1921 Imyaka 100 Irarangiye

UMUNARA W’INDERETSI wo ku wa 1 Nzero 1921, wabajije Abatohoji ba Bibiliya uti: “Ni igikorwa ikihe none duca tubona kiturindiriye muri uwu mwaka?” Uwo Munara wishuye ico kibazo mu gusubiramwo ibivugwa muri Yesaya 61:1, 2, ahabibukije igikorwa bashinzwe co kwamamaza inkuru nziza. Hagira hati: “Yehova yandobanuje amavuta kugira ngo mbwire inkuru nziza abatekereza. [Yantumye] . . . gutangaza umwaka w’ubutoni wa Yehova be n’umusi w’ukwihora w’Imana yacu.”

ABAMAMAJI B’UMUTIMA RUGABO

Kugira ngo Abatohoji ba Bibiliya barangure ico gikorwa, bokeneye kugira umutima rugabo. Bomenyesheje “inkuru nziza” abatekereza, abanyakibi na bo bakabamenyesha “umusi w’ukwihora.”

Umuvukanyi yitwa John Henry Hoskin yaba muri Kanada, yaramamaje n’umutima rugabo n’igihe ibintu bitari vyoroshe. Mu mpeshi yo mu 1921, yarahuye n’umuvugabutumwa umwe w’umumetodiste. Umuvukanyi Hoskin yatanguje ikiganiro avuga ati: “Turashobora kuyaga ku Vyanditswe duhuza, ariko naho hari ivyo tudahurizako, twokwiyemeza kuza gutandukana mu mahoro nk’abagenzi.” Ariko si ko vyahavuye bigenda. Umuvukanyi Hoskin avuga ati: “Tumaze kuganira iminota mikeya gusa, uwo muvugabutumwa yaciye akubita umuryango n’inguvu ku buryo nibajije ko ikiyo cawo kimenetse.”

Wa muvugabutumwa yaciye avuga akankama ati: “Kubera iki mutoja kwigisha abapagani?” Umuvukanyi Hoskin yarinumiye, ariko bavanye Hoskin yagiye ariyumvira ati: ‘Nawe mbona ata ho mutandukaniye na bo!’

Mu nyigisho uwo muvugabutumwa yigishije ku rusengero iwabo ku musi ukurikira, yarabandanije kuvuga nabi Hoskin. Umuvukanyi Hoskin agira ati: “Yabwiye abayoboke biwe ko bonyirinda, ababwira ko ari je nari umubeshi karuhariwe yaje muri ico gisagara, be n’uko nari nkwiye kuraswa.” Aho guca atekerwa n’ubwoba, Hoskin yarabandanije kwamamaza kandi yararoraniwe. Avuga ati: “Sinari bwigere ndyoherwa no kwamamaza ukuraho. Hari mbere n’abambwira ngo ‘turazi ko uri umuntu w’Imana,’ bagaca bambaza nimba bomfasha kugira ngo ntihagire ico mbura.”

KWIYIGISHA NO KWIGISHA UMURYANGO

Kugira ngo Abatohoji ba Bibiliya bafashe abashimishijwe gutera imbere, barasohoye porogarama zo kwiga Bibiliya mu kinyamakuru Ikiringo c’agakura.a Ibiganiro vyari bigenewe abakiri bato, vyari bigizwe n’ibibazo abavyeyi barimburira hamwe n’abana babo. Abavyeyi “barabaza ivyo bibazo abana babo, bagaca babafasha gutora inyishu muri Bibiliya.” Ibibazo bimwebimwe nk’iki ngo “Bibiliya igizwe n’ibitabu bingahe?,” vyaratuma abana bamenya ibintu bimwebimwe vy’ishimikiro vyo muri Bibiliya. Ibindi na vyo nk’iki cabaza ngo “Abakirisu b’ukuri bose boba bakwiye kwitega uruhamo?,” vyarategura abakiri bato kwamamaza badatinya.

Hari hariho n’ibiganiro vyari bigenewe Abatohoji ba Bibiliya bari bamaze kumenya utuntu n’utundi, bikaba vyari vyerekeye umugambi Imana ifitiye abantu. Vyarimwo ibibazo vyatuma bazirikana, bikaba vyari bishingiye ku gitabu ca mbere co muri rwa rukurikirane rw’ibitabu Études des Écritures (Ukwiga Ivyanditswe). Abasomyi ibihumbi n’ibihumbi barungukiye kuri ivyo vyigwa, ariko ikinyamakuru Ikiringo c’agakura co ku wa 21 Kigarama 1921, caramenyesheje ko ivyo biganiro vyose bitosubiye gusohoka. None ni kubera iki ibintu vyahindutse bukwi na bukwi?

