Woba uhanze amaso impera?

IYO ndwara ikwiragira buhorobuhoro. Mu ntango, iragabanya ubushobozi umuntu afise bwo kubona ibiri iruhande y’ikintu ijisho ririko riraraba. Iyo itavuwe, irashobora gukwiragira yerekeza ku ntimatima y’ijisho, ikabuza umuntu kubona neza ikintu ahanze ijisho. Impera n’imperuka, irashobora gutuma umuntu ataba akibona na gato. None iyo ndwara ni iyihe? Ni iyitwa glaucome, ikaba ari indwara itera uruhumyi.

Nka kurya nyene ukubona kwacu kwo mu buryo bw’umubiri gushobora kugenda kuragabanuka buhorobuhoro tutanabizi, hariho ukundi kubona kw’agaciro ntangere gushobora kugenda kurononekara buhorobuhoro, ukwo na kwo kukaba ari ukubona kwo mu buryo bw’impwemu. Ku bw’ivyo, birahambaye ko duhanga amaso ku bintu vy’impwemu kuruta ikindi kintu ico ari co cose.

Tugume duhanze amaso impera

Mu ‘bitabonwa’ n’amaso yacu bwite harimwo impera nziza igitangaza y’ubuzima budahera Yehova asezeranira intahemuka ziwe (2 Ab’i Korinto 4:18). Ego ni ko, imvo nyamukuru ituma abakirisu basukurira Imana ni urukundo bayikunda (Matayo 22:37). Naho ari ukwo, Yehova ashaka ko duhanga amaso impera yacu. Ashaka ko tumubona nk’umuvyeyi w’umutanzi aha “impēra aba[mu]rondera” (Abaheburayo 11:6). Ku bw’ivyo, abazi Imana vy’ukuri bakongera bakayikunda baraha agaciro imihezagiro yasezeranye kandi bakipfuza ko iranguka.—Abaroma 8:19, 24, 25.

Abasomyi benshi b’iki kinyamakuru be na kigenzi caco Be maso!, bararyoherwa n’amashusho yerekana isi y’Iparadizo turindiriye. Ego niko, ntituzi neza na neza ukuntu iyo si y’Iparadizo izoba isa, vyongeye, amashusho asohorwa usanga ari ibicapo gusa bishingiye ku vyanditswe, nko muri Yesaya 11:6-9. Naho ari ukwo, hari umukenyezi mukirisu umwe yavuze ati: “Igihe mbonye amashusho y’Iparadizo yimirije mu Munara w’Inderetsi na Be maso!, ndayasuzuma nitonze, nka kurya nyene umuntu yosuzuma agatabu kamufasha kumenya iyo atumbera igihe ari ku rugendo. Ndagerageza kwiha ishusho ndi muri iyo Paradizo kubera yuko aho ari ho nipfuza vy’ukuri kuzoba igihe Imana yashinze nicagera”.

Ukwo ni ko na Paulo yiyumva ku bijanye n’‘umuhamagaro wiwe wo kuja mw’ijuru’. Ubwiwe ntiyibwira yuko amaze kuwushikira kubera yuko yategerezwa kugaragaza ko ari umwizerwa gushika kw’iherezo. Mugabo yarabandanije “[gu]shingīra ibir’imbere” (Ab’i Filipi 3:13, 14). Mu buryo nk’ubwo nyene, Yezu yarihanganiye urupfu ku giti co kubabarizwako “kubg’umunezero yashizwe imbere”.—Abaheburayo 12:2.

Woba urigera ukekeranya nimba uzokwinjira mw’isi nshasha? Nta gukeka ko kwiyizigira birenze urugero atari vyiza kubera yuko, kugira ngo turonke impera y’ubuzima, bivana n’uko tuguma turi abizerwa gushika kw’iherezo (Matayo 24:13). Ariko rero, niba dukora uko dushoboye kugira ngo dushitse ivyo Imana isaba, turafise imvo yumvikana yo kwizigira tudakeka yuko tuzoshikira impera. Ibuka yuko Yehova ‘atagomba ko hagira abahona, ariko agomba ko bose bigaya’ (2 Petero 3:9). Niba twizigira Yehova, azodufasha gushikira ihangiro ryacu. Kukaba nkako, kurondera imvo zo kwerekana ko abagerageza kumuhimbara bivuye ku mutima badakwije ibisabwa, birateye kubiri n’ukuntu ameze.—Zaburi 103:8-11; 130:3, 4; Ezekiyeli 18:32.

