Nufashe abakiri bato kumenya ishirahamwe rya Yehova

USANGA abana bashaka kumenya ibintu. Niwiyumvire ibibazo abana b’Abisirayeli bari mu Misiri bashobora kuba baragize mw’ijoro rya Pasika ya mbere. Bashobora kuba baribajije bati: ‘Ni kubera iki vyabaye ngombwa ko bica umwagazi w’intama?’ ‘Ni kubera iki dawe ariko arashira amaraso ku gishimaryango?’ ‘Turiko tuja he?’ Kuba Yehova yarashimye ivyo bibazo bigaragarira mu vyo yari yarategetse ba sebibondo b’Abisirayeli. Yehova yababwiye ku bijanye na Pasika bogiye barahimbaza mu nyuma ati: “Abahungu banyu nibababwira bati: ‘Iki gikorwa gisobanura iki kuri mwebwe?’, muze mubabwire rero muti: ‘Ni ikimazi ca pasika ca Yehova, uwarenganye hejuru y’amazu ya bene Isirayeli mu Misiri, igihe yateza ivyago Abanyamisiri mugabo akarokora amazu yacu.’” (Kuv. 12:24-27) Mu nyuma, Yehova yaribukije abavyeyi bo muri Isirayeli ibijanye n’akamaro ko kwishura ibibazo abana babo bobabajije ku vyerekeye “ingingo nyobozi n’ingingo z’ubutungane” Yehova yari yarategetse.​—Gus. 6:20-25.

Biragaragara ko Yehova yashaka yuko abana baronka inyishu zimara akanyota ku bibazo babaza bijanye n’ugusenga kw’ukuri, ni ukuvuga inyishu zobavyuriye umutima wo gukunda Yehova nka we Mana yabo akaba n’Umurokozi wabo. Muri iki gihe, ivyo nyene ni vyo Yehova yipfuriza abakiri bato bacu. Uburyo bumwe abavyeyi bashobora kwinjiza mu bana babo ugukunda Yehova n’abasavyi biwe bimwe bivuye ku mutima ni mu kubafasha kumenya ishirahamwe rya Yehova no gutahura ukuntu bungukira ku ndinganizo rishiraho. Nimuze rero twihweze uburyo bumwebumwe abakiri bato boshobora gufashwa kwiga ibintu vyinshi vyerekeye ishirahamwe ry’Imana.

Ishengero murimwo

Abakiri bato barakeneye kumenya ishengero umuryango wanyu urimwo. Kugira ngo barimenye, mwebwe abavyeyi mukwiye gutwara abana banyu ku makoraniro yose ya gikirisu. Muri ubwo buryo, muba mukurikije akarorero Yehova yahaye Abisirayeli, abategetswe bati: “Koranya abantu, abagabo n’abagore n’abana batoyi . . . , kugira bumvirize no kugira bige, kuko bategerezwa gutinya Yehova Imana yanyu kandi bakitwararika gushitsa amajambo yose y’iri tegeko. Kandi abana babo ata co bamenye baze bumvirize, bige gutinya Yehova Imana yanyu.”​—Gus. 31:12, 13.

Guhera mu buhinja, abana barashobora gutangura kwiga ivyerekeye Ijambo rya Yehova. Intumwa Paulo yavuze ku vyerekeye Timoteyo ati: “Guhera mu buhinja wamenye ivyanditswe vyeranda.” (2 Tim. 3:15) Mu makoraniro abera mu Ngoro y’Ubwami, mbere n’abana batoyi cane baratangura gutahura amakuru aba ariko arashikirizwa no kumenya indirimbo z’Ubwami. Igihe bari ng’aho, bariga gukoresha Bibiliya be n’ibitabu bishingiye kuri yo bakongera bakiga ukuntu bobifata mu buryo buranga icubahiro. Vyongeye, bari ku makoraniro yacu bazokwibonera yuko harangwa kamere iranga abayoboke ba Kristu b’ukuri, iyo na yo ikaba ari urukundo nyakuri. Yezu yavuze ati: “Ndabahaye ibwirizwa rishasha: mukundane. Nk’uko nabakunze, abe ari ko namwe mukundana. Iki ni co bose bazomenyerako yuko muri abigishwa banje: nimwagiriranira urukundo hagati yanyu.” (Yoh. 13:34, 35) Urukundo rurangwa igishika be n’ugutekanirwa nyakuri birangwa mu Ngoro y’Ubwami, bizokwegera abana vyongere bibafashe gutuma ukwitaba amakoraniro ya gikirisu biba ikintu bama bagira mu buzima bwabo.

