Ni nde ashobora gukiza abariko baratakamba?

“Mana, uhe umwami uguca imanza kwawe . . . Kukw azokiza umukene ah’azotakambira.”​—ZAB. 72:1, 12.

1. Mu vyashikiye Dawidi, ni igiki twiga ku bijanye n’imbabazi z’Imana?

ESE ukuntu ayo majambo akora ku mutima, ayo biboneka ko yanditswe n’Umwami Dawidi wa Isirayeli ya kera! Imyaka n’iyindi imbere y’uko ayandika, yaricujije aho amariye kurenga ibigo na Batisheba. Ico gihe, Dawidi yatakambiye Imana ati: “Kubg’isinzi ry’imbabazi zawe usibanganye ibicumuro vyanje. . . . Icaha canje cama imbere yanje na ntaryo. . . . Rāba, nabumbanywe ukugabitanya, mu vyaha ni ho mama yamvyariye.” (Zab. 51:1-5) Yehova abigiranye imbabazi, ntiyirengagiza ukuba twararazwe igicumuro.

2. Zaburi ya 72 ishobora gute kudufasha?

² Yehova aratahura ukuntu ivyacu biteye agahinda. Ariko rero nk’uko vyari vyaravuzwe, Umwami yarobanuwe n’Imana “azokiza umukene ah’azotakambira, n’umugorwa atagira gitabara. Azogirira akagongwe uworoshe n’umukene, amagara y’abakene azoyakiza.” (Zab. 72:12, 13) None abantu bazoruhurirwa gute? Zaburi ya 72 irabitubwira. Iyo ndirimbo, iyatunganijwe ku bijanye n’ingoma y’umuhungu wa Dawidi ari we Salomo, irerekana imbere y’igihe ingene ubutware bw’Umwana w’Imana, ari we Yezu Kristu, buzokiza abantu amarushwa.

Akarorero k’ingene ubutegetsi bwa Kristu buzoba bumeze

3. Salomo yasavye iki, kandi Imana yamuhaye iki?

³ Dawidi uwari ageze mu zabukuru amaze gutegeka y’uko Salomo agirwa umwami, yaramuhaye ubuyobozi butomoye ubwo Salomo yakurikije adahemuka. (1 Abm. 1:32-35; 2:1-3) Mu nyuma, Yehova yarabonekeye Salomo mu ndoto maze amubwira ati: “Nsaba ico ugomba, ndakiguhe.” Salomo yasavye ikintu kimwe gusa ati: “Jewe umusavyi wawe, n’umpe umutima w’ubgenge, nshobore gucira abantu bawe imanza, mmenye gutandukanya ikibi n’iciza.” Ukwo gusaba guciye bugufi kwa Salomo kwatumye Imana imuha ico yari asavye be n’ibindi.​—1 Abm. 3:5, 9-13.

4. Ingoma ya Salomo yadondowe gute n’umutegetsi umwe wo mu gihe ciwe?

⁴ Kubera ko ingoma ya Salomo yari ihezagiwe na Yehova, yatumye haboneka ikiringo c’amahoro n’ugusagamba gihambaye kuruta ibindi vyose kitari bwigere kiboneka mu ntwaro n’imwe yo kw’isi. (1 Abm. 4:25) Mu baje kuraba ukuntu ubutegetsi bwa Salomo bwari bumeze harimwo na wa mwamikazi w’i Sheba, ari kumwe n’umugwi munini w’abantu bari bamugendaniye. Yabwiye Salomo ati: “Inkuru numvise ndi mu gihugu canje . . . zar’iz’ukuri. . . . Ivyo bāmbariye ntibishika n’agace k’ivyo mbonye; ubgenge bgawe n’ubutunzi bgawe bisumba uko navyumvise.” (1 Abm. 10:1, 6, 7) Yamara ubwenge buruta kure n’iyo ubwo, bwaragaragajwe na Yezu, uwashoboye kuvuga mu buryo bubereye yiyerekezako ati: “Ehe ikiruta Salomo kiri ng’aha.”​—Mat. 12:42.