Kumenya ukuntu Yehova abona abasavyi biwe biraduha icizigiro, icizigiro ikaba ari kamere ihambaye ku kwizera kwacu (1 Ab’i Korinto 13:13). Muri Bibiliya, ijambo ry’ikigiriki ryahinduwe ngo “icizigiro” ritanga iciyumviro co “kwitegana [umushasharo] iciza”. Intumwa Paulo afise ico cizigiro mu muzirikanyi, yanditse ati: “Turagomba cane yuk’umuntu wese wo muri mwebge yerekana uwo mwete nyene w’ivyizigiro vyuzuye gushitsa kw iherezo: kugira ngo ntimube ibinebge, ariko mwīgāne abaheshwa n’ukwizera n’ukwihangana kuragwa ivyasezeranywe” (Abaheburayo 6:11, 12). Urabona yuko tubandanije gusukurira Yehova turi abizerwa, dushobora guhera amazinda yuko icizigiro cacu kizoranguka. Ico cizigiro ntikimeze nk’ivyizigiro vyinshi vyo mw’isi, coco “ntig[i]tētereza” (Abaroma 5:5). Dushobora gute none gutuma icizigiro cacu kiguma gikayangana kandi kiboneka neza?

Ukuntu tworyohora ukubona kwacu kwo mu buryo bw’impwemu

Amaso yacu ntidushobora kuyashinga ku bintu bibiri icarimwe. Ni ko biri no ku bijanye n’ukubona kwacu kwo mu buryo bw’impwemu. Dushinze ijisho ku bintu vy’uru runkwekwe rw’ibintu, nta gukeka ko tutazoba tukibona neza mu mizirikanyi yacu isi nshasha yasezeranywe n’Imana. Iyo shusho y’isi nshasha imaze gufurungana canke iri iruhande y’ivyo dushinze ijisho izoshika aho itaba ikiryoheye ijisho, maze izimangane. Mbega ukuntu ivyo vyoba biteye agahinda (Luka 21:34)! Ese ukuntu bihambaye rero ko tuguma dufise ‘ijisho ryiza’, ni ukuvuga ijisho riguma rishinzwe ku Bwami bw’Imana no ku mpera y’ubuzima budahera!—Matayo 6:22.

Kuguma umuntu afise ijisho ryiza ntivyama vyoroshe. Ingorane za misi yose zisaba ko tuzitwararika. Vyongeye ibidusamaza, eka mbere n’ibitwosha nabi, vyoshobora kutuzibira. Igihe turi mu bintu nk’ivyo, twoshobora gute kuguma duhanze amaso Ubwami n’isi nshasha yasezeranywe n’Imana tutirengagije ibindi bikorwa vya nkenerwa? Reka turimbure uburyo butatu.

Niwige Ijambo ry’Imana ku musi ku musi. Gusoma Bibiliya be n’ibisohokayandikiro bishingiye kuri yo ubudahorereza biradufasha kuguma dushize imizirikanyi yacu ku bintu vy’impwemu. Ego ni ko, hari aho twoba tumaze imyaka twiga Ijambo ry’Imana, mugabo dutegerezwa kubandanya kuryiga, nk’uko nyene dukeneye kuguma dufungura imfungurwa zo mu buryo bw’umubiri kugira tubeho. Ntiduhagarika gufungura ngo ni uko tumaze gufungura imfungurwa zidaharurika. Ku bw’ivyo rero, naho twoba tumenyereye Bibiliya gute, turakeneye kubandanya kwihereza imfungurwa zo mu buryo bw’impwemu ziri muri yo tudahorereza kugira ngo icizigiro cacu kigume gikayangana, ukwizera kwacu be n’urukundo rwacu na vyo bigume bikomeye.—Zaburi 1:1-3.

