Nukunde Imana igukunda

“Mukundishe Uhoraho Imana yanyu imitima yanyu yose n’ubugingo bganyu bgose n’ubgenge bganyu bgose”.​—MATAYO 22:37.

1, 2. Ni igiki gishobora kuba caratumye habazwa ca kibazo cerekeye ibwirizwa risumba ayandi?

IKI kibazo biboneka ko Abafarizayo bo mu gihe ca Yezu bagiharirako cane. Mu mabwirizwa arenga 600 yari agize vya Vyagezwe vya Musa, ni ibwirizwa irihe ryari rihambaye kuruta ayandi? Ryoba ryari ibwirizwa rijanye n’ibimazi? Nakare ibimazi vyatangwa kugira ngo umuntu aharirwe ivyaha no kugira ngo akengurukire Imana. Canke kumbure ryoba ryari rimwe ryavuga ibijanye no gukebwa? N’iryo nyene ryari rihambaye, narirya ugukebwa cari ikimenyetso c’isezerano Yehova yari yaragiraniye na Aburahamu.​—Itanguriro 17:9-13.

² Abumira ku vyiyumviro vy’aba kera, biboneka ko bobo biyumvira yuko bitoba bibereye kuvuga ko hari ibwirizwa na rimwe risumba ayandi, narirya amabwirizwa yose Imana yatanze yari ahambaye, naho amwamwe yari gushobora gusa nk’aho umengo ntahambaye cane. Abafarizayo rero bashimye kubaza Yezu ico kibazo batabona kumwe. Biyumvira yuko kumbure yovuze ikintu cotumye abantu batamwemera. Umwe muri bo rero yaregereye Yezu maze amubaza ati: “Ibgirizwa risumba ayandi mu vyagezwe n’irihe?”.​—Matayo 22:34-36.

3. Yezu yavuze ko ibwirizwa risumba ayandi yose ari irihe?

³ Inyishu Yezu yatanze iri n’ikintu gikomeye cane ivuze kuri twebwe muri iki gihe. Mu nyishu yatanze, yaravuze muri make ikintu nyamukuru kuruta ibindi camye kandi kizokwama kiranga ugusenga kw’ukuri. Mu gusubiramwo ibivugwa mu Gusubira mu vyagezwe 6:5, Yezu yavuze ati: “Mukundishe Uhoraho Imana yanyu imitima yanyu yose n’ubugingo bganyu bgose n’ubgenge bganyu bgose. Iryo ni ryo rihambaye rya mbere”. Naho nya Mufarizayo yari yasavye ibwirizwa rimwe gusa, Yezu yaciye avuga n’irigira kabiri. Yarasubiyemwo ibivugwa mu Balewi 19:18, avuga ati: “Har’irindi rya kabiri rimeze nka ryo, n’iri: Mukunde bagenzi banyu nk’uko mwikunda”. Yezu yaciye yerekana ko ayo mabwirizwa abiri ari co kintu nyamukuru kiranga ugusenga gutyoroye. Kugira ngo ntihagire umuntu yomusaba gutondeka ayandi mabwirizwa uko yoba agenda ararutarutana, yasozereye ati: “Kur’ayo mabgirizwa yompi ivyagezwe vyose n’amajambo y’abavugishwa n’Imana ni yo vyenenako” (Matayo 22:37-40). Muri iki kiganiro turaca irya n’ino irisumba irindi muri ayo mabwirizwa abiri. Ni kubera iki dutegerezwa gukunda Imana? Tugaragaza gute urukundo dukunda Imana? Dushobora gute gukunda Imana tukongera tugatsimbataza urukundo tuyikunda? Birahambaye cane ko tumenya inyishu z’ivyo bibazo kubera yuko, kugira duhimbare Yehova, dutegerezwa kumukunda n’umutima wacu wose, n’ubugingo bwacu bwose be n’ubwenge bwacu bwose.

