Duhe agaciro ukudahemuka n’ukubabarira kwa Yehova

1, 2. (a) Ni kubera iki duha agaciro abagenzi b’intahemuka kandi bababarira abandi? (b) Ni ibibazo ibihe duca irya n’ino?

WOSIGURA gute umugenzi nyakuri? Mushiki wacu umwe w’umukirisu yitwa Ashley avuga ati: “Kuri jewe, umugenzi nyakuri ni umuntu yama yiteguriye kugufasha kandi akubabarira igihe umukoshereje.” Twese turaha agaciro abagenzi b’intahemuka kandi bababarira abandi. Baratuma twumva ko dutekaniwe be n’uko dukundwa.—Imig. 17:17.

² Yehova ni we Mugenzi w’intahemuka kandi ababarirana kuruta abandi bose twoshobora kugira. Ameze nk’uko umwanditsi w’amazaburi yabivuze ati: “Wewe, ewe Yehova, uri mwiza kandi witeguriye kubabarira! Kandi ubuntu bwuzuye urukundo [ni ukuvuga “urukundo rudahemuka”] ugirira abakwambaza bose ni ikirenga.” (Zab. 86:5) Kuba intahemuka no kubabarira bisobanura iki? Yehova agaragaza gute izo kamere z’agahore? Kandi dushobora gute kwigana akarorero kiwe? Inyishu z’ivyo bibazo ziraza kudufasha kurushiriza gukunda Umugenzi wacu mwiza kuruta abandi bose Yehova. Ziraza kandi kudufasha gukomeza ubugenzi dufitaniye.—1 Yoh. 4:7, 8.

YEHOVA NI INTAHEMUKA

3. Kuba intahemuka bisobanura iki?

³ Ukudahemuka ni kamere irangwa urukundo irimwo ukwihebera umuntu canke ikintu, kuba umwizigirwa, gushigikira umuntu canke ikintu utanyiganyiga. Umuntu w’intahemuka si mahindagu. Ahubwo, arifatanya n’umuntu (canke n’ikintu) abigiranye urukundo, akumira kuri uwo muntu canke kuri ico kintu no mu bihe bigoye. Egome, Yehova ni agaheta mu kuba “Intahemuka.”—Ivyah. 16:5.

4, 5. (a) Yehova yerekana gute ukudahemuka? (b) Dushobora gute kuronka inkomezi mu kuzirikana ku bikorwa vy’Imana biranga ukudahemuka?

⁴ Yehova yerekana gute ukudahemuka? Ntiyigera aheba abasavyi biwe b’abizigirwa. Umwe muri abo basavyi, Umwami Dawidi, yariboneye ukudahemuka kwa Yehova. (Soma 2 Samweli 22:26.) Igihe Dawidi yari mu bigeragezo, Yehova abigiranye ukudahemuka yaramuyoboye, aramukingira yongera aramurokora. (2 Sam. 22:1) Dawidi yari azi ko ukudahemuka kwa Yehova kutagarukira mu majambo gusa. Ni kubera iki Yehova yakoranye ukudahemuka ku bijanye na Dawidi? Ni kubera ko Dawidi ubwiwe yari “intahemuka.” Yehova araha agaciro ukudahemuka kw’abasavyi biwe, kandi arakubishura mu kuba intahemuka kuri bo.—Imig. 2:6-8.

⁵ Turashobora kuronka inkomezi mu kuzirikana ku bikorwa vya Yehova biranga ukudahemuka. Umuvukanyi w’umwizigirwa yitwa Reed avuga ati: “Biramfasha vy’ukuri igihe nsomye ibijanye n’ukuntu Yehova yafashe Dawidi mu bihe vy’amagorwa. N’igihe nyene Dawidi yariko arahunga, aba mu masenga canke inyuma yayo, Yehova yaguma amushigikira. Ivyo birandemesha cane! Biranyibutsa ko naho ibintu vyoba vyifashe gute, naho vyoba bisa n’ivyifashe nabi gute, Yehova azohaseruka kugira amfashe magingo nguma ndi intahemuka kuri we.” Nta gukeka ko wiyumva gutyo nyene.—Rom. 8:38, 39.

