Yehova arumviriza ugutabaza kw’uwuciye bugufi

NK’UKO Salomo wa mwami w’inkerebutsi wa Isirayeli ya kera yabivuze, “ibihe be n’ibishika giturumbuka [bidushikako twese].” (Umus. 9:11) Icago canke ingorane itoroshe birashobora guhungabanya ubuzima bwacu bimwe bikaze. Nk’akarorero, urupfu rushitse giturumbuka rw’incuti yacu ya hafi rurashobora kudutuntuza bimwe bikomeye. Mu ndwi canke mu mezi bikurikira, twoshobora kurengerwa n’intuntu be n’ukwihebura. Umuntu arashobora guta umutwe cane ku buryo yumva umenga ntabereye kwegera Yehova mw’isengesho.

Mu bihe nk’ivyo, umuntu aba akeneye kuremeshwa, kwitwararikwa no gukundwa. Umwanditsi wa Zaburi ari we Dawidi, yaririmvye mu buryo busubiriza umuntu umutima mu nda, ati: “Yehova ashigikira abatemba bose, kandi ahagurutsa abunamye bose.” (Zab. 145:14) Bibiliya itubwira yuko “amaso [ya Yehova] anyuragira mw’isi yose kugira ngo yerekane inkomezi ziwe ku bw’abafise umutima ukwiye kuri we.” (2 Ngo. 16:9) Aba ‘kumwe n’uwajanjaguwe, w’impwemu iciye bugufi, ngo agarurire agatege impwemu y’abaciye bugufi, agarurire agatege umutima w’abajanjagurwa.’ (Yes. 57:15) Yehova ashigikira gute uwujanjaguwe, w’impwemu iciye bugufi kandi amuhumuriza gute?

“Ijambo rije ku gihe caryo”

Bumwe mu buryo Yehova akoresha mu gutanga imfashanyo ku gihe cayo, abicisha ku muryango w’abavukanyi. Abakirisu bahanurwa ‘kuyagisha abadendebukiwe n’ijwi ryirura.’ (1 Tes. 5:14) Amajambo arangwa ubwitwararitsi n’urukundo umuntu abwirwa n’abo basangiye ukwemera b’abanyempuhwe arashobora gutuma yumva atekanye mu gihe c’amarushwa n’umubabaro. Amajambo ahumuriza avuzwe mbere mu kiyago kigufi arashobora kugira ikintu kinini akoze mu kuremesha uwihebuye. Mwene ayo majambo yiyumviriwe neza yoshobora kuvugwa n’umuntu yigeze gushuha umutwe no kugira intuntu. Canke yoshobora kuba ari amajambo agaragaza ukubona kure avuzwe n’umugenzi yigeze gushikirwa n’ibintu nk’ivyo. Yehova akoresheje ubwo buryo ngirakamaro butandukanye, arashobora kuremesha uwuciye bugufi.

Rimbura ivyashikiye umukurambere umwe yari aherutse kwubaka urwiwe yitwa Alex, uno akaba yarabuze umukenyezi wiwe giturumbuka kubera ko yari arwaye indwara idakira. Umucungezi w’ingenzi umwe afise ikibabarwe yarabwiye Alex amajambo yo kumuhoza. Na we nyene yari yarabuze umukenyezi wiwe mugabo akaba yari yarasubiye kwubaka urwiwe. Uwo mucungezi w’ingenzi yaravuze ingene kuba afise umutima woroshe vyatumye yicwa n’intuntu. Yarumva amerewe neza igihe yaba ari kumwe n’abandi mu busuku no ku makoraniro y’ishengero. Ariko rero igihe yaba yinjiye mu cumba ciwe maze akugara umuryango, yarumva afise irungu cane. Alex avuga ati: “Ese ukuntu nahumurijwe no kumenya ko inyiyumvo nari mfise zari izisanzwe be n’uko n’abandi bari barigeze kuzigira.” Mu vy’ukuri, “ijambo rije ku gihe caryo” rirashobora kuba imfashanyo ihumuriza umuntu mu gihe c’amarushwa.​—Imig. 15:23.

