Turaronka ububasha bwo gutsinda ikigeragezo ico ari co cose

“Muri vyose, ndonka inkomezi ndabikesheje umwe ampa ububasha.”​—FLP. 4:13.

1. Ni kubera iki abasavyi ba Yehova bashikirwa n’ingorane nyinshi zikomeye?

ABASAVYI ba Yehova bamye bashikirwa n’ingorane zitandukanye. Ibigeragezo bimwebimwe usanga biterwa n’udusembwa twacu bwite canke ugasanga biva kuri iyi si tubamwo. Ibindi bituruka ku nyankane iri hagati y’abakorera Imana n’abatayikorera. (Ita. 3:15) Kuva mu ntango y’ukubaho kw’abantu, Imana yarafashije abasavyi bayo b’abizigirwa gushikama mu ruhamo rushingiye kw’idini, kunanira akosho konona k’urunganwe, no kwihanganira izindi ngorane zikomeye z’ubwoko bwose. Impwemu nyeranda yayo irashobora kuduha ububasha kugira ngo tuvyifatemwo gutyo nyene.

Iradufasha gushikama mu ruhamo rushingiye kw’idini

2. Uruhamo rushingiye kw’idini ruba rufise intumbero iyihe, kandi rushobora kuza mu buryo butandukanye ubuhe?

² Uruhamo rushingiye kw’idini ni uguturubika abantu canke kubagirira nabi n’ibigirankana ubahora ukwizera kwabo canke ivyo bemera. Ruba rufise intumbero yo guhagarika ivyo bintu bemera, kubiburabuza ngo ntibikwiragire, canke gusenyura ugutungana kw’abavyemera. Uruhamo rurashobora kuza mu buryo butandukanye, bumwe ugasanga buribonekeza, ubundi na bwo ugasanga ntibwibonekeza. Bibiliya igereranya ibitero vya Shetani n’intambwe y’umukangara be n’imvuvyi.​—Soma Zaburi 91:13.

3. Ni ibiki biranga uruhamo rugereranywa n’ibitero vy’intambwe be n’ivy’imvuvyi?

³ Nka kurya kw’intambwe y’ikirara, Shetani akenshi yaragavye ibitero vy’imbonankubone biciye ku gukorera abasavyi ba Yehova ibintu biranga ubukazi, ku kubapfunga, canke biciye ku kubuza igikorwa cabo. (Zab. 94:20) Amaraporo yo mu gitabu c’umwaka (Annuaire) avuga ibikorwa vy’Ivyabona vya Yehova bo mu bihe vya none, arimwo inkuru zitari nke zerekeye ubwo buryo Shetani akoresha. Utugwi tw’inkozi z’ikibi, tumwetumwe tukaba twari tuyobowe n’abakuru b’amadini canke abantu bafise ishaka rirenze urugero mu vya politike, twaragiriye nabi abasavyi b’Imana mu mihingo myinshi. Ivyo bitero nk’ivy’intambwe vyaratumye abantu bakeyi batsitara. Nka kurya kw’imvuvyi, Shetani kandi aragaba igitero ku bantu ari ahantu hihishije kugira ngo yonone imizirikanyi yabo yongere abahende bakore ivyo agomba. Mwene ico gitero usanga gifise intumbero yo gutuma tugoyagoya canke twononekara mu buryo bw’impwemu. Mugabo tubifashijwemwo n’impwemu nyeranda y’Imana, turashobora gushikama muri ubwo bwoko bwompi bw’uruhamo.

4, 5. Uburyo bwiza kuruta ubundi bwo kwitegurira uruhamo ni ubuhe, kandi kubera iki? Tanga akarorero.

⁴ Kwiyumvira ibintu bitandukanye bijanye n’uruhamo rwoshobora gushika muri kazoza si bwo buryo bwiza kuruta ubundi bwo kurwitegurira. Kubera yuko tudashobora gusa kumenya uruhamo rwodushikira muri kazoza, kurazwa ishinga n’ibintu vyoshobora kutazokwigera bishika nta co vyotumarira. Ariko rero, hariho ikintu dushobora gukora. Benshi mu bashoboye kwihanganira uruhamo babifashijwemwo no kuzirikana ku karorero k’abantu b’abizigirwa bavugwa mu Vyanditswe bagumanye ugutungana kwabo, no kuzirikana ku nyigisho za Yezu be n’akarorero kiwe. Ivyo vyatumye bashobora gukomeza urukundo bakunda Yehova. Urwo rukundo na rwo rwarabafashije kunanira ibigeragezo ivyo ari vyo vyose vyaba bibashikiye.

