Amahwaniro y’intara aba mu ci mu Burusiya aravamwo ivyiza

UKO umwaka utashe, Abarusiya bakunda ibidukikije barava mu mazu yabo ari mu bisagara bakaja mu gihugu hagati kumara ici mu tuzu bita dacha. Kuri bo kaba ari akaryo ko kuruhuka ubuzima bwo mu gisagara bwo kwama wiruka muri vyinshi. Mu myaka mikeyi iheze, abantu bo mu Burusiya barabonye Ivyabona vya Yehova batari bake bo muri ico gihugu batera baja mu gihugu hagati mu ci, ariko hakaba hari ku bw’impamvu itandukanye n’iyo.

Naho igikorwa cabo co kwamamaza usanga kiburabuzwa mu bisagara bimwebimwe, Ivyabona vya Yehova bo mu Burusiya barabandanya gukoranira hamwe ku mugaragaro ku bw’ugusenga, bisunze uburenganzira ibwirizwa shingiro ribaha bwo kugira umwidegemvyo mu vy’idini. Ariko rero, mu turere tumwetumwe, ukurwanywa be n’imikazo biva ku bategetsi babwiwe amakuru atari yo canke biva ku bakuru b’idini ry’aborotodogisi ryo mu Burusiya bo muri utwo turere, vyaratumye Ivyabona vya Yehova batoroherwa no kuronka ibibanza bibereye vyo kugiriramwo amahwaniro y’intara aba mu ci uko umwaka utashe. Ivyabona vya Yehova rero baratunganije amahwaniro abera mw’ishamba canke mu gahinga. Kuva mu 2007 gushika mu 2009, Ivyabona vya Yehova barakoraniye hamwe mu gahinga incuro nka 40 ku bw’ugusenga mu bibanza 25 vyo hirya no hino mu Burusiya.

Icabona ca Yehova umwe amaze imyaka myinshi yitaba amahwaniro mu Burusiya yibuka ibi: “Mu myaka iheze, igihe twaba twakose ibibuga vy’inkino canke izindi nyubakwa mu bisagara bininibinini, abantu benshi b’imitima nziraburyarya n’abategetsi bo muri utwo turere barashobora gutahura ubwabo ingene ishirahamwe ryacu rimeze bafatiye kw’isuku hamwe n’urutonde baba biboneye. Ubu ho tubwirizwa gukoranira mw’ishamba, mu gahinga ka nyaganande. Birababaje kubona abantu badashobora kwihweza iyo mitororokano myiza igitangaza iba yitabwe n’abantu bo mu mice itandukanye, b’amabara y’urukoba atandukanye kandi bo mu madini atandukanye.”

Naho iyo mitororokano usanga ari ibiringo biteye umunezero, Icabona ca Yehova umwe yiyemerera ati: “Birateye umunezero kubona ukwitanga n’ukudahemuka kw’Ivyabona vya Yehova bagenzi bacu usanga bagenda barahuza n’uko ibintu vyifashe. Mugabo tuvugishije ukuri, igihe abategetsi batumye bitugora kugira amahwaniro yacu, birashobora kuturuhisha ku mubiri kandi tukumva tutamerewe neza mu mutima. Biragabanya kandi umwidegemvyo wacu wo gusenga Imana mushoboravyose mu buryo buranga icubahiro.” None Ivyabona vya Yehova bo mu Burusiya bahanganye gute n’iyo ngorane?

Amahwaniro yabereye mu mashamba mu gihugu cose

Akenshi, iyo amasezerano yo gukota ikibanza kanaka afuswe ku munota wa nyuma, bica bituma abatunganya ihwaniro basigarana imisi mikeyi gusa yo gukota ikindi kibanza ku bw’abashitsi ibihumbi. Nk’akarorero, mu 2008, Ivyabona vya Yehova b’i Cheboksary, muri Repubulika ya Tchouvachie, babwirijwe kugirira ihwaniro ry’intara mu kibanza cagutse gikikujwe n’ibiti gihanamiye Uruzi Volga. Akazi bari bafise karengako. Mu bashitsi 1.930 bari bitezwe, 1.700 bategerezwa kurara muri ico kibanza. Bari bakeneye ibibanza vyo kwogeramwo n’ivyo gukarabiramwo birimwo amazi akanye n’ayashushe, bagakenera n’utuzu twa surwumwe be n’umuyagankuba. Vyongeye, abashitsi bose bategerezwa kuronswa ivyo bafungura.

