Ivyo umusi wa Yehova uzohishura

“Umusi wa Yehova uzoza nk’igisuma, . . . isi n’ibikorwa biri muri yo [bizoshirwa] ku mugaragaro.”​—2 PET. 3:10.

1, 2. (a) Isi mbi yo muri kino gihe izohera gute? (b) Ni ibibazo ibihe tugira turimbure?

IYI si mbi yo muri kino gihe ishingiye ku kinyoma c’ishimikiro c’uko ngo umuntu ashobora gutegeka neza isi atisunze Yehova. (Zab. 2:2, 3) None ikintu gishingiye ku kinyoma coba gishobora kwamaho ibihe bidahera? Uwokubesha! Naho ari ukwo, si ngombwa ngo turindire yuko isi ya Shetani yikuraho. Ahubwo nyabuna, izosangangurwa n’Imana igihe yashinze kigeze kandi mu buryo ishaka. Ico Imana izokora mu gukuraho iyi si mbi kizogaragaza ata gahaze ubutungane bwayo be n’urukundo rwayo.​—Zab. 92:7; Imig. 2:21, 22.

² Intumwa Petero yanditse ati: “Umusi wa Yehova uzoza nk’igisuma, aho amajuru azovaho mu kwasana gukomeye, mugabo ibintu bikazoyagishwa n’ugushuha gukaze, n’isi n’ibikorwa biri muri yo bikazoshirwa ku mugaragaro.” (2 Pet. 3:10) None “amajuru” be n’“isi” bivugwa ng’aho ni ibiki? Ivyo “bintu” bizoyaga ni ibiki? Kandi Petero yashaka kuvuga iki igihe yavuga ko “isi n’ibikorwa biri muri yo [bizoshirwa] ku mugaragaro”? Kumenya inyishu z’ivyo bibazo biraza kudufasha kwitegurira ibintu biteye ubwoba bigiye gushika.

Amajuru n’isi bizovaho ivyo ari vyo

3. “Amajuru” avugwa muri 2 Petero 3:10 ni ayahe, kandi azovaho gute?

³ Igihe imvugo “amajuru” ikoreshejwe muri Bibiliya mu buryo bw’ikigereranyo, akenshi yerekeza ku butegetsi, buno bukaba buri hejuru y’abo butwara. (Yes. 14:13, 14; Ivyah. 21:1, 2) “Amajuru azovaho” agereranya ubutegetsi bw’abantu butwara ikibano kitibanga Imana. Ukuba azovaho “mu kwasana gukomeye,” canke mu “guturagara gukaze,” nk’uko iyindi Bibiliya ibivuga, vyoshobora kwerekana yuko ayo majuru azosangangurwa bukwi na bukwi.

4. Ya “si” ni iki, kandi izotikizwa gute?

⁴ Iyo “si” igereranya abantu biyonkoye ku Mana. Isi nk’iyo yarabayeho mu gihe ca Nowa kandi biciye kw’itegeko Imana yatanze, yaraheze hakoreshejwe Isegenya. Bibiliya ivuga iti: “Biciye kuri iryo jambo nyene amajuru n’isi biriho ubu birundanirijwe umuriro, kandi bibitswe ku bw’umusi w’urubanza n’uw’ugutikizwa kw’abantu batibanga Imana.” (2 Pet. 3:7) Mu gihe rya Segenya ryatikirije rimwe abantu bose batibanga Imana, ugutikiza kugiye kuza kwokwo kuzoba intambwe ku yindi mu kiringo ca “ya makuba akomeye.” (Ivyah. 7:14) Mu gihe c’intambwe ya mbere y’ayo makuba, Imana izotuma abategetsi bo mu vya politike b’iyi si batikiza “Babiloni Akomeye,” gutyo ibe yerekanye ko isuzugura uwo maraya wo mu vy’idini. (Ivyah. 17:5, 16; 18:8) Mu nyuma, mu gihe ca ya ntambara ya Harumagedoni, ino ikaba ari yo ntambwe ya nyuma y’ayo makuba akomeye, Yehova ubwiwe azoherengeteza ibintu vyose vy’isi ya Shetani bizoba bisigaye.​—Ivyah. 16:14, 16; 19:19-21.