Urukundo rurahambaye

4, 5. (a) Ni kubera iki wa Mufarizayo atatangajwe n’ivyo Yezu yavuze? (b) Ni igiki Imana ibona ko kiruta ibimazi n’amashikanwa?

⁴ Biboneka ko uwo Mufarizayo yabajije Yezu kirya kibazo, atababajwe canke ngo atangazwe n’inyishu yamuhaye. Yari azi ko ugukunda Imana wari umuce uhambaye cane w’ugusenga kw’ukuri, naho abenshi wasanga batakugaragaza. Mu masinagogi, abantu barakunda gusubiramwo n’ijwi ryumvikana igisabisho co kwatura ukwizera citwa Shema, ico na co kikaba carimwo n’amajambo dusanga mu Gusubira mu vyagezwe 6:4-9, kandi amwamwe muri ayo majambo ni yo Yezu yasubiyemwo. Iyo nkuru, wisunze uko ishikirizwa muri Mariko, yigana yuko nya Mufarizayo yaciye abwira Yezu ati: “Mwigisha, uvuze ivy’ukuri yukw ar’Imwe, nta yindi, atari yo yonyene: kandi kuyikundisha umutima wose, n’ugutahura kwose, n’inkomezi zose, bo n’ugukunda mugenzawe nk’uko wikunda, biruta cane ibimazi vyose vyoshejwe n’ibitoshejwe”.​—Mariko 12:32, 33.

⁵ Mu vy’ukuri, naho gutanga ibimazi vyo kwoswa be n’ibindi bimazi cari ikintu casabwa n’Ivyagezwe, ikintu nyamukuru Imana iha agaciro ni urukundo ruvuye ku mutima abasavyi bayo bayifitiye. Imana yabona ko mu gihe umuntu ayishikaniye akanyoni k’akajuri abigiranye urukundo n’ukuyibandako, vyaruta gutanga amapfizi y’intama ibihumbi abigiranye imvo mbi (Mika 6:6-8). Niwibuke ya nkuru y’umupfakazi w’umworo Yezu yitegereza ari mu rusengero i Yeruzalemu. Udusenge tubiri uwo mupfakazi yatereye mw’isandugu y’amahera ntitwari gushobora kugura n’akajuri kamwe. Yamara, utwo duhera yari atanze abitumwe n’urukundo yakunda Yehova ruvuye ku mutima, Yehova yabonye ko turuta amahera menshi abatunzi bari batanze ku bisagutse ku vyo bari bafise (Mariko 12:41-44). Ese ukuntu biremesha kumenya yuko ico Yehova aha agaciro kuruta ibindi vyose ari ikintu twese dushobora kugaragaza naho ivyacu vyoba vyifashe gute, ico na co kikaba ari urukundo tumukunda!

6. Paulo yanditse iki ku bijanye n’ukuntu urukundo ruhambaye?

⁶ Intumwa Paulo yarashimitse ku kuntu urukundo ruhambaye mu gusenga kw’ukuri, mu kwandika ati: “Naho novuga indimi z’abantu n’iz’abamarayika, ariko ntagira urukundo, noba ncitse umuringa uvuga, cank’icuma kivuzwa kigasāma. Kandi naho nogira ingabire yo kuvugishwa n’Imana, nkamenya amabanga yose, n’ubgenge bgose, kandi naho nogira ukwizera kwose, ngashobora gukūrah’imisozi, ariko ntagira urukundo, noba nd’ubusa. Kandi naho notanga ivyanje vyose, ngo ngaburire aboro, kandi naho notanga umubiri wanje ngo nturirwe, ariko ntagira urukundo, nta co vyommarira” (1 Ab’i Korinto 13:1-3). Birumvikana rero ko urukundo ari ikintu gihambaye cane nimba dushaka yuko ugusenga kwacu guhimbara Imana. None tugaragaza gute urukundo dukunda Yehova?

Ukuntu tugaragaza urukundo dukunda Yehova

7, 8. Dushobora gute kugaragaza ko dukunda Yehova?

