1 | Gusenga—“Muterere amaganya yanyu yose kuri yo”

BIBILIYA IVUGA ITI: “Muterere amaganya yanyu yose ku [Mana], kuko ibababara.”—1 PETERO 5:7.

Ico bisobanura

Yehova Imana adusaba kumubwira ikintu cose kiduhagaritse umutima. (Zaburi 55:22) Nta ngorane n’imwe tutoshira mw’isengesho, yaba nini canke ntoya. Ikituraje ishinga, na Yehova kiba kimuraje ishinga. Tumusenze tuba duteye intambwe ihambaye ituma turonka amahoro yo mu mutima.—Abafilipi 4:6, 7.

Ingene bishobora kudufasha

Igihe dufise ingorane zo mu mutwe, twoshobora kwumva ko turi twenyene. Abandi ntibama batahura neza ivyo tuba turiko turacamwo. (Imigani 14:10) Ariko iyo twituye Imana tukayibwira ingene twiyumva, yama itwumviriza yitonze kandi ikadutahura. Yehova aratubona, arazi ingorane ziriko ziradushikira, akaba rero yipfuza ko tumusenga tukamubwira ikintu cose kituraje ishinga.—2 Ngoma 6:29, 30.

Kwitura Yehova mw’isengesho biratuma turushiriza kwizigira ko atwitwararika. Turashobora kwiyumva nk’umwanditsi umwe w’amazaburi, uwasenze ati: “Wabonye amarushwa yanje; wamenye amagorwa y’umutima wanje.” (Zaburi 31:7) Kumenya gusa ko Yehova abona ivyo turiko turacamwo birashobora kudufasha kwihanganira ibihe bigoye turimwo. Ariko rero ntagarukira ku kubibona gusa. Aratahura kuruta uwo ari we wese ivyo turiko turacamwo akongera akadufasha kuronkera uruhoza n’indemesho muri Bibiliya.

Ingene Bibiliya iriko irafasha Julian

Ingene indwara yo guhagarika umutima ingirako ingaruka

“Ndwaye indwara yo guhagarika umutima be n’iyituma mpungabana cane mu bwenge. Ivyo guhagarika umutima bimfata giturumbuka. Mu mwanya umwe usanga meze neza, mu wundi na ho ngahagarika umutima birenze ata mvo iboneka bivuyeko. Iyo ndi kumwe n’abandi ni ho canecane mpagarika umutima cane. Ndarazwa ishinga n’ukuntu banyiyumvira.

“Abazi ingorane mfise baranshigikira cane. Birashika bakavuga ibintu bitandemesha. Naho ari ukwo, ndakenguruka akigoro bagira kugira bamfashe.

“Rimwe na rimwe, ukwo guhagarika umutima be n’iyo ndwara impungabanya mu bwenge, biratuma gusenga bimbera urugamba. Bisaba akigoro gakomeye kugira ngo ntekane mu bwenge maze niture Yehova mw’isengesho. Ubwenge bwanje buguma buva kuri iki buja ku kindi, ku buryo akenshi mbura ico mfata n’ico ndeka. Iyo ubwenge butari hamwe, bica bingora kubwira Yehova uko numva merewe.”

Ingene Bibiliya imfasha

“Mfatiye ku vyo nize muri Bibiliya, narabonye ko atari ngombwa ngo amasengesho abe maremare canke ayahinyanyuye kugira ngo yemerwe n’Imana. Rimwe na rimwe, igihe ntashobora guserura ingene niyumva, nca nsenga gusa mvuga nti: ‘Yehova, ndakwinginze umfashe.’ N’ico gihe, ndabona ko Yehova antahura kandi akandonsa ivyo mba nkeneye muri uwo mwanya nyene. Uretse ugusenga, naragiye no kwivuza. Ndahimbarwa no kubona ingene ivyo bintu bibiri bimfasha kwumva ko merewe neza. Naho kwiyegereza Umuvyeyi wacu wo mw’ijuru ngo amfashe bisaba akigoro, ndabikora kuko nzi ko yipfuza kumfasha.”