“Ubuhimbare buri iruhande y’ukuryo kwawe ibihe bidahera”

Nk’uko vyavuzwe na Lois Didur

Ni kangahe mu buzima bwawe wavuze amajambo nk’aya ngo: ‘Iyo menya simpitemwo ukuraho’? Emwe, mu myaka 50 maze mu murimo w’igihe cose, simbona ikintu na kimwe kidahimbaye coba caranshikiye ngo ni uko nari iruhande y’ukuryo kwa Yehova. Reka ndabiganire igituma.

NAVUTSE mu 1939, nkurira mu karere ko mu gihugu hagati ka Saskatchewan muri Kanada, nkaba nakuranye na bene wacu bane na musazanje umwe. Kuba kw’iyororero-rimiro ryo mu kiyaya vyari bihimbaye. Umusi umwe, Ivyabona vya Yehova baragendeye dawe, maze ndababaza nimba Imana ifise izina. Baratweretse izina Yehova muri Zaburi 83:18. Ivyo vyatumye nipfuza kumenya vyinshi ku vyerekeye Imana n’Ijambo ryayo.

Muri iyo myaka, abana b’abarimyi baja mu mashure yo hagati mu gihugu yaba agizwe n’ikirasi kimwekimwe gushika bashikanye imyaka nka 13. Baja kw’ishure bari ku mafarasi canke bakagenda ibilometero vyinshi n’amaguru. Abigisha batungwa n’imiryango yo muri iyo ntara. Umwaka umwe, abavyeyi banje ni bo bari baramukiwe kuronsa uburaro umwigisha mushasha yitwa John Didur.

Uwo musore na we nyene yarashimishwa cane n’Ijambo ry’Imana, nkaba ntari ndabizi. Igihe kimwe nariko ndahayagiza abakomunisiti n’abasosiyalisiti, akaba ari bo dawe yashigikira ico gihe. John yishuranye ubwitonzi ati: “Nta muntu n’umwe afise uburenganzira bwo kuganza abandi bantu. Imana ni yo yonyene ifise ubwo burenganzira.” Ivyo vyatumye haba ibiyago vyinshi bishimishije.

Kubera ko John yari yavutse mu 1931, yari yarumvise amagume aterwa n’intambara. Igihe ya Ntambara yo muri Koreya yaduka mu 1950, yarabajije abakuru b’amadini batandukanye igituma baja mu ntambara. Bose bavuze ko abakirisu bemererwa gufata ibirwanisho. Mu nyuma, yarabajije Ivyabona vya Yehova ico kibazo nyene. Baramweretse impagararo ishingiye ku Vyanditswe abakirisu bo mu ntango bagize ku bijanye n’intambara. John yabatijwe mu 1955, nanje mbatizwa mu mwaka ukurikira. Twempi twari tuzi ko twipfuza gukoresha ubuzima bwacu n’inguvu zacu mu gusukurira Yehova. (Zab. 37:3, 4) Muri Mukakaro 1957, twe na John twarubakanye.

Igihe twaba turamutse twibuka umusi twagiriyeko ubugeni, akenshi twaba turi kw’ihwaniro. Twarahimbarwa no kuba turi kumwe n’abandi bantu ibihumbi bubaha umubano w’ababiranye. Ihwaniro mpuzamakungu rya mbere twitavye, ryabaye mu 1958. Twarafashe urugendo mu muduga turi batanu, tuva i Saskatchewan tuja mu gisagara ca New York. Twamaze indwi tugenda ku murango, mw’ijoro na ho tukarara mw’ihema. Iyumvire ukuntu twatangaye igihe umuvukanyi umwe twahuriye i Bethlehem muri Pennsylvania yaduha indaro iryo joro! Ubuntu yatugaragarije atari yabiteguye bwaratumye dushika mu gisagara ca New York dusukuye. Iryo hwaniro rinini cane ryaratumye twibonera umunezero udasanzwe wo gukorera Yehova! Nk’uko umwanditsi w’amazaburi yabivuze, “ubuhimbare buri iruhande y’ukuryo kwawe ibihe bidahera.”​—Zab. 16:11.

DUKORA UBUTSIMVYI

Mu 1959, hakaba hari haciye umwaka umwe, twakora ubutsimvyi tuba mu gakonteneri kari kw’isonga ry’umurambi wari haruguru y’ikiyaya i Saskatchewan. Uri kuri uwo murambi warashobora kubona uturere twagutse, tumwetumwe muri two tukaba twari icibare cacu.