⁷ Abantu benshi biyumvira yuko urukundo ari ikintu, iyo kije mu muntu adashobora kugitangira, nka kurya bigenda igihe umuntu abonye uwundi agaca yumva amugomwe. Yamara, urukundo nyakuri si ikintu umuntu yiyumvamwo gusa. Ibikorwa ni vyo biruranga kandi ni vyo rumenyekanirako, si inyiyumvo gusa. Bibiliya ivuga ko urukundo ari “inzira irushiriza kuba nziza” be n’uko ari ikintu ‘twirukira’, ni ukuvuga dukurikirana (1 Ab’i Korinto 12:31; 14:1). Abakirisu baremeshwa kudakundana “mu majambo canke ku rurimi [gusa], ariko [ba]kundane mu vyo [ba]kora no mu kuri”.​—1 Yohana 3:18.

⁸ Urukundo dukunda Imana ruratuvyurira umutima wo gukora ibiyihimbara rukongera rukatuvyurira umutima wo kuburanira no gushigikira ukugaba n’ukuganza kwayo, ivyo tukabigira mu mvugo no mu ngiro. Ruratuvyurira umutima wo kwirinda gukunda isi be n’inzira zayo zirangwa n’ukutubaha Imana (1 Yohana 2:15, 16). Abakunda Imana baranka ikibi (Zaburi 97:10). Gukunda Imana birimwo n’ukugaragariza urukundo bagenzi bacu, urwo akaba ari na rwo duca irya n’ino mu kiganiro gikurikira. Vyongeye, gukunda Imana bisaba kuyigamburukira. Bibiliya ivuga iti: “Ugukunda Imana [ni] uku, [ni] uko twitondera ivyagezwe vyayo”.​—1 Yohana 5:3.

9. Yezu yerekanye gute ko akunda Imana?

⁹ Yezu yarerekanye neza ata gahaze ico gukunda Imana bisobanura. Urukundo ni rwo rwatumye ava mw’ijuru aho yaba maze akaza kuba kw’isi ari umuntu. Ni rwo rwamuvyurira umutima wo kuninahaza Se wiwe biciye ku vyo yakora no ku vyo yigisha. Urukundo ni rwo rwatumye “[‘agamburuka’, UB] no gushitsa ku rupfu” (Ab’i Filipi 2:8). Ukwo kugamburuka, ukwagaragaza urukundo rwiwe, kwatumye abantu b’intahemuka bashobora kubonwa n’Imana ko ari abagororotsi. Paulo yanditse ati: “Nk’uko kutumvira Imana kw’umuntu umwe [ni ukuvuga Adamu] kwatumye benshi bacika abanyavyaha, ni ko kuyumvira kw’umwe [ni ukuvuga Kirisitu Yezu] kuzotuma benshi bacika abagororotsi”.​—Abaroma 5:19.

10. Ni kubera iki gukunda Imana birimwo ukuyigamburukira?

¹⁰ Nk’ukwo kwa Yezu, twerekana ko dukunda Imana mu kuyigamburukira. Yohani, ya ntumwa Yezu yakunda cane, yanditse ati: “Uru ni rwo rukundo, [ni] uko tugenda dukurikira ivyagezwe na we” (2 Yohana 6). Abakunda Yehova vy’ukuri baripfuza cane kuyoborwa na we. Kubera yuko batahura ko badashobora kwitunganiriza intambuko zabo ngo baheze baroranirwe, barizigira ubukerebutsi bw’Imana maze bagakurikiza ubuyobozi bwayo buranga urukundo (Yeremiya 10:23). Bameze nka ba bantu b’imico myiza b’i Beroya bakira ubutumwa bw’Imana n’“umutima ukunze”, bipfuza cane gukora ivyo igomba (Ivyakozwe n’intumwa 17:11). Abo bantu b’i Beroya barasesa mu Vyanditswe kugira ngo barushirize gutahura neza ivyo Imana igomba, ivyo bikaba vyarabafashije kugaragaza urukundo mu kurushiriza gukora ibikorwa biranga ukugamburuka.