⁵ Rimbura ivyashikiye bashiki bacu babiri bo muri Malawi. Mu kugerageza gutuma bagura amakarata y’umugambwe, akagwi kamwe k’inkozi z’ikibi karabakubitaguye, karabambura impuzu, kongera kabatera ubwoba yuko kabafata ku nguvu. Ako kagwi kababwiye kababesha yuko mbere n’abagize umuryango wa Beteli bari baguze amakarata y’umugambwe. None abo bashiki bacu bishuye gute? Bavuze bati: “Yehova Imana ni we gusa dukorera. Nimba rero abavukanyi bo ku biro vy’ishami baguze amakarata, ivyo nta co bitubwiye. Ntidushobora guhemuka, naho mwotwica!” Abo bashiki bacu bamaze gufata iyo mpagararo iranga umutima rugabo, baciye barekurwa.

6, 7. Yehova aha gute ububasha abasavyi biwe kugira ngo bihanganire uruhamo?

⁶ Intumwa Paulo yavuze yuko abakirisu b’i Tesalonike bari baremeye ubutumwa bwerekeye ukuri “mu makuba menshi,” ariko “[ba]ri n’akanyamuneza k’impwemu nyeranda.” (1 Tes. 1:6) Nkako, abakirisu benshi, aba kera n’abo muri iki gihe, bihanganiye uruhamo kandi bakarutsinda bavuga yuko igihe bari bashitse aho umwansi ashaka mu bigeragezo, bagize amahoro yo mu mutima, uwo ukaba ari umwe mu mice igize icamwa c’impwemu nyeranda y’Imana. (Gal. 5:22) Ayo mahoro na yo yaciye abafasha kurinda imitima yabo n’ububasha bwabo bwo kwiyumvira. Egome, Yehova arakoresha inguvu ziwe zikora akazi mu guha ububasha abasavyi biwe kugira ngo bihangane mu bigeragezo bongere bakorane ubukerebutsi igihe bashikiwe n’ingorane zikomeye.a

⁷ Abatwihweza baratangajwe n’umwiyemezo abasavyi b’Imana bafise wo kugumana ugutungana kwabo mbere n’igihe baba bari mu ruhamo rukaze. Ivyo Vyabona wamenga buzuye inkomezi zidasanzwe, kandi koko bari bazuzuye. Intumwa Petero adukura amazinda ati: “Nimba mutukwa muhorwa izina rya Kristu, murahiriwe, kubera ko impwemu y’ubuninahazwa, mbere impwemu y’Imana, iguma kuri mwebwe.” (1 Pet. 4:14) Kuba duhamwa duhorwa ko dushigikira ingingo mfatirwako zigororotse vyerekana yuko dushimwa n’Imana. (Mat. 5:10-12; Yoh. 15:20) Ese ukuntu ico kimenyamenya c’uko Yehova aduhezagira gituma tugira umunezero!

Iradufasha kunanira akosho k’urunganwe

8. (a) Ni igiki catumye Yosuwa na Kalebu bashobora kunanira akosho k’urunganwe? (b) Dushobora kwigira iki ku karorero ka Yosuwa na Kalebu?

⁸ Ubwoko bw’ukurwanywa burushirije kuba ubutibonekeza abakirisu bategerezwa kwihanganira ni akosho k’urunganwe. Ariko rero, kubera ko impwemu ya Yehova ifise ububasha kuruta kure n’iyo impwemu y’isi, turashobora kunanira abantu badutyekeza, abakwiragiza ibinyoma ku bitwerekeye, canke abagerageza kuduhata ngo tubeho twisunga ivyo bisunga. Nk’akarorero, ni igiki catumye Yosuwa na Kalebu bashobora kutavuga rumwe na ba batasi cumi bandi bari barungitswe mu gihugu c’i Kanani? Impwemu nyeranda yaratumye bagira “agatima” gatandukanye n’akabo.​—Soma Guharura 13:30; 14:6-10, 24.