Nuzirikane kw’Ijambo ry’Imana ubigirana ugukenguruka. Ni kubera iki kuzirikana ari ntahara? Kubera imvo zibiri. Ubwa mbere, ukuzirikana kuratuma dutahura ivyo dusoma kandi kukanadufasha kubikenguruka bimwe bigera ibwina. Ubugira kabiri, kuzirikana bituma tutibagira Yehova, ibikorwa vyiwe bitangaje be n’icizigiro yadushize imbere. Tubitangire akarorero: Abisirayeli bavanye na Musa mu Misiri bariboneye n’amaso yabo bwite ukuntu Yehova yagaragaje ububasha bwiwe buteye akoba. Bariboneye kandi ukuntu yabakingiye mu buryo buranga urukundo uko yabayobora abajana ku ntoranwa yabo. Yamara, Abisirayeli bakimara gushika mu bugaragwa berekeza mu Gihugu c’Isezerano, baciye batangura kwidodomba, baba bahishuye ko ata kwizera bafise (Zaburi 78:11-17). Ni ingorane iyihe bari bafise?

Abo bantu bararetse guhanga amaso Yehova be n’icizigiro c’akaroruhore yari yarabashize imbere maze bitwararika ukwimerererwa neza be n’imyitwarariko y’umubiri. Naho Abisirayeli benshi bari bariboneye ibitangaro, baracitse abidodomvyi batagira ukwizera. Muri Zaburi 106:13 havuga hati: “Bibagira n’ingoga ibikorwa [Yehova] yakoze” (Ni twe tubihiritse.). Ukwo gufata ibintu minenegwe kutagira ishingiro kwatumye iryo yaruka ritinjira mu Gihugu c’Isezerano.

Ku bw’ivyo rero, igihe usoma Ivyanditswe canke ibisohokayandikiro bifasha kwiga Bibiliya, nufate umwanya wo kuzirikana ku vyo usoma. Ukuzirikana nk’ukwo kurahambaye ku magara yawe yo mu vy’impwemu be no ku gukura kwawe kwo mu vy’impwemu. Nk’akarorero, igihe uriko urasoma Zaburi 106, amwe mu majambo yayo akaba yasubiwemwo aho haruguru, nuzirikane kuri kamere za Yehova. Niwihweze ingene yihanganiye kandi akagirira imbabazi Abisirayeli. Raba ingene yakoze uko ashoboye kwose kugira ngo abafashe gushika mu Gihugu c’Isezerano. Raba ukuntu babandanije kugarariza Yehova. Niwiyumvire intuntu n’umubabaro Yehova yagize igihe imbabazi ziwe be n’ukwihangana kwiwe vyageragezwa gushika ku rugero rwa nyuma n’abantu batăkenguruka na gato. Vyongeye, mu kuzirikana ku murongo wa 30 n’uwa 31, iyidondora impagararo Finehasi yagize iranga uburindutsi yerekeye ubugororotsi, turasubirizwa umutima mu nda yuko Yehova atibagira intahemuka ziwe be n’uko abaha impera nyinshi.

Nushire mu ngiro ingingo ngenderwako za Bibiliya mu buzima bwawe. Uko dukurikiza ingingo ngenderwako zo muri Bibiliya, turibonera ubwacu yuko impanuro za Yehova ari ngirakamaro. Mu Migani 3:5, 6 havuga hati: “Wizigize Uhoraho umutima wawe wose, kandi ntiwishimikize ubgenge bg’iwawe: umumenye mu ngendo zawe zose, na we azogorora inzira zawe”. Nuzirikane ku kuntu inzira zirangwa ubuhumbu abantu benshi bafashe zatumye bagira ingorane zo mu bwenge, zo mu nyiyumvo n’izo ku mubiri. Bivuye ku kwisuka mu binezereza vy’akanya gato, abantu nk’abo barimbura imibabaro mu myaka kanaka y’ubuzima bwabo, eka mbere no mu buzima bwabo bwose. Igihushanye cane n’ivyo, abaca muri ya “nzira ntoya” barahonja ubuzima bwo mw’isi nshasha, maze ivyo bikabaremesha kubandanya mu nzira y’ubuzima.—Matayo 7:13, 14; Zaburi 34:8.