Uwundi mukurambere, uno akaba yari azinanyi n’abantu batari bake bari barabuze abo bari bubakanye, yaravyuriwe umutima wo kubwira Alex amajambo aremesha. Abigiranye impuhwe, yarerekanye mu buryo buranga urukundo yuko Yehova azi ingene twiyumva be n’ivyo dukeneye. Uwo muvukanyi yavuze ati: “Mu mezi no mu myaka biri imbere niwakenera umugenzi, intunganyo dufise ubu iranga urukundo Yehova yadushiriyeho ni iyo gusubira kwubaka.” Ego ni ko, ababuze abo bari bubakanye maze mu nyuma bakipfuza gusubira kwubaka izabo si bose bishobokera. Mugabo Alex amaze kuzirikana kuri ayo majambo uwo muvukanyi yamubwiye, yavuze ati: “Kwibutswa yuko iyo ntunganyo yashizweho na Yehova biratuma utagira ivyiyumviro vyo kwiyagiriza yuko, usubiye kwubaka urwawe muri kazoza, woba uhemukiye uwo mwari mwubakanye canke ukaba urenze ku ndinganizo Yehova yashizeho yerekeye umubano w’ababiranye.”​—1 Kor. 7:8, 9, 39.

Umwanditsi wa Zaburi ari we Dawidi, na we nyene akaba yari yarashikiwe n’ibigeragezo vyinshi be n’ingorane nyinshi, yiyemereye ati: “Amaso ya Yehova ari ku bagororotsi, kandi amatwi yiwe ari ku gutabaza kwabo.” (Zab. 34:15) Nta gukeka ko Yehova ashobora kwishura ugutabaza kw’uwuciye bugufi ku gihe cakwo abicishije ku majambo aranga ukubona kure n’ugutahura avugwa n’abakirisu bagenziwe b’abanyempuhwe kandi bahumuye. Mwene iyo ntunganyo ni iy’agaciro kandi ni ngirakamaro.

Turafashwa biciye ku makoraniro ya gikirisu

Umuntu avunitse umutima arashobora gutwarwa bitagoranye n’ivyiyumviro bica intege bishobora gutuma yigungira ukwiwe. Ariko rero, mu Migani 18:1 hatugabisha hati: “Uwigungira ukwiwe arondera icipfuzo ciwe c’ubwikunzi; arwanya ubukerebutsi ngirakamaro bwose.” Alex yiyemereye ati: “Igihe ubuze uwo mwubakanye, uca utangura kugira ivyiyumviro vyinshi bica intege.” Aribuka yuko vyashika akibaza ati: “‘Ubwo sinari kuvyifatamwo ukundi? Ubwo sinari kurushiriza kuba umuntu yitwararika abandi kandi abatahura?’ Sinashaka kuba ndi jenyene. Sinashaka kubaho ntafise uwo twubakanye. Usanga bigoye cane ko ureka kwiyumvira gutyo kubera ko umusi udashobora kwijana utibutse ko uri wenyene.”

Umuntu afise umutima ujanjaguritse aba akeneye kwifatanya n’abagenzi beza kuruta ikindi gihe cose. Abo bagenzi baraboneka bitagoranye ku makoraniro y’ishengero. Igihe turi ahantu nk’aho, turakira ivyiyumviro vy’Imana vyiza kandi vyubaka.

Amakoraniro ya gikirisu aradufasha kubona mu buryo bubereye ukuntu ivyacu vyifashe. Uko twumviriza imirongo yo muri Bibiliya tukongera tukayizirikanako, tuguma twiyumvira vya bibazo bibiri bihambaye kuruta ibindi vyose, ni ukuvuga ukwemezwa kw’ubusegaba bwa Yehova be n’ukwezwa kw’izina ryiwe, aho kuguma gusa twiyumvira ingorane zacu bwite. Vyongeye, muri mwene ivyo bihe vyo kwigishwa mu buryo bw’impwemu, turakomezwa no kumenya yuko naho abandi baba batazi amarushwa turimwo canke badatahura ukuntu twiyumva, Yehova we aba abizi koko. Arazi yuko “bivuye ku mubabaro wo mu mutima haba umushaha ukubititse.” (Imig. 15:13) Imana y’ukuri iripfuza kudufasha, kandi ivyo biratuvyurira umutima wo kubandanya bikongera bikaduha inkomezi zo kubandanya.​—Zab. 27:14.