9. Ni kubera iki abakirisu bategerezwa kwemera kuba abatandukanye na benshi?

⁹ Muri ubwo buryo nyene, impwemu nyeranda yarahaye intumwa za Yezu ububasha kugira ngo bagamburukire Imana aho kugamburukira abo abantu benshi baha icubahiro mu kubona ko ari abigisha b’idini ry’ukuri. (Ivyak. 4:21, 31; 5:29, 32) Abantu benshi bahitamwo gushigikira ivyiyumviro vya benshi kugira ngo birinde guhazuka canke amatati. Abakirisu b’ukuri bobo akenshi usanga babwirizwa gushigikira ivyo bazi ko bigororotse. Naho ari ukwo, babifashijwemwo n’inkomezi bahabwa n’inguvu z’Imana zikora akazi, ntibatinya kuba abatandukanye n’abandi. (2 Tim. 1:7) Rimbura umuce umwe dukwiye kwirindamwo gutwarwa n’akosho k’urunganwe.

10. Ni ryari vyoshobora gushika abakirisu bamwebamwe bakibaza ico bakwiye gukora?

¹⁰ Igihe abakiri bato bamwebamwe bamenye yuko umugenzi wabo yakoze ikintu giteye kubiri n’Ivyanditswe baribaza ico bakwiye gukora. Boshobora kubona yuko kuronderera uwo mugenzi wabo imfashanyo yo mu buryo bw’impwemu kwoba ari ukumuhemukira; ku bw’ivyo, baranka kugira ico bavuze ku bijanye n’iyo ngorane. Uwakoze ikibi yoshobora mbere gushira umukazo ku bagenzi biwe ngo bamugumirize akabanga. Ariko ntiwumve, abakiri bato si bo gusa bagira iyo ngorane. Abantu bamwebamwe bakuze na bo nyene vyoshobora kubagora kwitura abakurambere b’ishengero igihe hari umugenzi wabo canke umwe mu bagize umuryango yakoze ikintu kibi. Mugabo none abakirisu b’ukuri bakwiye kuvyifatamwo gute igihe hari uwubashizeko umukazo muri ubwo buryo?

11, 12. Ni ikintu ciza kuruta ibindi ikihe wokora mu gihe umwe mu bagize ishengero aguhimirije ngo ntuhishure ikibi yakoze, kandi kubera iki?

¹¹ Iyumvire iki kintu. Dufate yuko umuvukanyi akiri muto yitwa Alegisi amenye yuko umugenzi wiwe wo mw’ishengero yitwa Sitefano afise akamenyero ko kuraba amashusho yerekana ubushegabo. Alegisi abwiye Sitefano yuko arajwe ishinga cane n’ivyo akora. Ariko rero, Sitefano arirengagije ivyo amubwiye. Alegisi agize ngo aramuhimirije kubwira abakurambere ibijanye n’ico kintu, Sitefano aciye yishura yuko nimba ari abagenzi vy’ukuri, Alegisi atari akwiye rero kumurega. None Alegisi yoba akwiye gutinya ko uwo mugenzi wiwe yohava amuheba? Yoshobora kwibaza nimba abakurambere bazokwemera ivyo yababwiye bishitse Sitefano akabihakana vyose. Ariko rero, ibintu ntivyomera neza mu gihe Alegisi yokwinumira. Ahubwo vyoshobora gutuma Sitefano atakaza ubucuti afitaniye na Yehova. Vyoba vyiza Alegisi yibutse yuko “kujugumira imbere y’abantu [ari] vyo bitega umutego, mugabo [ko] uwizigira Yehova azokingirwa.” (Imig. 29:25) Ni ikindi kintu ikihe Alegisi ashobora gukora? Abigiranye urukundo yoshobora kwongera kwegera Sitefano maze akayaga na we ibijanye n’iyo ngorane ata kurya umunwa. Ivyo vyosaba ko agira umutima rugabo. Ariko rero, vyoshoboka yuko ico gihe hoho Sitefano yemera ako karyo ko kuyaga ku vyerekeye ingorane yiwe. Alegisi akwiye kwongera kuremesha Sitefano ngo abibwire abakurambere kandi akamubwira yuko aramutse atabigize mu kiringo kinaka, azoca abibibwirira.​—Lew. 5:1.