Ukuruhurirwa mu gihe ca Salomo Mukuru

5. Zaburi ya 72 ihishura iki, kandi ni ibiki yerekana imbere y’igihe?

⁵ Nimuze dusuzume ibintu nyamukuru biri muri Zaburi ya 72 dufise intumbero yo kumenya ibijanye n’imihezagiro izobaho mu gihe c’ubutegetsi bwa Yezu Kristu, we Salomo Mukuru. (Soma Zaburi 72:1-4.) Iyo Zaburi irahishura ukuntu Yehova yiyumva ku vyerekeye “ubutware” bw’Umwana wiwe, wa “Mukama w’amahoro,” ari we Yezu Kristu. (Yes. 9:6, 7) Salomo Mukuru ayobowe n’Imana ‘azocira abagorwa iziroranye yongere akize abana b’abakene.’ Ubutegetsi bwiwe buzorangwa amahoro n’ubugororotsi. Igihe Yezu yari kw’isi, yarerekanye imbere y’igihe ivyo Ingoma yiwe y’imyaka igihumbi igiye kuza izokora.​—Ivyah. 20:4.

6. Yezu yakoze iki mu kwerekana imbere y’igihe imihezagiro izohaba igihe Ubwami buzoba butegeka?

⁶ Rimbura bimwebimwe mu bikorwa Yezu Kristu yakoze bituma tubona imbere y’igihe ivyo azokorera abantu mu gushitsa ibivugwa muri Zaburi ya 72. Turafise imvo zumvikana zo gukorwa ku mutima n’impuhwe yagaragarije abantu baba bariko baracumukura. (Mat. 9:35, 36; 15:29-31) Nk’akarorero, umuntu umwe yari yarasinzikajwe n’imibembe yaregereye Yezu maze aramwinginga ati: “Ubishatse gusa, urashobora kumpumanura.” Yezu yishuye ati: “Ndabishaka. Humanuka.” Kandi uwo muntu yarakize! (Mrk. 1:40-42) Mu nyuma, Yezu yarahuye n’umupfakazi yari yabuze umuhungu wiwe w’ikinege. Kubera yuko Yezu vyari ‘bimuteye ikigongwe,’ yavuze ati: “Haguruka!” maze uwo muhungu wiwe arahaguruka. Yarasubiye kuba muzima!​—Luka 7:11-15.

7, 8. Ni ibintu bimwebimwe ibihe vyerekanye ububasha bwo gukiza Yezu yari afise?

⁷ Yehova yarahaye Yezu ubushobozi bwo gukora ibitangaro. Ivyo vyerekanywe n’ivyashikiye “umugore yari amaze imyaka cumi n’ibiri ava amaraso.” Naho “yari yararuhijwe cane n’abaganga benshi, yarakoresheje n’utwiwe twose,” mu vy’ukuri vyarushiriza kwunyuka. Uwo mugore yarinjiye mw’isinzi hanyuma akora kuri Yezu, ukwo kukaba kwari ukurenga Itegeko ku bijanye n’umuntu yaba afise ‘urunyigimbe rwisuka rw’amaraso.’ (Lew. 15:19, 25, NW) Yezu yarumvise ko hari ububasha bumuvuyemwo aca rero abaza uwari amukozeko uwo ari we. Uwo mugore, “n’ubwoba n’akantu kandi ajugumira [yaciye] yikubita hasi imbere yiwe, amubwira ukuri kwose.” Yezu amaze gutahura yuko Yehova yari yakijije uwo mugore, yaramufatanye ubuntu, avuga ati: “Mukobwa, ukwizera kwawe kuragukijije. Genda amahoro, ukire indwara yawe isesereza.”​—Mrk. 5:25-27, 30, 33, 34.

⁸ Ububasha bwo gukiza Yezu yahawe n’Imana bwaratumye akiza abarwaye mugabo butegerezwa kandi kuba bwaragize ikintu gikomeye bukoze ku bamwitegereza. Nk’akarorero, nta gukeka ko benshi bakozwe ku mutima igihe babona Yezu ariko arakiza abantu imbere y’uko ashikiriza ya Nsiguro rurangiranwa yo ku Musozi. (Luka 6:17-19) Igihe Yohani Umubatizi yarungika intumwa zibiri kugira ngo zirondere icemeza yuko Yezu yari we Mesiya, zasanze ariko ‘arakiza indwara nyinshi n’ubumuga bubabaza be n’impwemu mbi yongera agirira ubutoni impumyi nyinshi zikabona.’ Yezu yaciye abwira abo babiri ati: “Mwiganire Yohani ivyo mwabonye kandi mwumvise: impumyi zirahumuka, abacumbagira baragenda, abanyamibembe barahumanurwa, n’ibipfamatwi birumva, abapfuye barazurwa, aboro barabwirwa inkuru nziza.” (Luka 7:19-22) Ese ukuntu ubwo butumwa butegerezwa kuba bwararemesheje Yohani!