Umusi umwe, twararonse ikete rishimishije ryari rivuye ku biro vy’ishami. Naciye nsohoka nihuta nja iyo John yariko arakorera imashini barimisha. Iryo kete ryadusaba kuba abatsimvyi badasanzwe i Red Lake muri Ontario. Kubera ko tutari tuzi iyo haherereye, twaciye dusokorora amakarata ndondabihugu kugira ngo tuharondere.

Ese ukuntu ako karere kari gatandukanye cane n’ibiyaya! Ico gihe twariboneye amashamba maninimanini n’udusagara twubatswe iruhande y’aho bacukura inzahabu. Igihe twariko turarondera aho tuba ku musi wa mbere, hari akigeme kumvise ivyo twariko turayaga n’umubanyi wabo. Kaciye kiruka i muhira kabibwira nyina, uno akaba yaraduhaye indaro n’umutima mwiza iryo joro. Igitanda cari mu cumba kitagira isima. Umusi ukurikira, twararonse ahantu ho kuba, ikaba yari inzu y’ivyumba bibiri itagiramwo amazi n’ibindi bikoresho, yarimwo gusa iziko risusurutsa mu nzu. Twaraguze ibintu bikeyi mu mangazini igurisha ibintu vyakoze kandi ntitwatevye kubumbwa n’ivyo dufise.

Warashobora kugenda ibilometero 209 utarabona ishengero. Abakozi benshi bakorera ha hantu bacukura inzahabu bari baje bava i Buraya, kandi baratubaza ko twobaronsa Bibiliya yo mu rurimi rwabo. Mu gihe gitoyi, twari tumaze kuronka abantu 30 biga Bibiliya neza. Mu mezi atandatu, harashinzwe ishengero ritoyi.

Umunega w’umugore umwe twigana Bibiliya yaraterefonye umupatiri wabo ngo aze maze ahanure uwo mukenyezi wiwe. Igihe twari kumwe n’uwo mupatiri, uno yavuze ko twari dukwiye kwigisha n’Ubutatu. Uwo mugore yarafashe Bibiliya yabo y’Abagatolika maze asaba nya mupatiri ngo atange ibimenyamenya bishigikira ibintu yariko aravuga. Uwo mupatiri yaciye araririza nya Bibiliya ku ruhande rw’imeza rwo hirya, avuga yuko bidakenewe ko hagira ikintu na kimwe atangira ikimenyamenya. Igihe yagenda, yavuze mu kinya Ukraine yuko bakwiye kuduterera hanze kandi ntibaze bigere basubira kutwemerera kwinjira. Ntiyari azi ko John yumva urwo rurimi!

Haciye igihe gitoyi, twaravuye i Red Lake kubera ko John yabwirizwa kumenyerezwa mu gikorwa co kugendera amashengero. Ariko rero haciye nk’umwaka umwe, igihe John yariko arashikiriza insiguro y’ibatisimu kw’ihwaniro ry’intara, uwo munega yari mu bari bagiye kubatizwa! Ca kintu caba kijanye na wa mupatiri cari caratumye atangura kwisuzumira Bibiliya.

TUGIRA VYINSHI DUKORA MU GIKORWA CO KUGENDERA AMASHENGERO

Mu gikorwa co kugendera amashengero, twarahimbarwa mu buryo budasanzwe no kuba mu miryango itandukanye. Twaragiraniye ubucuti somambike n’abaduha indaro, tugasangira akabisi n’agahiye. Twarigeze kuba mu cumba co hejuru kitagiramwo icuma gitanga ubushuhe mu rushana. Hakiri kare mu gitondo, twarumva mushiki wacu ageze mu zabukuru yinjira mu cumba cacu adakoma akatsi kugira ngo acane umuriro mu ziko ritoyi. Yaca agaruka azanye ibase n’amazi ashushe kugira ngo twitegurire uwo musi. Narigiye vyinshi kuri ukwo kuntu yakora ibintu yitonze kandi adakoma akatsi.

Igikorwa co kugendera amashengero caramfashije kurushiriza kwiyegereza Yehova. Mu muzunguruko umwe wo muri Alberta harimwo igisagara bacukuramwo ubutare mu buraruko bwa Kanada, ahaba umugore umwe dusangiye ukwemera. None ishirahamwe rya Yehova ryabona gute uwo mugore yaba ukwa wenyene? Uko haciye amezi atandatu, twarajayo n’indege tukamara indwi dukorana na we mu busuku twongera tugira amakoraniro, nka kurya nyene bigenda kw’ishengero rinini ryo mu gisagara. Ivyo vyaratwibutsa ukuntu Yehova yitwararikana ikibabarwe umwumwe wese mu bameze nk’intama.