‘Ibintu bizoyaga’

5. Muri vya bintu vy’ikigereranyo harimwo n’iki?

⁵ None ‘ibintu bizoyaga’ ni ibiki? Inyizamvugo imwe y’ivya Bibiliya isobanura yuko iyo mvugo ngo “ibintu” yerekeza ku “mategeko ya mbere na mbere,” canke “ibintu vy’ishimikiro.” Ivuga yuko iyo mvugo “yakoreshejwe ku bijanye n’indome zigize urutonde rw’indome z’ururimi runaka, nka vyo bintu vy’ishimikiro bigize imvugo.” Ku bw’ivyo, “ibintu” vyavuzwe na Petero vyerekeza ku bintu vy’ishimikiro bituma isi igira kamere ziyiranga, agatima igaragaza, inzira zayo, be n’imigambi yayo bidahimbara Imana. Muri ivyo “bintu” harimwo “impwemu y’isi,” ino ikaba “ikorera mu bana b’ubugambarazi.” (1 Kor. 2:12; soma Abanyefeso 2:1-3.) Iyo mpwemu irakwiragiye mw’isi ya Shetani. Iratuma abantu biyumvira, bategekanya ibintu, bavuga, kandi bakora mu buryo bugaragaza ivyiyumviro vya Shetani, wa “mutware w’ubukuru bw’ikirere” yibona kandi w’umugarariji.

6. Impwemu y’isi yigaragaza gute?

⁶ Ku bw’ivyo rero, baba babizi canke batabizi, abamaze kwandukirwa n’impwemu y’isi barareka ivyiyumviro vyabo n’imitima yabo bikoshwa na Shetani, ku buryo bagaragaza ivyiyumviro vyiwe n’agatima kiwe. Ivyo bituma bakora ivyo bashaka batarinze kwitwararika ivyo Imana igomba. Mu bintu bitandukanye, usanga bakorana ubwishime n’ubwikunzi, bakagaragaza agatima k’ukugarariza ubukuru, kandi bagatwarwa n’“icipfuzo c’umubiri n’icipfuzo c’amaso.”​—Soma 1 Yohani 2:15-17.a

7. Ni kubera iki dutegerezwa ‘kurinda umutima wacu’?

⁷ Ese ukuntu bihambaye rero ko ‘turinda umutima wacu’ mu gukoresha ubukerebutsi buva ku Mana mu bijanye no guhitamwo abo twifatanya, ivyo dusoma, ukwiruhura, be n’imihora twoshobora gusuzuma kuri Internet! (Imig. 4:23) Intumwa Paulo yanditse ati: “Mwiyubare: Hari aho hogira uwubigarurira nk’isahu ryiwe biciye muri filozofiya no mu ruhendo ata co rurimwo vyisunga imigenzo y’abantu, vyisunga ibintu vy’intango vyo mw’isi, bitisunga Kristu.” (Kol. 2:8) Iyo mpanuro irarushiriza kuba iyihutirwa uko umusi wa Yehova wegereza, kuko “ugushuha” kwawo gukomeye cane kuzoshongesha “ibintu” vyose bigize isi ya Shetani, kwerekane ko bitagira na gato kamere zirinda umuriro. Ivyo biratwibutsa amajambo ari muri Malaki 4:1 agira ati: “Umusi uraje, waka nk’itanure; abībone bose n’inkozi z’ibibi zose bazoba ibishingwe; kand’uwo musi ugira uze uzobatōngōra.”

‘Isi n’ibikorwa biri muri yo bizoshirwa ku mugaragaro’

8. Isi be n’ibikorwa biri muri yo “[bizoshirwa] ku mugaragaro” gute?

⁸ Petero yashaka kuvuga iki igihe yandika ko “isi n’ibikorwa biri muri yo [bizoshirwa] ku mugaragaro”? Imvugo ngo ‘gushirwa ku mugaragaro’ ishobora kandi guhindurwa ngo “kumenyekana” canke “gushirwa ahabona.” Petero yashaka kuvuga ko mu gihe ca ya makuba akomeye, Yehova azoshira ahabona isi ya Shetani, yerekane ko imurwanya ikongera ikarwanya Ubwami bwiwe, akaba ari co gituma ikwiriye gutikizwa. Mu kuvuga mu buryo menyeshakazoza ibijanye n’ico gihe, muri Yesaya 26:21 hagira hati: “Uhoraho arikw arava i we azanywe no guhanira ababa mw isi ukugabitanya kwabo; ivu rizogaragaza ibitenga vy’amaraso yaviriye kuri ryo, kandi ntirizoba rigitwikiriye abishwe bo muri ryo.”

