Imihango wokwizigira

“UMUMENYESHAKAZOZA w’Imana Mika yari azi yuko imihango kenshi ishobora kugaragara ko atari iyo kwizigirwa. Mu gihe ciwe, mbere na basomambike mu bagenzi b’umuntu ntibashobora kwama bizigirwa ko bashitsa ivyo basezerana. Ku bw’ivyo, Mika yagabishije ati: “Ntimukizigire umukunzi, ntimukishimire incuti; ufate n’akanwa kawe no ku mugore wawe mupfumbatirana”.—Mika 7:5.

Mika yoba yararetse ngo ivyo bintu bibabaje bitume aba umuntu agira amakenga ku mihango yose? Habe namba! Yaraseruye ko yizigira agaherezako imihango yatanzwe n’Imana yiwe Yehova. Mika yanditse ati: “Jeho nzohanga amaso Uhoraho; nzokwitega Imana y’agakiza kanje”.—Mika 7:7.

Ni kubera iki Mika yari afise ukwizigira nk’ukwo? Ni kubera ko yari azi yuko Yehova yama ashitsa ivyo asezerana. Ikintu cose Imana yari yararahiye ba sekuruza ba Mika carashitse ata kabuza (Mika 7:20). Kuba Yehova yarabaye umwizigirwa muri kahise vyararonkeje Mika imvo yo kwemera yuko muri kazoza yoshikije ivyo yasezeranye.

‘Nta kintu na kimwe . . . kitāshitse’

Nk’akarorero, Mika yari azi yuko Yehova yarokoye Abisirayeli akabakura mu buja bwo mu Misiri (Mika 7:15). Yosuwa, uwiboneye ukwo kurokorwa, yaremesheje Abisirayeli bagenziwe kwizera imihango yose Imana yatanze. Yari yishimikije iki? Yosuwa yabibukije ati: “Mu mitima yanyu no mu vyiyumviro vyanyu murazi neza mwese yukw ata kintu na kimwe mu vyiza vyose Uhoraho Imana yanyu yabasezeraniye kitāshitse; vyose vyarasohoye, nta kintu na kimwe muri vyo kitāshitse”.—Yosuwa 23:14.

Abisirayeli bari bazi neza yuko Yehova yari yarabakoreye ibintu bitangaje. Yari yarashikije umuhango yahaye sekuruza wabo Aburahamu yatinya Imana, w’uko uruvyaro rwiwe rwogwiriye rukangana n’inyenyeri, kandi ko rwokwigaruriye igihugu c’i Kanani. Yehova yabwiye kandi Aburahamu yuko abamukomokako bocumukujwe n’umubabaro imyaka 400, mugabo yuko bogarutse i Kanani “mw’iyaruka rigira kane”. Ivyo vyose vyarabaye.—Itanguriro 15:5-16, NW; Kuvayo 3:6-8.

Abisirayeli barakiriwe neza mu Misiri mu gihe ca Yozefu, umuhungu wa Yakobo. Abanyamisiri mu nyuma babahatiye ku bikorwa vy’ubuja biranga ubunyamaswa, mugabo nk’uko Imana yari yarabisezeranye, mu kiringo c’amaruka ane akurikirana guhera igihe binjira mu Misiri, abo bakomoka kuri Aburahamu barabohowe bava mu buja bwo mu Misiria.

Mu myaka 40 yakurikiye, Abisirayeli barabonye ikindi kimenyamenya c’uko Yehova yama nantaryo ashitsa imihango yiwe. Igihe Abamaleki bagaba igitero ku Bisirayeli ata co babahora, Imana yararwaniye abasavyi bayo yongera irabakingira. Yarabaronkeje ibintu vyose vy’umubiri bari bakeneye mu gihe ca rwa rugendo bagira mu bugaragwa rwamaze imyaka 40, maze impera n’imperuka arabashira muri ca Gihugu c’Isezerano. Igihe Yosuwa yariko asubiramwo inkuru z’ivyo Yehova yagiriye abo bakomoka kuri Aburahamu, yarashoboye kuvuga ata gukeka ati: “Nta kintu na kimwe mu vyiza vyose Uhoraho yasezeraniye ab’inzu ya Isirayeli kitāshitse: ariko vyose vyarasohoye”.—Yosuwa 21:45.

