Niwamamaze inkuru nziza n’umwete nka Yezu

1. Kimwe mu bituma abasavyi ba Yehova baba abatandukanye n’abiyita abakirisu ni ikihe?

KIMWE mu bintu bituma abasavyi ba Yehova baba abatandukanye n’abiyita abakirisu, ni umwetea bafise mu kwamamaza. (Tito 2:14) Ariko rimwe na rimwe, vyoshika ukumva ko ata morare ufitiye igikorwa co kwamamaza. Kumbure uhora wiyumva nk’umukurambere umwe afise vyinshi akora, uwavuze ati: «Hari igihe numva umenga sinoja kuvuga inkuru nziza.»

2. Ni ibiki vyoshobora gutuma tutamamaza inkuru nziza tubigiranye umwete?

² Turashobora kugira uruhara mu yindi mice y’igikorwa ceranda turyohewe cane, ariko ntibigende gutyo mu gikorwa co kwamamaza. None biva ku ki? Mu bisanzwe, nk’igihe tugize uruhara mu gikorwa co kwubaka no kubungabunga inyubakwa z’Ubwami, gufasha abashikiwe n’ivyago vy’ivyaduka canke kuremesha abavukanyi bacu, twoshobora guca twibonera ivyiza ubwo nyene kandi tukumva ko hari ico twashitseko. Iyo turiko turakorana n’abavukanyi bacu, usanga dukorana mu mahoro no mu rukundo, kandi tuba tuzi ko bakenguruka ivyo tubakorera. Ariko ku rundi ruhande, twoshobora kuba tumaze imyaka myinshi twamamaza mu karere kanaka, mugabo abantu bari ku rushi akaba ari bo bumviriza inkuru nziza, abandi na bo ntibayerekwe. Turazi kandi ko uko iherezo ryegereza, ariko abantu barushiriza kurwanya ubutumwa twamamaza. (Mat. 10:22) Ni ibiki none vyodufasha kugumana umwete mu gikorwa co kwamamaza inkuru nziza, canke mbere tukawongereza?

3. Ikigereranyo dusanga muri Luka 13:​6-9 cerekana gute umwete wa Yezu?

³ Kwihweza akarorero ka Yezu birashobora kugira ico bitwigishije ku bijanye no kugira umwete mu ndimiro. Igihe Yezu yari kw’isi, yagumye yamamaza abigiranye umwete. Nkako, uko igihe carengana ni ko yaguma yongereza umwete. (Soma Luka 13:​6-9.) Nka kumwe nyene wa mugabo yakorera mu mirima y’imizabibu yamara imyaka itatu agerageza kwitwararika igiti c’umusukoni ariko nticame ikintu na kimwe, ni ko na Yezu yamaze nk’imyaka itatu abwira inkuru nziza Abayuda ariko benshi ntibamwumvirize. Yamara, cokimwe na wa mugabo ataciye ata icizere ku bijanye n’ico giti c’umusukoni, ni ko na Yezu ataciye ata icizere ku bijanye n’abo bantu, canke ngo agabanye umwete mu gikorwa ciwe co kwamamaza. Ahubwo riho, yararushirije kugira akigoro kugira abakore ku mutima.

4. Tugiye kwihweza ibintu bine ibihe twigira ku karorero ka Yezu?

⁴ Muri iki kiganiro, turihweza ingene Yezu yagaragaje umwete, canecane mu mezi atandatu ya nyuma yamaze ariko ararangura igikorwa yashinzwe. (Luka 10:1) Kugira ico twigiye ku vyo yigishije kandi tukamwigana, birashobora kudufasha kugumana umwete. Reka turimbure ibintu bine twigira ku karorero ka Yezu: (1) Yashira imbere ivyo Yehova agomba, (2) yarisunga ubuhanuzi, (3) yariheka kuri Yehova ngo amufashe, (4) yagumye yizigiye ko hogize abamwumviriza.

YASHIRA IMBERE IVYO YEHOVA AGOMBA

5. Yezu yerekanye gute ko yashira imbere gukora ivyo Imana igomba?

⁵ Yezu yaramamaza «inkuru nziza y’Ubwami» abigiranye umwete, kuko yari azi ko ari vyo Imana yagomba ko akora. (Luka 4:43) Igikorwa co kwamamaza ni co Yezu yashira imbere mu buzima bwiwe. Mbere n’igihe yariko arasozera igikorwa ciwe ng’aha kw’isi, yagenda arigisha «ava mu gisagara aja mu kindi no mu kigwati aja mu kindi.» (Luka 13:22) Yaramenyereje mbere n’abandi bigishwa gukora ico gikorwa.—Luka 10:1.

