Rwaruka, nimukomeze icipfuzo mufise co gukorera Yehova

“Wame wibuka Umuremyi wawe mu misi y’ubusore bgawe.”​—UMUS. 12:1.

1. Ni igiki abana bo muri Isirayeli basabwe?

HARACIYE imyaka 3.500 Musa, umuhanuzi wa Yehova, ategetse abaherezi n’abagabo b’inararibonye ba Isirayeli ati: “Muze mukoranye abantu, abagabo n’abagore n’abana, . . . kugira ngo bavyumve, bavyige, bubahe Uhoraho Imana yanyu, bitondere amajambo yose y’ibi vyagezwe, babishitse.” (Gus. 31:12) Urabona ko abari basabwe gukoranira hamwe kugira ngo basenge bari abagabo, abagore be n’abana. Egome, n’abakiri bato bari mu babwiwe kwumviriza, kwiga, no gukurikiza ubuyobozi bwa Yehova.

2. Yehova yerekanye gute ko yitwararika urwaruka rwo mw’ishengero rya gikirisu ryo mu ntango?

² Mu kinjana ca mbere, Yehova yarabandanije kwerekana ko yitwararika urwaruka rumutinya. Nk’akarorero, yarahumekeye intumwa Paulo gushira muri amwe mu makete yarungikiye amashengero ubuyobozi bwerekeye neza na neza urwaruka. (Soma Abanyefeso 6:1; Abakolosayi 3:20.) Abakirisu bakiri bato bashize mu ngiro iyo mpanuro bararushirije gukengurukira Se wabo munyarukundo wo mw’ijuru maze arabahezagira.

3. Urwaruka rwo muri iki gihe rwerekana gute icipfuzo rufise co gukorera Imana?

³ None urwaruka rwo muri iki gihe rwoba ruterwa akamo ko gukoranira hamwe kugira ngo rusenge Yehova? Cane nyene! Ku bw’ivyo, biratera umunezero abasavyi b’Imana bose igihe bibonera yuko abasavyi bayo bakiri bato benshi bo hirya no hino kw’isi bashira ku muzirikanyi impanuro ya Paulo igira iti: “Twiyumvirane kugira tuvyuriranire ugukundana n’ibikorwa vyiza, tudaheba kwa gukoranira hamwe kwacu, nk’uko bamwe babimenyereye, mugabo turemeshanya, kandi birushirize kumera gutyo uko mubona wa musi wegereza.” (Heb. 10:24, 25) Vyongeye, abana benshi barifatanya n’abavyeyi babo mu kwamamaza inkuru nziza y’Ubwami bw’Imana. (Mat. 24:14) Kandi abakiri bato ibihumbi n’ibihumbi, mu kwerekana urukundo ruvuye ku mutima bakunda Yehova, baritanga uko umwaka utashe bakabatizwa maze bakironkera imihezagiro izanwa no kuba umwigishwa wa Kristu.​—Mat. 16:24; Mrk. 10:29, 30.

Niwitabire ako kamo ubu

4. Ni ryari urwaruka rwokwitabira akamo Imana irutera ko kuyikorera?

⁴ Mu Musiguzi 12:1 hagira hati: “Wame wibuka Umuremyi wawe mu misi y’ubusore bgawe.” Mwebwe rwaruka, none mukeneye kuba mufise imyaka ingahe kugira ngo mwitabire ako kamo karangwa igishika ko gusenga Yehova no kumukorera? Ivyanditse ntibitomora imyaka mukwiye kuba mufise. Ku bw’ivyo rero, wewe ukiri muto, ntugonanwe wiyumvira yuko uri muto cane ku buryo utokwumviriza Yehova kandi ukamusukurira. Imyaka iyo ari yo yose woba ufise, uraremeshejwe kwitabira ako kamo udatebaganye.