9. (a) Ni ibiki dukwiye kwamirira kure, kandi kubera iki? (b) Ni igiki dukwiye gutsimbataza, kandi kubera iki?

⁹ Mu gihe c’umusi wa Yehova, ababumbabumbwe n’isi be n’impwemu yayo mbi bazokwerekana ukuntu bameze vy’ukuri, mbere bagandagurane. Nkako, vyoshoboka cane yuko ubwoko bwinshi bwo kwisamaza burimwo ubukazi bukundwa na benshi muri iki gihe buriko burosha ivyiyumviro vy’abantu benshi ngo bitegurire igihe umuntu wese azobangura ukuboko ‘akarwana na mugenzi we.’ (Zek. 14:13) Ese ukuntu bihambaye rero yuko twamirira kure ikintu cose, uri amasenema, ibitabu, udukino two kuri videwo, n’ibindi n’ibindi, vyoshobora gutuma dutsimbataza ingeso zisesema Imana, nk’ubwibone be n’ugukunda ubukazi! (2 Sam. 22:28; Zab. 11:5) Nimuze riho dutsimbataze ivyamwa vy’impwemu nyeranda y’Imana, kuko kamere nk’izo zizogaragara ko zidasha igihe kwa gushuha kw’ikigereranyo kuzokwaduka.​—Gal. 5:22, 23.

“Ijuru rishasha n’isi nshasha”

10, 11. “Ijuru rishasha” be n’“isi nshasha” ni ibiki?

¹⁰ Soma 2 Petero 3:13. Iryo “juru rishasha” ni Ubwami bw’Imana bwo mw’ijuru, ubwashinzwe mu mwaka wa 1914 igihe “ibihe vyashinzwe vy’amahanga” vyarangira. (Luka 21:24) Iyo ntwaro ya cami igizwe na Kristu Yezu be n’abantu 144.000 bazofatanya na we kuganza, benshi muri bo bakaba bamaze kuronka impera yabo yo mw’ijuru. Mu gitabu c’Ivyahishuwe, abo batowe bavugwa ko ari “ca gisagara ceranda, Yeruzalemu Nshasha, kimanuka kiva mw’ijuru ku Mana, giteguwe nk’umugeni asharijwe ku bw’umugabo wiwe.” (Ivyah. 21:1, 2, 22-24) Nka kurya nyene Yeruzalemu yo kw’isi yari icicaro c’intwaro ya Isirayeli ya kera, Yeruzalemu nshasha be n’Umugabo wayo bigize intwaro izoganza isi nshasha. Ico gisagara co mw’ijuru ‘kizomanuka kiva mw’ijuru’ mu kwitwararika isi.

¹¹ Iyo “si nshasha” yerekeza ku kibano gishasha co kw’isi kigizwe n’abantu bazoba barerekanye ko bayobokera Ubwami bw’Imana babikunze. Iparadizo yo mu buryo bw’impwemu abasavyi b’Imana bibereyemwo mbere no muri kino gihe, izoba igiye yarangwa ahantu ibereye muri iyo “si izoza” nziza igitangaza. (Heb. 2:5) Dushobora gute kuba muri iyo si nshasha?