Niwagira akamenyero ko gushika hakiri kare ku Ngoro y’Ubwami no kuhaguma akanya gatoyi amakoraniro arangiye, abana bawe bazoronka akaryo ko kugiranira ubugenzi n’abandi. Aho kubareka ngo bifatanye gusa n’abandi bana, ubona gute ubamenyekanishije ku bavukanyi na bashiki bacu b’imyaka yose? Abana bawe nibamenyana n’abantu bakuze bazokwibonera yuko hari ibintu vyinshi vyiza cane biboneye mu buzima be n’uko bafise ubukerebutsi. Nka kurya nyene Zekariya wo mu bihe vya kera, “uwigisha ugutinya Imana y’ukuri,” yagize akosho keza ku wari akiri muto Uziya, umwami w’Ubuyuda, ni ko n’abamaze imyaka myinshi bakorera Yehova badahemuka muri iki gihe bagira akosho keza ku bakiri bato. (2 Ngo. 26:1, 4, 5) Igihe muri mu Ngoro y’Ubwami, urashobora kandi gusigurira abana bawe ico ububiko bw’ibitabu bukora, ico ikibaho c’amatangazo kimaze be n’ibindi bintu.

Ishirahamwe rikwiye kw’isi yose

Abana barakeneye gutahura yuko ishengero murimwo ari rimwe mu mashengero arenga 100.000 agize ishirahamwe rya Yehova rikwiye kw’isi yose. Nubasigurire ibigize iryo shirahamwe, ukuntu rikora be n’uruhara abana bafise mu gushigikira igikorwa caryo. Nubereke igituma witegana igishika amateraniro y’umuzunguruko, amahwaniro y’intara be n’igihe co kugenderwa n’umucungezi w’umuzunguruko.​—Raba uruzitiro ruvuga ngo “Ibiganiro mwokwihweza mu gihe c’Ugusenga kwo mu muryango,” ruri ku rupapuro rwa 28.

Uko uronse akaryo, nutumire i muhira iwawe abacungezi b’ingenzi, abamisiyonari, abagize umuryango wa Beteli be n’abandi basuku b’igihe cose kugira ngo musangire akajumbu. Ntiwibaze yuko ata mwanya bafitiye abakiri bato. Abo basuku b’igihe cose barihatira kwigana Yezu, uwama aha ikaze abana akongera akabayagisha. (Mrk. 10:13-16) Abana bawe bumvise bene abo basavyi ba Yehova bariko barigana ivyo biboneye bakongera bakabona umunezero bakura mu murimo mweranda, na bo nyene boshobora kwishingira umugambi wo kuzokora ubusuku bw’igihe cose.

Ni ibindi bintu ibihe mushobora gukora uko mugize umuryango kugira ngo mufashe abana banyu kurushiriza kumenya ishirahamwe rya Yehova? Ng’ibi ivyiyumviro bimwebimwe: Uko mugize umuryango nimwishingire umugambi wo kurimbura igitabu Les Témoins de Jéhovah : Prédicateurs du Royaume de Dieu. Nushimike ku kuntu abasavyi ba Yehova bagaragaje ukwihebera Imana, ukwicisha bugufi n’ukudahemuka. Nubereke ukuntu Yehova yakoresheje abo basavyi biwe mu gukwiragiza inkuru nziza hirya no h’ino kw’isi. Nukoreshe amavidewo yateguwe n’ishirahamwe rya Yehova kugira ngo wigishe abana bawe ivyigwa bihambaye dukura mu bintu vyabaye kera be n’ibiba muri iki gihe. Nimba mubishoboye, nimugendere ibiro vy’ishami na Beteli vyo mu gihugu iwanyu canke kumbure ivyo mu bindi bihugu. Ukwo kugendera izo nyubakwa bizofasha abana bawe gutahura ukuntu igice c’ishirahamwe rya Yehova co kw’isi, kino kikaba kiyoborwa n’umugwi wa wa mushumba wo kwizigirwa kandi w’ubwenge, gitunganijwe kugira ngo uwo mugwi uronse ibifungurwa vyo mu buryo bw’impwemu be n’ubuyobozi abavukanyi bo kw’isi yose, nk’uko nyene wabigira mu kinjana ca mbere G.C.​—Mat. 24:45-47; Ivyak. 15:22-31.