6. Yehova yerekana ukudahemuka mu bundi buryo butandukanye ubuhe, kandi ivyo vyungura gute abasavyi biwe?

⁶ Yehova yerekana ukudahemuka mu bundi buryo butandukanye ubuhe? Ntiyigera adohoka ku ngingo mfatirwako ziwe. Adukura amazinda ati: “Gushika no mu busaza bwanyu, ndi wa wundi nyene.” (Yes. 46:4) Yama nantaryo afata ingingo zishingiye ku ngingo mfatirwako ziwe zidahindagurika zerekeye ikibi n’iciza. (Mal. 3:6) N’ikindi kandi, Yehova arerekana ukudahemuka mu gushitsa ivyo asezerana. (Yes. 55:11) Ukudahemuka kwa Yehova kuragirira akamaro rero abasavyi biwe b’intahemuka bose. Uti gute? Igihe dukoze uko dushoboye kwose kugira ngo dukurikize ingingo mfatirwako za Yehova, turashobora kwizigira ko azoshitsa umuhango yaduhaye wo kuduhezagira.—Yes. 48:17, 18.

TWIGANE UKUDAHEMUKA KWA YEHOVA

7. Ni uburyo bumwe ubuhe dushobora kwigana ukudahemuka kw’Imana?

⁷ Dushobora gute kwigana ukudahemuka kwa Yehova? Uburyo bumwe ni mu kugira ico dukoze ku bw’ineza y’abari mu ngorane. (Imig. 3:27) Nk’akarorero, woba uzi uwo musangiye ukwemera yacitse intege, kumbure bitumwe n’ingorane z’amagara, ukurwanywa n’umuryango canke bitumwe n’uko hari ivyo atashitseko? Ubona gute wibwirije kubwira uwo muntu “amajambo meza, amajambo ahumuriza”? (Zek. 1:13)a Ubigize, uba werekanye ko uri umugenzi w’intahemuka kandi nyakuri, umwe “amata ku muntu kuruta uwo bavukana.”—Imig. 18:24.

8. Dushobora gute kwigana ukudahemuka kwa Yehova, nk’akarorero mu mubano w’abubatse?

⁸ Turashobora kandi kwigana ukudahemuka kwa Yehova mu kudahemukira abo dukunda. Nk’akarorero, nimba twubatse, turazi ko dutegerezwa kuguma turi intahemuka ku wo twubakanye. (Imig. 5:15-18) Ni co gituma tudakora ikintu na kimwe coshobora kudushikana ku kurenga ibigo. (Mat. 5:28) Vyongeye, turerekana ukudahemuka ku bo dusangiye ukwemera mu kwamirira kure urusaku rwonona canke kwambika ibara abandi, tukirinda gukwiragiza urwo rusaku canke mbere kurwumviriza.—Imig. 12:18.

9, 10. (a) Twipfuza canecane kuguma turi intahemuka kuri nde? (b) Ni kubera iki bitazokwama bitworohera kugamburuka amabwirizwa ya Yehova?

⁹ N’ikiruta vyose, twipfuza kuguma turi intahemuka kuri Yehova. Ivyo tubigira gute? Mu kwihatira kubona ibintu nk’uko abibona, ni ukuvuga tugakunda ivyo akunda tukongera tukanka ivyo yanka, maze tukabaho tuvyisunga. (Soma Zaburi 97:10.) Uko turushiriza kwiyumvira no kwiyumva nka Yehova, ni ko tuzorushiriza kugira agatima ko kugamburuka amabwirizwa yiwe.—Zab. 119:104.

¹⁰ Ego ni ko, ntibizokwama bitworohera kugamburuka amabwirizwa ya Yehova. Hari aho vyoba ngombwa ko twita ku rutare kugira ngo tugume turi intahemuka. Nk’akarorero, hari abakirisu b’abirebange bipfuza kwubaka izabo, mugabo bakaba batararonka uwo bubakana abereye mu basavyi ba Yehova. (1 Kor. 7:39) Mushiki wacu w’umwirebange yoshobora kubona ko abo bakorana batemera bama bagerageza kumumenyekanisha ku muntu boshobora kwubakana. Uwo mushiki wacu yoshobora kuba yishwe n’irungu. Naho ari ukwo, aragira utwigoro dukomeye kugira ngo agumane ugutungana kwiwe imbere ya Yehova. Ntidukenguruka none bene ubwo burorero budasanzwe bw’ukudahemuka? Nta gukeka ko Yehova azoha impera abantu bose baguma ari abizigirwa kuri we naho baba bari mu ngorane.—Heb. 11:6.

YEHOVA ARABABARIRA

11. Kubabarira bisobanura iki?

¹¹ Imwe muri kamere z’igikundiro kuruta izindi zose Yehova afise, ni ukuba yiteguriye kubabarira. Kubabarira bisobanura iki? Muri rusangi, bisobanura guharira uwagucumuyeko igihe hari imvo yumvikana yo kubigira. Ivyo ntibishaka kuvuga ko umuntu ababarira arenza uruho rw’amazi ku kibi canke ahakana ko cabaye. Ahubwo, ahitamwo kutabika inzika. Ivyanditswe vyigisha ko Yehova “[y]iteguriye kubabarira” abigaya vy’ukuri.—Zab. 86:5.

