Ibibazo vy’abasomyi

Ko iyimbura ryatangura icese Abisirayeli bose b’igitsina-gabo bitavye Umusi mukuru w’imitsima itambiwe, ni bande none bimbura imishuzo ya sayiri yazanwa ku rusengero?

Ivyagezwe vya Musa vyategeka Abisirayeli biti: “Haze harenguke izinamuhungu wese imbere y’Uhoraho Imana yanyu gatatu-gatatu mu mwaka, barenguke ha hantu azoba yātoranije. Baze mu misi mikuru y’imitsima itambiwe, no ku musi ukurikira ya masabato ndwi, no mu misi mikuru y’insāgo” (Gusubira mu vyagezwe 16:16). Kuva mu gihe c’Umwami Salomo no kubandanya, urusengero rw’i Yeruzalemu ni co cari ikibanza Imana yahisemwo ko bogiye barakoraniramwo.

Uwa mbere muri iyo misi mikuru itatu wahimbazwa mu ntango z’impeshi. Uwo musi witwa Umusi mukuru w’imitsima itambiwe, watangura guhimbazwa bukeye baraye bahimbaje Pasika yaba ku wa 14 Nisani, ukabandanya mu kiringo c’imisi indwi gushika ku wa 21 Nisani. Umusi ugira kabiri w’iryo himbazwa, ni ukuvuga ku wa 16 Nisani, werekana ko iyimbura rya mbere ryo mu mwaka ushingiye ku kirangamisi ceranda ritanguye. Kuri uwo musi, umuherezi mukuru yabwirizwa kwakira ‘umukama w’ivyimburwa vy’umushuzo’ vya sayiri hanyuma akabizunguriza “imbere” ya Yehova mu rusengero (Abalewi 23:5-12). Kubera ko Abisirayeli bose b’igitsina-gabo basabwa kuba ari ho bari mu gihe c’uwo Musi mukuru w’imitsima itambiwe, ni bande none bimbura ivyo bashikanira Imana?

Itegeko ryasaba gushikanira Yehova ivyimburwa vy’umushuzo mu gihe c’Umusi mukuru w’imitsima itambiwe ryari ryahawe ihanga ryose. Si umwumwe wese yasabwa gutangura kwimbura maze akaba ari we ubwiwe azana ivyimburwa vy’umushuzo ku rusengero. Ahubwo riho, ni ihanga ryose ryasabwa kubigira biciye ku bariserukira. Ku bw’ivyo, umukama wakoreshwa mu gihe c’Umusi mukuru w’imitsima itambiwe washobora gucibwa n’ababa barungitswe mu murima wa sayiri wo mu micungararo yaho. Igitabu kimwe c’inkoranyabumenyi (Encyclopaedia Judaica) kiragira ico kivuze kuri ivyo kiti: “Mu gihe sayiri yaba yeze, yakurwa mu micungararo ya Yeruzalemu; atari ukwo na ho yarashobora gukurwa aho ari ho hose muri Isirayeli. Yagenywa n’abagabo batatu, umwe wese akagenda yitwaje agakero kiwe n’igiseke ciwe”. Umukama wa sayiri waca uzanwa ku muherezi mukuru, uno na we agaca awushikanira Yehova.

Ico gisabwa co gutanga ivyimburwa vy’umushuzo caraha Abisirayeli akaryo ntangere ko kwerekana yuko bakengurukira Imana ku kuba yarahezagiye ico gihugu be n’iyimbura (Gusubira mu vyagezwe 8:6-10). Ariko igihambaye kuruta, ni uko ivyo birori vyo gushikanira Imana uwo mukama vyari “igitūtu c’ivyiza bizoza” (Abaheburayo 10:1). Biri n’ico bivuze kuba Yezu Kristu yazuwe ku wa 16 Nisani mu 33 G.C., uwo akaba ari wo musi nyene bashikanirako Yehova ivyo vyimburwa vy’umushuzo. Intumwa Paulo yanditse ku vyerekeye Yezu ati: “Kristo yarazutse mu bapfuye, ni we yashurije abāsinziriye. . . . Arik’umuntu wese mu mwanya wiwe: Kristo ni we mushuzo, maz’aba Kristo bazobonerwa bazuke, ah’azozira” (1 Ab’i Korinto 15:20-23). Umukama w’ivyimburwa vy’umushuzo umuherezi mukuru yazungururiza imbere ya Yehova wagereranya Yezu Kristu amaze kuzurwa, uno akaba ari we yabaye uwa mbere yazuriwe kubaho ibihe bidahera. Yezu rero yari yugururiye inzira umuryango w’abantu, iyotumye babohorwa bakava mu caha n’urupfu.

[Abo dukesha ifoto ku rup. 26]

© 2003 BiblePlaces.com