Inkuru y’Ubuzima

Agakete Kahinduye Ubuzima Bwanje

NK’UKO VYAVUZWE NA IRENE HOCHSTENBACH

Vyashitse ku wa Kabiri ku mugoroba mu 1972. Nari mfise imyaka 16 y’amavuka, nkaba nari naherekeje abavyeyi banje mu gikorane c’ivy’idini i Eindhoven, igisagara co mu ntara ya Brabant yo mu gihugu ca Holande. Numva ntatekaniwe, ari co gituma nipfuza kuba ndi ahandi hantu. Maze hari abigeme babiri baciye bampa agakete karimwo ubutumwa bugira buti: “Irene Mukundwa, twipfuza kugufasha.” Sinatahura ukuntu ako gakete kohinduye ubuzima bwanje. Ariko imbere y’uko nigana ivyakurikiye, reka mbanze ngire ico ndababwiye ku vyerekeye kahise kanje.

NAVUKIYE mw’izinga rya Belitung ryo muri Indoneziya. Ndibuka amwamwe mu majwi yo muri iryo zinga riri mu turere tw’ubushuhe, nk’uguhungabana kw’ibigazi mu gihe c’umuyaga, ugusūma kw’uruzi rwo mu micungararo, agatwengo k’abana bakinira hafi y’inzu yacu be n’umuziki wasamirana mu nzu yacu. Mu 1960, igihe nari maze imyaka ine y’amavuka, umuryango wacu warimutse uva muri Indoneziya uja muri Holande. Twaragize urugendo rurerure mu bwato, ijwi nibuka canecane ni iry’agakinisho nakunda cane nagiye njanye ku rugendo, kakaba kari agakinisho gatoyi gatwengeje kariko akagoma. Maze imyaka indwi y’amavuka, sinabaye ncumva bitewe n’indwara, kandi kuva ico gihe, sinashobora kwumva ijwi na rimwe mu majwi yavugira iruhande yanje. Ayo nibuka ni ayo numvise ntaraziba amatwi.

Nkura Ndi Igipfamatwi

Kubera yuko abavyeyi banje banyitwararikana urukundo, mu ntango sinatahura bimwe bishitse inkurikizi z’ukuba igipfamatwi. Kubera nari umwana, niyumvira mbere yuko icuma camfasha kwumva cari nk’ikintu c’igikinisho, naho ata kintu kinini camfasha. Mu kuganira nanje, abana bo mu babanyi barandika n’ingwa inkuru zose hasi mu nzira, nkabavugisha mu kubishura, naho ntashobora kwumva ijwi ryanje bwite.

Uko nagenda nkura, ni ko natahura yuko nari ntandukanye n’abantu bari bankikuje. Natanguye kandi kubona yuko abantu bamwebamwe bantwenga kubera nari igipfamatwi, mu gihe abandi na bo bankumira. Natanguye kwumva ndi ukwa jenyene, ndi inyakamwe. Naratanguye gutahura ico kuba igipfamatwi vyasobanura, kandi uko nakura, ni ko narushiriza gutinya abantu batari ibipfamatwi.

Kugira ngo abavyeyi banje bamfashe kuja mw’ishure ridasanzwe rigenewe ibipfamatwi, barimuye umuryango wose uva mu kagari ko mu ntara ya Limburg, wimukira mu gisagara ca Eindhoven. Dawe yararondeye akazi muri ico gisagara, musanzanje na benewacu na bo baja kw’ishure rishasha. Ndakenguruka kubera ibintu vyose bahinduye ku bw’ineza yanje. Kw’ishure, narigishijwe guhindura urugero rw’ijwi ryanje be no kurushiriza kuvuga ntobora. Ikindi kandi, naho abigisha batakoresha ururimi rw’ibimenyetso, abo twigana baranyigishije gukoresha ibimenyetso.