12. (a) Yehova ababarira gute? (b) Kuba ibicumuro vy’umuntu ‘bihanagurwa’ bisobanura iki?

¹² Yehova ababarira gute? Igihe Yehova ababariye, abigira “cane”; arababarira buhere kandi ntiyisubireko. (Yes. 55:7) Tumenya gute ko Yehova ababarira buhere? Rimbura amajambo adukura amazinda ari mu Vyakozwe 3:19. (Soma.) Intumwa Petero yahimirije abariko baramwumviriza ‘kwigaya no guhindukira.’ Igihe umucumuzi yigaye vy’ukuri, aricuza rwose ingendo yiwe mbi. Ariyemeza kandi kudasubira gukora ico gicumuro. (2 Kor. 7:10, 11) Vyongeye, ukwigaya nyakuri gutuma umucumuzi ‘ahindukira,’ agaheba ingendo yiwe mbi maze agakurikira ingendo ihimbara Imana. Iyo abariko barumviriza Petero bagaragaza ukwigaya nyakuri hari kuvamwo iki? Petero yavuze ko ibicumuro vyabo vyari gushobora ‘guhanagurwa.’ Iyo mvugo ivuye mw’ijambo ry’ikigiriki risobanura “gufuta, kuzimanganya.” Igihe rero Yehova ababariye, aribagira ikosa umuntu aba yakoze. Arababarira buhere.—Heb. 10:22; 1 Yoh. 1:7.

13. Aya majambo ngo “igicumuro cabo sinzosubira kucibuka” adukura amazinda ku biki?

¹³ Tumenya gute ko Yehova ababarira ubutisubirako? Rimbura ubuhanuzi bwa Yeremiya bwerekeye isezerano rishasha ryagiranywe n’abakirisu barobanuwe, rino rikaba rituma bishoboka ko abizera incungu bababarirwa vy’ukuri. (Soma Yeremiya 31:34.) Yehova avuga ati: “Nzobababarira ikosa ryabo, kandi igicumuro cabo sinzosubira kucibuka.” Yehova aradukura amazinda rero yuko igihe ababariye, atazokwigera aduhanira ivyo bicumuro muri kazoza. Ntagaruka ku bicumuro vyacu ngo aze arabitwagiriza canke ngo aze arabiduhanira. Ahubwo, Yehova arababarira ivyo bicumuro maze akabishira inyuma yiwe, ni ukuvuga ko ababarira ubutisubirako.—Rom. 4:7, 8.

14. Dushobora gute guhumurizwa no kuzirikana kuri kamere ya Yehova yo kubabarira? Tanga akarorero.

¹⁴ Turashobora guhumurizwa no kuzirikana kuri kamere ya Yehova yo kubabarira. Rimbura aka karorero. Mushiki wacu twise Elaine yarigeze gucibwa, hakaba haciye imyaka myinshi ivyo bibaye. Haciye imyaka itari mike, yaragarukanywe. Yiyemerera ati: “Naho nibwira nkongera nkabwira abandi yuko nemera yuko Yehova yambabariye, naguma niyumvamwo ko hari ukuntu yari kure yanje canke ko abandi bari hafi yiwe kundusha be n’uko babona ko atari umugani kuruta uko jewe namubona.” Ariko rero, Elaine yarahumurijwe no gusoma akongera akazirikana ku mvugo ngereranyo zimwezimwe Bibiliya ikoresha mu kudondora kamere ya Yehova y’ukubabarira. Elaine yongerako ati: “Nariyumvisemwo urukundo n’ikibabarwe Yehova amfitiye mu buryo ntari bwigere ndabitahura.” Yarakozwe ku mutima canecane n’iki ciyumviro kigira giti: “Mu gihe Yehova aduhariye ivyaha, ntidukwiye kwiyumvamwo yuko dufise ikirabagu ca mwene ivyo vyaha mu gihe dusigaje kubaho.”b Elaine avuga ati: “Naratahuye ko ntari naremeye ko Yehova ashobora kumbabarira bimwe bishitse, kandi niyumvira ko nokwiremetse uwo muzigo mu gihe cose nari nsigaje kubaho. Ndazi ko bizofata igihe, mugabo ndatanguye kwiyumvamwo yuko nshobora vy’ukuri kurushiriza kwiyegereza Yehova, kandi ndiyumvamwo ko naremuruwe umutwaro.” Mbega Imana y’inyarukundo kandi ibabarira dukorera!—Zab. 103:9.