9. Ibitangaro Yezu yakoze vyerekanye iki imbere y’igihe?

⁹ Ego ni ko, ukuruhurirwa ugucumukura Yezu yatanze mu gihe c’ubusuku bwiwe bwo kw’isi kwari ukw’igihe gito gusa. Abo yakijije canke yazuye mu nyuma barapfuye. Yamara, ibitangaro Yezu yakoze igihe yari kw’isi vyarerekanye imbere y’igihe ukuruhurirwa kwamaho abantu bazokwironkera mu gihe azoba ategeka ari Mesiya.

Iparadizo ikwiye kw’isi yose iri hafi!

10, 11. (a) Imihezagiro y’Ubwami izomara igihe kingana iki, kandi ubutegetsi bwa Yezu buzoba bumeze nk’iki? (b) Ni nde azoba ari kumwe na Kristu mw’Iparadizo, kandi azoshobora gute kubaho ibihe bidahera?

¹⁰ Nugerageze kwiha ishusho y’ukuntu ubuzima buzoba bumeze mw’Iparadizo kw’isi. (Soma Zaburi 72:5-9.) Abasavyi b’Imana yonyene y’ukuri bazoshobora kwinovora ubuzima mw’Iparadizo igihe cose izuba n’ukwezi bizoba biriho, egome, ibihe bidahera! Umwami Yezu Kristu azoba uwuruhura, ‘nk’imvura igwa ku vyatsi bitemwe, nk’imvura y’umuvuvu itosa isi.’

¹¹ Uko wiha ishusho y’ukuntu iyo Zaburi izoranguka, ntukorwa ku mutima none n’icizigiro co kubaho ibihe bidahera mw’iparadizo kw’isi? Nta gukeka ko ya nkozi y’ikibi yari imanitswe yanezerewe cane igihe Yezu yayibwira ati: “Uzoba uri kumwe nanje muri Paradizo.” (Luka 23:43) Mu gihe ca ya Ngoma ya Yezu y’imyaka igihumbi, uwo mugabo azosubira kuba muzima. Niyayobokera ubutegetsi bwa Kristu, azoshobora kuba kw’isi ibihe bidahera afise amagara atagira agahaze kandi ahimbawe.

12. Mu gihe c’Ubutegetsi bwa Kristu bw’imyaka igihumbi, ni akaryo akahe kazohabwa abatagororotse bazoba bazutse?

¹² Mu gihe c’ubutegetsi bwa Salomo Mukuru, ari we Yezu Kristu, “abagororotsi bazororanirwa,” ni ukuvuga ko bazosagamba. (Zab. 72:7) Ico gihe urukundo rwa Kristu be n’ubwitwararitsi bwiwe burangwa ikibabarwe bizoba ari vyinshi cane, nk’uko vyari igihe yari ng’aha kw’isi. Mw’isi nshasha Imana yasezeranye, mbere n’“abatagororotse” bazoba bazutse bazoronswa akaryo karangwa urukundo ko kwisunga ingingo mfatirwako za Yehova maze babeho. (Ibik. 24:15) Ariko ntiwumve, abazokwanka gukora bahuza n’ivyo Imana isaba ntibazokwemererwa kubandanya kubaho ngo bahungabanye amahoro n’ugutekana bizoba birangwa mw’isi nshasha.

13. Ubwami buzotegeka gushika hehe, kandi ni kubera iki amahoro buzozana atazokwigera ahungabanywa?

¹³ Ivy’uko ubutegetsi bwa Salomo Mukuru buzoshika kw’isi yose birerekanwa n’aya majambo agira ati: “Azoganza uhereye ku kiyaga ugashitsa ku kiyaga kindi, kand’uhereye kuri rwa Ruzi [Efurate], ugashitsa ku mpera y’isi. Ababa mu bugaragwa bazomwunamira, abansi biwe bazorigata umukungugu.” (Zab. 72:8, 9) Egome, Yezu Kristu azotegeka isi yose uko ingana. (Zek. 9:9, 10) Abazoba baha agaciro ubutegetsi bwiwe be n’imihezagiro buzozana “bazomwunamira” mu kumuyobokera babikunze. Ariko rero, abacumuzi batigaya bazorandurwa bafise “imyaka ijana,” tubivuze mu buryo bw’ikigereranyo. (Yes. 65:20) “Bazorigata umukungugu.”