6. Igikorwa co kwamamaza gifitaniye isano gute n’ibindi bikorwa vyose twoshingwa? (Raba n’ifoto.)

⁶ No muri kino gihe, kwamamaza inkuru nziza ni co gikorwa nyamukuru Yehova na Yezu bipfuza ko dukora. (Mat. 24:14; 28:​19, 20) Ico gikorwa kirafitaniye isano rya hafi cane n’ibindi bikorwa twoshingwa mu murimo wa Yehova. Nk’akarorero, twubaka Ingoro z’Ubwami kugira ngo abo tubwira inkuru nziza baronke aho basengera Yehova. Ibikorwa birangurirwa kuri Beteli na vyo nyene, bigenewe gushigikira igikorwa co mu ndimiro. Dufasha abavukanyi bacu baba bashikiwe n’ivyago vy’ivyaduka, atari gusa kugira tubaronse ibintu vy’umubiri baba bakeneye, ariko kugira tubafashe no gusubirana urutonde rwabo rwo mu vy’impwemu, harimwo no kwamamaza. Dutahuye ko ico gikorwa co kwamamaza gihambaye cane, tukongera tukibuka ko ari co Yehova yipfuza ko dushira imbere mu buzima bwacu, bica bituvyurira umutima wo kwama tukigiramwo uruhara. Umukurambere umwe yitwa János wo muri Hongiriya, avuga ati: «Nama ngumiza mu bwenge ko ata kindi gikorwa dushinzwe mu murimo wa Yehova coza gisubirira igikorwa co kwamamaza, kuko ari co gikorwa nyamukuru twashinzwe.»

7. Kubera iki Yehova yipfuza ko tuguma twamamaza? (1 Timoteyo 2:​3, 4)

⁷ Kubona abantu nk’uko Yehova ababona, birashobora gutuma turushiriza kugira umwete mu ndimiro. Yipfuza ko abantu benshi bashoboka bumva inkuru nziza, kandi bakabaho bayisunga. (Soma 1 Timoteyo 2:​3, 4.) Ni co gituma Yehova atumenyereza kugira turushirize gukora ku mutima abo tubwira ubwo butumwa burokora ubuzima. Nk’akarorero, ka gatabu Nukunde abantu ubahindure abigishwa karimwo ivyiyumviro vyiza vyodufasha gutanguza ibiyago, dufise intumbero yo guhindura abantu abigishwa. Naho abantu batokwakira neza ubwo butumwa muri iki gihe, boshobora kuzoronka akaryo ko kubwakira neza imbere y’uko ya makuba akomeye arangira. Ivyo tubabwira muri iki gihe, hari aho wosanga ari vyo nyene bizobavyurira umutima wo kwakira inkuru nziza muri kazoza. Ariko ivyo bizoshoboka gusa nitwaguma twamamaza.

YAKORA YISUNZE UBUHANUZI

8. Kuba Yezu yari azi neza ico ubuhanuzi bwo muri Bibiliya bwavuga, vyatumye akoresha umwanya wiwe gute?

⁸ Yezu yaratahura ingene ubuhanuzi bwo muri Bibiliya bworangutse. Nk’akarorero, yari azi ko igikorwa ciwe ng’aha kw’isi comaze imyaka itatu n’igice gusa. (Dan. 9:​26, 27) Yari azi kandi ubuhanuzi bwavuga igihe yopfiriyeko be n’ingene yopfuye. (Luka 18:​31-34) Ubwo buhanuzi Yezu yari azi, bwatumye akoresha neza umwanya wiwe. Ivyo vyatumye yamamaza n’umwete kugira ngo arangize igikorwa yari yarashinzwe.

9. Gutahura ubuhanuzi bwo muri Bibiliya, bidufasha gute kwamamaza n’umwete?

⁹ Gutahura ubuhanuzi bwo muri Bibiliya, birashobora kudufasha kwamamaza n’umwete. Turazi yuko iyi si isigaje igihe gito. Turatahura yuko ibintu biriko biraba muri iki gihe be n’inyifato y’abantu, bihuye neza na neza n’ivyo Bibiliya yari yaravuze ko vyoranze imisi y’iherezo. Turibonera ingene ukunyinyana hagati y’intwaro nganzasi y’Abongereza n’Abanyamerika be n’Uburusiya hamwe n’ababushigikiye, biriko birashitsa ubuhanuzi buvuga ibijanye n’umwami wo mu bumanuko be n’uwo mu buraruko «mu gihe c’iherezo.» (Dan. 11:40) Turatahura kandi ko intwaro nganzasi y’Abongereza n’Abanyamerika ari yo igereranya ibirenge vya ca gishusho kivugwa muri Daniyeli 2:​43-45. Twisunze ubwo buhanuzi, turazi neza ko vuba cane Ubwami bw’Imana buzokuraho intwaro z’abana b’abantu. Ubwo buhanuzi bwose buratwereka ko tugeze kure mu misi y’iherezo, bigaca bituvyurira umutima wo kwamamaza tubona ko ibintu vyihutirwa.