¹² Hamwe woba ubwirizwa gutorera umuti ikintu nk’ico, umugenzi wawe yoshobora mu ntango kudakenguruka utwigoro ugira two kumufasha. Mugabo mu nyuma yoshobora gutahura yuko uriko umuronderera ineza. Mu gihe uwo nyene gukora ikosa ahawe imfashanyo kandi akayemera, yoshobora rero kwama agukengurukira kubera wagize umutima rugabo ukongera ukaba intahemuka. Ariko rero, agumye agushavuriye kubera yuko wasavye abakurambere ngo bamufashe, umuntu nk’uwo yoba vy’ukuri ari we wipfuza ko akubera umugenzi? Guhimbara wa Mugenzi wacu ahambaye kuruta abandi bose ari we Yehova cama ari co kintu kibereye twokora. Mu gihe tumushize mu kibanza ca mbere, abandi bantu bamukunda bazotwubaha kubera yuko turi intahemuka maze batubere abagenzi nyakuri. Ntidukwiye kwigera duha ikibanza Shetani mw’ishengero rya gikirisu. Hamwe twobigira, twoba vy’ukuri dutuntuje impwemu nyeranda ya Yehova. Ariko rero, igihe twihatira gutuma ishengero rya gikirisu riguma rityoroye tuba turiko turakora duhuza n’iyo mpwemu.​—Ef. 4:27, 30.

Iraduha ububasha bwo kwihanganira ingorane izo ari zo zose

13. Ni ingorane izihe ziriko zirashikira abasavyi ba Yehova, kandi ni kubera iki mwene ivyo bintu vyiraye gutyo?

¹³ Ingorane zirashobora kuza mu buryo bwinshi: ivy’ubutunzi bihindutse, ugukurwa mu kazi, icago c’icaduka, ukubura uwawe, ugukikwa n’amagara, n’ibindi n’ibindi. Kubera yuko tubayeho mu “bihe bitoroshe,” dukwiye kwitega yuko bitebe bitebuke twese tuzobwirizwa gushikirwa n’ikigeragezo kinaka. (2 Tim. 3:1) Igihe ivyo bishitse, birahambaye ko tudata umutwe. Impwemu nyeranda irashobora kuduha ububasha bwo kwihanganira ingorane iyo ari yo yose.

14. Ni igiki cahaye Yobu ububasha bwo kwihanganira ingorane zamushikiye?

¹⁴ Yobu yarashikiwe n’ingorane zikurikirana. Yarabuze ivyo yari atunze, arabura abana, abagenzi, arakikwa n’amagara, umugore wiwe na we arareka kwizigira Yehova. (Yobu 1:13-19; 2:7-9) Yamara, Yobu yararonse umuntu amuhoza koko, uwo akaba ari Elihu. Ubutumwa Elihu yamushikirije be n’iciyumviro nyamukuru c’ubutumwa bwa Yehova ubwiwe, vyagira biti: “Hagarara uzirikane ibikorwa vy’agatangaza vy’Imana.” (Yobu 37:14) Ni igiki none cafashije Yobu kwihanganira ibigeragezo vyamushikiye? Kandi ni igiki codufasha kwihanganira ibigeragezo bidushikira? Ni ukwibuka no kuzirikana uburyo butandukanye impwemu nyeranda ya Yehova be n’ububasha bwiwe vyigaragazamwo. (Yobu 38:1-41; 42:1, 2) Dushobora kuba twibuka ibihe mu buzima bwacu aho twiboneye ikimenyamenya c’uko Imana itwitwararika twebwe ubwacu. Iracatwitwararika.

15. Ni igiki cakomeje intumwa Paulo kugira ngo yihanganire ibigeragezo?

¹⁵ Intumwa Paulo yarihanganiye ingorane nyinshi zari zibangamiye ubuzima bwiwe kugira ngo azigame ukwizera kwiwe. (2 Kor. 11:23-28) Ni igiki none camufashije kugumana uburimbane no kuguma atekanye mu mutima muri ivyo bintu bitoroshe? Yabifashijwemwo no kuba yarihetse kuri Yehova biciye kw’isengesho. Muri ico gihe c’ibigeragezo, igishobora kuba caramushikanye ku kwicwa rumaratiri, Paulo yanditse ati: “Umukama yahagaze hafi yanje anshiramwo ububasha, kugira ngo biciye kuri jewe igikorwa c’ukwamamaza kirangurwe bimwe bishitse kandi amahanga yose acumve; kandi nararokowe mu kanwa k’intambwe.” (2 Tim. 4:17) Ni co gituma Paulo afatiye ku vyamushikiye we ubwiwe yashoboye guhumuriza abo basangiye ukwemera yuko batari bakwiye “[kwiganyira] ku kintu na kimwe.”​—Soma Abafilipi 4:6, 7, 13.

16, 17. Tanga akarorero kerekana ingene Yehova ariko araha ububasha abasavyi biwe kugira ngo bihanganire ingorane zibashikira muri iki gihe.

