Niwiyegereze Imana
Iratwitegereza ikabona agaciro dufise
“IMITIMA yacu [yodutsindisha].” Muri ayo majambo, Bibiliya irerekana ko bishoboka yuko rimwe na rimwe imitima yacu yoshobora gutuma twinebagura birenze. Mu vy’ukuri, umutima wacu woshobora gutuma tuguma twumva ko tutabereye gukundwa n’Imana be no kwitwararikwa na yo. Naho ari ukwo, Bibiliya iradukura amazinda iti: “Imana iruta imitima yacu ikaba kandi izi ibintu vyose.” (1 Yohani 3:19, 20) Imana iratuzi gusumba uko twiyizi. Ukuntu itubona kwoshobora kuba gutandukanye cane n’ukuntu twebwe ubwacu twibona. None, dufise agaciro akahe mu nyonga za Yehova Imana, we ukuntu atubona ari kwo vy’ukuri guhambaye? Turashobora kuronkera inyishu mu kigereranyo gikora ku mutima Yezu yakoresheje mu biringo bibiri bitandukanye.
Igihe kimwe, Yezu yavuze yuko “utujuri tubiri [tugurishwa] igiceri c’agaciro gatoya.” (Matayo 10:29, 31) Twisunze ibivugwa muri Luka 12:6, 7, Yezu yavuze kandi ati: “None utujuri dutanu ntitugurishwa ibiceri bibiri vy’agaciro gatoyi? Yamara nta na kamwe muri two kibagirwa imbere y’Imana. . . . Ntimutinye; mwebwe muri n’agaciro kuruta utujuri twinshi.” Ico kigereranyo gisanzwe mugabo gikomeye, kiratwereka ukuntu Yehova abona umwumwe wese mu basavyi biwe.
Utujuri twari mu nyoni zari zizimbutse cane kuruta izindi zose bafungura. Nta gukeka ko Yezu yahora yitegereza abakenyezi ba nyarucari, kumbure mbere na nyina wiwe bwite arimwo, bariko baragura mu kaguriro utwo tunyoni tunzwinya kugira ngo imiryango yabo ibukure mu cibo. Umuguzi afise igiceri kimwe ca asariyo, ayo akaba yari amahera angana n’amarundi adashika 60 yo muri kino gihe, yarashobora kugura utujuri tubiri. Utwo tunyoni twari tuzimbutse cane ku buryo umuguzi atanze uduceri tubiri, ataronka utujuri tune ahubwo yaronka dutanu, ako ka gatanu akaba ata co yakariha.
Yezu yarasiguye ko ata kajuri na kamwe “kibagirwa imbere y’Imana” canke ngo gakorokere “hasi” Umuvyeyi wacu atabizi. (Matayo 10:29) Igihe cose akajuri gakorokeye hasi, kumbure bitumwe n’uko kakomerekejwe canke gakorotse kugira ngo kanobagure utwo karya, Yehova arakabona. Utwo tunyoni dusa n’uko ata co tuvuze, utwo Yehova atafashe minenegwe ngo areke kuturema, ntadufata minenegwe ngo atwiyobagize. Mu vy’ukuri, arabona ko hari ico tumaze kubera yuko ari utunyabuzima tw’agaciro. None woba ubona icigwa Yezu yashaka gutanga muri ico kigereranyo?
Mu nyigisho Yezu yatanga, yarakunda gukoresha ugusanisha ibintu, akerekana icigwa yaba akuye ku kintu gisanzwe maze agaca yerekana ukuntu ico cigwa nyene gikora no ku kintu gihambaye kuruta. Nk’akarorero, Yezu yavuze kandi ati: “Ibikona: ntibibiba imbuto canke ngo bishwabure, kandi ntibigira inzu y’ubushinguro canke ikigega, yamara Imana irabigaburira. None mwebwe murusha agaciro inyoni ukungana iki?” (Luka 12:24) Ubu rero, ico Yezu yashaka gushira ahabona muri ya majambo yavuga yerekeye utujuri gica gitomoka, na co kikaba ari iki: Nimba Yehova yitwararika utwo tunyoni tunzwinya, ese ingene azorushiriza kwitwararika abantu bamukunda bakongera bakamusenga!
Twisunze ayo majambo ya Yezu, ntidukwiye kwiyumvamwo ko tutabereye na gato kubonwa na ya Mana “iruta imitima yacu” be n’ukwitwararikwa na yo. Ubwo none, ntibihumuriza kumenya yuko Umuremyi wacu ashobora kutubonamwo ibintu twebwe ubwacu twoshobora kuba tutibonamwo?
[Abo dukesha ifoto ku rup. 9]
Utujuri: © ARCO/D. Usher/age fotostock