Mba mu Karere ka Jenyene

Uko nakura, ni ko abavyeyi banje bihatira cane kunganiriza, mugabo hariho ibintu vyinshi ntatahura. Nk’akarorero, sinatahuye yuko abavyeyi banje bariko bigana Bibiliya n’Ivyabona vya Yehova. Mugabo ndibuka yuko umusi umwe umuryango wacu wagendeye ikibanza kimwe, aho abantu benshi bari bicaye ku ntebe. Bose baraba imbere, bagakoma amashi rimwe na rimwe, mu bindi bihe na ho bagahagarara, mugabo sinamenya igituma abo bantu bakora ivyo vyose. Hashize igihe, naramenye ko nari kw’ihwaniro ry’Ivyabona vya Yehova. Abavyeyi banje kandi barakunda kuntwara ku ngoro ntoyi yari mu gisagara ca Eindhoven. Aho narumva merewe neza kubera ko umuntu wese yari n’umutima mwiza, umuryango wanje na wo ukumva uhimbawe, mugabo sinamenya igituma twama tujayo. Ubu ndazi ko iyo ngoro ntoyi yari Ingoro y’Ubwami y’Ivyabona vya Yehova.

Ikibabaje, nta n’umwe yari ahari muri ayo makoraniro kugira ansigurire iyo porogarama. Ubu ndatahura yuko abari bahari bashaka kumfasha mugabo ntibamenye ukuntu bavyifatamwo kubera nari igipfamatwi. Kuri ayo makoraniro, numva ndi igicibwa nkiyumvira nti: ‘Iyo mba nari nibereye kw’ishure aho kuba ndi hano.’ Ariko, mu gihe nyene ivyo vyiyumviro vyari bikiriko biranyurangana mu muzirikanyi wanje, hari abigeme babiri banditse bihuta ikintu ku gapapuro maze barakampa. Ako kari ka gakete navuga mu ntangamarara. Siniyumvira ko ako gakete kobaye intango y’ubugenzi bw’agaciro bwotumye mva mu karere ka jenyene.

Ugutsimbataza Ubugenzi bw’Agaciro

Ba bigeme babiri banshikiriza nya gakete ari bo Colette na Hermine, bari barengeje gatoyi imyaka 20 y’amavuka. Mu nyuma, naramenye yuko bari baje mw’ishengero ry’Ivyabona vya Yehova nama ngendamwo kugira barikoreremwo ari abatsimvyi basanzwe, canke abasuku b’igihe cose. Naho Colette na Hermine batari bazi vy’ukuri ururimi rw’ibimenyetso, naragerageza gutegera ivyo bambwira ndabiye ku kuntu iminwa yabo ikubita, maze muri ubwo buryo twarayaga neza.

Abavyeyi banje baranezerewe igihe Colette na Hermine basaba ivy’uko twigana Bibiliya, mugabo abo bigeme barakoze n’ibiruta ivyo. Barihatira cane kunsobanurira ivyaba biriko birashikirizwa ku makoraniro mu Ngoro y’Ubwami, bakanagerageza gutuma nifatanya n’abandi mw’ishengero. Baramenyereza uburyo bwo gushikiriza ibiganiro bishingiye kuri Bibiliya bwo gukoresha mu gikorwa co kwamamaza, baranamfasha kandi gutegura insiguro z’abanyeshure zo gushikiriza mw’Ishure ry’Ubusuku bwa Gitewokarasi. Ibaze nawe, kuba ico gihe narashoboye mbere kugira uburindutsi bwo gushikiriza insiguro ndi imbere y’abantu batari ibipfamatwi!

Vyongeye, Colette na Hermine baratumye numva ko nshobora kubizigira. Bari abantu bihangana kandi bantega ugutwi. Naho kenshi twatwenga kubera amakosa nagira, ntibigeze bantwengera mw’ijigo; eka mbere ntibigeze baterwa ubuyega n’ukuba ndahari. Baragerageje gutegera inyiyumvo zanje bongera bamfata nk’uko bifata. Abo bakobwa b’abanyabuntu barampaye ingabirano y’akaroruhore, na yo ikaba ari urukundo n’ubugenzi bangaragarije.

Igihambaye kuruta ibindi vyose, Colette na Hermine baranyigishije yuko nategerezwa gushika ku kumenya Imana yacu Yehova, bwa mugenzi ashobora kwizigirwa. Baransiguriye yuko Yehova yari yarambonye nicaye mu Ngoro y’Ubwami kandi ko yatahura ingorane nari mfise yo kuba igipfamatwi. Ese ukuntu nkenguruka kubona urukundo dusanzwe dukunda Yehova rwaratumye twese uko turi batatu tuba abagenzi! Narakozwe ku mutima n’ukuntu Yehova yanyitwararitse, maze bivuye ku rukundo ndamukunda, naragereranije ukumwiyegurira mu kubatizwa mu mazi muri Mukakaro 1975.

