Yezu yabayeho ahimbawe

YEZU yoba vy’ukuri yabayeho ahimbawe? Biboneka ko yakuriye mu muryango uciye bugufi, kandi ko mu buzima bwiwe ata bintu vyinshi vyo muri iyi si yari afise. Mbere ntiyagira n’“aho arambika umutwe.” (Luka 9:57, 58) Vyongeye, abansi biwe baramwanka, bakamwambika ibara, kandi baruhiye kumwica.

Ushobora kwiyumvira uti: ‘Umuntu nk’uyo sinovuga ko yari ahimbawe!’ Mugabo hariho n’ibindi bintu bitari bike vyoba vyiza turimbuye ku bijanye n’ubuzima bwa Yezu. Reka twihweze ibintu bine vyaranze ubuzima bwiwe.

1. MU BUZIMA BWIWE YARI AFISE INTUMBERO, IKABA YARI UGUKORA IVYO IMANA IGOMBA.

“Ibifungurwa vyanje ni ugukora ukugomba kw’uwandungitse.”—Yohani 4:34.

Yezu yama arondera gushitsa ivyo Se wiwe wo mw’ijuru Yehovaa agomba, haba mu vyo yavuga canke mu vyo yakora. Yezu yarahimbarwa cane no gukora ivyo Imana igomba. Mbere yabigereranije n’ibifungurwa, nk’uko ico canditswe kivyerekana. Rimbura ukuntu ibintu vyari vyifashe igihe yavuga ayo majambo.

Igihe Yezu yavuga ayo majambo hari nk’isaha zitandatu z’umutaga. (Yohani 4:6) Kubera ko igitondo cose yari yakimaze agendagenda mu karere k’imisozi ka Samariya, nta gukeka ko yari ashonje. Kukaba nkako, abigishwa biwe bari bamwinginze bati: “Rabi, fungura.” (Yohani 4:31) Inyishu yabahaye yerekana yuko yabona vy’ukuri ko gukorera Imana vyamugarurira agatege kandi bikamukomeza. Wumva none ivyo biterekana ko Yezu yabayeho ahimbawe?

2. YARAKUNDA CANE SE WIWE.

‘Ndakunda Data.’—Yohani 14:31.

Yezu yari afitaniye ubucuti somambike na Se wiwe wo mw’ijuru. Urukundo rukomeye yakunda Imana ni rwo rwatumye amenyekanisha izina ryayo, imigambi yayo na kamere zayo. Ivyo yavuga, ivyo yakora be n’ukuntu yigenza, vyarerekana neza ukuntu Se wiwe ameze, ku buryo turavye Yezu duca tubona ingene Se wiwe ameze. Ni co gituma igihe Filipo yasaba Yezu ati: “Twereke Data,” Yezu yaciye yishura ati: “Uwubonye jewe aba abonye na Data.”—Yohani 14:8, 9.

Yezu yarakunda cane Se ku buryo yamugamburukiye gushika ku rupfu. (Abafilipi 2:7, 8; 1 Yohani 5:3) Urwo rukundo rukomeye Yezu yakunda Imana rwatuma ahimbarwa mu buzima.

3. YARAKUNDA ABANTU.

“Nta wufise urukundo ruruta uru: ko umuntu yigura abagenzi biwe.”—Yohani 15:13.

Tuvugishije ukuri, kazoza ka twebwe abantu badatunganye si keza. Bibiliya isigura iti: “Igicumuro cinjiye mw’isi biciye ku muntu umwe [Adamu] urupfu na rwo [ruzanwa] n’igicumuro, gutyo urupfu [rukwira] ku bantu bose kuko bose bari baracumuye.” (Abaroma 5:12) Ntidushobora kwikiza ingaruka y’igicumuro, ari rwo rupfu.—Abaroma 6:23.

Ariko kubera ko Yehova adukunda, yaratoreye umuti ico kibazo c’umuryango w’abantu. Yaremeye ko Umwana wiwe atunganye kandi atagira igicumuro, ari we Yezu, ababazwa akongera akicwa kugira ngo atange incungu yari ikenewe kugira ngo umuryango w’abantu ukurwe mu buja bw’igicumuro n’urupfu. Yezu na we, kubera ko yakunda Se agakunda n’abantu, yaremeye aratanga ubuzima bwiwe butunganye ku neza yacu. (Abaroma 5:6-8) Urwo rukundo yari afise ruzira ubwikunzi, rwatuma abaho ahimbawe.b

4. YARI AZI KO SE AMUKUNDA AKONGERA AKAMUSHIMA.

“Uyu ni Umwana wanje, umukundwa, uwo nashimye.”—Matayo 3:17.

Yehova yavuze ayo majambo ari mw’ijuru igihe Yezu yabatizwa. Gutyo, Yehova yari aseruye icese ukuntu akunda uwo Mwana wiwe Yezu akongera akamushima. Ntibitangaje kubona Yezu yaravuze ashimitse ati: “Data a[ra]nkunda”! (Yohani 10:17) Kuba Yezu yari azi ko Se amukunda kandi akamushima, vyatuma agira umutima rugabo igihe yaba ariko ararwanywa canke atorwa amahinyu. Mbere naho yari azi ko azokwicwa, yaguma atekanye. (Yohani 10:18) Kuba Yezu yari azi ko Se amukunda kandi akamushima, nta gukeka ko vyatuma arushiriza kubaho ahimbawe.

Biragaragara yuko Yezu yabaho ahimbawe. Turashobora rero kumwigirako ibintu vyinshi ku bijanye n’ingene twobaho duhimbawe vy’ukuri. Mu kiganiro gikurikira, turaca irya n’ino zimwezimwe mu mpanuro zitomoye Yezu yahaye abayoboke biwe zijanye n’ukuntu bakwiye kubaho.