Nutsimbataze ukwizigira imihango y’Imana

Ushobora gute gutsimbataza ukwizera imihango y’Imana nka kumwe kwa Mika na Yosuwa? Mbega utsimbataza gute ukwizigira abandi? Uramenya vyinshi bishoboka ku biberekeye. Nk’akarorero, ushobora kwiga ukuntu ari abizigirwa mu kwihweza yuko bagerageza gushitsa ata guhemuka ibintu vyose basezerana. Uko urushiriza kumenya abantu nk’abo, ni ko buhorobuhoro ugenda utsimbataza ukubizigira. Ukwo ni ko wogira ku bijanye no gutsimbataza ukwizera imihango y’Imana.

Uburyo bumwe ushobora kubigira, ni mu kuzirikana ku vyaremwe be n’amategeko abigenga. Abanyasiyansi barizigira badakeka ayo mategeko, nk’akarorero, amwe agenga uburyo akagingo ngengabuzima k’umuntu kamwe kigabura hanyuma kakigwiza kugira ngo kavyare utundi tugingo ngengabuzima amamiliyaridi tugize umubiri wawe. Nkako, amategeko agenga inyifato y’ibintu be n’inguvu vyo mu vyaremwe vyose, bitegerezwa kuba vyashizweho na wa Mushingamategeko wo kwizigirwa bimwe biherejeko. Nta gukeka ko ushobora kwizigira imihango yiwe, nk’uko nyene wizigira amategeko agenga ibiremwa vyiwe.—Zaburi 139:14-16; Yesaya 40:26; Abaheburayo 3:4.

Yehova abicishije ku mumenyeshakazoza Yesaya, uwabayeho mu gihe kimwe na Mika, yarakoresheje ikurakuranwa ry’ibiringo vy’umwaka be n’inzinguzingu y’amazi itangaje kugira ngo yerekane ukuntu ivyo asezerana ari ivyo kwizigirwa. Uko umwaka utashe, imvura yaragwa. Yaranywesha isi maze igatuma abantu bashobora kubiba imbuto hanyuma bakimbura. Ku bijanye n’ivyo, Yehova yavuze ati: “Nk’ukw imvura na shelegi bigwa bivuye mw ijuru, ntibisubireyo, ariko bigatosa isi, bigatuma imeza, ikēra, igaha umubivyi imbuto, n’ūrya ikamuha ivyo kurya; uko ni kw ijambo ryanje riva mu kanwa kanje rizomera: ntirizogaruka ubusa, ariko rizoshitsa ivyo ngomba, rizosozera ico naritumye”.—Yesaya 55:10, 11.

Imihango ntakekeranywa y’Iparadizo

Kwihweza ivyaremwe birashobora gutuma utsimbataza ukwizigira Umuremyi, mugabo hari n’ikindi gikenewe nimba ushaka kwiga ibijanye n’imihango yiwe iri mu bigize “ijambo . . . riva mu kanwa k[iw]e”. Kugira wige ivyerekeye iyo mihango uheze ushobore kuyizigira, urakeneye gusuzuma inkuru yo mu Vyanditswe yahumetswe n’Imana ivuga umugambi Imana ifitiye isi be n’ivyo izokorera abantu.—2 Timoteyo 3:14-17.

Umumenyeshakazoza Mika yari yizigiye adakeka imihango ya Yehova. Wewe uranafise inkuru zahumetswe n’Imana nyinshi kuruta izo Mika yari afise. Uko usoma Bibiliya ukongera ukayizirikanako, na wewe urashobora kwizera ko imihango Imana yatanze izoranguka. Iyo mihango ntiyerekeye gusa abakomoka kuri Aburahamu mu buryo bw’umubiri, ariko yerekeye abantu bose. Yehova yasezeraniye uwo sokuruza yatinya Imana ati: “Mu ru[but]o rwawe ni ho amahanga yose yo mw isi azo[kwihesh]a umu[hezagiro], kuko wanyumviye” (Itanguriro 22:18). Igihimba nyamukuru c’urwo ‘rubuto’ rwa Aburahamu ari rwo ruvyaro rwiwe, ni umwe Mesiya, Yezu Kirisitu.—Ab’i Galatiya 3:16.

