Ivyo Yezu yigishije ku vyerekeye Ubwami bw’Imana

“Afata urugendo ava mu gisagara aja mu kindi, ava mu kigwati aja mu kindi, yamamaza . . . inkuru nziza y’ubwami bw’Imana.”​—LUKA 8:1.

TURAKUNDA kuvuga ibijanye n’ibintu tubona ko bihambaye, ibintu bidukora ku mutima. Nk’uko Yezu ubwiwe yabivuze, “akanwa kavuga bivuye ku bibogaboga mu mutima.” (Matayo 12:34) Dufatiye ku vyo Yezu yavuga mu kiringo c’ubusuku yaranguye, turashobora gushika ku ciyumviro c’uko Ubwami bw’Imana cari ikintu kimukora ku mutima.

None Ubwami bw’Imana ni iki? Ubwami ni intwaro irongowe n’umwami. Ubwami bw’Imana rero ni intwaro yashinzwe n’Imana. Yezu yaravuze cane ibijanye n’Ubwami bw’Imana, abugira wo mutwe-shimikiro w’ubutumwa yashikiriza. Ubwo Bwami buravugwa ahantu harenga 110 muri za Njili zine. Ariko rero, Yezu ntiyigisha akoresheje amajambo gusa. Ivyo yakora na vyo nyene vyarigishije vyinshi ku bijanye n’Ubwami bw’Imana be n’ivyo buzokora.

Umwami wabwo ni nde? Umwami w’Ubwami bw’Imana ntatorwa n’abantu. Ahubwo riho, uwo Mutegetsi atorwa n’Imana ubwayo. Mu vyo Yezu yigishije, yarahishuye yuko ari we Imana yatoye ngo abe Umwami.

Yezu yari azi yuko ubuhanuzi bwo muri Bibiliya bwari bwaravuze yuko Mesiya yasezeranywe yotegetse Ubwami bw’ibihe bidahera. (2 Samweli 7:12-14; Daniyeli 7:13, 14; Matayo 26:63, 64) Niwibuke ko Yezu yavuze atomora yuko ubwiwe ari we Mesiya yari yaravuzwe ko yoje. Gutyo, Yezu yariyemereye yuko ari we Mwami yagenywe n’Imana. (Yohani 4:25, 26) Birabereye rero kubona Yezu yarakoresheje incuro zitari nke imvugo ngo “ubwami bwanje.”​—Yohani 18:36.

Yezu yarigishije kandi ko hari n’abandi bofatanije na we gutegeka muri ubwo Bwami. (Luka 22:28-30) Abo bazofadikanya na we gutegeka yabise “ubusho buto,” kuko igitigiri cabo cobaye ari gitoya. Ku biberekeye, yavuze yuko “[Se] yashimye kubaha ubwami.” (Luka 12:32) Igitabu ca nyuma ca Bibiliya kirerekana yuko abantu bazoterwa agateka ko gutegeka bari kumwe na Kristu bose hamwe bazoba ari abantu 144.000.​—Ivyahishuwe 5:9, 10; 14:1.

Ubwo Bwami buri hehe? Yezu yabwiye wa mutegetsi w’Umuroma Ponsiyo Pilato ati: “Ubwami bwanje si ubwo muri iyi si.” (Yohani 18:36) Ubwami bw’Imana burongowe na Kristu ntibuzotegeka buserukiwe n’abantu. Yezu yaravuze incuro nyinshi ko Ubwami bw’Imana ari “ubwami bwo mw’ijuru.”a (Matayo 4:17; 5:3, 10, 19, 20) Ku bw’ivyo, Ubwami bw’Imana ni intwaro yo mw’ijuru.

Yezu yari yizeye adakeka yuko yosubiye mw’ijuru arangije ubuzima bwiwe kw’isi. Yavuze ko aho mw’ijuru ‘yoteguye ikibanza,’ akaba yugururiye inzira abazofadikanya na we gutegeka kugira ngo bamusangeyo.​—Yohani 14:2, 3.

Ni ibiki ubwo Bwami burangura? Yezu yarigishije abamwumviriza gusenga Imana bati: “Ubwami bwawe nibuze. Ivyo ugomba nibibe kw’isi nko mw’ijuru.” (Matayo 6:9, 10) Ivyo Imana igomba biriko birakorwa mw’ijuru. Ubwo Bwami ni bwo buryo Imana ikoresha mu kurangura umugambi ifitiye isi. Kugira ngo ubwo Bwami bubishikeko, buzobanza gutuma haba amahinduka akomeye kuri iyi si.

Ni ibiki ubwo Bwami buzokora kw’isi? Yezu yigishije yuko Ubwami bw’Imana buzokuraho ikibi mu kurandura abiyemeje kugikora. (Matayo 25:31-34, 46) Ivyo bizotuma ukwononekara kwose n’ububisha bwose bihera. Yezu yigishije ko isi izoba yuzuyeko abantu “bitonda,” b’abagororotsi, b’abanyembabazi, “batyoroye mu mutima” be n’indemeshamahoro.​—Matayo 5:5-9.