Aratwitwararikana ikibabarwe

14, 15. Tumenya gute yuko Yezu atahura ukuntu abantu biyumva be n’uko “azokiza umukene ah’azotakambira”?

¹⁴ Abantu b’abacumuzi barateye agahinda kandi barakeneye cane gufashwa. Ariko turafise icizigiro. (Soma Zaburi 72:12-14.) Yezu, we Salomo Mukuru, aradufitiye ikibabarwe kubera yuko atahura ko turi abanyagasembwa. Vyongeye, Yezu yaracumukuye ku bw’ubugororotsi, kandi Imana yaramuretse ngo ahangane n’ibigeragezo we ubwiwe. Kukaba nkako, Yezu yaragize intuntu ikomeye ku buryo “icuya ciwe . . . gicika nk’amama y’amaraso atibagurikira hasi”! (Luka 22:44) Mu nyuma, igihe yari ku giti co gusinzikarizwako, yarasemereye ati: “Mana yanje, Mana yanje, kubera iki umpevye?” (Mat. 27:45, 46) Naho Yezu yashikiwe n’ivyo bintu vyose, kandi naho Shetani yakoze uko ashoboye kwose kugira ngo amukure kuri Yehova, yarerekanye ko ari umwizigirwa kuri Yehova Imana.

¹⁵ Turashobora kwemera tudakeka yuko Yezu abona umubabaro dufise be n’uko “azokiza umukene ah’azotakambira, n’umugorwa atagira gitabara.” Yezu abigiranye ubwitwararitsi burangwa urukundo nk’ubwa Se, ‘azokwumva umukene’ kandi ‘azokiza abafise imitima imenetse, apfuke inguma zabo.’ (Zab. 69:33; 147:3) Yezu arashobora “kubabarana natwe mu bugoyagoye bwacu,” kubera yuko “[y]agejejwe mu mice yose cokimwe natwe.” (Heb. 4:15) Ese ukuntu ari vyiza kumenya yuko Umwami Yezu Kristu ubu aganza mw’ijuru kandi ko ashashaye kuruhurira abantu bariko baracumukura!

16. Ni kubera iki Salomo yari ashoboye gutahura abo yatwara?

¹⁶ Kubera ko Salomo yari afise ubukerebutsi n’ugutahura gushika kure, nta gukeka ko ‘yagirira akagongwe uworoshe.’ Kanatsinda, ubuzima bwiwe bwaranzwe n’ibintu bibabaje kandi bitesha umutwe. Mwene wabo Amunoni yarafashe ku nguvu mushiki we Tamari, mwene wabo Abusalomu na we aricisha Amunoni kubera ico kibi yari yakoze. (2 Sam. 13:1, 14, 28, 29) Abusalomu yarigaruriye ingoma ya Dawidi, mugabo uwo mugambi wiwe wahavuye umutekurukana, kandi Yowabu yaramwishe. (2 Sam. 15:10, 14; 18:9, 14) Mu nyuma, mwene wabo na Salomo ari we Adoniya yaragerageje kwigarurira ingoma. Iyo abishikako, nta gukeka yuko Salomo yari guca yicwa. (1 Abm. 1:5) Ivy’uko Salomo yatahura imibabaro ishikira abantu bisa n’ibigaragara kubera ivyo yavuze mw’isengesho yatuye igihe urusengero rwa Yehova rwariko ruregurwa. Ku bijanye n’abo yatwara, uwo mwami yasenze ati: ‘Umuntu wese uko azoba yimenyeko indwara yiwe n’umubabaro wiwe, uze umuharire, ugenze umuntu wese nk’uko ameze.’​—2 Ngo. 6:29, 30.

17, 18. Ni umubabaro uwuhe bamwebamwe mu basavyi b’Imana babwirijwe kwihanganira, kandi ni igiki cabafashije kwihangana?

¹⁷ ‘Umubabaro wacu’ woshobora kuva ku ngaruka z’ibintu binaka vyigeze kudushikira mu buzima. Uwitwa Mary,a uno akaba ari Icabona ca Yehova ageze mu myaka 30, yandika ati: “Ndafise imvo yumvikana yo guhimbarwa, mugabo akenshi ibintu vyanshikiye muri kahise biratuma numva maramaye kandi niyanse. Ivyo bica bituma ngira umubabaro mwinshi, kandi nca numva nshatse kurira, nk’aho umengo ivyo bintu vyose vyaraye binshikiye. Ibintu nibuka vyanse kumva mu mutwe biracatuma numva cane ko ata co maze kandi nkiyagiriza.”