5. Abavyeyi bashobora gute gufasha abana babo gutera imbere mu vy’impwemu?

⁵ Benshi muri mwebwe murafashwa gutera imbere mu vy’impwemu n’umwe mu bavyeyi banyu canke bompi. Muri ubwo buryo, mumeze nka Timoteyo wo mu bihe vya Bibiliya. Igihe yari akiri uruhinja, nyina wiwe Ewunise na inakuru Loyisi baramwigishije ivyanditswe vyeranda. (2 Tim. 3:14, 15) Birashoboka ko abavyeyi bawe bariko barakumenyereza mu buryo nk’ubwo mu kwigana nawe Bibiliya, mu gusenga bari kumwe nawe, mu kukujana ku makoraniro y’ishengero no ku materaniro maninimanini agirwa n’abasavyi b’Imana, no mu kugira uruhara mu busuku bwo mu ndimiro bari kumwe nawe. Mu vy’ukuri, kukwigisha inzira z’Imana ni ibanga rihambaye cane abavyeyi bawe bashinzwe na Yehova ubwiwe. Woba ukenguruka urukundo bagukunda be n’ukuntu bakwitwararika?​—Imig. 23:22.

6. (a) Nk’uko bivugwa muri Zaburi 110:3, ni ugusenga ukuhe guhimbara Yehova? (b) Tugira turimbure iki?

⁶ Naho ari ukwo, uko mwebwe urwaruka mukura, Yehova ashaka ko “mwiyemez[a] neza ukugomba kw’Imana kwiza, kwemerwa kandi gutunganye ukwo ari kwo,” nk’uko na Timoteyo yabigize. (Rom. 12:2) Mubigenjeje gutyo, muzogira uruhara mu bikorwa vy’ishengero, atari kubera yuko abavyeyi banyu bashaka ko mubikora, ariko kubera yuko mushaka gukora ivyo Imana igomba. Nimwakorera Yehova n’umutima ukunze, bizomuhimbara. (Zab. 110:3) Mushobora gute none kwerekana yuko mushaka gukomeza icipfuzo mufise co kwumviriza Yehova no gukurikiza ubuyobozi bwiwe? Tugira twihweze uburyo butatu buhambaye mwobigira. Ubwo buryo ni ukwiyigisha, isengesho, n’inyifato. Reka dusuzume bumwebumwe ukwabwo.

Numenye yuko Yehova abaho koko

7. Yezu yatanze gute akarorero mu bijanye no kuba umutohoji w’Ivyanditswe, kandi ni igiki camufashije kubigira?

⁷ Uburyo bwa mbere werekanamwo yuko ushaka gukomeza icipfuzo ufise co gukorera Yehova ni mu gusoma Bibiliya ku musi ku musi. Urashobora kwironsa ivyo ukeneye mu vy’impwemu ukongera ukaronka ubumenyi bw’agaciro bwo muri Bibiliya mu gusoma Ijambo ry’Imana udahorereza. (Mat. 5:3) Yezu yaratanze akarorero. Igihe kimwe, afise imyaka 12, abavyeyi biwe bamusanze mu rusengero “yicaye hagati y’abigisha, abumviriza yongera ababaza ibibazo.” (Luka 2:44-46) Yezu akiri umwana yari yaramaze kuba umuntu acambirwa Ivyanditswe kandi acambirwa kubitahura. Ni igiki none camufashije kubigira? Nta gukeka ko nyina wiwe Mariya na se wiwe murezi Yozefu baragize uruhara ruhambaye. Bari abasavyi b’Imana baronsa Yezu ubuyobozi buva ku Mana kuva akiri uruhinja.​—Mat. 1:18-20; Luka 2:41, 51.

8. (a) Ni ryari abavyeyi bakwiye gutangura kwinjiza mu bana babo ugukunda Ijambo ry’Imana? (b) Niwigane ikintu cabaye cemeza yuko kumenyereza abana kuva bakiri impinja biri n’agaciro.

⁸ Muri ubwo buryo nyene, abavyeyi batinya Imana muri iki gihe baratahura agaciro ko kwinjiza mu mitima y’abana babo ugucambirwa ukuri kwo muri Bibiliya kuva bakiri impinja. (Gus. 6:6-9) Ivyo ni vyo mushiki wacu mukirisu yitwa Rubi yagize inyuma gato y’aho avyariye umuhungu wiwe wa mbere Joseph. Buri musi yaramusomera mu Gitabu Canje c’Inkuru za Bibiliya. Uko yagenda arakura, yaramufashije gufata ku mutwe ivyanditswe bitandukanye. None Joseph yoba yarungukiye kuri ukwo kumenyerezwa? Gatoyi inyuma y’aho amariye kumenya kuvuga, yarashobora kwigana inkuru nyinshi zo muri Bibiliya mu majambo yiwe bwite. Igihe yari afise imyaka itanu, yaratanze ikiganiro ciwe ca mbere mw’Ishure ry’ubusuku bwa gitewokarasi.