IGITABU GISHASHA

Igitabu *Inanga y’Imana*

Agakarata kerekana aho gusoma

Udukarata turiko ibibazo

Abari bayoboye igikorwa barabonye ko Abatohoji ba Bibiliya bashasha, bari bakeneye kwiga ukuri kw’ishimikiro mu buryo buri ku rutonde. Ku bw’ivyo, muri Munyonyo 1921, baciye basohora igitabu Inanga y’Imana. Abashimishwa bakakira ico gitabu, barashirwa no ku rutonde rw’abakurikirana ivyigwa vyo kwiyigisha. Ivyo vyigwa vyarafasha abasomyi gutahura “umugambi Imana ifise wo kuronsa abantu ubuzima budahera.” None vyari bitunganijwe gute?

Igihe umuntu yaba yakiriye ico gitabu, baca bamuha agakarata kamwereka igice yosoma muri ico gitabu. Ku ndwi ikurikira, baca bamuha agakarata kariko ibibazo bishingiye ku vyo yaba yasomye. Mu mpera z’ako gakarata, baca bamwereka ikindi gice azosoma mu ndwi ikurikira.

Mu kiringo c’indwi 12, buri ndwi ishengero ryama rirungikira uwo mutohoji agakarata gashasha. Akenshi utwo dukarata twarungikwa n’ababa bitereye mu myaka, canke ababa batagishoboye kuja ku nzu n’inzu. Nk’akarorero, mushiki wacu yitwa Anna Gardner wo muri Millvale, i Pensilivaniya, muri Leta Zunze Ubumwe za Amerika, avuga ati: “Igihe igitabu Inanga y’Imana casohoka, vyarahaye akaryo mwenewacu Thayle atari agishoboye kugendagenda, ko kugira vyinshi akoze mu kwama arungika udukarata tw’ibibazo buri ndwi.” Igihe umutohoji yaba arangije ivyo vyigwa, baramugendera i muhira kugira ngo bamufashe gutahura vyinshi ku vyerekeye Bibiliya.

Thayle Gardner yicaye mu gakinga k’abamugaye

IGIKORWA CARI KIKIRIHO

Mu mpera z’uwo mwaka, umuvukanyi Joseph Rutherford yararungikiye ikete amashengero yose. Yavuze ko “igikorwa co gushingira intahe Ubwami muri uwo mwaka cashitse kure cane, congera kivamwo ivyiza vyinshi kurusha uwundi mwaka uwo ari wo wose w’ikiringo c’iyimbura.” Atereje amaso imbere, yongeyeko ati: “Turacafise vyinshi vyo gukora. Nimutere intege abandi bifatanye natwe muri iki gikorwa cahezagiwe.” Biragaragara ko Abatohoji ba Bibiliya bafashe nka nkama iyo mpanuro. Mu 1922, baratangaje Ubwami babigiranye umutima rugabo ku rugero rutari bwigere ruboneka.

Abagenzi badatinya

Abatohoji ba Bibiliya baragaragaje urukundo rwa kivukanyi mu gufashanya. Nk’uko inkuru ikurikira ivyerekana, barabaye abagenzi badatinya “[ba]vukiye kuhaseruka mu gihe c’amarushwa.”—Imig. 17:17.

Ku wa kabiri, itariki ya 31 Rusama mu 1921 ni ho i Tulsa muri Oklahoma muri Leta Zunze Ubumwe za Amerika, haduka ubwicanyi bushingiye ku bwoko, inyuma y’aho umugabo w’umwirabure aterewe mw’ibohero yagirizwa ko yakubise umugore w’umuzungu. Igihe umugwi w’abagabo b’abazungu barenga 1.000 watana mu mitwe n’akagwi gatoyi k’abirabure, ubwo nyene iyo ntambara yaciye ikwiragira mu karere kabamwo abirabure ko hafi y’aho kitwa Greenwood. Inzu n’amaduka birenga 1.400 vyarasahuwe vyongera biraturirwa. Raporo yavuze ko hishwe abantu 36, ariko mu vy’ukuri hashobora kuba hapfuye abantu amajana.