Mperekeza Umugenzi Adasanzwe

Mu myaka yakurikiye, nararushirije kumenyana n’abavukanyi be n’abavukanyikazi bakirisu benshi. Hari umuvukanyi yambereye umugenzi adasanzwe vy’ukuri, maze twubakanye mu 1980. Inyuma y’aho gatoyi, naratanguye gukora ndi umutsimvyi, maze mu 1994, jewe n’umunega wanje Harry twaratumwe gukora turi abatsimvyi badasanzwe mu karere gakoreshwamwo Ururimi rw’Ibimenyetso mu Kidagi. Umwaka ukurikira, narahawe igikebere kitoroshe. Nategerezwa gukurikira umunega wanje atari igipfamatwi, uko agendera amashengero atandukanye ari umucungezi w’umuzunguruko musubirizi.

Ehe ukuntu ubu ndavyifatamwo. Igihe tugendeye ishengero ari bwo bwa mbere, nca negera ubwo nyene abavukanyi n’abavukanyikazi benshi bashoboka maze nkidondora. Ndababwira yuko ndi igipfamatwi, hanyuma nkabasaba kundaba igihe bariko bamvugisha buhorobuhoro. Ndagerageza kandi gutanga inyishu amakoraniro y’ishengero agitangura. Maze ngasaba niba hari umuntu afise umutima ukunze wo kumbera umusobanuzi muri iyo ndwi y’amakoraniro be no mu murimo wo mu ndimiro.

Ubwo buryo burakora neza, ku buryo bw’uko rimwe na rimwe abavukanyi n’abavukanyikazi banje bibagira ko ntashobora kwumva, bigatuma haba ibintu bitwenza. Nk’akarorero, barambwira ko igihe bambonye ndiko ndagendagenda mu gisagara, bavuza isone y’umuduga wabo kugira bandamutse, mugabo ntiwumve sindabishura. Rimwe na rimwe na jewe ndibagira aho ubushobozi bwanje bugarukira, nk’igihe ngerageza kwongorera mu gutwi umunega wanje ikintu c’akabanga. Iyo ndamubonye aciye ahinduka mu maso, nca menya yuko ‘namwongoreye’ n’ijwi ryumvikana cane.

Abana barafasha mu buryo umuntu atari yiteze. Mw’ishengero rimwe twagendeye ari bwo bwa mbere, hari agahungu k’imyaka icenda kabonye ko bamwebamwe ku Ngoro y’Ubwami hari ukuntu bagonanwa kumvugisha, maze gaca gafata ingingo yo kugira ico gakoze ku bw’ico kintu. Karaje aho ndi, karamfata ukuboko, kanjana hagati na hagati mu Ngoro y’Ubwami, maze gasemerera n’ijwi ryako ryose gati: “Noshobora kubamenyesha Irene uwo ari we, ni igipfamatwi!” Abari bahari baciye baza aho ndi maze baranyidondora.

Uko mperekeza umunega wanje mu gikorwa c’umuzunguruko, ni ko abagenzi banje baguma bagwira. Ese ukuntu ubu ubuzima bwanje butandukanye n’ubwo nari mfise mu myaka numva ko nkumiriwe kandi ndi ukwa jenyene! Guhera kuri wa mugoroba Colette na Hermine bampereza ka gakete mu minwe, narabonye ububasha ubugenzi bufise kandi narahuye n’abantu bambereye abadasanzwe. Ikiruta vyose, narashitse ku kumenya Yehova, Umugenzi w’agaciro aruta abandi bose. (Abaroma 8:38, 39) Ese ukuntu ako gakete gatoyi kahinduye ubuzima bwanje!

[Ifoto ku rup. 24]

Ndibuka ijwi ry’agakinisho kanje nakunda

[Amafoto ku rup. 25]

Ndi mu busuku be n’igihe nari kumwe n’umunega wanje Harry