Ibibazo vy’abasomyi

Yozefu, uwari umusavyi wa Yehova w’intahemuka, yoba yarakoresha igikombe c’ifeza kidasanzwe mu kuragura, nk’uko mw’⁠Itanguriro 44:5 hasa n’ahavyerekana?

Nta mvo n’imwe yotuma twiyumvira yuko Yozefu mu vy’ukuri yakoresha ubwoko bunaka bw’ubupfumu.

Bibiliya irahishura ukuntu Yozefu yatahura vy’ukuri ibijanye n’ugukoresha amageza umuntu arondera kumenya ivya kazoza. Imbere y’aho, igihe Yozefu yasabwa gusobanura indoto za Farawo, yarashimitse akatari gake ku vy’uko Imana yonyene ari yo ishobora ‘kwishura’ canke kumenyesha ibizoshika. Ivyo vyatumye Farawo ubwiwe yemera ko ububasha nsigabwenge atari bwo bwatumye Yozefu amenya ivya kazoza, ariko ko ari Imana Yozefu yasenga, ni ukuvuga ya Mana y’ukuri (Itanguriro 41:16, 25, 28, 32, 39). Muri vya Vyagezwe Musa yahabwa mu nyuma, Yehova yarihanikirije ivy’ugukoresha amageza canke ubupfumu, gutyo aba yemeje ko ari we wenyene ashobora kumenyesha imbere y’igihe ivya kazoza.​—Gusubira mu vyagezwe 18:10-12.

Ni kubera iki none Yozefu yavuze abicishije ku musuku wiwe yuko yakoresha igikombe c’ifeza mu ‘kuragura’a (Itanguriro 44:5)? Turakeneye kurimbura ukuntu ibintu vyari vyifashe igihe ayo majambo yavugwa.

Bivuye ku kigoyi kizura inzara cari carateye, benewabo na Yozefu baragiye mu Misiri gusuma ibifungurwa. Hari haciye imyaka abo benewabo nyene bamugurishije ngo ajanwe mu bunyagano. Ico gihe, barasavye imfashanyo mwenewabo bwite batabizi, uno akaba yari yabaye umutegetsi wo mu Misiri ajejwe gutanga ibifungurwa. Yozefu ntiyabibwiye. Aho kubibwira, yafashe ingingo yo kubagerageza. Yozefu yarashatse kuraba yuko bari barigaye vy’ukuri, ivyo bikaba vyari bibereye. Yagomba kandi kuraba nimba barakunda mwenewabo Benyamini na se wabo Yakobo, uwakunda cane Benyamini. N’ikindi kandi, yagomba kumenya aho urukundo babakunda rwagera. Ku bw’ivyo, Yozefu yarakoresheje uruyeri.​—Itanguriro 41:55–44:3.

Yozefu yategetse umwe mu basuku biwe kwuzuza amagunira y’abo benewabo ibifungurwa no gusubiza amahera y’umwumwe wese mu munwa w’igunira ryiwe, hanyuma agaca ashira igikombe c’ifeza ca Yozefu mu munwa w’igunira rya Benyamini. Muri ivyo vyose, Yozefu yariko ashaka kuboneka imbere yabo ko ari umutegetsi w’igihugu c’igipagani. Yarihinduye, arahindura uburyo akora ibintu be n’imvugo yiwe kugira aboneke ko ari mwene uwo mutegetsi, nk’uko nyene vyobonetse mu maso ya benewabo ata co bikeka.

Igihe yari imbere ya benewabo, yarabandanije uruyeri rwiwe ababaza ati: “Ntimuzi yuk’umuntu ameze nkanje ashobora kuragura koko?” (Itanguriro 44:15). Biboneka rero ko ico gikombe cari gusa kimwe mu bintu vy’amayeri yakoresheje. Mu vy’ukuri, Yozefu ntiyakoresha ico gikombe mu kuragura, nk’uko nyene na Benyamini atacivye.

[Akajambo k’epfo]