Inyishu ku bibazo vyanyu

◼ Ni ibiki abana bategerezwa kwiga kugira ngo bakure babe abahumuye mu vy’impwemu?

Abavyeyi bakirisu barakora vyinshi kugira ngo barere abana babo “mu kubatoza indero no mu kuyobora ivyiyumviro vyabo nk’uko Yehova yashinze.” (Ef. 6:4) Nk’akarorero, abavyeyi basanze ari ngirakamaro kurimburira hamwe n’abana babo icanditswe c’umusi buri gitondo. Mu gusenga kwo mu muryango canke mu bindi biringo imiryango yorabira hamwe ividewo ikongera ikayiganirako, yoganira ku mayagwa kanaka yo mu biganiro bivuga ngo Urwaruka ruribaza, yogira agakino gashingiye ku nkuru ivugwa muri Bibiliya canke ikagira udukino two kwimenyereza. Yamara, kugira ngo abana ‘batere baja imbere bagana ku buhumure,’ bategerezwa kandi kwigishwa ukuri kwimbitse kwo muri Bibiliya.​—Heb. 6:1.

Rimbura ivyo twigisha abantu duhura mu cibare. Igihe duhuye n’umuntu ari bwo bwa mbere canke igihe dusubiye kumugendera, muri rusangi turihatira gutanguza inyigisho ya Bibiliya dukoresheje igitabu Mu vy’ukuri Bibiliya yigisha iki? Turangije ico gitabu, duca twiga igitabu “Mwigumize mu rukundo rw’Imana.” Kubera iki? Igitabu Ivyo Bibiliya yigisha kiraronsa abatohoji ubumenyi bw’ishimikiro bwo mu Vyanditswe. Igitabu ‘Urukundo rw’Imana’ kirabigisha ukuntu boshira mu ngiro ingingo ngenderwako zo muri Bibiliya mu buzima bwabo bwa misi yose. Kwiga ivyo bitabu vyompi birafasha abashasha ‘gushinga imizi’ muri Kristu no ‘kutanyiganyiga mu kwizera.’ (Kol. 2:6, 7) None ivyo bitabu ntivyogirira akamaro n’abana bacu? Na bo nyene barakeneye kwiga ivyerekeye incungu, Ubwami be n’ukuntu abapfuye bamerewe. Abana kandi barakeneye kumenya igituma Imana ireka abantu bagashikirwa n’imibabaro be n’ibiranga imisi ya nyuma y’ivy’iyi si. Bategerezwa kujijuka ko Ivyabona vya Yehova ari bo bafise ukuri. Abana bakiri bato barakeneye kandi gutahura ingingo ngenderwako zo muri Bibiliya be n’ingene bomenyereza “ububasha bwabo bwo gutegera.” (Heb. 5:14) Ariko ntiwumve, abavyeyi barakwiye kurimbura imyaka abana babo bafise be n’urugero bagezako gutahura ibintu. Yamara, abana benshi usanga bafise ubushobozi bwo gutangura kwiga ukuri kwimbitse kwo muri Bibiliya mbere n’igihe baba bakiri bato cane.​—Luka 2:42, 46, 47.