10. Ni izindi mvo izihe zituma ubuhanuzi bwo muri Bibiliya butuvyurira umutima wo kwamamaza n’umwete?

¹⁰ Ubuhanuzi bwo muri Bibiliya burimwo kandi agakuru keza dushashaye kubwira abandi. Mushiki wacu umwe yitwa Carrie wo muri République dominicaine, avuga ati: «Nzirikanye ku bintu vyiza igitangaza Yehova adusezeranira muri kazoza, biramvyurira umutima wo kubwira abandi ukuri.» Yongerako ati: «Ndavye ingorane abantu barimwo muri iki gihe, nca mbona ko bakeneye kumenya ko iyo mihango iberekeye na bo nyene.» Ubuhanuzi bwo muri Bibiliya buraturemesha kubandanya twamamaza tuzi ko Yehova ari we ayoboye ico gikorwa. Mushiki wacu yitwa Leila wo muri Hongiriya, avuga ati: «Ibivugwa muri Yesaya 11:​6-9 biramvyurira umutima wo kubwira inkuru nziza mbere n’abantu mbona umenga ntiboyakira. Ndazi neza ko uwo ari we wese yohinduka abifashijwemwo na Yehova.» Umuvukanyi yitwa Christopher wo muri Zambiya, na we avuga ati: «Nk’uko bivugwa muri Mariko 13:10 inkuru nziza iriko iramamazwa kw’isi yose, kandi mbona ko ari agateka kugira uruhara mw’iranguka ry’ubwo buhanuzi.» Ni ubuhanuzi bwo muri Bibiliya ubuhe nawe bukuvyurira umutima wo kuguma wamamaza?

YARIHEKA KURI YEHOVA NGO AMUFASHE

11. Kubera iki Yezu yari akeneye kwiheka kuri Yehova kugira abandanye kwamamaza n’umwete? (Luka 12:​49, 53)

¹¹ Yezu yarihetse kuri Yehova kugira ngo amufashe kuguma yamamaza n’umwete. Naho Yezu yari umuntu yavugana ukwiyubara, yari azi ko inkuru nziza yotumye abantu bacanamwo, mbere no kuyirwanya bakayirwanya. (Soma Luka 12:​49, 53.) Indongozi z’amadini zaragerageje kenshi kwica Yezu zimuhora ico gikorwa co kwamamaza. (Yoh. 8:59; 10:​31, 39) Ariko Yezu yarabandanije kwamamaza, kuko yari azi ko Yehova yari kumwe na we. Yavuze ati: «[Sindi] jenyene. Data yandungitse ari kumwe nanje. . . . Ntiyantaye jenyene, kuko nama nkora ibimuhimbara.»—Yoh. 8:​16, 29.

12. Yezu yateguye gute abigishwa biwe kugira ngo bagume bamamaza n’igihe bohamwa?

¹² Yezu yaribukije abigishwa biwe kwiheka kuri Yehova kugira abafashe. Yarabahumurije kenshi ko Yehova yobafashije, mbere n’igihe bobaye bariko barahamwa. (Mat. 10:​18-20; Luka 12:​11, 12) Kuba yari azi ko bohamwe, vyatumye abasaba kwiyubara. (Mat. 10:16; Luka 10:3) Yaranabasavye kudahata abantu batoshimye kwumviriza inkuru nziza. (Luka 10:​10, 11) Vyongeye, bishitse bakabahama yabasavye guca bahunga. (Mat. 10:23) Naho Yezu yamamaza n’umwete akongera akizigira Yehova, ntiyashira ubuzima bwiwe mu kaga bidakenewe.—Yoh. 11:​53, 54.

13. Wokwemezwa n’iki ko Yehova azogufasha?

¹³ Uravye ingene baturwanya muri iki gihe, turakeneye gufashwa na Yehova kugira ngo tugume twamamaza n’umwete. (Ivyah. 12:17) None wokwemezwa n’iki ko Yehova azogufasha? Rimbura isengesho Yezu yatuye dusanga muri Yohani ikigabane ca 17. Yezu yasavye Yehova ko yorinda intumwa ziwe, kandi Yehova yarishuye iryo sengesho. Igitabu c’Ivyakozwe kirerekana ingene Yehova yafashije izo ntumwa kwamamaza n’umwete naho zariko zirahamwa. Muri iryo sengesho, Yezu yarasavye kandi Yehova ko yorinda abokwizeye bivuye ku nyigisho z’izo ntumwa. Muri abo na wewe urimwo. N’ubu Yehova aracabandanya kwishura iryo sengesho. Na wewe azogufasha nk’uko nyene yafashije izo ntumwa.—Yoh. 17:​11, 15, 20.