Abavukanyi barashoboye kuvyifatamwo neza. Harabonetse ababaji, abakora ivy’umuyagankuba n’abakora ivy’amazi. Umugwi w’Ivyabona vya Yehova 350 baritanze kugira ngo bafashe, 14 muri bo bakaba bamaze imisi cumi baba muri ico kibanza. Barakoze imbaho, baraseha ubwatsi, barashinga amahema, barakora utuzu tw’ubwogero n’utwa surwumwe. Uwundi mugwi w’abavukanyi baragize ingendo nyinshi baja mu gisagara kugura ivya nkenerwa. Kubera ko ata kibanza cariho co kubikamwo ibifungurwa bikeneye kuguma bikanye, abavukanyi bafashe ingingo yo kugaburira abashitsi bose gatatu ku musi ibifungurwa bishushe vyatekewe muri ico kibanza nyene. Abajejwe ico kibanza baradufashije mu kurondera no mu kuriha abakozi bakeyi badufasha gutegurira abashitsi ibifungurwa. Abashitsi 500 barizaniye amahema, 150 barikoteshereza uburaro hafi y’ico kibanza, 15 na bo baryama ku bwatsi mu ruhongore ata kwidoga, maze abasigaye barara mu mahema abavukanyi bari bashinze.

Igihe abashitsi bashika, barabonye intebe nyinshi za purasitike zisa n’ubururu zipanze ku mirongo. Imbere hari ibibanza bibiri bibayabaye uwuvuga ahagararamwo bisharijwe n’amashurwe, kimwe ku bw’abavuga ikirusiya, ikindi ku bw’abavuga igicuvashi. Umwe wese yarahimbawe n’inyigisho z’ivy’Imana zatanzwe kandi yarakengurutse igikorwa gikomeye abitanze bakoze. Umwe muri bamwe bategura imfungurwa yikuguye ati: “Iyo ntaba navyiboneye n’amaso yanje bwite, sinokwigeze nemera ko hashobora kubaho ishirahamwe ritunganijwe neza kandi ryubahiriza urutonde nk’iryanyu!” Ingene iryo hwaniro ryari ritunganije, bamwebamwe babigereranije na wa Musi mukuru w’Insago wahimbazwa n’ihanga rya Isirayeli mu bihe vya Bibiliya.

Mu bindi bisagara, kenshi Ivyabona vya Yehova wasanga bafise umusi umwe gusa wo kurondera no gutegura ikindi kibanza ihwaniro ry’intara ryoberamwo. Ukwo ni ko vyagenze i Nizhniy Novgorod, aho abitanze bakora bakurakuranwa ijoro n’umurango, bategura ikibanza cari mw’itongo ry’umuntu. Bategerezwa gutema ibiti n’ibisaka, bagatema ivyatsi bakongera bakica inyondwe n’ibimonyo. Igihe abashitsi bashika ku wa gatanu mu gitondo, abitanze bari bamaze kuzana intebe za purasitike 2.000, ibikoresho vyo gukora utuzu twa surwumwe cumi tw’imfatakibanza, batunganije ahantu ho gukarabira hari amazi, bubatse ikibanza uwuvuga ahagararamwo, bashizeho n’imoteri itanga umuyagankuba be n’ivyuma vy’amajwi. Umuvukanyi umwe yavuze ati: “Ikintu cari gitangaje kurusha ibindi ni uko abavukanyi bari bakoze ijoro n’umurango batigeze babona ko bakoze ibidasanzwe. Ahubwo babandanije gukorera abandi mu kiringo c’ihwaniro bicishije bugufi. Baritanze vy’ukuri kugira ngo abavukanyi na bashiki babo boroherwe kandi banezererwe inyigisho z’ivy’Imana zariko ziratangwa.”