Umuvukanyi Richard Hill, akaba yari Umutohoji wa Bibiliya w’umwirabure yaba i Greenwood, yariganye ivyabaye ati: “Muri iryo joro ryabayemwo imishamirano twari mw’ikoraniro nk’uko twari dusanzwe tubigira. Ikoraniro riheze twarumvise inkoho zivugira mu gisagara. Twagiye kuryama zikiriko ziravuga.” Ku wa gatatu mu gitondo, itariki 1 Ruheshi ibintu vyarunyutse. Abandanya ati: “Hari abantu baje batubwira ko nimba twipfuza gukingirwa, vyoba vyiza twihutiye kuja ku Ngoro y’amakoraniro ya leta.” Umuvukanyi Hill n’umugore wiwe hamwe n’abana babo batanu rero, baciye bahungira mu Ngoro y’amakoraniro y’i Tulsa. Ng’aho, hari abagabo n’abagore b’abirabure bashika nka 3.000 bari bacungerewe n’abasoda barungitswe gusubiza ibintu mu buryo.

Nko muri ico kiringo nyene, umuvukanyi w’umuzungu yitwa Arthur Claus, yarakoze ikintu kiranga umutima rugabo. Yavuze ati: “Igihe numva ko imishamirano yariko iraba muri Greenwood hose, basahura bongera baturira amazu, naciye nja kuraba umugenzi wanje, umuvukanyi Hill.”

Arthur Claus yarigishije abana 14 akoresheje igitabu Inanga y’Imana

Ashitse ku muhana w’umuvukanyi Hill yahasanze umubanyi w’umuzungu afise inkoho. Uwo mubanyi, akaba kandi yari n’umugenzi w’umuvukanyi Hill, yibajije ko Arthur na we yari muri abo bari bagumutse. Yaciye amukankamira ati: “Uje gukora iki ng’aha?”

Arthur avuga ati: “Iyo ntamuha inyishu itomoye yari guca andasa. Naramuhumurije ko nari umugenzi w’umuvukanyi Hill, kandi ko nama nza iwe kenshi.” Arthur n’uwo mubanyi barashoboye gukingira urugo rw’uwo muvukanyi kugira ntihagire abarusahura.

Bidatevye, Arthur yaramenye ko umuvukanyi Hill n’umuryango wiwe bari bahungiye ku Ngoro y’amakoraniro. Arthur bamubwiye ko abirabure badashobora kuva muri ico kibanza badafise uruhusha rwateweko umukono na jenerali Barrett, uwari abijejwe. Arthur yavuze ati: “Kugira ushikire uwo mujenerali vyari bigoye cane. Igihe namubwira icipfuzo canje, yaciye ambaza ati: ‘Uzoshobora gukingira uwo muryango wongere ubaronse ivyo bakenera?’ Naciye ndavyemera n’akamwemwe kenshi.”

Arthur amaze kuronka urwo ruhusha, yaciye yihutira kuja ku Ngoro y’amakoraniro. Yararweretse umukuru w’abasoda bari bahacunze na we aca aratangara ati: “Basha ni jenerali nyene yarusinye! Urazi ko ari we wa mbere ukuye umuntu muri iki kibanza uyu musi?” Bidatevye, umuvukanyi Hill n’umuryango wiwe baciye babahamagara. Bose baciye binjira mu muduga wa Arthur maze arabatahana i muhira.

Umuvukanyi Arthur yaritwararitse gukingira umuvukanyi Hill n’umuryango wiwe. Kuba yarakingiye abavukanyi biwe adatinya, vyaragize ico bikoze ku bandi. Arthur yavuze ati: “Wa mubanyi yamfasha gukingira urugo rwa Hill, yararushirije kwubaha Ivyabona vya Yehova. Vyongeye, abatari bake barashimishijwe n’ubutumwa bw’Ubwami kubera ko biboneye yuko abasavyi b’Imana badatandukanywa n’ivy’amoko, kandi ko twese abasavyi b’Imana tungana.”

a Ikinyamakuru Ikiringo c’agakura cahavuye citwa Uruhoza (Consolation) mu 1937, mu 1946 na ho citwa Be maso!