¹⁸ Benshi mu basavyi b’Imana barashobora kugira mwene izo nyiyumvo, ariko ni igiki cobafasha kuronka inkomezi zikenewe kugira ngo bihangane? Mary avuga ati: “Ubu abagenzi nyakuri be n’umuryango wo mu buryo bw’impwemu baratuma ngira agahimbare. Ndagerageza kandi kwibanda ku vyo Yehova asezerana ku bwa kazoza, kandi ndizigira ntakeka yuko akamo ntera nsaba gufashwa kazohinduka akamo k’umunezero.” (Zab. 126:5) Turakeneye kwizigira intunganyo Imana yashizeho mu gutanga Umwana wayo, we Mutegetsi yagenye. Ibi ni vyo vyari vyaravuzwe ku bimwerekeye: “Azogirira akagongwe uworoshe n’umukene, amagara y’abakene azoyakiza. Azobacungura, abakize agahahazo n’umuryano; kand’amaraso yabo azoba ay’igiciro mu nyonga ziwe.” (Zab. 72:13, 14) Ese ukuntu ivyo bidusubiriza umutima mu nda!

Isi nshasha izoba irimwo agahimbo iraturindiriye

19, 20. (a) Nk’uko vyerekanwa muri Zaburi ya 72, ni ingorane iyihe izotorerwa umuti n’ubutegetsi bw’Ubwami? (b) Ni nde ubwa mbere na mbere akwiye kwitirirwa ubutegetsi bwa Kristu, kandi wumva umerewe gute ku bijanye n’ivyo buzorangura?

¹⁹ Nugerageze kandi kwiha ishusho ya kazoza k’abantu bagororotse bazoba bari mw’isi nshasha y’Imana bategekwa na Salomo Mukuru. Dusezeranirwa duti: “Hazokwera impeke habe agahimbo mu gihugu no ku mpinga z’imisozi.” (Zab. 72:16) Kubera yuko impeke mu bisanzwe zitarimwa ku mpinga z’imisozi, ayo majambo ashimika ku kuntu isi izoba yimbuka cane. Izokwimbuka nk’i “Lebanoni,” kano kakaba kari akarere kimbuka cane mu gihe c’ingoma ya Salomo. Iyumvire ntuze! Ibifungurwa ntibizosubira gukena, nta muntu azosubira gufungura nabi, nta wuzosubira kwicwa n’inzara! Ico gihe abantu bose bazokwinovora “amazimano n’inyama zinuze.”​—Yes. 25:6-8; 35:1, 2.

²⁰ None ni nde azokwitirirwa iyo mihezagiro yose? Ubwa mbere na mbere izokwitirirwa wa Mwami yamaho akaba n’Umutegetsi w’ibiriho vyose, ari we Yehova Imana. Nkako, ico gihe twese tuzosubiramwo tubigiranye umunezero amajambo asozera uru ruririmbo rwiza cane kandi rukora ku mutima agira ati: “Izina ryiwe [ni ukuvuga iry’Umwami Yezu Kristu] rizohorah’ibihe bidashira, izina ryiwe rizogira uruvyaro, izuba rikiriho: abantu bazokwisabira umugisha wo guhwana na we, amahanga yose azomwita uwuhiriwe. Uhoraho Imana, ni yo Mana y’Abisirayeli, ihimbazwe; ni yo yonyene ikora ibitangaza: izina ryayo ry’icubahiro rihimbazwe ibihe bidashira; kand’isi yose yuzure icubahiro cayo; Amen, kandi Amen.”​—Zab. 72:17-19.

[Akajambo k’epfo]

Wokwishura gute?

• Mu buryo bw’ubuhanuzi, Zaburi ya 72 yerekanye imbere y’igihe iki?

• Salomo Mukuru ni nde, kandi ubutegetsi bwiwe buzoganza gushika hehe?

• Ni igiki wewe ubwawe ubona ko gikwegera ku bijanye n’imihezagiro yari yaravuzwe muri Zaburi ya 72?

[Akajambo gasigura ifoto ku rup. 29]

Ugusagamba kwabayeho mu gihe c’ingoma ya Salomo kwagereranya iki?

[Akajambo gasigura ifoto ku rup. 32]

Birabereye ko dukora uko dushoboye kwose kugira ngo tuzobeho mw’Iparadizo izoba itegekwa na Salomo Mukuru