14. Twemezwa n’iki ko dushobora kuguma twamamaza n’umwete? (Raba n’ifoto.)

¹⁴ Uko iherezo ryegereza, birashobora kuzorushiriza kutatworohera kwamamaza n’umwete. Ariko rero, Yehova azodufasha kurangura ico gikorwa. (Luka 21:​12-15) Nka kumwe kwa Yezu n’intumwa ziwe, turareka abantu akaba ari bo bihitiramwo nimba botwumviriza, tukirinda no guhazuka na bo. Mbere no mu bihugu biburabuza igikorwa cacu, abavukanyi barabandanya kwamamaza inkuru nziza kubera ko biheka kuri Yehova, aho kwiheka ku nkomezi zabo. Nk’uko nyene Yehova yaronkeje ububasha abasavyi biwe bo mu kinjana ca mbere, ni ko no muri iki gihe aturonsa ububasha kugira ngo «igikorwa co kwamamaza inkuru nziza kirangurwe bimwe bishitse», nk’uko avyipfuza. (2 Tim. 4:17) Nitwiheka kuri Yehova, nta nkeka ko azodufasha kuguma twamamaza n’umwete.

YAGUMANA ICIZERE

15. Ni ibiki vyerekana ko Yezu yagumana icizere c’uko abantu bokwakiriye inkuru nziza?

¹⁵ Yezu yagumana icizere c’uko abantu bokwakiriye inkuru nziza. Ivyo vyaramufashije kuguma yamamaza n’umwete. Nk’akarorero, mu mpera z’umwaka wa 30, Yezu yarabonye ko abantu benshi bari bashashaye kwumviriza inkuru nziza, mbere aca abagereranya n’umurima weze ugeze kwimbura. (Yoh. 4:35) Haciye nk’umwaka, yabwiye abigishwa biwe ati: «Ivyimburwa ni vyinshi» (Mat. 9:​37, 38) Mu nyuma yarasubiye kugaruka kuri ico ciyumviro ati: «Ivyimburwa ni vyinshi . . . Nimwinginge rero uwujejwe iyimbura arungike abakozi mu vyimburwa vyiwe.» (Luka 10:2) Yezu yaguma yizigiye ko hobayeho abantu bakira inkuru nziza, kandi bayakiriye yaranezerwa.—Luka 10:21.

16. Ibigereranyo Yezu yatanze, vyerekanye gute ko igikorwa co kwamamaza covuyemwo ivyiza? (Luka 13:​18-21) (Raba n’ifoto.)

¹⁶ Yezu yarafashije abigishwa biwe kuguma babona ko ubutumwa bamamaza bwovuyemwo ivyiza, ivyo bikaba vyobafashije kugumana umwete muri ico gikorwa. Raba nk’akarorero ibigereranyo bibiri yatanze. (Soma Luka 13:​18-21.) Yezu yakoresheje akarorero k’agatete ka sinapi kugira yerekane ko ubutumwa bw’Ubwami bwovuyemwo iterambere ritangaje, kandi ko ata na kimwe cobujije ko riba. Ikigereranyo c’umwambiro na co, yagikoresheje kugira ngo yerekane ko ubutumwa bw’Ubwami bwokwiragiye cane mu bantu, bugatuma bagira amahinduka adashoka yibonekeza. Muri ubwo buryo, Yezu yarafashije abigishwa biwe kubona ko ubutumwa bamamaza bwovuyemwo ivyiza ata kabuza.

17. Ni imvo izihe zotuma tugumana icizere c’uko abantu bazokwakira inkuru nziza?

¹⁷ Tuzirikanye ingene muri iki gihe igikorwa co kwamamaza kiriko kirafasha abantu benshi hirya no hino kw’isi, biratuvyurira umutima wo kuguma twamamaza n’umwete. Buri mwaka, abantu amamiliyoni bashimishwa n’ukuri baritaba Icibutso kandi bakemera ko tubigisha Bibiliya. Abantu ibihumbi amajana barabatizwa, kandi bakifatanya natwe muri ico gikorwa co kwamamaza. Naho tutazi abasigaye kwakira inkuru nziza uko bangana, ico tuzi coco ni uko Yehova ariko aregeranya isinzi rinini ry’abantu bazorokoka ya makuba akomeye yimirije. (Ivyah. 7:​9, 14) Kubera ko Umukuru w’iyimbura akibona ko hariho abashobora kwakira ukuri, turakwiye rero kuguma twamamaza.

18. Twipfuza ko abandi batubona gute?

¹⁸ Abigishwa ba Yezu bamye barangwa n’umwete mu gikorwa co kwamamaza. Igihe abantu babona ingene intumwa zavuga inkuru nziza ata kurya umunwa, «[baciye] batahura yuko bahoze bagendana na Yezu.» (Ivyak. 4:13) Uko abantu batwihweza turiko turamamaza, ese bobona ko natwe twigana umwete wa Yezu.