11. Bisobanura iki gukunda Imana n’umutima wacu wose, n’ubwenge bwacu bwose, n’ubugingo bwacu bwose be n’inkomezi zacu zose?

¹¹ Nk’uko Yezu yabivuze, dusabwa gukunda Imana n’umutima wacu wose, n’ubwenge bwacu bwose, n’ubugingo bwacu bwose be n’inkomezi zacu zose (Mariko 12:30). Urukundo mwene urwo ruva ku mutima, uwo na wo ukaba werekeza ku nyiyumvo zacu, ivyipfuzo vyacu, be n’ivyiyumviro vyacu vy’i bwina, kandi turipfuza rwose guhimbara Yehova. Turakunda kandi Imana n’ubwenge bwacu. Yehova ntidupfa kumuyobokera ata kibidutumye; twaramumenye, turamenya kamere ziwe, ingingo mfatirwako ziwe be n’imigambi yiwe. Turakoresha ubugingo bwacu, ni ukuvuga ubuzima bwacu bwose, kugira ngo tumukorere twongere tumushemeze. Turakoresha kandi inkomezi zacu ku bw’iyo ntumbero nyene.

Igituma dukwiye gukunda Yehova

12. Ni kubera iki Imana idusaba kuyikunda?

¹² Impamvu imwe yotuma dukunda Yehova ni uko adusaba kugaragaza kamere ziwe. Imana ni yo sôko ry’urukundo, kandi ni yo karorero ruheta karwo. Intumwa Yohani yanditse ahumekewe ati: “Imana [ni] urukundo” (1 Yohana 4:8). Twebwe abantu twaremwe mw’ishusho y’Imana. Ku bw’ivyo, twaremwe mu buryo butuma dushobora gukunda. Mu bisanzwe, uburyo Yehova agaba akaganza bushingiye ku rukundo. Yipfuza ko abasavyi biwe bomukorera babitumwe n’uko bakunda uburyo ategeka bugororotse kandi bipfuza kubuyoboka. Vy’ukuri, urukundo ni ntahara kugira ngo mu biremwa vyose harangwe amahoro kandi bibeho bihuza.

13. (a) Ni kubera iki Abisirayeli babwiwe ngo: ‘Mukunde Uhoraho Imana yanyu’? (b) Ni kubera iki vyumvikana ko Yehova yitega ko tumukunda?

¹³ Iyindi mpamvu ituma dukunda Yehova ni uko dukenguruka ivyo yatugiriye. Uribuka yuko Yezu yabwiye Abayuda ati: ‘Mukunde Uhoraho Imana yanyu’. Ntivyari vyitezwe ko bakunda imana iri kure batashobora kwiyegereza kandi batari bazi. Basabwa gukunda Uwari yarabagaragarije urukundo. Yehova yari Imana yabo. Ni We yari yarabakuye mu Misiri abajana mu Gihugu c’Isezerano, arabakingira, arabaronsa ivyo bakeneye, arabakunda, yongera arabatoza indero abigiranye rukundo. Muri iki gihe na ho, Yehova ni we Mana yacu, yo yatanze Umwana wayo ngo atubere incungu kugira ngo dushobore kuzoronka ubuzima budahera. Wumva none bitumvikana ko Yehova yitega yuko natwe tumukunda? Urukundo tumukunda ni urwo tumwishura, kuko dusabwa gukunda Imana idukunda. Dukunda Umwe “yabanje kudukunda”.​—1 Yohana 4:19.