Twaguma duhanahana amakuru n’abantu benshi baduha indaro. Ivyo biranyibutsa imwe mu ngabirano za mbere John yampaye, iyo na yo ikaba ari ikarato y’amabara yuzuyemwo impapuro zo kwandikako. Twararyoherwa rwose no kuguma duhanahana amakuru n’abagenzi biciye ku makete, dukoresha izo mpapuro. Ndacaha agaciro iyo karato yarimwo impapuro zo kwandikako.

Igihe twari mu muzunguruko umwe w’i Toronto, hari umuvukanyi wo kuri Beteli yo muri Kanada yaduterefonye atubaza nimba tworimbura ivyo kuza kuri Beteli. None yashaka inyishu ryari? Yavuze ati: “Bukeye, nimba bishoboka!” Emwe, yarayironse.

UMURIMO WO KURI BETELI

Igihe cose twaba duhinduriwe igikorwa twaribonera imice itandukanye y’ubuhimbare buva iruhande y’ukuboko kwa Yehova. Ivyo vyarabandanije igihe twimukira kuri Beteli mu 1977. Kwifatanya na bamwebamwe mu barobanuwe, uretse ko vyatumye tubona kamere zabo zitandukanye, vyaranatumye twibonera ukuntu bubaha cane Ijambo ry’Imana.

Urutonde rushasha rw’ibikorwa vyo kuri Beteli rwaradushimishije. Nk’akarorero, ico gihe impuzu zacu zabikwa mu kabati aho kubikwa mw’ivalisi, kandi twaguma mw’ishengero rimwe. Uretse ko nahimbarwa no gukora igikorwa nari narashinzwe, narahimbarwa kandi no gutembereza abavukanyi baba bagendeye Beteli. Narabasigurira igikorwa gikorerwa ng’aho, nkumviriza ico bavuga nkongera nkishura ibibazo vyabo.

Imyaka yaheze ningoga, maze mu 1997 John aratumirwa kwitaba Ishure ry’abagize komite y’ishami i Patterson muri New York. Inyuma y’aho, twarasabwe kurimbura ivyo kwimukira muri Ukraine. Twaremeshejwe kuvyiyumvira twitonze kandi tubijanisha n’isengesho. Kuri uwo mugoroba, twari tuzi ko inyishu twobahaye ari ego.

IRINDI HINDUKA: TUJA MURI UKRAINE

Twari twaritavye rya hwaniro mpuzamakungu rinini cane ryabera i St. Petersburg mu Burusiya mu 1992, mu nyuma twitaba iryabereye i Kiev muri Ukraine mu 1993. Ayo mahwaniro yari yaratumye dukunda abavukanyi bacu bo mu Buraya bwo mu buseruko. Twagiye kuba i Lviv muri Ukraine, mw’igorofa rya mbere ry’inzu ishaje. Amadirisha yari ahereranye n’ikigo carimwo ubusitani butoyi, isake nini itukura hamwe n’umugwi w’inkokokazi. Wamenga ni kw’iyororero-rimiro ry’i Saskatchewan. Twaba ng’aho turi cumi na babiri. Imisi yose mu gitondo twarajabuka igisagara turi mu muduga tukaja gukorera kuri Beteli.

None twabona gute ibijanye no kuba muri Ukraine? Kwicarana n’abantu benshi bari baraciye mu bigeragezo, igikorwa cabo kikabuzwa, bakongera bagapfungwa, vyari ibintu vyatuma twicisha bugufi. Naho bari barashikiwe n’ivyo bintu, bagumye bafise ukwizera gukomeye. Igihe twaba tubakeje, baca bavuga bati: “Twabifashijwemwo na Yehova.” Ntibigeze biyumvamwo ko bahebwe. N’ubu nyene, iyo ushimiye umuntu kubera ubuntu aba agaragaje, aca yishura ati: “Shimira Yehova,” akaba yemeye icese ko ari we Sôko ry’ivyiza vyose.

