Zigama umuzirikanyi wawe
1. Iteraniro ry’umuzunguruko ry’umwaka w’umurimo wa 2013 rizoba rifise umutwe-shimikiro uvuga gute, kandi rizoba rigenewe iki?
1 Yezu yabwiye abigishwa biwe ngo bakunde Yehova n’umutima wabo wose, n’ubuzima bwabo bwose n’umuzirikanyi wabo wose. (Mat. 22:37, 38) Amahwaniro be n’amateraniro vyo muri uwu mwaka vyagenewe kudufasha gukomeza umuntu wacu w’imbere. Nk’uko uvyibuka, umutwe-shimikiro w’ihwaniro ry’intara ugira uti: ‘Zigama umutima wawe!’ Iteraniro ridasanzwe ry’umusi umwe ryo mu mwaka w’umurimo wa 2013 rizoba rifise umutwe-shimikiro uvuga ngo “Zigama ijwi ryawe ryo mu mutima.” Amateraniro y’umuzunguruko azotangurana n’ukwezi kuza na yo azoba afise umutwe-shimikiro ushingiye kuri Matayo 22:37 uvuga ngo “Zigama umuzirikanyi wawe.” Iryo teraniro ry’umuzunguruko rizoba rigenewe gufasha umwe wese muri twebwe gusuzuma ivyiyumviro vyiwe kugira ngo birushirize kuba ibihimbara Yehova.
2. Ni ibibazo ibihe tworonderera inyishu kw’iteraniro ry’umuzunguruko?
2 Ibizoshikirizwa: Igihe tuzoba turiko turatega yompi ibishikirizwa kw’iteraniro ry’umuzunguruko, tuzorondere inyishu z’ibi bibazo bizoba bihuye n’ivyiyumviro nyamukuru:
• Twokwirinda gute kwiyumvira ‘ivyiyumviro vy’abantu’?
• Twofasha gute mu bijanye no gukuraho icitwikiro gihuma imizirikanyi y’abatemera?
• Ni umutima bwoko ki twipfuza kugira?
• Ukuzirikana kubereye kutwungura iki?
• Ni gute tworeka Yehova ngo abumbabumbe ivyiyumviro vyacu?
• Abanega, abakenyezi, abavyeyi n’abana bokora iki ngo mu rugo habe agahimbare?
• Twokwitegurira gute umusi wa Yehova?
• Gutubika imizirikanyi yacu ku bw’igikorwa bisobanura iki?
• Abashira mu ngiro ivyo biga bavyungukirako gute?
3. Kubera iki bihambaye ko twokwitaba imisi yose y’iteraniro uko ari ibiri, tukumviriza twitonze tukongera tugashira mu ngiro ivyo tuzohigira?
3 Shetani ariko ararwana urugamba rwo kwigarurira imizirikanyi yacu kugira ayonone. (2 Kor. 11:3) Dutegerezwa rero gukingira imizirikanyi yacu no gucungera ivyiyumviro vyacu. Dukwiye kubandanya kugaragaza umuzirikanyi wa Kristu tukongera tukarwanya utwosho tw’iyi si ata co yibanga. (1 Kor. 2:16) Niwitegure rero kugira ngo mu misi ibiri iryo teraniro rizomara uzobe ari ho uri. Uze wumvirize witonze. Nitwashira mu ngiro inyigisho ihambaye tuzoharonkera bizodufasha gutubika imizirikanyi yacu kugira ngo turangurane umwete igikorwa c’Ubwami.—1 Pet. 1:13.