9. Kubera iki gusoma Bibiliya no kuzirikana ku vyo usoma bihambaye?

⁹ Kugira ngo mwebwe urwaruka murushirize gutera imbere mu vy’impwemu, mukwiye kugira akamenyero ko gusoma Bibiliya ku musi ku musi, mukama mugafise mu myaka yanyu y’ubuyabaga no gushika mugeze mu bigero. (Zab. 71:17) Kubera iki gusoma Bibiliya bizogufasha gutera imbere? Raba ivyo Yezu yavuze mw’isengesho yatuye Se wiwe: “Ubuzima budahera ni ubu: ni uko baguma bironsa ubumenyi bwerekeye wewe, Imana yonyene y’ukuri.” (Yoh. 17:3) Nkako, uko urushiriza kwironsa ubumenyi bwerekeye Yehova, ni ko uzorushiriza kubona mu buryo butomoye yuko abaho koko no gukomeza urukundo umukunda. (Heb. 11:27) Igihe cose rero usomye igice kinaka co muri Bibiliya, nukoreshe ako karyo kugira ngo urushirize kumenya ivyerekeye Yehova. Niwibaze uti: ‘Iyi nkuru inyigishije iki ku vyerekeye Yehova ku bijanye n’uko abaho koko? Iki gisomwa co muri Bibiliya cerekana gute ko Imana inkunda ikongera ikanyitwararika?’ Gufata akanya ko kuzirikana kuri mwene ivyo bibazo bizogufasha kumenya ingene Yehova yiyumvira n’ingene yiyumva be n’ivyo agusaba. (Soma Imigani 2:1-5.) Nka kumwe kwa Timoteyo uwari akiri muto, ‘uzokwumvishwa wemere’ ivyo wiga mu Vyanditswe, kandi uzokwumva ushaka gusenga Yehova n’umutima ukunze.​—2 Tim. 3:14.

Ingene isengesho rikomeza urukundo ukunda Yehova

10, 11. Isengesho rigufasha gute gukomeza icipfuzo ufise co gukorera Imana?

¹⁰ Uburyo bugira kabiri ushobora gukomeza icipfuzo ufise co gusukurira Yehova n’umutima wawe wose ni amasengesho utura. Muri Zaburi 65:2, dusoma duti: “Wewe wumva ivyo usabga, abafise umubiri bose bazoza kuri wewe.” Mbere n’igihe Isirayeli yari ihanga ryagiranye isezerano n’Imana, abanyamahanga baza ku rusengero rwa Yehova barashobora kumwegera mw’isengesho. (1 Abm. 8:41, 42) Imana ntigira nkunzi. Abakurikiza amabwirizwa yayo barashira amazinda yuko izobumviriza. (Imig. 15:8) Nta gukeka yuko mu “bafise umubiri bose” harimwo na mwebwe urwaruka.

¹¹ Urazi yuko ishingiro ry’ubugenzi nyakuri ubwo ari bwo bwose ari uguseruriranira neza akari ku mutima. Ushobora kuba uhimbarwa no kubwira umugenzi wawe somambike ivyiyumviro vyawe, ibikuraje ishinga, be n’ukuntu wiyumva. Muri ubwo buryo nyene, mu gutura amasengesho avuye ku mutima, uraserurira akari ku mutima Umuremyi wawe Ahambaye. (Flp. 4:6, 7) Nuganirire Yehova nk’aho woba uriko urasuka ibiri mu mutima wawe ubibwira umuvyeyi munyarukundo canke umugenzi somambike. Nkako, hariho isano rikomeye hagati y’ingene usenga n’ingene wiyumva ku vyerekeye Yehova. Uzokwibonera yuko uko ubugenzi ufitaniye na Yehova burushiriza gukomera, ari ko n’amasengesho utura azorushiriza kugira ico avuze.

12. (a) Kubera iki amasengesho ari n’ico avuze arimwo n’ibindi uretse gusa amajambo? (b) Ni igiki kizogufasha gutahura yuko Yehova ari hafi yawe?