Uwundi muvukanyi yandika ati: “Harangwa vy’ukuri agatima ko gusenyera ku mugozi umwe. Naho bwari ubwa mbere abavukanyi batunganya ihwaniro ribera mu gahinga bakaba kandi bari bafise umwanya muto, baritwararitse akantu kose kugira ngo mu kiringo c’ihwaniro habe ibisamaza bike bishoboka. Inyuma y’ivyo bikorwa, uburuhe twarabaza. Wamengo Yehova yari yahaye amababa umwe wese muri twebwe!”

Impwemu y’Imana yarikorera akazi

Mu buryo butari buke, guhangana n’ingorane zijanye no kugira ayo mahwaniro vyatumye Ivyabona vya Yehova bo mu gace kaberamwo ihwaniro bakomeza ubucuti bafitaniye kandi vyarerekanye ukuntu impwemu y’Imana yikorera akazi. I Smolensk, vyinshi mu bibanza vy’uburaro abavukanyi bari bafashe baravyatswe buca ihwaniro riba. Umukurambere umwe avuga ati: “Igihe amabisi menshi yashika azanye abashitsi isaha indwi z’ijoro, nta hantu na hamwe ho kubaraza hariho. Naciye ntangura kurira kubera ko ata co nari nshoboye kubafasha. Narasenze Yehova ndamutakambira ngo atorere umuti iyo ngorane. Ese umunezero nagize kubona inyuma y’isaha imwe twari tumaze kuronka ahandi hantu abo bashitsi bose borara! Vyari bitangaje koko kandi vyarerekanye ko Yehova atosiga umugororotsi mu kangaratete!” Ku rindi hwaniro ryabereye mw’ishamba, abavukanyi barituye abantu bo mu kigwati co muri ako karere babasaba kubafasha kuronka aho boraza abashitsi, maze abantu bo muri ico kigwati baraha indaro babikunze abashitsi 2.000 mu mazu yabo mu gihe c’ihwaniro kubera ukuntu Ivyabona vya Yehova bazwi neza muri ako gace.

Icabona ca Yehova umwe avuga ati: “Kubona gusa ihwaniro ryarashoboye kuba vyarerekanye koko ingene bihambaye kwiheka kuri Yehova mu bihe vyose.” Ivyo vyaribonekeza canecane igihe abantu bataba batumiwe baba biyadukije bagatangura guhungabanya ihwaniro. I Novoshakhtinsk, abakuru b’idini ry’aborotodogisi ryo mu Burusiya be n’abayoboke babo batwiyamiriza baraje maze batangura kuririmbira indirimbo zabo mu vyuma vyabo biduza amajwi kugira ijwi ry’uwuriko arigisha kw’ihwaniro ntiryumvikane. Ariko rero, abapolisi barababujije guhungabanya ihwaniro. Igihe umugore umwe w’umworotodogisi yari muri abo batwiyamiriza yaraba kubera ubushuhe, abavukanyi baciye bamujana mu Rwego rwo gutabara abarwaye rwo kuri iryo hwaniro maze baramuvura. Uwo mugore yarumiwe.