TWIGANE KAMERE YA YEHOVA Y’UKUBABARIRA

15. Dushobora gute kwigana kamere ya Yehova yo kubabarira?

¹⁵ Turashobora kwigana kamere ya Yehova y’ukubabarira mu guhitamwo kubabarirana igihe cose hari imvo yumvikana yo kubigira. (Soma Luka 17:3, 4.) Uribuka ko igihe Yehova ababariye, yibagira ibicumuro vyacu mu buryo bw’uko atabiduhanira mu nyuma. Igihe tubabariye abandi, na twebwe nyene turashobora kwibagira mu gushira iyo ngorane inyuma yacu no mu kudasubira kuyivyura muri kazoza.

16. (a) Kubabarira vyoba bisobanura ko turenza uruho rw’amazi ku bibi canke tukareka abandi bakaturenganya? Sigura. (b) Kugira ngo Imana itubabarire dutegerezwa gukora iki?

¹⁶ Kubabarira ntibisobanura yuko turenza uruho rw’amazi ku bibi canke ko tureka abandi bakaturenganya. Muri rusangi bisobanura ko duhitamwo kutabika inzika. Ariko rero kugira ngo Imana itubabarire, dutegerezwa kwigana kamere ya Yehova y’ukubabarira mu migenderanire tugiranira n’abandi. (Mat. 6:14, 15) Nakare, impuhwe ziratuma Yehova yibuka yuko “turi umukungugu.” (Zab. 103:14) Wumva none impuhwe zidakwiye vy’ukuri gutuma twirengagiza amakosa y’abandi, tukabababarira ata gahigihigi tubikuye ku mutima?—Ef. 4:32; Kol. 3:13.

17. Ni igiki codufasha mu gihe tubabajwe n’uwo dusangiye ukwemera?

¹⁷ Ariko ntiwumve, ntivyama vyoroshe kubabarira abandi. Mbere n’abakirisu bamwebamwe barobanuwe bo mu kinjana ca mbere biboneka ko vyabagora gutorera umuti ivyo batumvikanako. (Flp. 4:2) Ni igiki codufasha mu gihe tubabajwe n’uwo dusangiye ukwemera? Rimbura ivyerekeye Yobu. Yarababaye cane igihe abitwa ngo ni abagenzi biwe ari bo Elifazi, Biludadi na Zofari bamwagiriza ibintu bitagira ishingiro. (Yobu 10:1; 19:2) Yehova yahavuye akangira abo bantu bamwagiriza ibinyoma. Imana yabategetse kuja kuri Yobu bagashikana ikimazi ku bw’ibicumuro vyabo. (Yobu 42:7-9) Mugabo Yehova yarasavye kandi yuko Yobu agira ico akoze. Uti cari igiki? Yehova yategetse Yobu gusenga ku bw’abo bantu bari bamwagirije ibinyoma. Yobu yaragize ico kintu Yehova yari amusavye, Yehova na we aramuhezagira ku bw’ako gatima kiwe ko kubabarira abandi. (Soma Yobu 42:10, 12, 16, 17.) Ni icigwa ikihe tuhakura? Isengesho rivuye ku mutima dutura ku bw’umuntu yatugiriye nabi ryoshobora kudufasha kutabika inzika.

TUBANDANYE KURUSHIRIZA GUHA AGACIRO KAMERE ZA YEHOVA

18, 19. Twoshobora gute kubandanya kurushiriza guha agaciro kamere za Yehova z’igikundiro?

¹⁸ Nta gukeka ko twaruhuriwe no kurimbura kamere zitandukanye za Yehova ziranga urukundo. Twarabonye ko yegereka, atagira nkunzi, atanga, agira ibitegereka, ari intahemuka be n’uko ababarira. Ariko ntiwumve, twihweje nkeyi cane gusa. Turashobora kwironkera umunezero wo kurushiriza kwiga ivyerekeye Yehova ibihe bidahera. (Umus. 3:11) Turemera amajambo intumwa Paulo yanditse, ayagira ati: “Ewe bwimbike bw’ubutunzi n’ubukerebutsi n’ubumenyi vy’Imana,” tudasize inyuma urukundo na za kamere zitandatu twarimbuye.—Rom. 11:33.

¹⁹ Ese twese twobandanya kurushiriza guha agaciro kamere za Yehova z’igikundiro. Ivyo twobigira mu kumenya kamere ziwe, tukazizirikanako maze tukazigana mu buzima bwacu. (Ef. 5:1) Nitwabigenza gutyo, nta gukeka ko tuzorushiriza kwemera amajambo umwanditsi w’amazaburi yavuze, uwaririmvye ati: “Nayo jewe, kwegera Imana bimbera vyiza.”—Zab. 73:28.