14. Ni mu buryo ki urukundo Yehova adukunda rumeze nk’urw’umuvyeyi w’umunyarukundo?

¹⁴ Urukundo Yehova akunda abantu ni nk’urwo umuvyeyi akunda abana biwe. Abavyeyi b’abanyarukundo, naho ari abanyagasembwa, baramara imyaka n’iyindi bita ku rutare kugira ngo bitwararike abana babo, bakemera bakagira ibintu vyinshi bahevye mu vy’umubiri canke mu bindi. Abavyeyi barigisha abana babo, bakabaremesha, bakabafata mu mugongo bakongera bakabatoza indero kubera yuko bipfuza ko bahimbarwa kandi bamererwa neza. None abavyeyi na bo ni igiki baheza bakipfuza? Baripfuza ko abana babo babakunda bakongera bagafata nka nkama indero babahaye ku bw’ineza yabo. Uravye ivyo Umuvyeyi wacu atunganye wo mw’ijuru yatugiriye vyose, wumva none bitumvikana ko yitega yuko tugaragaza ko tumukengurukira tubitumwe n’urukundo?

Dutsimbataze urukundo dukunda Imana

15. Kugira ngo umuntu akunde Imana, ni intambwe ya mbere iyihe ategerezwa gutera?

¹⁵ Ntiturigera tubona Imana canke ngo twumve ijwi ryayo (Yohana 1:18). Yamara, iradutera akamo ngo tugiranire na yo ubucuti burangwa urukundo (Yakobo 4:8). Ivyo twobigira gute? Intambwe ya mbere ishikana umuntu ku gukunda uwundi, ni ukumumenya. Nakare biragoye ko dukunda cane umuntu tutazi. Yehova yaraduhaye Ijambo ryiwe Bibiliya kugira ngo dushobore kumenya ibimwerekeye. Ni na co gituma, biciye kw’ishirahamwe ryiwe, aturemesha gusoma Bibiliya ubudasiba. Bibiliya ni yo itwigisha ivyerekeye Imana, kamere zayo, be n’ivyo yagiye iragiranira n’abantu mu myaka ibihumbi yagiye irarengana. Kuza turazirikana kuri izo nkuru bituma turushiriza kuyimenya no kuyikunda.​—Abaroma 15:4.

16. Ni gute kuza turazirikana ku busuku Yezu yaranguye bituma turushiriza gukunda Imana?

¹⁶ Uburyo bumwe nyamukuru dushobora kurushiriza gukunda Yehova ni ukuza turazirikana ku buzima bwa Yezu no ku busuku yaranguye. Nkako, Yezu yaragaragaje kamere za Se wiwe bimwe bitagira agahaze ku buryo yashoboye kuvuga ati: “Ūbonye jewe aba abonye Data” (Yohana 14:9). Mbega ntiwumva ukozwe ku mutima n’impuhwe Yezu yagaragaje mu kuzura wa mwana w’ikinege w’umupfakazi (Luka 7:11-15)? Mbega ntibiguhimbara kumenya yuko Yezu yicishije bugufi akoza ibirenga abigishwa biwe kandi yari Umwana w’Imana akaba na we muntu ahambaye kuruta ababayeho bose (Yohana 13:3-5)? Mbega ntiwumva ukozwe ku mutima no kumenya yuko yareka abantu bose, ushizemwo n’abana, bagashobora kumwegera, naho yari ahambaye kuruta abantu bose akaba kandi yari afise ubukerebutsi kuruta bose (Mariko 10:13, 14)? Igihe tuza turazirikana kuri ivyo tubigiranye ugukenguruka, turamera nka ba bakirisu Petero yavuga hamwe yandika ati: “Muramukunda [ni ukuvuga Yezu] naho mutigeze kumubona” (1 Petero 1:8). Uko turushiriza gukunda Yezu, ni na ko turushiriza gukunda Yehova.

17, 18. Ni ibintu biranga urukundo ibihe Yehova yadushiriyeho bishobora gutuma turushiriza kumukunda mu gihe tugiye turabizirikanako?