Baratangajwe n’ivyo babonye

Kubera ko mu Burusiya usanga baguma bari maso ku bijanye n’ibitero vya ba gaterabwoba, kenshi iyo hari abantu benshi bahuriye hamwe bituma inyamiramabi be n’abandi bantu bahaba barondera kumenya ivyo ari vyo. Nk’akarorero, kw’ihwaniro ryabereye mw’ishamba i Volzhskiy haraje abaserukira igipolisi kijejwe kurwanya intagondwa. Umwe muri bo yaratakaje telefone yiwe ngendanwa mu kiringo c’iryo hwaniro, maze abavukanyi baramufasha kuyirondera baciye ku Rwego rujejwe ivyatakaye n’ivyatowe. Haheze akanya gatoyi, yarahamagawe kuri telefone n’uwumukurira, akaba yashaka kumenya nimba kuri iryo hwaniro hoba hariko haravugirwa ibiremesha ubukazi canke ivyiyumviro vy’intagondwa. Uwo mupolisi yishuye ati: “Vyose bigenda neza; hari abantu 5.000 kandi ntibahonyanga amategeko. Uti ivy’intagondwa? Emwe, ubaravye usigara urazirikana. Ibaze nawe: nataye telefone yanje, baca barayirondera barayinzanira!”

Umwe muri abo bapolisi yaratangajwe cane n’isuku ryari muri ico kibanza, aratangazwa kandi no kubona hari abana benshi ukuraho ariko hakaba ata n’agapapuro k’imbombo kaharangwa. Nyene ikibanza cabereyemwo irindi hwaniro yarabonanye n’abapolisi bari bagabishijwe ku vyerekeye umutororokano munini w’ivy’idini wariko uraba. Yaciye ajana liyetena w’abo bapolisi kw’ibaraza ry’igorofa ya kabiri y’inzu yarabana n’ico kibanza maze avuga ati: “Itegereze nawe abo bantu! Urambonera rurya rutonde!” Nyene ico kibanza yaratangajwe no kubona Ivyabona vya Yehova batigeze banywa inzoga canke itabi be n’ingene basize ikibanza barimwo gitunganije nk’aho umengo nta cahigeze, bakagenda mbere bajanye iyarara ryabo. Yikuguye ati: “Wamengo ni iparadizo!”

Ubumwe burigaragaza mu basavyi b’Imana

Inyuma y’ihwaniro rimwe ryabereye mw’ishamba, umukuru w’ikigwati cari hafi yavuze ati: “Narumvise ko muri abantu baciye bugufi, mugabo murakomeye koko. Mu gihe twebwe tuguma umwe wese ari ukwiwe, mweho mutuma abantu bunga ubumwe!” Kuva i Kaliningrad gushika i Kamchatka, abantu bo muri ico gihugu amahanga barabandanya gutangarira ubumwe burangwa mu basavyi b’Imana igihe baba bagize imitororokano mininiminini y’ivy’ugusenga. Naho ivyo baba bateguye bishobora guhinduka bukwi na bukwi kandi mu buryo batari biteze, hariho ikintu kidahinduka: baguma bubaha abategetsi be n’abandi bantu.

Naho vyogenda gute, Ivyabona vya Yehova bo mu Burusiya barabandanya gukoranira hamwe banezerewe kugira baronswe inyigisho z’ivy’Imana. Barasenga ‘ku vyerekeye abami n’abo bose bari mu kibanza co hejuru; kugira ngo [Ivyabona vya Yehova] babandanye kugira ubuzima butekanye kandi buri mu mahoro, bari n’ukwihebera Imana gukwiye kandi badafyina.’​—1 Timoteyo 2:2.

[Iciyumviro nyamukuru ku rup. 27]

Umwe mu Vyabona vya Yehova bitanze mu gufasha gutunganya ihwaniro ryabereye mu gahinga

[Iciyumviro nyamukuru ku rup. 29]

Ivyabona vya Yehova bo mu Burusiya barabandanya kugira ‘ubuzima butekanye kandi buri mu mahoro, bari n’ukwihebera Imana gukwiye’

[Amafoto ku rup. 28]

Abitanze barakoreye hamwe mu gusukura ikibanza imbere y’uko ihwaniro riba no mu gutegurira ibifungurwa abashitsi ibihumbi bari baje kw’ihwaniro

[Amafoto ku rup. 29]

Umwe wese yarahimbawe n’inyigisho z’ivy’Imana zatanzwe kandi yarakengurutse igikorwa gikomeye abitanze bakoze