Igihe Umwami Dawidi yari mu mukazo ukomeye uturutse ku bansi biwe, yatakambiye Imana ati: “Umushaha wanje uradendebukiwe muri jewe; hagati muri jewe, umutima wanje uratimvye.” (Zab. 143:4) Akenshi ingorane umuntu aba arimwo ziratuma agoyagoya ku mubiri no mu mutima, zigatuma mbere umutima wiwe utimba. Twoshobora gushikirwa n’amarushwa bitumwe n’indwara canke bitumwe n’uko tumaze igihe kirekire dufise amagara mabi. Turashobora kwizigira tudakeka ko Yehova azodufasha kwihangana. (Zab. 41:1-3) Naho ata muntu n’umwe Imana ikiza ku gitangaro muri iki gihe, iraha uwuriko aramererwa nabi ubukerebutsi be n’umutima rugabo akeneye kugira ngo yihanganire ingorane arimwo. Uribuka yuko igihe Dawidi yari aremerewe n’ibigeragezo, yituye Yehova. Yaririmvye ati: “Nibutse imisi ya kera; nazirikanye igikorwa cawe cose; nagumye nitwararitse igikorwa c’amaboko yawe ndabikunze.”​—Zab. 143:5.

Kuba Yehova Imana yarandikishije mw’Ijambo ryiwe ayo majambo yahumetswe aserura inyiyumvo, birerekana yuko atahura ukuntu twiyumva. Amajambo nk’ayo ni icemeza c’uko yumviriza ugutakamba kwacu. Nitwemera gufashwa na Yehova, ‘we ubwiwe azodushigikira.’​—Zab. 55:22.

“Musenge ubudahengeshanya”

Muri Yakobo 4:8 havuga hati: “Mwiyegereze Imana, na yo izobiyegereza.” Uburyo bumwe bwo kwegera Imana ni ukuyitura isengesho. Intumwa Paulo aduhanura ‘gusenga ubudahengeshanya.’ (1 Tes. 5:17) Naho nyene vyotugora kuvuga ukuntu twiyumva koko, “impwemu ubwayo iratakamba ku bwacu mu miniho itavuzwe.” (Rom. 8:26, 27) Nta gukeka ko Yehova atahura ukuntu twiyumva.

Monika, uno akaba afitaniye na Yehova ubucuti somambike, avuga ati: “Biciye kw’isengesho, ku gusoma Bibiliya no ku kwiyigisha, nahavuye niyumvamwo ko Yehova ari umugenzi wanje somambike. Asigaye atari umugani kuri jewe ku buryo nibonera ukuntu yama amfasha mu buzima bwanje. Kumenya yuko antahura n’igihe nyene ntaba nshobora gusigura ukuntu niyumva, birampumuriza. Ndazi yuko ubuntu bwiwe be n’imihezagiro yiwe bitagira aho bigarukira.”

Uko bishoboka kwose rero, nimuze twemere amajambo aranga urukundo kandi yirura tubwirwa n’abakirisu bagenzi bacu, dushire mu ngiro impanuro ziranga umutima mwiza be n’ivyibutswa bikomeza ukwizera twumva igihe turi ku makoraniro ya gikirisu, twongere tubwire Yehova ibiri mu mutima wacu biciye kw’isengesho. Izo ntunganyo ziza hageze ni bwo buryo Yehova akoresha mu kutwereka yuko atwitwararika. Alex afatiye ku vyamushikiye avuga ati: “Nitwarangura uruhara rutwega rwo kubandanya kwitwararika ibintu vyose Yehova Imana aturonsa kugira ngo tugume dukomeye mu buryo bw’impwemu, tuzoronka ‘ububasha burengeye ubusanzwe’ buzodufasha kwihanganira ikigeragezo ico ari co cose codushikira.”​—2 Kor. 4:7.

[Uruzitiro/Ifoto ku rup. 18]

Icohumuriza uwuciye bugufi

Mu mazaburi harimwo amajambo menshi aserura inyiyumvo abantu bagira, ari kumwe n’amajambo aguma adukura amazinda yuko Yehova yumviriza koko ugutabaza kw’umuntu aciye bugufi yishwe n’intuntu. Rimbura imirongo ikurikira:

“Mu marushwa yanje, naguma nambaza Yehova, kandi Imana yanje naguma ndayitabaza. Nuko yumva ijwi ryanje iri mu rusengero rwayo, ugutabaza kwanje imbere yayo kuraheza gushika mu matwi yayo.”​—Zab. 18:6.

“Yehova ari hafi y’ab’umutima umenetse; kandi abajanjaguritse mu mutima arabakiza.”​—Zab. 34:18.

“[Yehova] akiza abavunitse umutima, agatubika ahantu habababaza.”​—Zab. 147:3.

[Ifoto ku rup. 17]

Ese ukuntu “ijambo rije ku gihe caryo” rishobora kuduhumuriza ku musi w’amarushwa!