Niwitegurire umusi uhambaye wa Yehova

12. Ni kubera iki umusi wa Yehova uzoza nk’ikintu kibabaza isi?

¹² Paulo na Petero bompi barabuye yuko umusi wa Yehova woje “nk’uko igisuma kiza,” ata wubiciye n’ikanda kandi ata wari awiteze. (Soma 1 Abanyatesalonika 5:1, 2.) Mbere n’abakirisu b’ukuri, abaguma biteze uwo musi, bazotangazwa n’ukuntu uzoshika giturumbuka. (Mat. 24:44) Ariko rero, isi ntizotangara gusa. Paulo yanditse ati: “Igihe [abantu biyonkoye kuri Yehova] bazoba bariko bavuga ngo: ‘Amahoro n’umutekano!’ ni ho agatikizo ka bukwi na bukwi kazoba kuri bo nk’uko ububabare bw’ibise buza ku mugore yibungenze; kandi ntibazogenda barusimvye.”​—1 Tes. 5:3.

13. Twokwirinda gute guhendwa n’akamo kavuga ngo “Amahoro n’umutekano!”?

¹³ Ako kamo ngo “Amahoro n’umutekano!” kizoba ari ikindi kinyoma gihumetswe n’amadayimoni; yamara, ntikazohenda abasavyi ba Yehova. Paulo yanditse ati: “Ntimuri mu mwiza, ngo uwo musi ubahwikire nk’uko wohwikira ibisuma, kuko mwese muri abana b’umuco n’abana b’umurango.” (1 Tes. 5:4, 5) Nimuze rero tugume mu muco, kure cane y’umwiza w’isi ya Shetani. Petero yanditse ati: “Bakundwa, ko musanzwe muzi ivyo, mwiyubare ngo ntimutwarwe hamwe na bo [ni ukuvuga abigisha b’ikinyoma bari mw’ishengero rya gikirisu] biciye ku buzimire bw’abantu batibanga amategeko mugata ugushikama kwanyu bwite.”​—2 Pet. 3:17.

14, 15. (a) Yehova adutera iteka gute? (b) Ni amajambo yahumetswe ayahe dukwiye gufata nka nkama?

¹⁴ Urabona ko Yehova atatubwira gusa ‘kwiyubara’ ngo ace agarukiriza aho. Ahubwo nyabuna, aradutera iteka mu ‘kutumenyesha’ ibintu imbere y’igihe abigiranye umutima mwiza akatubwira muri rusangi ibintu bikurubikuru bizoshika muri kazoza.

¹⁵ Ariko rero, birababaje kubona hari abafashe minenerwe canke mbere barakekeranya ku bijanye n’ivyibutswa bitwereka ko dukeneye kuguma turi maso. Boshobora kuvuga bati: ‘Tumaze imyaka mirongo twumva ivyibutswa nk’ivyo.’ Ariko rero, abo bantu barakwiye kugumiza ku muzirikanyi yuko mu kuvuga amajambo nk’ayo baba vy’ukuri bariko barakekeranya ku vyo Yehova be n’Umwana wiwe bavuga, bataba bariko bakekeranya gusa ku vyo umugwi wa wa mushumba w’umwizigirwa uvuga. Yehova yavuze ati: “Ubirorēre.” (Hab. 2:3) Yezu na we nyene yavuze ati: “Mugume muteramye . . . kubera ko mutazi umusi Umukama wanyu azozirako.” (Mat. 24:42) Ikigeretse kuri ivyo, Petero yanditse ati: “Mubwirizwa kuba abantu bameze gute mu bikorwa vy’ingeso nyeranda be n’ibikorwa vy’ukwihebera Imana, murindira kandi mwamiza hafi ku muzirikanyi ukuhaba kw’umusi wa Yehova!” (2 Pet. 3:11, 12) Umugwi wa wa mushumba w’umwizigirwa be n’Inama Nyobozi iwuserukira ntibazokwigera bafata minenerwe ayo majambo ahambaye!

