yohana 4:8) Yehova aritwararika abantu bimwe bigera ibwina, kandi aranka urunuka ububi bwose. Birakwiriye rwose ko duhindukirira Imana kugira ngo iduhumurize, kubera yuko imeze neza, ifise imbabazi, ifise ububasha kandi ikazokura ikibi kw’isi. Umwanditsi wa Zaburi yanditse ati: “[Umwami wo mw’ijuru yagenywe n’Imana] azokiza umukene ah’azotakambira, n’umugorwa atagira gitabara. Azogirira akagongwe uworoshe n’umukene, amagara y’abakene azoyakiza. Azobacungura, abakize agahahazo n’umuryano; kand’amaraso yabo azoba ay’igiciro mu nyonga ziwe.”​—Zaburi 72:12-14.

Woba wumvira ikigongwe abacumukura? Kumbure urakibumvira. Impuhwe ni kamere Yehova yadushizemwo, kubera yuko twaremwe mw’ishusho yiwe. (Itanguriro 1:26, 27) Turashobora kwizigira rero yuko Yehova yumva ababaye igihe abona ingene abantu bacumukura. Yezu, we yari azi neza Yehova kuruta uko uwundi muntu wese amuzi, yigishije yuko Yehova atwitwararika bimwe bikomeye kandi yuko yuzuye imbabazi zirangwa ikibabarwe.​—Matayo 10:29, 31.

Ivyaremwe ubwavyo biremeza yuko Imana yitwararika abantu. Yezu yavuze yuko Imana “[i]tuma izuba ryiwe rirasira ababi n’abeza, kand’aha imvura abagororotsi n’abagabitanya.” (Matayo 5:45) Intumwa Paulo yabwiye abantu bo mu gisagara c’i Lusitira ati: “[Imana] ntiyabirekeye ngaho, itagira ico kuyishingira intahe, kuko yama ibagirira neza, ibaha imvura iva mw ijuru, n’ibihe vy’ivyimburo vyiza, ibahāza ivyo kurya, yuzuza imitima yanyu umunezero.”​—Ivyakozwe 14:17.

Ni Nde Yobibazwa?

Biri n’ico bivuze kuba Paulo kandi yabwiye abantu b’i Lusitira ati: “[Imana] ni yo yaretse amahanga yose mu bihe vyahise ngo bagendere mu nzira zabo.” Ni co gituma amahanga, ni ukuvuga abantu ubwabo, ari yo ahanini yobazwa ivyo bintu bigoye arimwo. Imana si yo bakwiye gutako ishavu.​—Ivyakozwe 14:16.

Ni kubera iki Yehova areka ibintu bibi bigashika? Hoba hari ikintu azokora kuri ivyo? Inyishu z’ivyo bibazo umuntu ashobora kuzisanga mw’Ijambo ry’Imana gusa. Ni kubera yuko inyishu ifitaniye isano cane n’ikindi kiremwa c’impwemu, be n’ikibazo cavyuwe n’ico kiremwa mu karere k’impwemu kataboneka.

[Amafoto ku rup. 4]

Abantu barafise impuhwe. Mbega Imana ni yo yoba itumva ibabaye igihe ibona ingene abantu bacumukura?

[Abo dukesha amafoto ku rup. 2]

IGIPFUKISHO: Ikiduga c’Indwano: UN PHOTO 158181/J. Isaac; nyamugigima: San Hong R-C Picture Company

[Abo dukesha amafoto ku rup. 3]

Hejuru amaja Ibubamfu, Korowasiya: UN PHOTO 159208/S. Whitehouse; umwana yishwe n’ikigoyi: UN PHOTO 146150 BY O. MONSEN