¹² Ariko rero, nugumize ku muzirikanyi yuko isengesho riri n’ico rivuze ririmwo n’ibindi uretse amajambo gusa. Ririmwo n’inyiyumvo zawe z’imbere muri wewe. Mu masengesho utura, nuserure urukundo rurangwa igishika ukunda Yehova, ukuntu umwubaha bimwe bigera kure, be n’ingene umwihekako bimwe bishitse. Uko ubona ingene Yehova yishura amasengesho yawe, uzotahura ubwawe kuruta uko wahora yuko “Uhoraho aba hafi y’abamwambaza bose.” (Zab. 145:18) Egome, Yehova azokwiyegereza, agukomeze kugira ngo urwanye wa Mubesheranyi wongere ugire amahitamwo abereye mu buzima.​—Soma Yakobo 4:7, 8.

13. (a) Kugiranira ubugenzi n’Imana vyafashije gute mushiki wacu umwe? (b) Kugiranira ubugenzi n’Imana bigufasha gute gutsinda akosho k’urunganwe?

¹³ Rimbura ukuntu uwitwa Cherie yakomejwe n’ukuba yari afitaniye na Yehova ubucuti somambike. Mw’ishure ryisumbuye, yararonka udushimwe kubera ko yakora neza akaba kandi yari bitumwako mu vy’inkino. Igihe yarangiza amashure, yaremerewe kurihirwa amahera y’ishure yari gutuma ashobora kubandanya amashure ahanitse. Cherie avuga ati: “Ico kintu nari nemerewe carakwegera cane kandi abamenyereza be n’abanyeshure bagenzanje baranshizeko umukazo ukomeye kugira ngo nemere.” Ariko rero, yaratahuye yuko kwiyongeza amashure vyomusavye yuko umwanya wiwe mwinshi awumara ariko ariga yongera yitegurira amahiganwa y’ivy’inkino, ivyo bikaba vyotumye asigarana umwanya mutoyi wo gukorera Yehova. None Cherie yakoze iki? Avuga ati: “Maze gutura isengesho Yehova, naranse kurihirwa ayo mahera y’ishure maze ntangura gusukura ndi umutsimvyi asanzwe.” Ubu haciye imyaka itanu akora ubutsimvyi. Avuga ati: “Sinicuza na gato. Kumenya ko nafashe ingingo ihimbara Yehova biranezereza. Mu vy’ukuri, ushize Ubwami bw’Imana mu kibanza ca mbere, ibindi vyose uravyongerwa.”​—Mat. 6:33.

Inyifato nziza irahishura yuko ufise “umutima utanduye”

14. Kubera iki inyifato yawe nziza ihambaye mu maso ya Yehova?

¹⁴ Uburyo bugira gatatu wokwerekanamwo yuko ukorera Yehova n’umutima ukunze ni inyifato yawe. Yehova arahezagira urwaruka ruguma rutanduye mu vy’inyifato runtu. (Soma Zaburi 24:3-5.) Samweli uwari akiri muto yaranse kwigana inyifato y’ubuhumbu y’abahungu b’Umuherezi Mukuru Eli. Inyifato nziza ya Samweli ntiyabuze kumenyekana. Inkuru yo muri Bibiliya ivuga iti: “Arik’uwo mwana Samweli akomeza gukura, no gushimwa n’Uhoraho n’abantu.”​—1 Sam. 2:26.

15. Ni imvo zimwezimwe izihe zituma uguma ufise inyifato nziza?

¹⁵ Tuba mw’isi yuzuyemwo abantu bikunda, bibona, bagambararira abavyeyi, b’intashima, b’ibihemu, b’inkazi, bishira hejuru kubera ubwishime, bakunda ibibahimbara aho gukunda Imana, aho tukaba tuvuze bimwebimwe mu bintu biranga abantu vyavuzwe na Paulo. (2 Tim. 3:1-5) Kuguma ufise inyifato y’akarorero kandi ukikujwe n’ivyo bintu bibi birashobora rero kukubera urugamba rutoroshe. Ariko rero, igihe cose ukoze ibigororotse maze ukanka kugira inyifato idahimbara Imana, uba werekanye ko uri ku ruhande rwa Yehova ku bijanye na ca kibazo cerekeye uwukwiye kuba Segaba w’ijuru n’isi. (Yobu 2:3, 4) Urahimbarwa kandi no kumenya yuko uriko witabira akamo Yehova agutera akwinginga ati: “Mwana wanje, uce ubgenge, unezereze umutima wanje, kugira ngo ngire ico nishura uwontuka.” (Imig. 27:11) Vyongeye, kumenya yuko Yehova agushima bizokomeza icipfuzo ufise co kumukorera.