¹⁷ Ubundi buryo bwo kurushiriza gukunda Imana ni ukuzirikana ku bintu vyinshi biranga urukundo yadushiriyeho kugira ngo twinovore ubuzima. Muri ivyo twovuga ubwiza bw’ivyo yaremye, ibifungurwa binovera vy’ubwoko bwinshi, ukwifatanya n’abagenzi beza kuranga igishika, hamwe n’ibindi bintu umuyoro bihimbaye bituma tunezerwa kandi tugashira akanyota (Ivyakozwe n’intumwa 14:17). Uko turushiriza kumenya ivyerekeye Imana yacu, ni ko turushiriza kugira imvo zo gukenguruka ukuntu igira neza cane be n’ukuntu itanga ititangiriye itama. Nuzirikane ku bintu vyose Yehova yakugiriye wewe ubwawe. Ntuca ubona none yuko bibereye ko umukunda?

¹⁸ Imwe mu ngabire nyinshi Imana yaduhaye ni ukuba dushobora kuyiyegereza mw’isengesho igihe ico ari co cose, tuzi neza yuko Uwo ‘yumva ivyo asabwa’ adutega ugutwi (Zaburi 65:2). Yehova yarahaye Umwana wiwe mukundwa ububasha bwo gutegeka no guca imanza. Yamara rero, kwumviriza amasengesho vyovyo nta n’umwe abiha, eka mbere n’Umwana wiwe. Yehova ni we ubwiwe yumviriza amasengesho tumutura. Ukwo kuntu Yehova yitwararikana urukundo umwumwe wese ukwiwe kuratuma tumwiyegereza.

19. Ni imihango iyihe Yehova yatanze ituma tumwiyegereza?

¹⁹ Ikindi kintu gituma twiyegereza Yehova ni ukuzirikana ku vyo azokorera abantu muri kazoza. Yasezeranye gukuraho indwara, intuntu n’urupfu (Ivyahishuriwe 21:3, 4). Igihe abantu bazoba bamaze kuba abatagira agasembwa, nta n’umwe azoba akigira intuntu, canke ngo acike intege, kibure ngo ashikirwe n’amarushwa. Inzara, ubukene, n’intambara tuzoba twarasezeye (Zaburi 46:9; 72:16). Isi izohindurwa Iparadizo (Luka 23:43). Iyo mihezagiro, Yehova ntazoyizana kubera yuko ari vyo ategerezwa kugira, ahubwo azoyizana kubera yuko adukunda.

20. Musa yavuze iki ku bijanye n’ivyiza umuntu akunda Yehova yironkera?

²⁰ Emwe, ngirango urabonye nawe ko hari impamvu zikomeye zotuma dukunda Imana yacu tukongera tukareka urwo rukundo tuyikunda rukarushiriza kwiyongera. Woba uzobandanya gukomeza urukundo ukunda Imana, mu kuyireka ikakuyobora? Iyo ni ingingo wokwifatira. Musa yaratahura ivyiza umuntu aronka mu gukunda Yehova no mu kuzigama urwo amukunda. Yabwiye Abisirayeli bo mu gihe ciwe ati: “Muhitemw’ubu[zima], kugira ngo mubone kubaho, mwe n’uruvyaro rwanyu, mukunde Uhoraho Imana yanyu, mumwumvire, mwifatanye na we akaramata, kukw ari we bugingo bganyu n’ukuramba kwanyu”.​—Gusubira mu vyagezwe 30:19, 20.

Woba uvyibuka?

• Ni kubera iki bihambaye cane ko dukunda Yehova?

• Dushobora gute kugaragaza urukundo dukunda Imana?

• Ni impamvu izihe dufise zituma dukunda Yehova?

• Dushobora gute gukunda Imana tukongera tugatsimbataza urwo rukundo?

[Ifoto ku rup. 20]

Yehova araha vy’ukuri agaciro ico twese dushobora kugaragaza, ni ukuvuga urukundo tumukunda

[Ifoto ku rup. 23]

“Ūbonye jewe aba abonye Data”.​—Yohana 14:9