Biciye kuri Yezu Kirisitu, Yehova azoraba neza yuko iyo mihezagiro ishungururirwa ku bantu bagamburuka. Ni igiki none Imana yasezeranye gukora muri iki gihe cacu? Muri Mika 4:1, 2 hishura muri aya majambo menyeshakazoza agira ati: “Mu misi y’iherezo umurwa wubatswekw ingoro y’Uhoraho uzotsimbatara ku mpinga y’umusozi, ushirwe hejuru y’iyindi mirambi; kand’amoko azosendanisha aja kuri wo. Amahanga menshi azojayo, abarirane, ati Ni muze tudūge, tuje ku murwa w’Uhoraho, ku ngoro y’Imana ya Yakobo, kugira ngw itwigishe ivy’inzira zayo, natwe tuzigenderemwo”.

Abiga ivy’inzira za Yehova, ‘inkota zabo barazivunjavunja bakazicuramwo amasuka, n’amacumu barayavunjavunja bakayakuramwo inkero’. Impengamiro izo ari zo zose zo gukunda intambara zirazimangana. Vuba, isi izokwuzurako abantu bagamburuka, kandi nta n’umwe azobatera ubwoba (Mika 4:3, 4). Vyemere, Ijambo ry’Imana risezerana yuko mu gihe c’ubutegetsi bw’Ubwami buzoba buri mu minwe ya Yezu Kirisitu, Yehova azokura kw’isi abantu bose bahahaza abandi.—Yesaya 11:6-9; Daniyeli 2:44; Ivyahishuriwe 11:18.

Mbere n’abacumukuye hanyuma bagapfa bivuye ku kuntu abantu bagararije ivyo Imana igomba, bazozurwa bagire icizigiro co kubaho ibihe bidahera kw’isi (Yohana 5:28, 29). Shetani n’amadayimoni yiwe ari bo bene gutanguza ubukozi bw’ikibi si ho bazoba bari kandi n’ingaruka z’icaha ca Adamu zizokurwaho biciye ku nkuka y’incungu ya Yezu (Matayo 20:28; Abaroma 3:23, 24; 5:12; 6:23; Ivyahishuriwe 20:1-3). None umugabane w’abantu bagamburuka uzoba uwuhe? Emwe, bazohezagirwa mu kuronka ubuzima budahera bafise amagara atagira agasembwa kw’isi y’iparadizo!—Zaburi 37:10, 11; Luka 23:43; Ivyahishuriwe 21:3-5.

Mbega imihango myiza igitangaza! Mugabo none, woba ushobora kuyizera? Egome, urabishobora. Yoyo si imihango y’abantu bashobora kuba bafise intumbero nziza mugabo bakabura ububasha bwo kuyishitsa. Ni imihango y’Imana Mushoboravyose, idashobora kubesha kandi ‘idatebeje isezerano ryayo’ (2 Petero 3:9; Abaheburayo 6:13-18). Urashobora kwizigira ugaherezako imihango yose iri muri Bibiliya kubera yuko ikomoka kuri ‘Yehova ya Mana y’ukuri’.—Zaburi 31:5.

[Akajambo k’epfo]

[Iciyumviro ku rup. 6]

“[N]ta kintu na kimwe mu vyiza vyose Uhoraho Imana yanyu yabasezeraniye kitāshitse”.

—YOSUWA 23:14

[Amafoto ku rup. 4, 5]

Yehova yarashikije imihango yari yarasezeraniye Isirayeli ku Kiyaga Gitukura no mu bugaragwa

[Amafoto ku rup. 7]

Yehova yararanguye umuhango yahaye Aburahamu. Urubuto rwiwe ari rwo Yezu Kirisitu ruzozanira imihezagiro abantu