16. Mushiki wacu umwe yanezereje gute umutima wa Yehova?

¹⁶ Igihe mushiki wacu mukirisu umwe yitwa Carol yari akiri umuyabaga yarumira ku ngingo ngenderwako zo muri Bibiliya ari kw’ishure, kandi inyifato yiwe nziza ntiyijanye. Uti vyagenze gute? Carol yaratyekezwa n’abanyeshure bigana kubera ko ijwi ryiwe ryo mu mutima ryamenyerejwe na Bibiliya ritamwemerera kugira uruhara mu vyo guhimbaza imisi mikuru no mu birori bijanye no kwiratira igihugu. Muri ivyo biringo, vyarashika akaronka akaryo ko gusigurira abandi ivyo yemera. Haciye imyaka myinshi, Carol yararonse agakarata kavuye ku muntu bahoze bigana, uno akaba yanditse ati: “Namye nantaryo nizigiye ko nzokurondera nkagukengurukira. Inyifato yawe nziza be n’akarorero keza watanze uri umukirisu akiri muto, hamwe n’impagararo irangwa umutima rugabo wagira ku vyerekeye imisi mikuru, ntivyijanye. Ni wewe Cabona ca Yehova natanguye kubona.” Akarorero ka Carol kari karakoze ku mutima cane uwo munyeshure bigana ku buryo yari yahavuye atangura kwiga Bibiliya. Muri ka gakarata yandikira Carol, yavuze yuko yari amaze imyaka irenga 40 ari Icabona ca Yehova yabatijwe! Nk’ukwo kwa Carol, mwebwe urwaruka mwumira ku ngingo ngenderwako zo muri Bibiliya mubigiranye umutima rugabo muri iki gihe, murashobora gutuma abantu b’umutima nziraburyarya bumva bashatse kumenya Yehova.

Urwaruka rushemeza Yehova

17, 18. (a) Wumva umerewe gute ku bijanye n’urwaruka rwo mw’ishengero iwanyu? (b) Ni kazoza akahe karindiriye urwaruka rutinya Imana?

¹⁷ Twese mw’ishirahamwe rya Yehova rikwiye kw’isi yose turahimbarwa cane no kubona urwaruka ibihumbi n’ibihumbi b’abanyamwete bagira uruhara mu gusenga kw’ukuri! Urwo rwaruka rurakomeza icipfuzo rufise co gusenga Yehova mu gusoma Bibiliya ku musi ku musi, mu gutura amasengesho, no mu kugira inyifato ihuye n’ivyo Imana igomba. Urwo rwaruka rw’intangakarorero ruratuma abavyeyi barwo be n’abasavyi ba Yehova bose bumva baruhuriwe.​—Imig. 23:24, 25.

¹⁸ Muri kazoza, urwaruka rw’abizigirwa ruzoba ruri mu bazorokoka bakinjira mw’isi nshasha Imana yasezeranye. (Ivyah. 7:9, 14) Muri iyo si nshasha, bazokwironkera imihezagiro itagira uko ingana uko bazobandanya kurushiriza gukengurukira Yehova, kandi bazoshobora kumushemeza gushika igihe kitagira urugero.​—Zab. 148:12, 13.

Woshobora kubisigura?

• Urwaruka rushobora gute kugira uruhara mu gusenga kw’ukuri muri iki gihe?

• Kugira ngo wungukire ku gusoma Bibiliya, kubera iki kuzirikana bihambaye?

• Isengesho rigufasha gute kwiyegereza Yehova?

• Inyifato nziza ya gikirisu ivamwo iki?

[Ifoto ku rup. 5]

Woba ufise akamenyero ko gusoma Bibiliya ku musi ku musi?