16. Ni agatima akahe dukwiye kwirinda, kandi kubera iki?

¹⁶ Mu vy’ukuri, wa “mushumba mubi” ni we ashika ku ciyumviro c’uko Databuja atevye. (Mat. 24:48) Uwo mushumba mubi ari mu bagize umugwi w’abantu bavugwa muri 2 Petero 3:3, 4. Petero yanditse ati: “Mu misi ya nyuma hazoza abashinyaguzi,” bano “nk’uko ivyipfuzo vyabo bwite biri” bakaba batwengera mw’ijigo abagumiza hafi ku muzirikanyi umusi wa Yehova babigiranye ukugamburuka. Egome, aho kwibanda ku vyungura Ubwami, bene abo bashinyaguzi bibanda ku biberekeye ubwabo no ku vyipfuzo vyabo vy’ubwikunzi. Nimuze ntitwigere dutsimbataza ukwiyumvira nk’ukwo kurangwa n’ukugambarara kandi guteye akaga! Ahubwo nyabuna, ese “[twobona] ukwihangana kw’Umukama wacu nk’ubukiriro” mu kuguma dufise vyinshi dukora mu gikorwa co kwamamaza Ubwami no guhindura abantu abigishwa be no mu kudahagarikwa umutima birenze n’ugushaka kumenya igihe ibintu bizoberako, ivyo bikaba ari ivya Yehova Imana.​—2 Pet. 3:15; soma Ibikorwa 1:6, 7.

Niwizigire ya Mana y’ubukiriro

17. Abakirisu b’abizigirwa bavyifashemwo gute ku bijanye n’impanuro Yezu yatanze yo guhunga bakava i Yeruzalemu, kandi kubera iki?

¹⁷ Inyuma y’aho ingabo z’Abaroma zimariye gutera Yudaya mu 66 G.C., abakirisu b’abizigirwa baciye bakora bisunga impanuro Yezu yatanze yo guhunga igisagara ca Yeruzalemu bakironka akaryo ko kubigira. (Luka 21:20-23) Ni kubera iki baciye ubwo nyene bagira ico bakoze kandi ata gufyina? Nta gukeka ko bari baragumije hafi ku muzirikanyi ingabisho ya Yezu. Ni ivy’ukuri ko bari biteze yuko ingingo bafashe yotumye bashikirwa n’ingorane, nk’uko Yezu yari yarabagabishije. Mugabo kandi bari bazi ko Yehova atokwigeze aheba abasavyi biwe b’intahemuka.​—Zab. 55:22.

18. Amajambo ya Yezu dusanga muri Luka 21:25-28 agira ico akoze gute ku kuntu ubona ya makuba akomeye agiye kuza?

¹⁸ Na twebwe nyene dutegerezwa kwizigira Yehova tugaherezako, kuko ari we wenyene azotubera ubukiriro igihe iyi si izoba iriko irashikirwa n’amakuba akomeye kuruta ayandi yose yigeze kubaho muri kahise k’abantu kose. Mu gihe kinaka ya makuba akomeye amaze gutangura mugabo imbere y’uko Yehova ashitsa urubanza rwiwe ku bintu bigize iyi si bizoba bisigaye, abantu “bazorabikwa n’ubwoba be n’ukwitega ibintu [bigira bize] kw’isi.” Ariko rero, mu gihe abansi b’Imana bazoba bariko barajugumira kubera ubwoba, abasavyi ba Yehova b’intahemuka bobo ntibazoranduka umutima. Ahubwo nyabuna, bazohimbarwa kubera bazoba bazi yuko ukurokorwa kwabo kwegereje.​—Soma Luka 21:25-28.

19. Ni igiki tuzokwihweza mu kiganiro gikurikira?

¹⁹ Mbega kazoza gateye akamwemwe karindiriye abaguma bitandukanije n’isi be n’“ibintu” vyayo! Ariko rero, nk’uko ikiganiro gikurikira kibisigura, nimba twipfuza kuronka ubuzima, dutegerezwa gukora n’ibindi uretse gusa kwirinda ibibi. Turakeneye gutsimbataza kamere zihimbara Yehova tukongera tugakora ibikorwa yemera.​—2 Pet. 3:11.

[Akajambo k’epfo]

Woshobora kubisigura?

• Ni ibiki bigereranywa na . . .

‘amajuru n’isi’ vyo muri kino gihe?

“ibintu”?

‘amajuru mashasha n’isi nshasha’?

• Ni kubera iki twizigira Imana tugaherezako?

[Akajambo gasigura ifoto ku rup. 5]

Ushobora gute ‘kurinda umutima wawe’ ukongera ukaguma witandukanije n’isi?

[Akajambo gasigura ifoto ku rup. 6]

Twerekana gute ko “[tubona] ukwihangana kw’Umukama wacu nk’ubukiriro”?