Nuhuze ayo makuru n’uko ivy’umwana wese vyifashe

Igihe uriko urigisha abana bawe, urama wibuka ukuntu Yezu yigisha intumwa ziwe. Yarigeze kubabwira ati: “Ndacafise ibintu vyinshi vyo kubabwira, mugabo ntimushobora kuvyihanganira ubu.” (Yoh. 16:12) Yezu ntiyigisha abigishwa biwe ibintu birenze urugero. Ahubwo, yaza arabigisha buhorobuhoro ukuri guhambaye ku buryo bashobora kugutegera neza. Muri ubwo buryo nyene, ntubwire abana bawe ibintu birenze urugero. Niwaza urababwira ibintu bikebike vyerekeye ishirahamwe mugabo ukabigira udahorereza, uzotuma barushiriza gushimishwa wongere utume baryoherwa no kwiga ivyerekeye ishengero rya gikirisu. Uko ivyo abana bawe bakenera bihinduka, urashobora kubasubiriramwo ivyo baba baramaze kwiga maze ukarushiriza kubitomora.

Ishengero rya gikirisu ni isoko rihambaye dukuramwo inkomezi zo mu buryo bw’impwemu, kandi abakiri bato bagira uruhara n’umwete mu bikorwa vyaryo bararonka ibikenewe vyose kugira ngo bananire akosho k’isi ya Shetani. (Rom. 12:2) Turizigiye yuko uzohimbarwa cane no gufasha abana bawe kumenya ishirahamwe rya Yehova. Babifashijwemwo na we, ese boguma bifatanije n’iryo shirahamwe badahemuka bakongera bakifatanya badahemuka n’iyo Mana y’urukundo dusukurira.

[Uruzitiro/Ifoto ku rup. 28]

Ibiganiro mwokwihweza mu gihe c’Ugusenga kwo mu muryango

Ng’ibi ibiganiro bimwebimwe vyerekeye ishirahamwe rya Yehova mwoshobora kwihweza mu gihe c’umugoroba mwageneye Ugusenga kwo mu muryango.

▪ Nimwihweze kahise k’ishengero murimwo. Ryatanguye ryari kandi gute? Iryo shengero ryanyu ryakoresheje Ingoro z’Ubwami zitandukanye izihe? Ku bijanye n’ico kiganiro, ubona gute utumiye i muhira iwanyu umuntu amaze igihe kirekire muri iryo shengero kugira ngo yishure ibibazo abana bawe bobaza?

▪ Nusigure intumbero y’amakoraniro y’ishengero atandukanye be n’intumbero y’imitororokano mininiminini be n’ukuntu abana bashobora kuvyungukirako.

▪ Nimwihweze intumbero y’amashure atandukanye yashizweho n’ishirahamwe rya Yehova. Nubabwire ivyabonywe vyerekana ibintu vyiza abaciye muri ayo mashure bariko barashikako.

▪ Nufashe abakiri bato kubona akamaro ko kuba abamamaji b’inkuru nziza badahorereza. Nubereke ingene bashobora kugira ico baterereye kuri raporo yo kw’isi yose isohorwa mu gitabu Annuaire des Témoins de Jéhovah.

▪ Nimwihweze imice itandukanye y’umurimo w’igihe cose abakiri bato bo mw’ishirahamwe rya Yehova bashobora kujamwo. Ikigabane ca 10 c’igitabu Twagizwe ishirahamwe ngo dukore ivyo Yehova agomba kirimwo amakuru yofasha.

▪ Nufashe abakiri bato gutahura igituma hariho uburyo bunaka bwo gukora ibintu bukurikizwa mw’ishengero. Nubasigurire igituma badakwiye gukora ibintu batisunga ishirahamwe rya Yehova, mbere no mu bintu bitobito. Nubereke ingene bashobora guterera agacumu k’ubumwe kugira ngo habe urutonde rwiza mw’ishengero mu gukurikiza ubuyobozi abakurambere batanga.

[Ifoto]

Abana bawe bazokwungukira ku kugiranira ubugenzi n’abasuku bamaze igihe kirekire

[Akajambo gasigura amafoto ku rup. 26]

Nk’uko vyari biri muri Isirayeli ya kera, muri iki gihe abavyeyi barihatira kwishura abana babo mu buryo bumara akanyota igihe bababajije ibibazo vyerekeye ishirahamwe rya Yehova