Gushira mu ngiro ingingo ngenderwako bishobora kuba urugamba. Rimwe na rimwe, umuti ku ngorane kanaka udashingiye ku Vyanditswe ushobora kuboneka nk’aho ari co kintu gica kikuruhura mu bihe bitoroshe. Nk’akarorero, igihe umuntu afise ingorane mu vy’amahera, yohava asanga ashize ivy’Ubwami mu kibanza ca kabiri. Ariko rero, abakorana ukwizera kandi bakaguma bitwararitse ivy’impwemu barakurwa amazinda yuko amaherezo “abubaha Imana ari bo bazoba amahoro” (Umusiguzi 8:12). Rimwe na rimwe, umukirisu yoshobora kuba ategerezwa gukora amasaha menshi, ariko ntakwiye kwigera amera nka Esau, uwakengereye ibintu vy’impwemu mu kubifata nk’ibintu bitagira akamaro.—Itanguriro 25:34; Abaheburayo 12:16.

Yezu yarasiguye neza amabanga tujejwe bwa bakirisu. Dutegerezwa ‘kubanza kwitwararika ubwami bw’Imana n’ukugororoka kwayo’ (Matayo 6:33). Nitwabigira gutyo, Yehova azotugaragariza urukundo rwa kivyeyi mu kuraba neza ko turonka ivyo dukeneye mu vy’umubiri. Ntashaka vy’ukuri ko twiremereza imyitwarariko ku bintu avuga yuko yitwararika. Mwene iyo myitwarariko irenze urugero irashobora kumera nka glaucome (indwara y’amaso) yo mu buryo bw’impwemu; igihe itavuwe, irashobora kugenda iragabanya ukubona kwacu, tugasigara tubona gusa ivy’umubiri maze impera n’imperuka igatuma tuba impumyi mu buryo bw’impwemu. Nitwaguma tumeze gutyo, umusi wa Yehova uzotuzako “nk’umutego”. Ese ukuntu ivyo vyoba biteye agahinda!—Luka 21:34-36.

Tugume tubihanze amaso nka Yosuwa

Nimuze tugume duhanze amaso icizigiro cacu c’akaroruhore c’Ubwami, mu gushira ayandi mabanga tujejwe mu kibanza cayo abereye. Dushishikaye akamenyero kacu ko kwiyigisha, ko kuzirikana n’ako gushira mu ngiro ingingo ngenderwako zo muri Bibiliya, turashobora kuguma dufise icizigiro nka Yosuwa. Amaze gushikana Abisirayeli mu Gihugu c’Isezerano, yavuze ati: “Mu mitima yanyu no mu vyiyumviro vyanyu murazi neza mwese yukw ata kintu na kimwe mu vyiza vyose Uhoraho Imana yanyu yabasezeraniye kitāshitse; vyose vyarasohoye, nta kintu na kimwe muri vyo kitāshitse”.—Yosuwa 23:14.

Ese icizigiro c’Ubwami cogukomeza, kandi ese cotuma uhimbarwa uko kigaragarira mu vyiyumviro vyawe, mu nyiyumvo zawe, mu ngingo ufata be no mu vyo ukora!—Imigani 15:15; Abaroma 12:12.

[Ifoto ku rup. 21]

Woba urigera ukekeranya nimba uzokwinjira mw’isi nshasha?

[Ifoto ku rup. 22]

Ukuzirikana ni umuce uhambaye w’ukwiga Bibiliya

[Amafoto ku rup. 23]

Nugume witwararika ivy’Ubwami