Muri Ukraine, abantu benshi baja ku makoraniro n’amaguru, bakaba rero bararonka umwanya wo kuyaga no kuremeshanya. Barashobora kumara isaha canke irenga bariko baragenda. Hari amashengero arenga 50 i Lviv, 21 muri yo akaba akoresha inyubakwa nini irimwo Ingoro z’Ubwami nyinshi. Imisi yose ku w’indwi, usanga bihimbaye cane kubona ukuntu abavukanyi baguma bisukira baje ku makoraniro.

Ntitwatevye kwumva twisanze turi kumwe n’abavukanyi bitonda kandi bashashaye kwitwararika abandi. Igihe mba ntatahuye ivyo bavuga, baranyihanganira cane. Ivyo akenshi bibonekera mu kuntu mu maso habo herekana ko bafise umutima mwiza.

Akarorero k’ukuntu abavukanyi bacu bizigirana vy’ukuri kashitse mu kiringo c’ihwaniro mpuzamakungu ryabereye i Kiev mu 2003. Twari duhejeje kumanuka tuja aho bategerera igariyamoshi kw’ibarabara ry’indarayi rica mu kuzimu, hano hakaba hari uruja n’uruza rw’abantu, igihe agakobwa kamwe kaza katugana maze kakavuga kitonze gati: “Nazimiye. Nabuze iyo nyokuru ari.” Ako gakobwa kari kabonye udukarata karanzi twacu maze karamenya ko turi Ivyabona. Ntikatinya na gato kandi ntikarize. Umukenyezi w’umucungezi w’umuzunguruko twari kumwe abigiranye ukwengenga yaratwaye ako gakobwa ku Rwego rujejwe ivyatakaye n’ivyatowe rwari ku kibuga c’inkino. Ako kigeme ntikatevye gusubira kubonana na inakuru wako. Narakozwe ku mutima cane n’ukwizigira kudasanzwe ako kigeme kari gafise, mbere no mw’isinzi ry’abantu.

Abavukanyi bavuye mu bihugu vyinshi baraje muri Ukraine muri Rusama 2001 mu birori vyo kwegurira Yehova inyubakwa zacu nshasha z’ibiro vy’ishami. Inyuma y’insiguro idasanzwe yashikiririjwe ku kibuga c’inkino ku w’indwi mu gitondo, abavukanyi barasidukanye n’iyonka baca mw’ibarabara kugira ngo batembere kuri iyo Beteli nshasha. Ico kintu niboneye sinzopfa ndacibagiye! Narakozwe ku mutima cane no kubona abo bavukanyi, bano bakaba bari batekanye kandi bakurikiza urutonde. Vyatumye ndushiriza gukenguruka ubuhimbare buva ku gukorera Imana.

HABA IHINDUKA RIKOMEYE

Ikibabaje, mu 2004 John bamutoye kanseri. Twaragiye muri Kanada kugira yivuze. Ikiringo ca mbere co gufata imiti caramereye nabi cane umubiri wiwe, akaba yamaze indwi nka zingahe ariko aravurwa mu buryo bukomeye. Igishimishije ni uko yagarukanye akenge. Naho yavuga bimugoye, mu maso hiwe hama herekana ko akengurukira abaza kumusuhuza bose.

Mugabo ntiyashoboye gukira, akaba yapfuye mu gatasi ko muri uwo mwaka. Nariyumvisemwo yuko mbuze igihimba kinini cane c’umubiri wanje. Twe na John twari twararyimaze mu gukorera Yehova turi kumwe. Nari gukora iki none? Nahisemwo gusubira muri Ukraine. Ndakenguruka cane urukundo rurangwa igishika ngaragarizwa n’umuryango wa Beteli be n’ishengero.

Ntitwigeze twicuza mu buzima amahitamwo twari twaragize. Twaragize ubuzima buhimbaye, turi kumwe n’abagenzi beza cane. Ndazi ko hakiriho vyinshi vyo kwiga ku bijanye n’ukumera neza kwa Yehova, kandi ndizigiye kubandanya umurimo wiwe ibihe vyose kubera ko naronse vy’ukuri ‘ubuhimbare iruhande y’ukuryo kwa Yehova.’

[Iciyumviro nyamukuru ku rup. 6]

“Ntitwigeze twicuza mu buzima amahitamwo twari twaragize”

[Ifoto ku rup. 3]

Igihe twubakana na John

[Ifoto ku rup. 4]

Igihe nari umutsimvyi adasanzwe i Red Lake muri Ontario

[Ifoto ku rup. 5]

Turi kumwe na John muri Ukraine mu 2002