None abo bantu b’abizigirwa boba bazobwirizwa kuba ku mubumbe utosekaye? Habe namba! Yezu yasezeranye yuko isi izohinduka bimwe biteye igomwe igihe izoba itwarwa n’Ubwami bw’Imana. Umugabo umwe yagira yicirwe hamwe na Yezu yavuze ati: “Yezu, urazonyibuka niwashika mu bwami bwawe.” Mu kwishura, Yezu yavuze ati: “Ni ukuri ndabikubwiye uno musi: Uzoba uri kumwe nanje muri Paradizo.” (Luka 23:42, 43) Ego cane, Ubwami bw’Imana buzohindura isi ibe iparadizo ikwiye hose, iparadizo imeze nka ya yindi yari mw’itongo ry’i Edeni.

Ni ibindi bintu ibihe ubwo Bwami buzokorera abantu? Yezu ntiyasezeranye gusa ivyo Ubwami bw’Imana buzokora, ariko kandi yaravyerekanye mu bikorwa. Yezu yarakijije abantu benshi ku gitangaro, gutyo aba yerekanye ku rugero rutoyi ivyo azokora muri kazoza ku rugero runini kuruta, mu kiringo c’ubutegetsi bw’Ubwami bwiwe. Inkuru yahumetswe yo mu Njili ivuga ku bijanye na Yezu iti: “Agendagenda i Galilaya hose, yigisha mu masinagogi yabo yongera yamamaza inkuru nziza y’ubwami, akiza n’indwara z’ubwoko bwose be n’ubumuga bw’ubwoko bwose mu bantu.”​—Matayo 4:23.

Yezu yarakijije indwara z’ubwoko bwinshi. “Ya[ra]humuye amaso y’uwavutse ari impumyi.” (Yohani 9:1-7, 32, 33) Yezu yarakijije umugabo yari arembejwe n’indwara iteye ishishi y’imibembe mu kumukorako abigiranye umutima mwiza. (Mariko 1:40-42) Igihe bamuzanira “umugabo w’igipfamatwi kandi atavuga ngo atobore,” Yezu yarerekanye ko ashoboye gutuma “ibipfamatwi vyumva n’ibiragi bikavuga.”​—Mariko 7:31-37.

N’urupfu ari urupfu, Umwami yagenywe n’Imana yarugira akari aho. Mu bihe bitatu bivugwa muri Bibiliya, Yezu yarasubije ubuzima abari bapfuye. Yarazuye umwana w’ikinege w’umupfakazi, arazura umukobwa w’imyaka 12, yongera arazura umugenzi wiwe Lazaro yakunda cane.​—Luka 7:11-15; 8:41-55; Yohani 11:38-44.

Mu kwerekana kazoza keza igitangaza abatwarwa b’Ubwami bw’Imana biteze, Yezu yavuze imbere y’igihe biciye ku ntumwa Yohani ati: “Ehe! Ihema ry’Imana riri kumwe n’abantu, kandi izobana na bo, na bo bazoba ibisata vyayo. Kandi Imana ubwayo izoba kumwe na bo. Kandi izohanagura amosozi yose ku maso yabo, kandi urupfu ntiruzokwongera kubaho, eka n’ikigandaro canke amaborogo canke ububabare ntibizokwongera kubaho. Ibintu vya kera vyagiye.” (Ivyahishuwe 1:1; 21:3, 4) Ibaze nawe isi itarimwo amosozi y’intuntu, ububabare canke urupfu! Ico gihe, rya sengesho ryo gusaba ngo ivyo Imana igomba bibe kw’isi nko mw’ijuru rizoba ryishuwe bimwe bishitse.

Ubwami bw’Imana buzoza ryari? Yezu yigishije yuko ubutegetsi bwiwe bwa cami bwotanguye mu gihe cohuriranye n’ikiringo kidasanzwe yise “ukuhaba” kwiwe. Yezu yaravuze ubuhanuzi bw’ido n’ido kugira ngo yerekane igihe ukuhaba kwiwe mu bubasha bwa cami kwotanguriye. Ico kiringo coranzwe n’ingorane zikwiye kw’isi yose, harimwo intambara, ikigoyi, vya nyamugigima, indwara z’ibiza be n’iyongerekana ry’ubugarariji. (Matayo 24:3, 7-12; Luka 21:10, 11) Ivyo hamwe n’ibindi Yezu yavuze ko vyoranze ico kiringo, vyatanguye kwibonekeza bimwe bidasanzwe kuva mu 1914, akaba ari wo mwaka Intambara ya mbere y’isi yose yaduka. Ku bw’ivyo, Yezu ubu araganza ari Umwami. Vuba igihe kigiye gushika c’uko ubwo Bwami buza maze butume ivyo Imana igomba bikorwa kw’isi.b

None ukuza kw’Ubwami bw’Imana ushobora kukwungukirako gute? Vyose bivana n’ukuntu uhitamwo kwitabira ubutumwa Yezu yashikirije.

[Utujambo tw’epfo]