¹⁶ Umutsimvyi umwe yitwa Roxana ni umwe mu biboneye ingene Yehova aronsa abasavyi biwe ivyo bakeneye. Igihe yasaba umukoresha wiwe imisi mikeyi y’ikonji kugira ngo yitabe rimwe mu mahwaniro yacu, uwo mukoresha yaciye amwishura ashavuye yuko aramutse agiye, yociye amwirukana mu kazi. Roxana yaciye agenda, arasenga abigiranye ubwira kugira ngo ashobore kuguma muri ako kazi. Inyuma y’ivyo, yaciye yumva atekanye. Erega uko uwo mukoresha yabivuze ni ko vyagenze; ku wa mbere iryo hwaniro ryaraye ribaye, yaramwirukanye. Roxana yarahagaritse umutima. Yari akeneye ako kazi kugira ngo kamufashe gutunga umuryango wiwe naho yahembwa intica ntikize. Yarongeye gusenga, maze arazirikana ku vy’uko Imana yari yamuronkeje ivyo akeneye mu vy’impwemu igihe yari kw’ihwaniro, ikaba rero yari no gushobora vy’ukuri kumuronsa ivyo akeneye mu vy’umubiri. Igihe Roxana yari atashe, yarabonye icandiko kiriko itangazo rivuga yuko hakenewe abakozi bazi gukoresha imashini zishona zo mw’ihinguriro, aca arasaba akazi. Umuyobozi w’iryo hinguriro yarabonye ko Roxana atazi gukoresha izo mashini mugabo nticabuza ko amuha akazi, akaba yari kuza arahembwa umushahara ungana n’uwo yahora aronka incuro nka zibiri. Roxana yarabonye ko amasengesho yiwe yari yishuwe. Ariko rero, umuhezagiro uhambaye kuruta iyindi yose yaronse ni uko yashoboye kubwira inkuru nziza abakozi batari bake bakorana. Batanu muri bo, harimwo na nya mukoresha, baremeye ukuri maze barabatizwa.

¹⁷ Vyoshobora gushika tukabona umenga amasengesho yacu ntiyishurwa, kumbure ntiyishurwe ubwo nyene canke mu buryo twari twiteze. Nimba ari ukwo biri, nta gukeka ko haba hari imvo yumvikana yabitumye. Yehova aba ayizi, mugabo twebwe twoshobora kuyitahura gusa muri kazoza. Ikintu kimwe twokwemera tudakeka, ni uko Imana idaheba abasavyi bayo b’abizigirwa.​—Heb. 6:10.

Iradufasha gutsinda ibigeragezo

18, 19. (a) Ni kubera iki twokwitega gushikirwa n’ibigeragezo? (b) Ushobora gute kwihanganira ibigeragezo?

¹⁸ Abasavyi ba Yehova ntibatangara igihe bashikiwe n’ibigeragezo, ugucika intege, uruhamo, be n’akosho k’urunganwe. Ico womenya coco, ni uko isi itwanka. (Yoh. 15:17-19) Yamara, impwemu nyeranda irashobora kudufasha gutsinda ingorane iyo ari yo yose yodushikira mu murimo turangurira Imana. Yehova ntazoreka ngo tugeragezwe ibirenze ivyo dushobora kwihanganira. (1 Kor. 10:13) Ntazogenda adutaye canke ngo aduhebe. (Heb. 13:5) Kugamburuka Ijambo ryiwe ryahumetswe biradukingira bikongera bikadukomeza. Vyongeye, impwemu y’Imana irashobora kuvyurira abo dusangiye ukwemera umutima wo kuturonsa imfashanyo dukeneye igihe tuba tuyikeneye cane.

¹⁹ Ese twese twobandanya kurondera impwemu nyeranda biciye kw’isengesho no ku kwiga Ivyanditswe! Ese twoshishikara ‘kugirwa abanyabubasha n’ububasha bwose ku rugero rw’ubushobozi bw’Imana buninahaye, ngo tubone kwihangana bimwe bishitse twongere twiyumanganye tunezerewe.’​—Kol. 1:11.

[Akajambo k’epfo]

Wokwishura gute?

• Ushobora gute kwitegurira gushikama mu ruhamo?

• Ukwiye gukora iki igihe hari uwuguhimirije ngo ntuhishure ikibi yakoze?

• Ushobora kwizigira iki igihe ushikiwe n’ingorane iyo ari yo yose?

[Ifoto ku rup. 28]

Dushobora kwigira iki kuri Yosuwa na Kalebu?

[Ifoto ku rup. 29]

Ushobora gute gufasha umugenzi akora ikintu kibi?