Ingoro z’Ubwami Porogarama yo Kuzubaka Iratera Ija Imbere
1 Kw’Ihwaniro ry’Intara ryataziriwe ngo “Ubumwe bw’Ubwami” ryabaye mu 1983, muri Leta Zunze Ubumwe za Amerika haratangajwe yuko hoshinzwe ikigega kidasanzwe co gushigikira iyubakwa be n’isanurwa ry’Ingoro z’Ubwami zo hirya no hino muri Leta Zunze Ubumwe za Amerika no muri Kanada. Ico gihe ntitwari tuzi imihezagiro yovuye muri iyo ntango ntoya. Twaratanguye kwibonera mu buryo bushitse ico muri Zaburi 92:4 havuga mu buryo bubereye hati: “Kuko wewe Uhoraho, wannejereje kubg’igikorwa cawe wakoze: nzovugishwa impundu n’ibikorwa vy’intoke zawe.”
2 Ubu turanezerezwa cane n’ibiriko birarangurwa. Muri iki gihe, porogarama yihutirwa yo kwubaka Ingoro z’Ubwami kw’isi yose iriko irarangurwa. Mu buryo bunaka, twese turafise agateka ko kugira uruhara muri ico gikorwa. Ivyo tubigira mu gutanga intererano z’amahera, zaba ntoyi canke nini, kugira ngo zifashe mu vy’ukuronka amahera yo kwubaka ibindi bibanza vyo gusengeramwo hirya no hino kw’isi. Abavukanyi benshi kandi baratanga bavyishakiye ibikoresho vyabo be n’umwanya wabo, ububangukirwe bwabo be n’ubuhanga bwabo, kugira bikoreshwe mu bijanye n’amaporoje mwene ayo. Ukuroranirwa kw’iyo ndinganizo yose uko ingana tugukesha uburongozi bwa Yehova, ugushigikirwa na we, be n’ukuntu ahezagira cane utwigoro tugira dusenyera ku mugozi umwe.—Zab. 127:1.
3 Amashami menshi yarakurikije icitegererezo cashinzwe mu ntango mu mashengero yo muri Leta Zunze Ubumwe za Amerika. Mu bihugu vyinshi, usanga ku Ngoro z’Ubwami hariho agasandugu abamamaji bashiramwo intererano batanga ku bw’Ikigega Kigenewe Ingoro z’Ubwami. Muri Leta Zunze Ubumwe za Amerika, Igikorwa Dukorera Ubwami (mu Congereza) co muri Ntwarante 1997 caratangaje ihinduka ku bijanye n’iyo porogarama. Cavuze kiti: “Kuva aho Ikigega ca Sosiyete Kigenewe Ingoro z’Ubwami gishingiwe mu 1983, abavukanyi baratanze intererano batitangiriye itama, ivyo bituma hashobora gutangwa ingurane ku bw’iyubakwa ry’Ingoro z’Ubwami. Amashengero ashika ku 2.700 yo muri iki gihugu aramaze kwungukira kuri iyo ndinganizo. Ahandiho, amashengero atari make ntiyari gushobora kwubaka Ingoro z’Ubwami nshasha canke ngo asubiremwo izari zikeneye gusanurwa. Ubu birakenewe mu buryo bwihutirwa yuko zimwe muri izo ntererano zikoreshwa mu kuronsa ingurane amashengero ari mu bihugu usanga ivy’ubutunzi vyifashe nabi. Sosiyete be n’ayo mashengero yungukira ku ntererano mutanga, birakenguruka cane ukuntu mubandanya gufata mu mugongo iyo ndinganizo.”
4 Iryo tangazo ryabaye iribatera akamo ngo bagire uruhara muri porogarama yihutirwa yo kwubaka Ingoro z’Ubwami. Ico Kigega Kigenewe Ingoro z’Ubwami kirakoreshwa mu kwitwararika ivyo abavukanyi bacu bo mu bihugu vyose bakeneye. Muri Leta Zunze Ubumwe za Amerika, ikiganiro cakurikiye co mu nomero y’Igikorwa Dukorera Ubwami (mu Gifaransa) co muri Myandagaro 1997 cavuze giti: “Kwubaka Ingoro z’Ubwami kw’isi yose birabandanya gukenerwa. Mu mwaka w’umurimo uheze honyene, amashengero mashasha 3.288 yarashinzwe. Menshi muri ayo mashengero ari muri Afirika, Aziya, Amerika yo Hagati n’iy’Epfo be no mu Buraya bwo mu Buseruko.”
5 None kuva ico gihe vyavuyemwo iki? Igitabu c’Umwaka c’ 2001 (Annuaire 2001) catanze raporo igira iti: “Kubera iyo ndinganizo, gushika ubu mu bihugu 30 haramaze kurangizwa Ingoro z’Ubwami 453, kandi izindi 727 zikaba zikiriko zirubakwa. Twarashimitse cane ku vyo gushinga imigero y’Ingoro z’Ubwami yokurikizwa mu gihugu kimwekimwe cose, iyituma hakoreshwa ibikoresho biboneka aho hantu be n’ubuhinga bwo kwubaka buhuje na ho. Muri Kenya, hakoreshwa amabuye yo mw’ikariyeri; muri Togo bakunda gukoresha amatafari; muri Kameruni bakunda gukoresha amaborokosima baheza bagaterako iripu. Muri ubwo buryo, abavukanyi bo muri ivyo bihugu barashobora kuronka ningoga ubuhanga bukenewe kugira ngo barangure uruhara nyamukuru muri porogarama yo mu bihugu vyabo.”
6 Ikimenyamenya c’uko Yehova ahezagira iyo porogarama, turashobora kugisanga kuri ca gice c’isi kinini citwa Afirika. Uko utereza amaso ku mafoto ya zimwezimwe mu Ngoro z’Ubwami zubatswe, niwiyumvire ico mwene iryo yubakwa ryagize ku gikorwa c’Ivyabona vya Yehova! Ivyo ni ko biri mu mice itatu itandukanye: ubumwe burangwa mu kivukano cacu co kw’isi yose, ico bikora ku kibano c’aho hantu be n’iyongerekana ry’abitaba amakoraniro y’ishengero. Naho iyi nyongera ishimika ku Ngoro z’Ubwami zubatswe muri Afirika, izindi nomero z’Igikorwa Dukorera Ubwami zimirije zizoshimika ku kuntu porogarama yo kwubaka Ingoro z’Ubwami iriko itera ija imbere mu tundi turere two kw’isi.
[Pictures on page 3]
REPUBLIQUE CENTRAFRICAINE
Bimbo, Bangui
Begoua, Bangui
[Pictures on page 4]
Ukonga, Tanzaniya
[Picture on page 4]
Accra, Gana
[Picture on page 4]
Salala, Liberiya
[Picture on page 4]
Karoi, Zimbabwe
[Pictures on page 4, 5]
Allada, Bénin—Ingoro y’Ubwami ya kera
Allada, Bénin—Ingoro y’Ubwami nshasha
[Picture on page 5]
Kpeme, Togo
[Picture on page 5]
Sokodé, Togo
[Pictures on page 4, 5]
Fidjrosse, Bénin
[Picture on page 6]
Lyenga, Zambiya—Ingoro y’Ubwami ya kera
[Picture on page 6]
Lyenga, Zambiya—Ingoro y’Ubwami nshasha
[Picture on page 6]
Kinshasa, Kongo
[Picture on page 6]
Musambira, Rwanda